Machitilo 8

1SAULO naye enzozomerezyana pa imfwa yake.

Lomba wiuka siku lamene lila mkululusyo ukuru pa eklezya yenze mu Yerusalemi; naŵo ŵonse echulunganyiwa mdera la Yudaya na la Samariya, sembe apostolo yai. 2Nipo ŵantu a ulambilo emuŵika Stefano nomlilila kwene kantu. 3Sembe Saulo eilofya eklezya, eloŵa mng'anda na mng'anda eŵakulika analume na anakazi noŵaika mkambolimboli.

4Teti ŵala amene echulunganyiwa ezungulila ponseponse noliŵirizya lizu. 5Na Filipo esika ku munzi wa Samariya noŵaŵilila mbila ya Kristo. 6Maumba naŵo eteya matu na mtima umo ku vinenewa na Filipo, apo pechimvwa, noviŵona viziŵikwilo vyechichita. 7Pakuti anyinji a aŵo ŵenze nayo mizimu ya lunsa ifuma mwaŵo nolila nkonde: anyinji naŵo a manjenje na ŵolemala epoleshewa. 8Nipo mmunzi mula mwenze chimango chikuru.

9Lomba enzemo muntu zina lake Simoni, wamene kale mmunzi enzochita mayere noŵakanganisya a mtundu wa ku Samariya nonena kuti ni ngana mkuru: 10uyo wechiteyera matu ŵonse ŵala chitatikile atonto mpaka akuru echiti, Uyu muntu ni mpamvu ya Mlungu ila yoitiwa Ikuru. 11Naŵo emteyera matu chifukwa nsita ikuru enzoŵakanganisya na mayere ŵake. 12Sembe apo pechimzomera Filipo enzoŵirizya utumi uweme wofumu wa Mlungu na zina la Yesu Kristo ebatiziwa, analume na anakazi. 13Na Simoni mwine ezomera: akabatiziwe enkala na Filipo; naye poŵona viziŵikwilo na vyampamvu vikuru vuchitika ezuzuka.

14Lomba apo apostolo enze pa Yerusalemi akamvwe kuti a ku Samariya elipokera lizu la Mlungu eŵatumira Petro na Yohana: 15amene ŵala akasikireko eŵalombera kuti apokeko Mzimu Mtuŵa: 16pakuti akali wosaŵaponera yeka umo: ebatiziwa tyala mzina la Asikuru Yesu. 17Pamene apo eŵasintilila manja, naŵo epokako Mzimu Mtuŵa. 18Naye Simoni pechiŵona kuti Mzimu Mtuŵa epewa na maikilo a manja a apostolo esakoŵapa ndalama 19echiti, Nipekoni nane upinguzi uyu wakuti ali wonse unti nisintilile manja apokeko Mzimu Mtuŵa. 20Sembe Petro enena naye, Ndalama yako naichenekeke pamo nawe, pawati uchipoke chabule cha Mlungu na ndalama. 21Uliye chitwa cholondolera pa mlandu uno: pakuti mtima wako suli uweme pa menso pa Mlungu. 22Teti wolapa ichi chiipa chako, nomsenga Asikuru angalekelewe kwako kaya malingililo a mu mtima mwako. 23Chifukwa nuŵona kuti uli pa nsangolulu yolula na pa chomangila cha mpulupulu. 24Simoni eyasuka echiti, Munisengere mweo kwa Asikuru kasanizila kantu ka ivi vyamwanena.

25Nipo ŵeve akachite untoni nolilaŵira lizu la Asikuru ewerera ku Yerusalemi noiŵirizya evangelo ku minzi inyinji ya Asamariya.

26Sembe malaika wa Asikuru enena naye Filipo echiti, Ima uye dera la ku kampambe ku njira yufumira ku Yerusalemi kusikira ku Gaza, iyo ya mmalambo. 27Naye eima echiya: nipo ŵonani, muntu wa ku Etiyopiya, mntungu ana nsaka ikuru kwa Kandake mfumukazi yaŵo a ku Etiyopiya, chisunga wa chuma chake chonse, echiza ku Yerusalemi kulambila; 28wamene uyu enzowerera na kuŵankezi mngolo yake, enzopenda mwa Isaya muŵirizi. 29Mzimu enena na Filipo, Uvwendere kwake, ukwere nawe mngolo iyi. 30Naye Filipo emuutukira emumvwa enzopenda mwa Isaya muŵirizi echiti, Mwati muziŵa chimupenda? 31Yeve enena, Niziŵe syani, paniliye wonitangulila? Naye emtetelela Filipo kukwerapo nonkala naye. 32Lomba pa malembo penzopenda penze apa,

Euliwa nga ni mbelele konyemera;

Nga ni umo kambelele pa menso pa wosesa usako mkalili nuu,

Tetyo naye ni mwasapambanulila kanwa:

33Posishiwa kwake upinguzi wake wilondewa:

Luko lwake ati azalilulule ni ŵani?

Chikomo moyo wake ululondewe ku charo.

34Mntungu naye emyasuka Filipo kuti, Napapata, nga muŵirizi elaŵira teti zya ŵani? zya mwine kansi, kano zya mumbine? 35Nipo Filipo epambanula kanwa etatikira pa malembo apa nomuŵirizyira Yesu. 36Naŵo penzekuya mnjira efwika ku manzi akuti; mntungu echiti, Ŵonani manzi; chunilesya kubatiziwa ni chinji? [37Naye Filipo echiti, Kati muzomera na mtima wanu wonse, mkumeko. Yeve eyasuka echiti, Nuzomera kuti Yesu Kristo ni Mwana wa Mlungu.] 38Naye esuzula ngolo ipaname: naŵo ŵonse aŵiri esikira mmanzi, Filipo na mntungu; naye embatiza. 39Lomba akatumpuke mmanzi Mzimu wa Asikuru emsompola Filipo; naye mntungu aliyomuŵona soti, pakuti enzekuya mnjira nosekelela. 40Sembe Filipo eŵoneka pa Azoto: nipo popitilila eiŵirizya evangelo ku minzi yonse mpaka pechifwika ku Kaisariya.

Currently Selected:

Machitilo 8: MA23

Highlight

Copy