San Juan 11
11
Laj te Lázaroe
1Ay jtul winic te ay ta chamel te Lázaro sbiil te ay ta Betania. Ja' slumal te María soc uuc te xwixe ja' te Martae.#Lc 10.38-39. 2(Ja' in to, ja' te María te la smalbey perfume te yacan te Cajwaltique soc te la scusbey yacan ta stsotsil sjole.#Jn 12.3. Ja' yijts'in te ay ta chamele.) 3Jich yu'un te cheb antsetique la sticunic ta alel ta stojol te Jesuse, jich la yalic bael:
—Cajwal, ay ta chamel te mach'a c'ux ta awo'tane —xiic bael.
4C'alal la yaiy stojol te Jesuse, jich la yal:
—Ja' in chamel to ma swentauc lajel. Swenta yu'un ya x'ac'ot ta ilel yutsilal a te Diose, soc swenta yu'un ya x'ac'ot ta ilel yutsilal uuc te Snich'ane —xi' te Jesuse.
5Bayal c'ux ta yo'tan Jesús te Marta soc te yijts'ine soc uuc te Lázaroe. 6Te bit'il la yaiyix stojol te ay ta chamel te Lázaroe, jalaj xan cheb c'aal tey a te banti aye. 7Soc la yalbey te jnopojeletic yu'une:
—Ya xcha'bootic xan ta sq'uinal Judea —xi'.
8La yalic te jnopojeletique:
—Maestro, ach' to nax c'an smilat ta ch'ojel ta ton tey a te judioetique. ¿Bistuc ya xcha'baat xan tey a? —xiic.
9La yal te Jesuse:
—¿Ma bal lajchayeb ora yich'oj te jun c'aale? Jich yu'un te mach'a ya xbeen ta c'aaleltique, ma ba ya sc'ojch'in yacan, melel ya yil q'uinal te bit'il sacuben q'uinal ta balumilale. 10Yan te mach'a ya xbeen ta ajc'ubale, ya sc'ojch'in yacan stuquel, melel ma sacubenuc q'uinal ta stojol —xi'.
11Patil la yal te Jesuse:
—Wayalix te Lázaro te jun co'tan jbajtic soque, ja'uc me to, ya xba jtij jajch'el —xi'.
12La yalic te jnopojeletique:
—Cajwal, teme wayalixe, yu'un tey ya xlamajix a te xchamele —xiic.
13Te bit'il jich la yal te Jesuse, yu'un lajemix te Lázaroe. Yan te jnopojeletique la scuyic te wayal naxe. 14Jich yu'un te Jesuse jamal la yalbey yaiyic:
—Lajemix te Lázaroe, 15ja'uc me to, ay sbujts' co'tan yu'un te ma'yucon tey a, yu'un jich me ya ach'uunonic a te ja'exe. Ya xba quiltic —xi'.
16Jich te Tomase, te Dídimo yan sbiile, caj yalbey te yantic jnopojeletique:
—Ya xbootic uuc te jo'otique, ya xba jointic ta lajel —xi'.
Te Jesús ya yac' cha'cuxel soc ya yac' cuxlejal
17C'alal c'ot tey a te Jesuse, xchanebalix c'aal smujq'uel a te Lázaroe. 18Te Betania ay niwan oxebuc kilómetro yiloj sba soc te Jerusalene. 19Talemic tsobol te judioetic ta smuc'tesbel q'uinal yaiyic te Martae soc te Mariae te bit'il lajemix te Lázaroe. 20C'alal la yaiy stojol te Marta te julelix tel te Jesuse, loc' bael ta stael. Yan te Mariae nacal jilel ta na stuquel. 21Te Marta jich c'o yalbey te Jesuse:
—Cajwal, te li'uc ayate, ma ba laj te quijts'in te jichuque. 22Ja'uc me to, ya jna' stojol te spisil te bila ya ac'anbey te Diose ya yac'bat —xi'.
23La yal te Jesuse:
—Te awijts'ine ya xcha'cux tel —xi'.
24La yal te Martae:
—Jich. Ya jna' te ya xcha'cux tel ta slajibal c'aal te c'alal ya sta yorail cha'cuxel —xi'.
25Te Jesús la yalbey:
—Jo'on cha'cuxelon soc jo'on cuxlejalon.#Ro 6.4-5; Col 2.12; 3.1. Ja' te mach'a ya xch'uunone, teme ya xlaje, ya me xcha'cux tel. 26Soc spisil mach'a cuxulic te ya xch'uunonique ma xlaj sbajt'el q'uinal. ¿Jich bal ach'uunej in to? —xi'.
27La yal te Martae:
—Jich, Cajwal. Jch'uunej te ja'at Cristoat te Snich'anat Dios te talemat ta balumilale —xi'.
Oc' Jesús ta bay smuquenal te Lázaroe
28Te c'alal laj yo'tan ta yalel in to te Martae, ba yic' tel te María ja' te yijts'ine. Jich c'o yalbey ta muquen:
—Te Maestroe li' ayix to. Ya me yic'at —xi'.
29C'alal la yaiy stojol te María, ora ba yil te Jesuse. 30Ma to ochemuc ta lum a te Jesuse. Tey to ay a te banti taot yu'un te Martae. 31Te judioetic te talemic smuc'tesbel q'uinal yaiyique la yilic te bit'il ora jajch' bael te María. Jich la sts'aclinic bael, yu'un la scuyic te ya xba oc'uc ta smuquenal te Lázaroe.
