2 Kolɛntikalu 2

1Wo le n'a kɛla, ǹ n'a latɛɛla ko ǹ tɛnala seikɔla ài ma bene, jani ǹ'ài josomakasi kɔtunun. 2Kamasɔlɔn ni ǹ k'ài josomakasi, jene kɛtɔ tola min yi se ka ǹ kɔnɔlɔdiya ni àilu tɛ, ǹ na àilu minu josomakasila? 3Wo le n'a kɛla, ǹ na lɛtɛlɛ wo sɛvɛla boloɲa wo ma, fɔsa m̀'ɛ sena ài fɛlɔ, ǹ kana josomakasi sɔlɔn mɔɔlu ya ko lɔ, minu tɛɛ ka kan ka ǹ kɔnɔlɔdiya. Ǹe do layine tɛɛ a la k'a fɔ ko ǹa kɔnɔlɔdiya y'ài bɛ le ta le. 4Ǹ na lɛtɛlɛ wo sɛvɛla ài ma josomakasi ni niilafin ba le boloma, ǹ ɲaji vɛ jiila palapala. Ǹ tɛɛ t'a fɛ k'ài josomakasi, mafɔ k'ài lalɔnni ǹa kanundeya wala jate la ài yɛ.

Ài yi hakɛtaba makoto

5Ni a k'a sɔlɔn mɔɔ dɔ vɛ josomakasiko dɔ kɛ, wo tii ma ǹe kelen josomakasi, mafɔ a na àilu bɛ le josomakasila, hali ni a ka kɛ a dɔni ne, ni ǹ tɛ ko makawala. 6Ài fanba na makumali min siila a la, wo vɛ je bɔ. 7Wo ma yi ne, fɔ ài yi wo tii makoto k'a masawali, fɔsa a jei kana tɛɛ josomakasi boloma. 8Wo lɔ, ǹ'ài madiyala, ài yi kanundeya gbugbu lagbɛ wo tii yɛ. 9Dailu min na kɛla ǹ na lɛtɛlɛ wo sɛvɛla ài ma, wo le ǹ tɛɛ a fɛ le k'ài lɔsuma k'a lɔn ni ài koloyine ko bɛ lɔ. 10Ni ài do ka mɔɔ min makoto yi ne, ǹe fana vɛ wo tii makoto. Ni do ko dɔ ka kɛ je, ǹ ka kan ka min lɔkoto, m̀'ɛ a lɔkoto àiya ko lɔ ka Masa Tɔɔmasenin kɛ ǹ sele le, 11fɔsa Soitana kana a hangili labaale mɔ ma, kamasɔlɔn mɔ tɛ divi lɔ ka bɛn aa kojatesiininnu ma.

Pɔli haminko Tolohasi so kɔnɔ

12 # Kɛkolu 20.1. Ǹ ka se Tolohasi so kɔnɔ mingɛ Masa Tɔɔmasenin ya Samakan Kein lasenko lɔ, ǹ k'a ye ko mɔ Tii tɛɛ vɛ da laka ǹ yɛ wo ko lɔ. 13Kɛɛ ǹ josolajiinin tɛɛ tɛ, kamasɔlɔn m̀ ma m̀ badenma Tite talan je. Wo lɔ, ǹ k'ai diɲa ɲinin ka bɔ je ka taa se Masaduwani koovi lɔ.

Mɔ vɛ see sɔlɔn Masa Tɔɔmasenin sabu la

14Kɛɛ ǹ'i balika bɔla Ala yɛ, min yi bilala mɔ ɲa kudein Masa Tɔɔmasenin ya seesɔlɔn taama lɔ. A do yi baalela mɔ fɛ ka Masa Tɔɔmasenin lɔnko lajɛzɛn fan bɛ lɔ, iwo wusulan suma yi jɛzɛnna fan bɛ lɔ teme. 15Kamasɔlɔn mɔ kɛyine iwo wusulan, Masa Tɔɔmasenin yi min lasena Ala ma salaka le, min suma diyanin yi jɛzɛnna mɔɔ lakisininnu ni halakibatɔlu bɛ tɛma. 16Wo do kɛyine iwo saya suma halakibatɔlu yɛ, min yi saya lasena ai ma. Kɛɛ a kɛyine iwo niimaya suma mɔɔ lakisininnu yɛ, min yi niimaya lasena ai ma. Ado jene senin baale wo la? 17Mɔ do kɛnin tɛ iwo dɔ mɔɔ siyama minu yi Ala kumakan kɛla julayafen ne, mafɔ mɔɔ sɔvɛ le mɔ le, minu yi kumala Ala ɲakɔlɔ Masa Tɔɔmasenin ya see lɔ, iwo mɔɔ minu kelanin Ala bolo.

Currently Selected:

2 Kolɛntikalu 2: MBT2023

Highlight

Copy