YouVersion Logo
Search Icon

Proverbios 1

1
Te bila swentail te p'ijil c'opetique
1P'ijil c'opetic yu'un Salomón#1 R 4.32; Pr 10.1; 25.1. te snich'an David, te muc' ajwalil yu'un Israel, 2yu'un ja' ay sc'oplal ta yo'tan
te ya yalbotic caiytic te p'ijil c'ope#Stg 1.5; 3.13-17. soc p'ijubtesel;
te ya scoltayotic ta sna'el swentail te bitic ya stabotic c'oel te co'tantique;
3te ya jtatic p'ijubtesel, soc te ya jtsajtay jbajtic,
soc te ya jpastic bila stojil, soc te ya jtatic toj-o'tanil, soc te ma xjowejotic ta c'op;
4soc te ya x'ac'bot sp'ijil yo'tanic te queremeticte ma'yuc bila sna'ojic, te ya yich' ac'beyel sp'ijil sjolic, soc ac'beyel snop ta yo'tanic
te bila t'ujbil ta pasele.
5Te mach'a ay sp'ijile, ya me xc'ot ta yo'tan.
Jich me ya yich' xan sp'ijil yo'tan soc ay me bi ya sna' xan yu'un:
6swenta sna'el swentail te bitic yalojic te mach'atic p'ijique,
soc te c'opetic yu'unic,
soc te bitic seña-c'op ya yalic,
soc te bila ya yalic te chujc'ul ta na'el sujt'ibe.
7Te xjajch'ibal te p'ijil-o'tanile,
ja' te yich'el ta muc' te Cajwaltique;#Job 28.28; Sal 111.10; Pr 9.10; 15.33.
te mach'atic ma sna'ic q'uinale
ya yilayic te p'ijil c'op soc te p'ijubtesele.
Tac'uyel ta stojol queremetic
8Jnich'an, aiybon me awaiy te p'ijubtesel cu'un te atatone,
soc ma me xach'aybey te tojtesel yu'un te ame'e.
9Melel jich me c'oem ta atojol te bit'il buen t'ujbil ach'alil,
jich me te bit'il t'ujbil ualil ta anuc',
soc jich me te bit'il corona#Pr 6.20-21. ta ajol.
10Jnich'an, teme ya sc'an ya slo'layat te jmulawiletic,
ma me xawac' slo'layat.#Sal 1.1.
11Teme jich ya yalbat:
“La', t'unawotic, ya jpastic pejts' ta swenta nax sc'anjel co'tantic,
swenta yu'un ya jmiltic mach'auc ch'ayal yo'tan ya xc'ax.
12Cuxul me ya jbic'tic c'oem te mach'atic lec yat'elique,
jich te bit'il ya xbic'ot yu'un lajel te mach'atic ya xch'ayic coel ta muquenal.
13Bayal me ta jchajp c'ulejaliletic ya jtatic tey a,
ya jnojestic ta puro elc'anbil biluquetic te jnatique.
14La' me, ya quiltic bi ya jtatic,
soc jun me jbiluctic ta jpisiltic ya xc'ootic”, teme xie,
15anan ta stojolic, jnich'an,
ma me xba at'un te be te amen st'unojique.
16Melel yac'ojic puersa ta spasel te bila amene;
sujoj sbaic ta smalel ch'ich'.#Is 59.7; Ro 3.15.
17Ay tojol ya xc'ot te ya yich' pasel pejts'
teme ju' yu'un ya yil te ja'mal mute.
18Yan te mach'atic jich ya spasique,
ja'ic nix ya spas spejts'ulic stuquelic;
jich quechel ta lajinel xcuxlejalic yu'un.
19Ja' me slajibic ya xc'ot te jbic'tal-o'tanetique,
melel ja' nix ya xlajinotic yu'un.
Ya yic'otic te p'ijil-o'tanil
20Ta calleetic soc ta banti ya stsob sbaic te lume,
te p'ijil-o'tanil ya yac' ta aiyel sc'op;
21ta ti'nailetic ya yal ta tulan te c'opetic yu'une,
soc ta banti bayal mach'atic ya stsob sbaique;#Pr 8.1-3.
jich ya yal:
22“Queremetic, te ma'yuc ap'ijilique,
te jlabanwanejex soc te ma x'ana'ic q'uinale,
¿jayeb xan ora te ya amulanic te bol-o'tanile,
soc te ya sbujts'naj awo'tanic yu'un te labanwanej,
soc te ya awilayic te p'ijilile?
23Aiybon awaiyic te tojtesel cu'une,
jo'on me ya calbeyex lequil consejo;
ya me cac'beyex ana'ic te bila ya yal te co'tane.
24Jo'on la quiq'uex tel, la calbeyexix,
pero te ja'exe ma x'ac'an ya awich'onic ta wenta.
25Ma ba la ach'uunic te tac'uyel cu'une;
ma x'ac'anic ya awich'bonic ta muc' te tojtesel cu'une.
26Ya me xc'ot ta jwenta stse'luyel te c'alal ya xjul ta atojolic te woclajele.
Ya me jlabanex te c'alal lajelexix yu'un xiwel ae,
27c'alal ya xtal ta atojolic bayal xiwel soc chujc'ul c'opetic,
mel-o'tan soc xc'uxul woclajel,
jich bit'il sutu-ic' te spisil ya slajine.
28“Te c'alal ya xc'ot sc'aalelal, ya me awic'onic,
pero ma ba ya jac'beyex;
ya aleonic, pero ma ba ya ataonic;
29melel ya awilayic te p'ijil c'ope,
soc ma x'ac'an ya awich'ic ta muc' te Cajwaltique.
30Ma x'ac'an te ya awich'bonic ta wenta te tac'uyel cu'une;
ya awilaybonic te tojtesel cu'une.
31C'ux obol me abaic yu'un swocolil te awat'elique;
tsobol me ya xjil ta atojolic te bila amen la anop ta awo'tanique.
32Te mach'atic ma'yuc bila sna'ojique,
ja' nix ya xmilotic yu'un te ma'yuc bila sna'oje;
ja' te mach'atic ma sna'ic q'uinale,
ja' nix ya xlajinotic yu'un te bila ma ba la yich'ic ta wenta.
33Pero te mach'a ya yaiybon te jc'ope,
jun me yo'tan ya xcuxin jujun c'aal;
ma ba ya xi' te bila amen ya xtal ta stojol stuquel”,
xi' te p'ijil-o'tanile.

Currently Selected:

Proverbios 1: TZOXCH

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy