Romanos 1
1
Spatjibal-o'tanil
1Jo'on Pabloon, yabaton te Jesucristoe. La yic'on ta jpuc-c'op, tsabilon ta swenta yalel te lec yach'il c'op yu'un te Diose.
2Ja' nix te lec yach'il c'op te albil sc'oplal yu'un Dios ta Xch'ul Sjun ta swenta te j'alwanejetic yu'une. 3Ja' bi ja' sc'oplal te Cajwaltic Jesucristo te ja' Snich'an Dios stuquel. Ja' sts'umbal te muc' ajwalil David#Mt 1.1; 12.23. ta swenta sbaq'uetal. 4Ja'uc me to, ac'ot ta ilel te ja' Snich'an Dios te yich'oj yu'ele, melel cha'cux tel ta bay animaetic ta swenta te Espiritue te ya xch'ulteswane. 5Ja' ta swenta te Jesucristo te ayotic ta c'uxtayel yu'un te Diose. Soc la yac'bonix cat'el ta jpuc-c'op, swenta yu'un jich me ya cac'bey xch'uunic Dios te ants-winiquetic ta spisil nacionetic. 6Jich bit'il te ja'exe, te ic'bilex yu'un uuc te Jesucristoe.
7Ya jpatbeyex awo'tanic ta apisilic te ayex ta lum Roma, te c'ux ya yaiyex ta yo'tan te Diose, soc te ic'bilex swenta ch'ul lum yu'un Dios ya xc'oex. Ayuc me yutsilal soc lamaluc me q'uinal ya awaiyic yu'un ta swenta te Jtatic Diose soc ta swenta te Cajwaltic Jesucristoe.
Te Pablo yo'tan ya yil te mach'atic ayic ta lum Roma
8Te bila sbabial ya cale ja' te ya calbey bayal wocol te Dios ta awentaic ta stojol te Jesucristoe, yu'un la caiyix stojol te bit'il ayix xch'uunjel awo'tanique, melel pujq'uemix ac'oplalic ta bayuc ta spamal balumilal. 9Melel te Diose, te jun nax co'tan cac'oj jba ta abatinel yu'un te ya calbey sc'oplal ta bayuc te Snich'ane, ja' testigo cu'un te spisil ora ya jna'ex te c'alal ya jc'opon te Diose. 10Spisil ora ayon ta yalel wocol ta stojol Dios te yacuc xtal quilexe, teme jich ya sc'an yo'tan, soc te lecuc ya xc'oon ta loq'uel te banti ayexe. 11Melel toyol co'tan te ya xtal quilexe, swenta yu'un jich me ya cac'beyex yip awo'tanic ta swenta te majt'anil yu'un te Espiritue, swenta yu'un ya me ataic xan stulanil awo'tanic a. 12Ja' ya cal te pajal me ya jech jmuc'tesbey jbatic q'uinal caiytic ta juju-jtul ta swenta te bit'il pajal ay xch'uunjel co'tanique.
13Quermanotac, ya calbeyex awaiyic te bayal buelta te c'an tal quilexe.#Hch 19.21. Ja'uc me to, ay bila la scomon te jujun bueltae. Te bila ay ta co'tane, ja' te ya caiy c'ajoj ta awolilic uuc, jich te bit'il la jpasix ta stojol te yantic jyanlumetique. 14Ay jbet ta stojol te griegoetique soc te mach'atic ma griegouque, soc ay jbet ta stojol te mach'atic ay sp'ijilique soc te mach'atic ma'yuc sp'ijilique. 15Jich yu'un te jo'one, toyol co'tan yu'un te yacuc xtal calbeyex uuc te lec yach'il c'op te jayebex ayex ta lum Romae.
Te yu'el te lec yach'il c'ope
16Melel ma xq'uexawon#Mr 8.38. yu'un te lec yach'il c'ope. Melel ja' ay yu'el yu'un te Diose,#1 Co 1.18. swenta yu'un jich ya xcolic spisil te mach'atic ya xch'uunique. Ja' neel te judioetique, soc uuc te jyanlumetique. 17Melel ya yal te lec yach'il c'ope te ja' toj ya x'ilot yu'un Dios te mach'a ay xch'uunjel yo'tane. Jich nix te bit'il ts'ibubil jilele: “Te mach'a toj ya x'ilot yu'un Dios ta swenta xch'uunjel yo'tane,#Hab 2.4. ja' me ya xcuxin yu'un”, te xie.