32C'alal c'ot María tey a ta bay te Jesuse, la squejan sba ta stojol. Jich la yal:
—Cajwal, te li'uc ayate, ma ba laj te quijts'in te jichuque —xi'.
33C'alal Jesús la yil te yac ta oq'uel te María soc uuc te judioetic te ts'aclinbilic tel yu'une, bayal la smel yo'tan yu'un uuc. 34Jich la sjojc'obey yaiy:
—¿Banti la amuquic? —la yut.
La yalic:
—Li' ay to, Cajwal. La', ilawil —xiic.
35Oc' te Jesuse. 36Te judioetic la yalbey sbaic:
—¡E! Bayal c'ux ta yo'tan —xiic.
37Ay cha'oxtul te judioetic la yalique:
—Te bit'il la sjambey sit te ma'site, ¿ma bal ju'uc yu'un te manchuc la yac' lajuc te Lázaroe? —xiic yu'un.
Cha'cux te Lázaroe
38Te Jesús, yac to ta smelel yo'tan yu'un a, noptsaj bael ta bay te smuquenale. Nailch'en te smuquenale. Mac'bil sti' ta ton. 39La yal te Jesuse:
—Loq'uesaic te ton macal ae —xi'.
La yal te Marta te xwix te animae:
—Cajwal, tuix, melel xchanebalix c'aal slajel —xi'.
40Te Jesús jich la yalbey:
—¿Yu'un bal ma la calbat teme jc'axel ya ach'uune, ya me awilbey yutsilal te Diose? —xi'.
41Jich la sloq'uesic te tone. Te Jesús la stoy moel sit ta ch'ulchan. Jich la yal:
—Jtat, wocol awal te la awaiybonix stojol te jc'ope. 42Jna'oj stojol te spisil ora ya awaiybon stojol te jc'ope. Ja'uc me to, ya cal ta scaj te bayal mach'atic sepoj sbaic li'to, yu'un jich me ya xch'uunic te ja'at la aticunon tele —xi'.
43Te c'alal la yal jich in to, tulan c'opoj:
—¡Lázaro, la', loc'an tel! —la yut.
44Jich loc' tel te animae. Potsol loq'uel tel sc'ab yacan ta spojts'il, soc pixil loq'uel tel ta pac' te yelawe. Te Jesús la yal:
—Polaic, ac'a bajt'uc —xi'.
Chajbanbot sc'oplal ta milel te Jesuse
(Mt 26.1-5; Mr 14.1-2; Lc 22.1-2)
45Te judioetic te sjoinejic tel te Mariae ay tsobol la xch'uunic te Jesuse, scaj te la yilic te bila la spase. 46Soc ay cha'oxtulic te ba sc'oponic te fariseoetique. Ja' c'o yalbey yaiyic te bila la spas te Jesuse. 47Jich yu'un te fariseoetique soc te jwolwanej-sacerdoteetique la stsob sbaic ta Muc'ul Tsoblej yu'unic. Jich la yalic:
—¿Bi me ya jpastic yu'un? Melel te winique bayal señailetic yac ta spasel. 48Teme jich nax ya xjil cu'untique, spisilic me ya xba xch'uunic. Jich me ya xtal te romaetique, ya me sjinbotic te ch'ul temploe soc te nación cu'untique —xiic ta yalel.
49Ja'uc me to, c'opoj te Caifás, te ja' ochem ta muc' sacerdote ta swenta te ja'wile:
—Te ja'exe xujt' ma'yuc bi ya ana'ic. 50¿Yu'un bal ma x'ana'ic te ja' lec te jtul nax winic ya xlaj bael ta swenta te jlumaltique? Ja' wocol teme spisil te nación ya xlajotic soque —xi'.
51Te bit'il jich la yal te Caifase, ma stuquel-o'tanuc nax. Dios te jich ac'bot yal yu'un ta scaj te ochem ta muc' sacerdoteil a te ja'wile. Jich la yalbey sc'oplal te puersa me ya sjelolin Jesús ta lajel te nacione. 52Soc ma stuqueluc nax sc'oplal te judioetique, ja' sc'oplalic ta spisil uuc te alnich'anetic yu'un Dios te pujq'uemic te ya yich'ic tsobel ochel ta jun naxe. 53Jich yu'un te mach'atic yich'oj yat'elic yu'un te judioetique, jich ora te jajch' xchajbanbeyic sc'oplal ta milel te Jesuse.
54Ja' swentail te ma ba beenix ta comonsitil ta yolil judioetic te Jesuse. La yijq'uitay jilel te sq'uinal Judeae. Bajt' ta ch'in lum te Efraín sbiile te nopol yiloj sba soc te jochol q'uinale. Tey ain soc te jnopojeletic yu'une. 55Nopolix yorail a te q'uin Pascua yu'un te judioetique. Neelajemic bael ta Jerusalén tsobol judioetic ta juju-jpam lum, swenta yu'un ya xba yac' sbaic ta utstesel ta stojol Dios neeluc te bit'il ya xjajch' spasic te q'uin Pascuae. 56Yacalic ta sleel te Jesuse. Te c'alal ayic ta templo la sjojc'obey sbaic:
—¿Bi xaex? ¿Ya bal xtal ta q'uin awaiyic? —xiic.
57Te fariseoetique soc te jwolwanej-sacerdoteetic yalojiquix mandal te ya me yalic teme ay mach'a ya sna' ta banti ay te Jesuse, swenta yu'un ya me xba stsaquic tel.
Currently Selected:
San Juan 11: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.