2 Tesalonicenses 1
1
Spatjibal-o'tanil
1Jo'on Pabloon soc te Silvanoe, soc te Timoteo, ya jpatbeyex awo'tanic ja'ex te jch'uunjelex ta lum Tesalónica#Hch 17.1; 1 Ts 1.1. te jun ayex soc te Jtatic Dios soc te Cajwaltic Jesucristoe. 2Ac'a yac'beyex yutsil yo'tan te Jtatic Diose soc te Cajwaltic Jesucristoe. Lamaluc me q'uinal ya awaiyic yu'un spisil ora.
Dios ya yac'bey castigo jmulawiletic te c'alal ya xtal Cristo
3Quermanotac, spisil ora ya calbey wocol Dios ta awentaic yu'un te bit'il yac ta esmajel xch'uunjel awo'tanic, soc te bit'il talel c'axel c'ux ya awaiy abaic juju-jtulex soc te yantique. 4Jich bin nax co'tan ya calbeyex ac'oplalic ta stojol te jch'uunjeletic yu'un te Diose, te bit'il ay xch'uunjel awo'tanic soc ts'ijq'uem awu'unic spisil te uts'inel soc te controinel te ay awocolic yu'une. 5Ja' in to ja' ya yac' ta ilel te bit'il stojil te chajbanel yu'un te Diose, melel ya yac' x'ainex tey a ta banti ay ta muc' ajwalil te Diose. Ja' swentail te ay awocolic ta ora to.
6Melel te Diose, ja' stojil te ya yac'bey stoj ta woclajel te mach'atic ya scontroinexe. 7Yan te ja'ex, te awich'ojic controinele, ya me yac'beyex awich'ic lewa yu'un awocolic, soc uuc te jo'otic, te bi ora ya xchicnaj tel ta ch'ulchan te Cajwaltic Jesuse. Joytaybil ta yat c'ajc' ya xtal soc te ch'ul abatetic yu'une te ay bayal yipique. 8Jich me ya xtal yac'bey castigo te mach'atic ma la sna'beyic sba te Diose soc te ma la sc'an xch'uunic te lec yach'il c'op yu'un te Cajwaltic Jesucristoe. 9Ya me xc'ax swocolic ta castigo ta ch'ayel sbajt'el q'uinal. Ya me yich'ic ch'ojel loq'uel ta stojol te Cajwaltique soc ta bay yutsilal yu'el te Cajwaltique. 10Te c'alal ya xtale, ya me x'ich'ot ta muc' ta yolil te mach'atic ch'ul lum yu'un te Diose, soc jelawen yutsilal sc'oplal ya xbajt' yu'un ta spisilic te jch'uunjeletic yu'une. Jich te ja'exe, tey me ayex uuc a, te melel la ach'uunbotic te c'op te tal caltic awaiyique.
11Ja' swentail te spisil ora ya jc'oponbeyex Dios ta atojolique. Ja' ya jc'anbeytic te Dios te yic'ojex ta stojole, te yacuc xju' awu'unic xch'uunel te Diose, soc te yacuc xju' awu'unic spasel ta swenta yu'el spisil te bila lec te ay ta awo'tanique, soc spisil te at'el ya apasic ta swenta te xch'uunjel awo'tanique. 12Jich me ya x'ich'ot ta muc' sbiil a te Cajwaltic Jesucristoe. Soc jich me ay bayal yutsil ac'oplalic yu'un uuc ta swenta yutsil yo'tan te Dios cu'untique soc uuc te Cajwaltic Jesucristoe.
Currently Selected:
2 Tesalonicenses 1: TZOXCH
Highlight
Share
Copy
Want to have your highlights saved across all your devices? Sign up or sign in
Biblia en Tzeltal de Oxchuc y Tenejapa © Sociedad Bíblica de México, A.C., 2001.