Jonás 1
1
Jonás an loq'uel ta stojol Dios
1Te Jonás#2 R 14.25. snich'an Amitai c'oponot yu'un te Cajwaltique, jich albot:
2—Jajch'an ta beel, baan ta muc'ul lum Nínive. Albeya te ya jlajinix, scaj te toyix sc'oplal ta ch'ulchan te smulic ta jtojole#Nah 1.1; 3.1-19. —xi' sc'oplal yu'un te Cajwaltique.
3Pero te Jonás ma jichuc la spas. Loc' ta anel ta stojol Cajwaltic,#Sal 139.7,9-10. c'an bajt'uc ta Tarsis. Jich bajt' ta banti ya xloc' barcoetic ta Jope. Tey c'o sta jun barco a te baelix ta Tarsis. Jich la stoj spasaje ta ora. Och ta barco, bajt' te Jonase. Jich c'an loc'uc ta anel ta stojol te Cajwaltique.
4Pero te Cajwaltic la yac' jajch'uc tulan ic' ta yolil mar, mero buen tulan ic'. Jich yilel te bit'il jc'axel ya xlajix te barco. 5Jich te jtij-barcoetic jajch'ic ta buen xiwel. Juju-jtul jajch' sc'opon te dios yu'unique, soc la xch'ojic ochel ta ja' te ijc'atsiletic, swenta yu'un jich ma ba alix ya xjil a te barco.
Te Jonás coem bael ta yawil ijc'atsiletic, jun yo'tan ochem swayel tey a. 6Pero bajt' ta ilel yu'un te mach'a swentainej te jtij-barcoe, jich albot:
—¿Bistuc te jun awo'tan wayalate? Jajch'an ta ora, c'opona te Dios awu'une. Repente ya sna' yo'bolil jbajtic. Jich ma ba ya xlajotic —la yut.
7Te mach'atic ayic ta barco jich la yalbey sbaic:
—La', jpasbeytic snumeroil ta na'el mach'a ta smul te ay jwocoltique —xiic.
Jich la spasbeyic snumeroil ta na'el. Ja' c'ot ta swenta te Jonase. 8La yalbeyic:
—Ala caiytic bi swentail te talem te wocol ta jtojoltique. ¿Bi awat'el? ¿Bi swentail te talemate? ¿Banti jajch'emat tel? ¿Banti nacionil talemat? ¿Bi sbiil ats'umbal? —la yutic.
9La sjac' te Jonás:
—Te jo'one hebreoon. Ja' quich'oj ta muc' te Cajwaltic te Dios ta ch'ulchan, te la spas te mar soc te lumq'uinale —xi'. 10Soc la yal ta jamal te yac ta anel ta stojol te Cajwaltic. Te c'alal la yaiybeyic sc'op, soc te bit'il la yilic te mar te tulan yac ta ixlanel yu'un te iq'ue, te j'at'eletic ta barco xiw yo'tanic yu'un. 11Jich la yalbeyic:
—¿Bi yu'un jich la apas? ¿Bi ya sc'an ya awich' pasbeyel swenta yu'un jich ya xlamaj te mare? —la yutic.
12La sjac' te Jonase:
—Ja' lec ch'ojawonic ochel ta mar. Jich me ya xlamaj te mare. Melel jna'oj ta lec te jo'on ta jmul te talem ta atojolic te buen tulan ic' in to —xi' te Jonase.
13Te jtij-barcoetic la yaq'uic xan puersa ta stijel te barco, swenta yu'un ya xc'otic ta bay lumq'uinal, pero ma ba ju' yu'unic, scaj te mero tulan xan yac ta ixlanel te mare. 14Jich jajch' sc'oponic te Cajwaltique, jich la yalic:
—Cajwaltic, ma xawac' lajucotic ta swenta smul te winique. O teme ma'yuc smule, ma me xawac' jmulintic te bit'il ya xlaje. Melel te ja'at Cajwaltic, ja' chican bi ya smulan awo'tan ya apas —xiic.
15Te c'alal laj yo'tanic ta sc'oponel Dios, la stsaquic te Jonás, la xch'ojic ochel ta mar. Te c'alal jich la spasbeyique, ora lamaj c'axel te mare. 16Te c'alal la yilic te jtij-barcoetic te bila c'ot ta pasel, xiw yo'tanic yu'un. La yich'ic ta muc' te Cajwaltique. La yalic te ya yac'beyic milbil smajt'an, soc ay bi la yal ya spasbeyic xan ta stojol.
17Pero te Cajwaltic ay xchajbanejix jcojt' muc'ul chay te ya xbic'ot yu'un te Jonás. Oxeb c'aal soc oxeb ajc'ubal ay ta xch'ujt' te chaye.#Mt 12.40.
Currently Selected:
Jonás 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.