Esdras 1
1
Mandal la yal Ciro
(2 Cr 36.22-23)
1Ja' in to ja' sc'oplal te bila c'ot ta pasel ta sbabial ja'wil yochel ta muc' ajwalil yu'un Persia a te Ciro. Jich c'ot ta pasel a te bila yaloj Cajwaltic ta swenta te Jeremías.#2 Cr 36.21; Jer 25.11; 29.10. Te Cajwaltic la stijbey yo'tan te Ciro te yacuc yal mandal ta stojol te israeletique. La yich' puquel ta alel sc'oplal soc ta ts'ibubil junetic ta spamal q'uinal te banti c'alal swentaineje. Jich ay te smandale: 2“Ciroon muc' ajwalilon yu'un Persia, ya cal ta jamal in to: Te Ajwalil te Dios ta ch'ulchane, la yac'bonix ta jc'ab spisil q'uinaletic yu'un te ajwaliletic ta balumilale. La yac'bon ta jwenta spasel templo ta Jerusalén#Is 44.28; 45.1-4. te ay ta sq'uinal Judá. 3Ja' yu'un mach'auquex a te ayex ta swenta te lum yu'un te Ajwalile, Dios me ya scoltayex, baanic ta Jerusalén te ay ta sq'uinal Judá ta spasel te templo yu'un te Ajwalil te Dios yu'un Israel, te nainem ta Jerusalén. 4Spisil te judioetic ta bayuc nainemique ya me xcoltayotic yu'un te spat-xujq'ue. Ac'a yac'beyex plata, oro, soc spisil biluc yu'un, soc wacax, soc xan yan majt'anil te spasemal yo'tanic ya yaq'uic yu'un te templo yu'un Dios ta Jerusalén”, xi' te smandale.
Ay sujt'ic xan ta Jerusalén israeletic
5Te jwentainwanejetic yu'un jujun na ta Judá soc ta Benjamín soc te sacerdoteetic, soc te levitaetique, ja'ic ta spisil te tijbot yo'tanic yu'un te Diose, la xchajban sbaic yu'un te bael ta Jerusalén, soc ta xcha'pasel xan te templo yu'un te Cajwaltique. 6Ta spisil te spat-xujq'uique coltayotic yu'un ta plata, oro, soc spisil biluquetic, chambalametic, soc biluquetic te bayalic stojole, soc xan yantic bayal ta jchajp biluquetic te spasemal yo'tanic la yaq'uique. 7Te muc' ajwalil Ciro, ta stuquel-o'tan la yac' te biluquetic ya xtuun ta templo yu'un te Cajwaltique. Ja' te la yich' loq'uel ta Jerusalén te Nabucodonosor te la yac' ta templo yu'un te diosetic yu'une.#2 R 24.13; 25.13-16; 2 Cr 36.10,18. 8Te Ciro la sujt'es te biluquetic ta swenta te Mitrídates te ja' tesorero yu'une. C'alal laj yo'tan ta yajtayel, la yac'bey ta sc'ab te Sesbasar te mach'a muc' sc'oplal yu'un Judá. 9Te loc' ta ajtayel te biluquetique, jich ay: lajuneb xcha'winic (30) muc'ul tazaetic pasbil ta oro, jmil (1,000) muc'ul tazaetic pasbil ta plata, baluneb xcha'winic (29) cuchilloetic, 10lajuneb xcha'winic (30) tazaetic pasbil ta oro, jbajc' soc lajuneb (410) tazaetic pasbil ta corriente plataetic, soc jmil (1,000) xan yantic biluquetic. 11Ta spisil te biluquetic pasbil ta oro soc ta plata loc' jo'mil soc bajc' (5,400). Spisil in to, la yich' bael Sesbasar yan buelta ta Jerusalén te c'alal jajch' bael ta Babilonia soc te mach'atic ic'otic loq'uel ta slumalique.
Currently Selected:
Esdras 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.