1 कुरिन्थियो 6
6
मासिहीमाय पेयज
1काय तुमरे माय हि हिम्मत हि कि ताहेरया दिहीरा बरोबर लेडायेल एता, तर तानकेरीन निर्णय अधर्मी फाय दिहरी जाती उगे जाणेन एने पवित्र माणहाउगी जाणेन नाह? 2काय तुमूह मालूम नाहं कि पवित्र माणहे जगान न्याय केरुहू? तान केरता ताहेरया तुमूह जगान न्याय केरहू हि, तर काय तुमूह हाणाम आत्या मिठाडणे न्याय निवाडा केरणेन योग्य नाहं? 3काय तुमूह मालूम नाहं कि आमु स्वर्गदूतान न्याय केरुहू? तर काय संसारिक वातून न्याय केरहू नाहं? 4जर तुमूह संसारिक वातून न्याय निवाडा केरहू, तर काय ताणुच बोहाडीन जे कलीसिया माय कायीच समजील जात नाहं? 5मी तुमूह लाजवाडणे केरणेन केरता हे, किथे काय खेरी खेरीच तुमरे माय एक पुण बुद्धिमान जुडतो नाहं, जो आपणो बाहाकान न्याय निवाडा केरूह शकेल? 6तुमरे माय बाहाक बाहाकपुर चौकशी करने, ते अविश्वासी माणाहान ओगाण.
7पुण खेरीच तुमरे माय मोठू दोष हा हि कि आपसामाय फिर्याद केरणू. अन्याय काहा सहन केरतीन नाहं? आपणा नुकसान काहा सहन केरतीन नाहं? 8पुण तुमूह तर स्वताह अन्याय केरणू एने नुकसान केल्यो, एने ते पुण बायाकुच. 9काय तुमूह मालूम नाहं कि अन्यायी माणहे बोगवानान राज्यान वारिसनेय रेती? फोसू मा; जारकर्मी व्यभिचारी, मूर्ती पूजा, बायकू सारखो सभोंग आपणार, एदमीहारखो सभोंग लेणार. 10चोर, लोभी, साकल्यो, लुच्डो एने वित्त हरिन केरणार बोगवानान राज्यान वारिसनेय रेती. 11एने तुमरे मायरीन कोलाक जन ओहलाच एता, पुण तुमूह प्रभु यीशु मसीहान नावान एने आमरा बोगवानान आत्मा माय धुवील गेलेले, एने पवित्र इयील खेरो ठेरना.
शरीर बोगवान महिमान केरता
12आखा वस्तु मारकेरता योग्य तर हि, पुण आखा वस्तु फायद्याच्या नाहं; आखा वस्तु मारकेरीन योग्य तर हि, पुण मी काल्लूच वातून अधीन एय नाहं. 13रूटू पेटान केरता एने पेट एनान केरीन, पुण बोगवान ज्याह एने ताह दुईजानाह नाश केरुहू. पुण शरीर व्यभिचारासाठी नाहं, पुण प्रभु केरता हि एने प्रभु शरीराकेरिन हि. 14बोगवानान आपणो सामर्थ्यान प्रभुह जीवतालो किरील, एने आमूह पुण जीवतालू केरुहू. 15काय तुमूह मालूम नाहं कि तुमरो शरीर मसीहान अवयव हि? तर काय मी मसीहान अवयवाह लीन ताह वेश्यांचे अवयव बणावूहू? मुळीच नाहं. 16काय तुमूह मालूम नाहं कि जो कूण वेश्यांबरोबर संगती करने, तिहे-यो एक तन एय जाथू कारण लिखील हि, “ते दुयू एक तन एय.” 17एने जो प्रभुन सहभागिता माय रेणे, तो ताहेऱ्यो एक आत्मा एय जाथू. 18व्यभिचारा पासून सेटो रीवू; जोलाक दिहरा पाप माणुह करने ते शरीरान बाहेरिनाला हि पुण व्यभिचार केरणार आपणाच शरीरान विरोधामाय पाप करने. 19कारण काय तुमूह मालूम नाहं कि तुमरो शरीर पवित्र आत्मान मंदिर हि, जो तुमरे माय बोहील हि, एने तुमूह बोगवाना फायरीन जुडना हि; एने तुमूह तुमरो नाहं? 20काहाकाय किंमत आपील वेचातो लीईल हि, तामुळे आपणो शरीर केरीन बोगवानान महिमा केरू.
Currently Selected:
1 कुरिन्थियो 6: NLXNT
Highlight
Copy
Compare
Share
Want to have your highlights saved across all your devices? Sign up or sign in
Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.
