Levitika 7
7
Nā Tāulaga mo te Nofohala
1“Ko nā folahaga iēnei mo te faiga o te tāulaga mo te nofohala, he mea e matuā paia lava. 2Ko te manuvaefa mo te tāulaga tēnei e tatau ke tāmate i te itū ki mātū o te fata faitāulaga, i te koga e tāmate ai nā manu mo nā tāulaga mū, ma ko tona toto e liaki ki nā itū uma o te fata faitāulaga. 3Ko te gako uma e tō mai ki fafo, oi ofo atu ai i luga o te fata faitāulaga; ko te gako i te toke, ko te gako e tatao ai nā tōtōga, 4nā fatugako e lua ma te gako e tatao ai, ma te vāega e hili te lelei o te ate, e kave kehe uma fakatahi ma nā fatugako. 5E tatau ke huhunu e te ohitāulaga nā mea iēnei i luga o te fata faitāulaga, ke fai ma meālofa meakai e ofo atu i te afi ki te Aliki. Ko he tāulaga mo te nofohala tēnei. 6Ho he tama tāne mai nā kāiga o nā ohitāulaga, e mafai ke kai ki ei, kae e tatau ke kai i he koga e paia, auā e paia lele.
7“Ko te folahaga e fokotahi e āfia uma ai te tāulaga mo te nofohala ma te tāulaga mo nā agahala; ko nā kanofi o nā manu, e a te ohitāulaga e ohia te tāulaga. 8Ko te paku o te manu na ofo ma tāulaga mū, e a te ohitāulaga na ofo e ia te tāulaga. 9Ho he tāulaga haito e tao i he ogāumu, pe tunu i he falai, pe i luga o he ukamea māfolafola, e a te ohitāulaga e ohi e ia te tāulaga ki te Atua. 10Kae ko nā tāulaga haito e hēki tunua, pe na palu i te lolo, pe na kaumai mamago, e a te kaukāiga ohitāulaga uma, ma e tatau ke fakahoa tutuha kia te kilātou uma.
Nā Tāulaga mo te Māfuta Fakatahi
11“Ko nā folahaga iēnei mo te faiga o te tāulaga mo te māfuta fakatahi, e ofo atu e he tino ki te Aliki. 12Kāfai e ofo atu e he tino hana tāulaga ke fai ma tāulaga fakafetai ki te Atua, ko te manuvaefa mo te tāulaga e tatau ke kaumai fakatahi ma he tāulaga pāpā falaoa e hēki fakafefetea—pe ni falaoa māfiafia na fai i te falaoa mata e palu i te lolo olive, pe ni falaoa mānifinifi e valivali ki luga te lolo olive, pe ni keke e fai i te falaoa mata ma palu ki ei te lolo olive. 13Ko te tāulaga tēnei mo te māfuta fakatahi e tatau ke kaumai fakatahi ma ni pāpā falaoa e palu ki ei te fefete. 14E kaumai e ia ni itūkāiga falaoa takitahi, ke ofo atu ma meālofa ki te Aliki; ko nā mea iēnei e a te ohitāulaga tēia e liakia te toto o te manuvaefa ki te fata faitāulaga, mo te tāulaga o te māfuta fakatahi. 15Ko nā kanofi o tana tāulaga, e tatau ke kai i te aho lava e ofo atu ai; e hē tatau ke i ei he mea e fakatotoea ki te tāeao e hohoko ai.
16“Kāfai e kaumai e he tino he tāulaga mo te māfuta fakatahi ke fakakātoatoa ai he takutinoga, pe ke fai ma ana tāulaga o te lotomalie, ko te tāulaga tēnā e tatau ke kai i te aho lava e ofo atu ai e ia, kae kāfai e i ei ni mea e totoe, e tatau ke fakaaogā i te aho e hohoko ai; 17kae ko nā mea e totoe o nā kanofi o te tāulaga, e tatau ke huhunu i te tolu o aho. 18Kāfai ni mea kanofi e kai i te tolu o aho, ka hē talia te tāulaga a te tino tēnā e te Atua. Ka hē faitaua e vē ko he tāulaga e a ia, auā kua hē mamā, ma ko ai lava e kai ki ei, ka nofohala ia ona kua ia faia te mea tēnei.
19“Ko nā kanofi manu e paki ki hō he mea e hē mamā i nā tu tau tāpuakiga, e hē tatau ke kai ki ei he tino, kae e tatau ke huhunu i he afi. Kae ko iētahi mea kanofi, ho he tino e mamā i nā tu tau tāpuakiga, e mafai ke kai ki ei. 20Kāfai he tino e hē mamā i nā tu tau tāpuakiga kae kai ki he mea kanofi o te tāulaga mo te māfuta fakatahi e ofo atu ki te Aliki, ka tipi kehe ia mai te fakapotopotoga a oku tagata. 21Kāfai he tino na paki atu ki he mea e hē mamā ai i nā tu tau tāpuakiga—pe ki he tagataola pe ki he manuvaefa, pe ki he meaola e totolo i te kelekele—oi toe kai ai ki he mea kanofi o te tāulaga mo te māfuta fakatahi e ofo atu mo te Aliki, ka hē toe takua ia e o te Atua.”
E Fakahā te Kai ki te Gako ma te Toto
22Na vāgana te Aliki kia Mohe, ma lea vē atu: 23“Lea ki nā tino Ihalaelu: Ko koutou e hē kakai lele ki te gako o he pōvi, pe o he māmoe, pe o he oti. 24Ko te gako o he manuvaefa na maua kua mate, pe na tāmate e he manu fekai, e mafai ke fakaaogā ki ho he mea, kae e hē mafai ke kai e koutou. 25Ho he tino o koutou e kai ki te gako o he manuvaefa e ono ofo atu ma meālofa meakai i te afi mo te Aliki, ka hē toe takua te tino tēnā he tagata o te Atua. 26#Ken 9.4; Lev 7.10-14; 19.26; Teu 12.16; 23; 15.23Pe ko fea lava te nonofo ai koutou, ko koutou e hē kakai lele ki te toto o he manulele, pe o he manuvaefa. 27Ho he tino e kai ki he toto, ka hē toe takua ia, he tagata o te Atua.”
Inati o nā Ohitāulaga
28Na vāgana te Aliki kia Mohe, ma lea vē atu: 29“Lea ki nā tino Ihalaelu: Ho he tino e ofo atu hana tāulaga mo te māfuta fakatahi, e tatau ke kaumai e ia he vāega o te tāulaga tēnā, ke fai ma meālofa fakapitoa ki te Aliki. 30E kaumai e ia i ona lima te gako fakatahi ma te fatafata o te manuvaefa, ke fai ma meālofa fakapitoa e ofo atu i te afi ki te Aliki. 31Ka huhunu e te ohitāulaga te gako i luga o te fata faitāulaga, kae ko te fatafata e a Alona ma ona ataliki, te kau ohitāulaga. 32Ko te ālaga taumatau e tuku atu e ia ke fai ma inati 33o te ohitāulaga e ia ofo atua te toto ma te gako o te tāulaga mo te māfuta fakatahi. 34Ko te fatafata o te manuvaefa ko he meālofa fakapitoa, ma ko te ālaga taumatau i tua ko he inati tēnā kua talia e te Aliki mai te nuku o Ihalaelu, ma e tuku atu e ia kia Alona te ohitāulaga ma ona ataliki, ke fai ma o lātou inati tūmau.”
35Ko te inati tēnei na vavae mo Alona ma ona ataliki mai nā tāulaga meakai e huhunu i te afi ki te Aliki, mai te aho na fakauku ai ke fai ma ohitāulaga. 36I te aho na fakauku ai kilātou, na fakatonu ai e te Aliki ia tagata Ihalaelu ke kilātou fōkia te inati tēnei kia Alona ma ona ataliki, ke fai ma o lātou inati tūmau, i augā tupulaga koi hau.
37Ko iēnā la nā folahaga mo nā tāulaga mū, tāulaga haito, tāulaga mo na agahala, tāulaga mo te nofohala, tāulaga mo te fakapaiaga, ma nā tāulaga mo te māfuta fakatahi, 38na tuku mai e te Aliki kia Mohe i luga o te Mauga o Hinai, i te fakatonuga e ia o tagata Ihalaelu ke kaumai a lātou meālofa ki te Aliki i te vao o Hinai.
Currently Selected:
Levitika 7: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
