2 Tɛsalɔnik munu 3
3
’Ka bazoro ko tɔ ma
(Rom 15:30–32; 1 Kor 1:8–9; Kol 4:3–4)
1Yé sin, bwenu, ’ka bazoro ko tɔ ma léé, Mizambale dére ’é nwɛɛn fɛfaana yé ’wa nyi si é zima bélé fɛan zo lé ka a nyi si é zima, a zo ma, 2yé ko si tavozannu valé mi lɛrɛlɛrɛnu lee, naa, mi faa bli ’ka é pale lo. 3Mizambale a yarapawelazan nya, é dan ka dɔ lɛ gligli, yé é dan ka ta kuun lɛ Satan lee. 4Ko bli a Mizambale lɛ kalé we ma, léé, wenu lé ko wo pla ka lɛ, ka a wo kɛlɛna, yé ka dan wo kɛlɛ lɛ. 5Yé Mizan ’é go ka nya Kazambale lé sɔlɛle va, é valé Krist lé bli tiéé va ma.
É a lé mi faa é nyanama pa
(1 Ts 2:9–10; 4:1, 11–12)
6Bwenu, ko we plaan ka lɛ Kaazan Jézu Krist tɔ nya léé, Krétiɛn faa lé wolé tawobɛ ke é vɔɔle, ’té wo ’ka tawoo kolé wepaale yɛrama lo, ’ka kini wo nya ékema. 7Fɛan zo lé é a lé ka kɛlɛ ko zuosonazannu nya, ka ’bɛ gi dɔɔ. Naa, ko ’ka we vɔɔle kɛlɛ lɛ ka va lo; 8ko ’ka mi do kpen lé fɛ ble lɛ é pla lo, ko lɔa é wo; naa, tu valé é kinile ma, ko nyanama paan, ’té ko nyané blé, té ko kɛlɛ mi do kpen nwiin kɔné nya lo we ma. 9Ka leefɛ blele se a ko lɛ, naa, é sɔ ko lɛ léé, ko kɛlɛ kalé wekɛlɛmazannu nya, yé ka we kɛlɛ kolé we ma. 10Bléyian va lé ko a ka va, ko lé ka lɛ léé, dé é ’ka sɔ lɛ mianzan lɛ léé, é nyanama pa lo, té é fɛ ble lo. 11Ko a ’ma léé, ka va mi kenu a kun‐anwona; wo ’ka ’wobo lé nyanama paan lo, ’té woo giéan ’wo ’wuo wɔrale nya mi bɛnu lé we gi. 12Ko we plaan ’bɛ zoɛ munu faa lɛ, ’té ko wo tunuan Mizan Jézu Krist tɔ nya léé, ’wobo kun, ’wo nyanama pa yifaama, yé ’wobo lé fɛ ble.
13’Kaa bwenu, té ka wɔlɛgi é nyaan ka ma wezin kɛlɛle nya lo. 14We lé ko fé sɛbɛ ’ko la, dé mianzan ’ka a lɛdɔama lo, ’ka bɛ zun ’bɛzan ma, té ka nana a va lo, ’bɛzan gyɛle yara nya we ma. 15Naa, té ka a ye bélé ka nyanézan zo lo; ’ka we pla a lɛ bélé ka bwe zo.
Wo drɔɔ vole
16Mizan, mivodrɔɔzan bozen, ’é ka vo drɔɔ bléyi faa ma, bɛ faa ma. Mizan ’é kɛlɛ ka faa va ma.
17Weale ’ko, maa Pɔl ɛ gyɛ anbozen bɛ nya. Yee ɛ ke anlé sɛbɛ faa lé tɔmase nya. Maa a gyɛ ’ko zo: PƆL.
18Kaazan Jézu Krist lé zin ’é kɛlɛ ka faa va ma.
Currently Selected:
2 Tɛsalɔnik munu 3: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
