Mark 4
4
De mee hagasengasenga o tangada doo golee
(Mat 13.1-9; Luke 8.4-8)
1Gai Iesu ne agoago ange hogi i gaogao de vai. Gai dangada soa mmao ga hagabuni mai gi ono daha, gai ia ga gage age ga noho i honga dahi boose i honga de vai, gai dangada e nnoho i gaogao de vai.#Luke 5.1-3 2Gai Iesu ne agoago ange gilaadeu i mee lagolago i muna hagasengasenga, ga hai ange, 3“Goodou nnoho mai hagalaangona! E dahi daane hai veelenga ne hano e doo ana golee. 4Gai de masavaa huu aana ne hagamalili ai ana golee, gai hanu gu too ange gi gaogao de haiava, gai denga manu llele ga loomai ga gai. 5Hanu ne too ange gi honga mommee haduhadua, go de mommee e dee maadolu de gelegele iai. Gai ne moolau donu de ssomo age, go hiidinga e daballahi de gelegele i kilaa. 6Aagai de masavaa huu ne sula age ai de laa, gai manu laa gu mmae, go hiidinga tigi ai donu olaadeu aga. 7Hanu ne too ange gi magavaa manu daladala, gai denga manu daladala laa ga ssomo age ga hagakabi gilaadeu, gai manu laa tee maua gi hhua. 8Gai hanu ne too ange gi honga de gelegele danuaa, aanei golee ne ssomo ga hhua: hanu e dagimatolu, hanu e dagimadaono, gai hanu e dagillau.”
9Gai Iesu ga hai ange, “Be goai e hanu ono dalinga e hagallongo ai, gai ia gi hagalaangona!”
Hiidinga o denga mee hagasengasenga
(Mat 13.10-17; Luke 8.9-10)
10Gai de masavaa huu ne deai ai dangada, gai tinoangahulu ma dogolua ma dangada ange laa ne ssili ange gi de ia de hagadoonunga o de mee hagasengasenga laa. 11Gai ia ga hai ange gi gilaadeu, “Gu dugu adu gi goodou de maua i de tonu ange, gi mee o de nohoanga hodooligi o de Maadua, e dee iloo laa. Aagai e tala ange donu huu gi gilaadeu i tua i muna hagasengasenga,
12‘gi gidee ai e gilaadeu gai e dee madea;
gai gi langona ai e gilaadeu, gai e dee tonu ange aagena,
gi dee daahuli ai olaadeu lodo
gai de Maadua ga degi ange gi olaadeu haisala.’ ” #Isa 6.9-10
De hagadonu o de mee hagasengasenga o tangada e dooa golee
(Mat 13.18-23; Luke 8.11-15)
13Gai Iesu ga hai ange gi gilaadeu, “Goodou tigi tonu ange naa donu gi de mee hagasengasenga nei? Gai dee hee ai naa doodou hai e tonu ange ai gi denga mee hagasengasenga alodahi? 14Tangada hai veelenga e doo muna a de Maadua. 15Hanu dangada e bei dagodo o denga golee e too ange laa gi gaogao de haiava. De masavaa alaadeu ne langona ai muna a de Maadua, gai ne moolau donu de humai o Satan ga kave gee muna gu doo ange laa gi olaadeu lodo. 16Hanu e bei denga golee e doo ange laa gi honga mommee haduhadua, gilaadeu ne hagamoolau donu ga kave muna laa i de malangilangi, i de masavaa alaadeu ne langona ai. 17Aagai e deai donu olaadeu aga, deelaa ai, gilaadeu tee daulooloa donu. Gai de masavaa huu ne tae mai ai denga hai ngadaa ma de vaivai haia o dangada, i hiidinga o muna nei, gai gilaadeu ne moolau donu de aahe dua. 18Gai hanu e bei dagodo o denga golee e too ange laa gi magavaa o denga manu daladala. Gilaadeu ne langona muna laa, 19aagai mee hagamanavasaa o henua i lalo, ma de lava e hagasengalia laa dangada ma de nnoo hagamau mee ga hagakabi muna laa, gai tee maua gi hanu ono hua. 20Hanu e bei denga golee ne too ange laa gi honga de gelegele danuaa; gilaadeu ne langona muna laa ga daohi i olaadeu lodo, gai gilaadeu gu hhua: hanu e dagimatolu, hanu e dagimadaono, gai hanu e dagillau.”
