Machitilo 9

1LOMBA Saulo nteleka kwafuzila asambili a Asikuru kuyofya nopululusya; echiya ku mkuru wa ansembe 2nosenga kwake tulata aye nato ku Damasko ku masunagoge, kuti akayofwanga ayake a Njira ila, kano analume kano anakazi, aze naŵo ŵomangiwa ku Yerusalemi. 3Nipo yenzepo penzekuya mnjira epanamila ku Damasko: lomba kovurumukizya kwisakata nomzinga kuŵala kufumila kumulu: 4naye echiwa pansi echimvwa lizu lenzomnenera, Saulo, Saulo, unizuzyiranji? 5Echiti, Nimwe ŵani, Asikuru? Naye enena, Nine Yesu uuzuzya: 6lomba uka ukaloŵe mmunzi, ninga chikanenewe kwako chamene chiuti wochita. 7Naŵo ŵantu enzompelekezya epanama nuu, elimvwa lizu ŵosaŵona muntu. 8Nipo Saulo eima pansi: akazuliwe menso ŵake aliyoŵona kantu; naŵo emkatilila kwanja echiya naye ku Damasko. 9Naye enze nsiku zitatu wosaŵona, ntenzekulya na kumwa.

10Lomba enzepo msambili umbi pa Damasko zina lake Ananiya; Asikuru emnenera mmensompenya, Ananiya. Naye echiti, Ŵonani, nili pano, Asikuru. 11Asikuru emuuzya, Ima, nkoya ku mseo woitiwa Wolungama, nokonsha mng'anda ya Yuda zya muntu zina lake Saulo, wa ku Tarso: pakuti ŵona, osenga; 12waŵona muntu zina lake Ananiya oloŵamo nomsintilila manja kuti alole soti. 13Sembe Ananiya eyasuka, Asikuru, nikumvwa kwa anyinji zya uyu, mwechiŵachitira viipa vinyinji asanto ŵanu a ku Yerusalemi: 14na pano kumo ana upinguzi wa akuru a ansembe womanga ŵonse oita zina lanu. 15Sembe Asikuru emuuzya, Nkoya: pakuti uyo ni chiya chosaluliwa changu, choula zina langu pa menso pa Mitundu na mafumu na ŵana a Israeli: 16nane nize nimlangizye mazuzyo aŵo anyinji ŵati azatamanishiwe naŵo chikomo cha zina langu. 17Nipo Ananiya echiya eloŵa mng'anda; pomsintilila manja echiti, Saulo mkwasu, Asikuru Yesu emuŵonekerani mnjira imwenzozamo wanituma kuti mulole soti nozula Mzimu Mtuŵa. 18Lomba pano apa efumamo mmenso mwake nga ni mamba, naye elola soti; nipo eima nobatiziwa; 19eula chakulya nochizyiwa.

Naye enze masiku ŵambi pamo na asambili enze ku Damasko. 20Lombalomba mmasunagoge eŵirizya Yesu kuti ni Mwana wa Mlungu. 21Naŵo ŵonse emumvwa ezuzuka echiti, Uyu mwati nti uyo enzopululusya mu Yerusalemi amene ŵala enzoita zina ili? naye echiza kuno lona kuti aye naŵo ŵomangiwa kwa akuru a ansembe. 22Sembe Saulo mpamvu yake ikula ngako, eŵazuvyazuvya Ayuda enzonkala pa Damasko, kolongosola kuti uyu ni Kristo.

23Nipo zikasile nsiku zinyinji Ayuda eyeruzyana kuti ampaye: 24sembe chiŵembu chaŵo chiziŵikwa kwa Saulo. Ŵeve ŵenzolindila pa milyango soti usiku na mzuŵa kuti ampaye: 25sembe asambili ŵake emuula usiku, empuzya pa linga nomsisya mchilwanga.

26Naye akafwike ku Yerusalemi esakolikungumizya kwa asambili, naŵo ŵonse emuyopa ŵosazomera kuti ni msambili. 27Lomba Barnaba emuula echiya naye kwa apostolo noŵalululira mwechimuŵonera Asikuru pa njira, na kuti elaŵira naye, na mwechiŵirizyira kokaŵalala mzina la Yesu pa Damasko. 28Enze naŵo pamo kuloŵa nofuma pa Yerusalemi, 29noŵirizya kokaŵalala mzina la Asikuru: elaŵira nosusyana na a Chihellene, naŵo echiti timpaye. 30Nipo akaziŵe akwaŵo echiya naye kusikira ku Kaisariya, nomsuzulira ku Tarso.

31Teti eklezya ya mvitwa vyonse vya Yudaya na Galilaya na Samariya yenze na mtendere notang'ishiwa; nayo poyendayenda mkumuyopa Asikuru na mkumyalalikiwa kwa Mzimu Mtuŵa ikula.

32Nipo yenzepo potantamo Petro mmalo mmalo echiya soti kwa asanto enzonkala pa Luda. 33Efwanga palapa chite zina lake Eneya wamene enze kalalilo pa malili vyaka visano na vitatu, pakuti enze na manjenje. 34Petro emnenera, Eneya, Yesu Kristo okupozya: uka uyanzule vya pa malili ŵako. Lomba pano euka. 35Naŵo ŵonse enzonkala pa Luda na mSarona emuŵona nomyarukira Asikuru.

36Lomba enzepo pa Yoppa msambili umo zina lake Tabita, ni kulongosola kuitiwa Dorika: mwanakazi uyu enze na milimo inyinji iweme na vyachitinti vyechichita. 37Nipo yenzepo mmasiku ŵala elwala na kufwa: naŵo akamsuke emsunga mchipinda cha pamulu. 38Nipo pa Luda pepenze pafupi na pa Yoppa asambili pakumvwa kuti Petro ali pamene emtumira ŵantu aŵiri emtetelela, Msalembuka kuza kwasu. 39Naye Petro eima echiya naŵo pamo. Nipo akaze ŵekwera naye ku chipinda icho cha pamulu: na anakazi ŵonse ŵofwilwa enzepeneme pamo naye nolila, nolangizya vyovwinikila na minjira vyechitima Dorika peenze naŵo pamo. 40Sembe Petro eŵafumya ŵonse, efukama nolomba; naye akachungulukile chitanda echiti, Tabita, uka. Naye etunama; lomba akamuŵone Petro euka enkala. 41Yeve emtambikizizya kwanja kwake nomuusya; nipo eita asanto na anakazi ŵofwilwa noŵapa wamoyo. 42Ichi chiŵirikila pa Yoppa ponse: na anyinji ezomera pa Asikuru. 43Nipo yenzepo kuti enkala masiku anyinji ku Yoppa kwa chite Simoni wopuka mikupo.

Currently Selected:

Machitilo 9: MA23

Highlight

Copy