Nehemías 1
1
Nehemías la sc'oponbey Dios slumal
1Ja' sc'oplal Nehemías in to te snich'an Hacalías.
Ayix jtab ja'wil yat'el ta muc' ajwalil a te Artajerjes,#Esd 4.7. ta u te Quisleu sbiile, te jo'on te Nehemias, ayon ta joyob ts'ajc'ubil centro yu'un te lum Susa a 2te c'ot te quermano Hanani. Sjoinej c'oel winiquetic jajch'ic tel ta Judá. Jich ora la jojc'obey te bi yilel te Jerusalén, soc te judioetic colic tel te ic'otic bael stuquelic. 3Jich la yalbonic:
—Te mach'atic sujt'emic loq'uel tel ta sq'uinal Babilonia, mero wocol ayic soc mero ayic ta q'uexlal. Jich nix te Jerusalén, jinbil te sjoyob ts'ajc'ule, soc chic'bil ta c'ajc' te spuertail te muc'ul ts'ajq'ue —xi'.
4C'alal la caiy te c'opetic in to, la jnajc'an jba, ochon ta oq'uel yu'un. Che'oxeb c'aal la jmel co'tan yu'un. La jcom jwe'el soc la jc'opon te Dios ta ch'ulchane. 5Jich la cal:
—Cajwal Dios ta ch'ulchan, te muc' Diosat soc te ayat ta xi'ele, te stalel ay awu'un te c'op chapal awu'une, soc te jun awo'tan ta stojolic te mach'atic c'uxat ta yo'tanique, te ya yaq'uic c'otuc ta pasel te mandaliletic awu'une, 6yo'tic ya calbat wocol te yacuc awich'bon ta wenta te jc'op te yacon ta yalel ta atojol ta c'aal ta ajc'ubal, ta swenta sna'beyel yo'bolil sbaic te abatetic awu'une, ja' te israeletique. Ya jna' ta lec te jtaoj jmultic ta atojol te jo'otic te israelotique. Asta te mach'atic ay cu'un soc te jo'one, jtaoj jmultic ta atojol. 7Mero amen la cac' jbajtic ta atojol. Ma ba cac'ojtic c'otuc ta pasel spisil te mandaliletic awu'une, te la awac'botic ta swenta te awabat Moisés. 8Na'a me te la awalbey te Moisés, teme ya jle jmultic ta atojole, ya me apucotic bael ta spamal te balumilale.#Lv 26.33; Dt 28.64. 9Pero teme ya sujt'otic ta atojole, soc teme ya cac'tic c'otuc ta pasel te mandaliletic awu'une, soc teme ya x'och jpastic xan spisil orae, melel awaloj te ya atsobotic tel tey a, soc awaloj te ya awac'otic xan tey ta banti tsabil awu'un te ch'ultesbil yu'un te abiile, manchuc me la quich'tic puquel bael c'alal ta xujc' sti'il te balumilale.#Dt 30.1-5.
10“Te jo'otique awabatotic, soc lumotic awu'un. Ta swenta smuc'ul yip awu'el soc ta swenta yu'el ac'ab, te la acoltayotic loq'uel ta lajele.#Dt 9.29. 11Ya calbat wocol jiche, Cajwal, te yacuc awich'bon ta wenta te jc'ope, soc te sc'opic te abatetic awu'une te yacalic ta yalel wocol ta atojol, te ja' nax bayal sc'oplal ta yo'tanic te ya x'ich'otat xan ta muq'ue. Soc ya jc'anbat te lecuc ya xc'oon ta stojol te muc' ajwalile, soc te yacuc atijbey yo'tan, te lecuc yo'tan ta jtojole —xoon ta sc'oponel Dios.
Currently Selected:
Nehemías 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.