De laama e haoli ange laa
(Luke 8.16-18)
21Iesu ne ssili ange gi dangada, “E aha, goodou e kave laa de laama ga haoli ange i lalo dahi bagede aabe go lalo de moenga? E aha, goodou e dee dugu ange laa gi honga de mommee dugu laama?#Mat 5.15; Luke 11.33 22Go hiidinga mee alodahi e hagammuni e hagaago mai naa donu, gai mee e dee iloo e hai naa ga iloo.#Mat 10.26; Luke 12.2 23Be goai e hanu ono dalinga e hagallongo ai, gai ia gi hagalaangona!”
24Ia ne hai ange hogi gi gilaadeu, “Goodou kana ange daohia oodou mee gu langona; de hagabaaunga oodou e hagabau ange ai gi dangada, go de hagabaaunga hogi e hagabau adu ai gi goodou, gai e hai naa donu ga lagolago ange.#Mat 7.2; Luke 6.38 25Go hiidinga be goai e hanu ana mee, gai e hai naa donu gi kii ange de lagolago. Gai be goai e deai ana mee, aagai e kave gee donu momo mee e hanu i ono daha.” #Mat 13.12; 25.29; Luke 19.26
De mee hagasengasenga o de golee e somo laa
26Iesu ne hai ange hogi, “De nohoanga hodooligi o de Maadua e bei dagodo o taane e kave laa ana golee ga doo i honga de gelegele. 27Gai de boo ma de laangi, e dee hilihili be ia e seni be ala, gai denga golee laa e matili age ga ssomo, gai ia tee iloo donu be dee hee delaadeu hai ne ssomo ai laa. 28De gelegele ne hai ga ssomo ma de hhua mee e doo ange aagena; taamada e ssula age denga lau, ga lava go denga hua, gai muli mai gu maatua denga grain. 29Aagai de masavaa huu ne maatua ai denga grain, gai dangada ga duuduu i de kamaa, go hiidinga gu dae mai de masavaa o de hagihagi.” #Joel 3.13
De mee hagasengasenga o de golee o de mustard
(Mat 13.31-32, 34; Luke 13.18-19)
30Gai ia ga hai ange, “Se aha adaadeu e hagadagodo ange aagena de nohoanga hodooligi o de Maadua? Gai se aha adaadeu e hagasengasenga ange aagena ono dagodo? 31E bei dagodo o de golee o de mustard e doo ange laa gi lo te gelegele, gai e damaa mee ange i denga golee i honga de gelegele. 32Gai de masavaa huu ne doo ai ga somo, gai gu laumalie ange i denga manu ssomo hugadoo i lo te veelenga laa, ono laa gu nnui, gai denga manu llele gu loomai ga hai olaadeu hoohanga i lalo dono malu.”
33Gai ne lagolago mee hagasengasenga bee nei a Iesu ne agoago ange ai dangada, go de hai olaadeu e tonu ange ai. 34Ia ne agoago ange donu huu dangada i denga mee hagasengasenga. Aagai de masavaa naa huu oona gu noho ai madali ana dangada agoago, gai ia ga hagadonu ange mee alodahi gi gilaadeu.
De hagasee a Iesu de madangi mmahi
(Mat 8.23-27; Luke 8.22-25)
35De laangi mau i de ahiahi, gai Iesu ne hai ange gi ana dangada agoago, “Gidaadeu ga hulo gi de baasi gee de vai.” 36Gai ga hulo gee huu gilaadeu i daho dangada soa laa, gai ana dangada agoago ne kave ia bei dono hai nogo noho ai laa i lo te boose. Gai ne hanu ange boose ne hulo madali ia. 37Gai gu ssau mai de madangi mmahi, gai delaadeu boose gu dai abulu i de haohao ina mai i denga beau. 38Aagai Iesu e ulunga i dahi ulunga ma e seni ai i muli moni. Gai ana dangada agoago ne loomai ga hhango ange ia, ga hai ange, “Tangada Agoago, koe e dee anga ange naa donu gi taadeu dai maakau?”
39Gai ia ga alahage ga hagasee de madangi ma de beau, ga hai ange, “Gi sili de madangi, gai gi malino honga de vai!” Gai gu sili de madangi, gai gu malino mmao.
40Gai ia ga hai ange gi ana dangada agoago, “Gu aha gu maatagu ai naa goodou? Goodou e deai naa donu oodou kai?”
41Gai ana dangada agoago gu maatagu mmao ga hagataba i olaadeu magavaa, “Goai taane nei? De madangi ma tai e hagallongo ange hogi gi de ia!”
Currently Selected:
Mark 4: DBD
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
