1 कुरिन्थियो 9

प्रेरितान अधिकार एने कर्तव्य

1काय मी स्वतंत्र नाह? काय मी प्रेरित नाह? काय मी यीशुह जो आमरो प्रभु हि, देखील नाह? काय तुमु प्रभु माय मारा बोणाविल नासोता? 2जर मी दिहिराकेरता प्रेरित नाहं, तेभी पुण तुमरीकेरता तेभी हि; कारण तुमूह प्रभु माय मारो प्रेरणेवर छाप हेते.

3जे मारी चौकशी केरणू, तान केरता ज्याच मारा उत्तर हि. 4काय आमूह खालोपिलो अधिकार नाहं? 5काय आमूह हा अधिकार नाहं, कि कूण मसीही बोणिक वाराड केरीन तीयीरी जीवूहू, जोहलो दिहरी प्रेरित एने प्रभुन बाहाक एने कैफा केरणू? 6केव्ही फक्त माहु एने बरनाबसलाच अधिकार नाहं कि कोमाडीन सोडीन आपज्यू? 7कूण केवी आपणाच सोराह शिपायांन काम करने? कूण अंगूरिनाडी लागाडील फोल खाणे नाहं? कूण मेंढा राखणे केरीन तान दुध पित नाहं?

8काय मी ज्यू वातू माणहान रीती पुर बोलथु वारिसनेय रेती? 9काय व्यवस्था हि किथी नाहं? कारण मुसान नियामशास्त्राम लिखील हि का, “मोलने केरता बोयलाह मुहको बांधणु नाहा” काय बोगवान बोयलान चिंता करने? 10ज्यो हाजान केरीन आमरे केरताच किथी का. एने होव, आमरे केरताच लिखील हि, कारण योग्य हि, का जुपणारान आशा से जुपणे, एने मोलने वालो भागीदार एणार आशा से मोलने जुवी. 11केरीन ताहेरया आमु तुमरीकेरता आत्मिक वस्तु पेरणे, तर काय मटली वात हि कि तुमूह शारीरिक वस्तून पिक काटू. 12ताहेरया दिहीराहा तुमरे पोर हा अधिकार हि, तर काय आमारो ज्यापोररीन जादा रेहू नाहं? पुण आमु हा अधिकार कामाम लावील नाहं; पुण आखा काही सहन करने कि आमरा द्वारे मसीहान सुवार्ताताह देरील कायीच रुकावट आवही मां. 13काय तुमूह मालूम नाहं कि जे मंदिरामाय सेवा केरणू, ते मंदिरामाय रीन खाणु; एने जे वेदीई सेवा केरणू ते वेदीपरत भागीदार ऐतेह; 14ज्यानप्रमाणे प्रभुने पुण ठेरायेल कि जे माणहे सुवार्ता होमेलनू, तान सेवेम कमाई रेणेन जुवी.

15“पुण मी ज्यामायरीन काल्लीज वात कामाम देरील नाह, एने मी आवो वातू तान केरता लिखील कि मारकेरीन इही किरील जाणे, कारण ज्यान पेक्षा तर माहु मोरने हाजो हि कि कूण मारो गर्वाला वाया ठेरिनणार. 16जर मी सुवार्ता होमबोलणार, तर मारकेरता कायीच गर्वाची वात नाहं” कारण हे तर मारकेरीन जरुरी हि. जर मी सुवार्ता होमालनारू नाहं, तर मारपुर हाय! 17कारण जर आपणो ईच्छा हे करने तर माहु मोजरी जुडणे, एने जर आपणो ईच्छा केरतीन नाहं तेभी पुण कारभारी माहु होपील जाईल. 18तर मारी काल्ली मोजरी हि? हे कि मी सुवार्ता होमलाडतलु मी मसीहान सुवार्ता फुकुट केरीन आपुह, न्याओर कि सुवर्तेमाय जो मारो अधिकार हि ताह पुण मी पुरो केर देनूह कामाम लीन आवूह नाहं. 19कारण आखा फायरीन हाजो एतालून पुण मी स्वताह आखान दास बोनाडीन आपील हि कि जादा माणहाह मसीहाकडे लीन आवहू. 20मी यहूद्यांसाठी यहूदी बोणील म्हणजे मसीहाकडे लीन लावणे केरता. जे माणहे मसीहान आर्दामाय हि तान केरता मी व्यवस्था आधीनात नसताना पुण व्यवस्था अधीन एनो कि ताह जे व्यवस्था आधीनतेमाय, हि मसीहा माय लीन आवहू. 21व्यवस्था वातून मानणाराकेरिन मी जे बोगवानान मानणारे नाहं पुण मसीहान व्यवस्था अधीन हेते, व्यवस्था वातून माननाराकेरता, व्यवस्थाह केनारान केरता एनो म्हणजे व्यवस्था माय मानणाराह मसीहाकडे लीन आवहू. 22मी दुर्बळांसाठी पातलो बोणील तान केरता कि मसीहाकडे लीन आवहू. मी आखा माणहा केरता आखा काही बोणील, म्हणजे कायताहा कायताहा प्रकारे कूण एकास उद्धार मेलावीन आपुह. 23मी हे आखा सुवार्तान केरीन करने कि दिहराहे-यो भागीदार एईन जाहू.

मसीही दौड

24काय तुमूह मालूम नाहं कि दोवाडणे तर आखाज दोवडणे पुण बक्षीस एकुच लीन जाथू? तुमूह ता प्रकारेच दोवडू. 25प्रत्येक ताकतवालो आखा प्रकारान संयम करने ते तर एक खेतेमएणार मुकूटाला मिलवणे केरता किरील पुण आमु तर ता मुकूटाकेरीन करने जो केध्दीह नाश एय नाहं. 26तामुळे मी पुण ता प्रकारे दोवडणे; जे लक्ष्य एक हि, मी पुण ज्योच प्रकारे माणहान जुलाते लेडाणे पुण वारामाय त्यासारखो नाहं. 27पुण मी आपणो शरीराह दाबावामाय, चेदिलो एने काबुमाय लावथू, इही एणेन मां कि दिहीरा पोरचार केरीन मी खुदेन कायताहा प्रकारचा बिनकामान ठेरणार.

Currently Selected:

1 कुरिन्थियो 9: NLXNT

Highlight

Copy

Compare