Te bila smulinejic te ants-winiquetique
18Melel te yilimba te Diose ya xchicnaj tel c'alal ta ch'ulchan ta stojolic te ants-winiquetic te ma xyich'ic ta muc' te Diose soc te ma stojiluc te bila ya spasique, soc te smacojic a te smelelil c'ope. 19Chican ta na'el yu'unic te bit'il ay te Diose, melel ya xju' ta na'beyel sba yu'unic a. Yu'un yac'ojix ta ilel ta jamal ta stojolic. 20Te c'alal la xchicnantes te balumilale, ja' ay ta na'el a te bit'il ay te Diose, manchuc teme ma chicanuc ta ilele. Ja' bi, ja' te bit'il sbajt'el q'uinal ay yu'ele soc te bit'il stalel Dios stuquele. Jich ma'yuc bila ya xju' ya smac sbaic ta c'op a. 21Jich sna'ojbeyic sba te Diose. Ja'uc me to, ma la sc'an yalbeyic yutsilal te bit'il ja' Dios stuquele soc ma sc'an yalbeyic wocol. Nojelix ta jowil c'op te yo'tanic, soc jc'axel ayic ta ijc' q'uinal.#Ef 4.17-18. 22Ya yalic te p'ij yo'tanic ta sc'opique, ja'uc me to, bol te yo'tanique. 23Jich la sc'atp'unbeyiquix#Sal 106.20; Jer 2.11. te yutsilal Dios te ma xlaj stuquele. Spasojic ta sloc'omba ants-winic te ma staleluc cuxule, soc sloc'ombail mutetic soc chambalametic soc chanetic.#Dt 4.16-18.
24Ja' swentail te ijq'uitayotic yu'un Dios ta spasel spisil te bila amene, te ya xbic'taj yo'tanic yu'un spasel. Jich ya spasic te bila q'uexlaltic sba te ya spas ta sbaq'uetalique. 25La sc'atp'unic te smelelil c'op yu'un te Diose; ja' la xch'uunic te lotil c'ope. Jich la yich'ic ta muc' soc la slajin sbaic ta stojol te bila pasbil yu'un te Diose. Ma ja'uc la slajin sbaic ta stojol te mach'a Jpaswaneje, te ja' ay ta ich'el ta muc' sbajt'el q'uinale. Jichuc.
26Ja' swentail te ijq'uitayotic yu'un Dios ta spasel spisil te bila q'uexlaltic nax sbae. Asta te antsetic yu'unique la yijq'uitayic te bit'il ay stalelique. Jich la spasic te bila ma sbelaluc ay ta pasel yu'unic ta swenta te sbaq'uetalique. 27Jich nix la spasic uuc te winiquetique. La yijq'uitayic te bit'il stalel ya sc'opon sbaic soc te yinamique. La sc'opon sbaic soc te mach'a pajal winic soque. Ma'yuc q'uexlal ta yo'tanic te sjoy sbaic ta winiquil te la sc'opon sbaique. Jich ya yich'ic castigo yu'un ta sbaq'uetalic te bit'il mero ilaybil sba te bila ya spasique.
28In te bit'il ma la sc'an sna'beyic sba ta melel te Diose, jich ijq'uitayotic yu'un Dios. Jich jowejic ta jyalel, ja' la spasic te bila ma jichuc ya sc'an pasele. 29Nojel ta yo'tanic spisil ta jchajp te bila ma lecuc ta pasele, ja' te yalel ta mulil, ixtajel, bic'tal-o'tanil, te bila amen, jex-o'tanil, milaw, jach-c'op, lo'laywanej soc bolteswanej, 30amen sc'oplal ya yalbey te yantique, jwalac'patiwanejetic, scontroinel Dios, jc'ajc'al-c'optaywanejetic, jtoyba-o'tanetic, jtoyba-c'opetic, ya sle ta yo'tanic muliletic, jc'axintay-mandaletic ta stojol te sme'-statique, 31jbol-o'tanetic, jchebal-o'tanetic, ma'yuc mach'a c'ux ya yaiy ta yo'tan, ma sna'ic spasel perdón, ma xc'uxtaywanic. 32Te mach'atic jich yat'elique, sna'ojic stojol ta lec te bit'il ay ich'el ta c'op yu'un te mulile. Soc sna'ojic stojol teme ya spasic in mulil to, ja' ya stojic ta lajel yu'un. Ja'uc me to, jich yacalic ta spasel spisil ora, soc bin nax yo'tanic yu'un te jich nix yacalic spasel uuc te yantique.
Currently Selected:
Romanos 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.