Levitika 6
6
1 #
Nūm 5.5-8
Kua vāgana te Aliki kia Mohe, 2“Kāfai he tino o koutou e agahala ma hē fakamāoni ki te Aliki, ona kua muhu oi toe fakafoki he mea na tuku ake e tona tuākoi ke ia teua, pe kaihohoa e ia hana mea, pe fakavalea foki e ia, 3pe kāfai foki e maua e ia he mea na galo kae pepelo e hēki ia kitea—kāfai e tautō pepelo, pe ia faia ho he agahala e vē ono fai e tagata— 4kāfai la ia kua agahala ma kua nofohala, e tatau ke toe fakafoki e ia te mea na kaihohoa pe na kave e ia i he auala piko, pe ko te mea na tuku ake ke kikila e ia, pe he mea na galo na maua e ia, 5pe ko ho hētahi lava mea na tautō pepelo ai ia. E tatau ke toe totogi e ia te tau kātoa ma fakaopōpo ki ei he lua hefulu pahene, i te aho e ofo atu ai e ia he tāulaga mo te nofohala. 6Ke fai ma tāulaga mo te nofohala ki te Aliki, e tatau ke kaumai e ia ki te ohitāulaga mai tana lafumāmoe, he māmoe poa e hēai he māila i te tino, pe fakatau mai foki he māmoe i he tau e tutuha. 7I te faiga tēnei, ka ofo atu ai e te ohitāulaga te tāulaga mo te agahala a te tino i mua o te Aliki, ma ka fakamāgalo ai ia mai nā mea uma na ia faia, na ala ai tona nofohala.”
Nā Tāulaga Mū
8Kua vāgana te Aliki kia Mohe, 9“Fōki kia Alona ma ona ataliki te fakatonuga tēnei: ‘Ko iēnei nā folahaga mo te faiga o nā tāulaga mū: Ko te tāulaga mū e tuku i luga o te fata faitāulaga i te pō kātoa ke pa ki te tāeao, ma ko te afi e tatau ke ola pea lava i luga o te fata faitāulaga. 10E kofu e te ohitāulaga ona kofu lino i fafo o tona kofuvae loto lino, oi kave kehe mai ai e ia te lefulefu o te tāulaga mū, ma tuku ki tafa o te fata faitāulaga. 11Oi hui ai ona kofu ma fai iētahi ona kofu, ma kave ai e ia te lefulefu ki fafo o te api, ki he mea e mamā i nā tu tau tāpuakiga. 12Ko te afi i luga o te fata faitāulaga e tatau ke ola pea lava, ma hē tukua lele ke mate. I tāeao uma, e tuku e te ohitāulaga ni fafie ki luga o te afi, oi fālite ai ki luga te tāulaga mū, ma huhunu te gako o te tāulaga mo te māfuta fakatahi. 13Ko te afi e tatau ke mumū pea lava i luga o te fata faitāulaga, ma e hē tatau lele ke mate.
Nā Tāulaga Haito
14“ ‘Ko nā folahaga iēnei mo te faiga o nā tāulaga haito: Ko nā ataliki o Alona te ofo atua te tāulaga haito ki te Aliki i mua o te fata faitāulaga. 15E kaumai e te ohitāulaga e tiute, he lulukugā falaoa mata e hili te lelei ma ni lolo mai te tāulaga haito, fakatahi ai ma nā meamanogi uma lele kua maua mo te tāulaga haito, ma huhunu i luga o te fata faitāulaga, ke fai ma fakailoga, ko nā mea uma lele mo te tāulaga haito, kua ofo uma atu mo te Aliki. Ko te manogi o te tāulaga tēnei, e fiafia ai te Aliki. 16Ko te vāega o te tāulaga e totoe, e a Alona ma ona ataliki e kai; e tatau ke fai i he falaoa tao e hē tukua ki ei he fefete, ma ke kai i he koga e paia, i loto o te lotoā o te Falekie Tapu. 17Ke manatua, e hē tukua ki ei he fefete. Kua kō tuku atua ki nā ohitāulaga, ke fai ma o lātou inati o te meālofa meakai kua ofo mai kia te au i te afi. E vē foki lava ko te tāulaga mo nā agahala, ma te tāulaga mo te nofohala, ko he mea tēnei e matuā paia lava. 18Ko nā lāpuna tāne o Alona ka kakai ki ei—ko to lātou vāega tūmau tēnā mai nā meālofa meakai e ofo atu i te afi ki te Aliki. Pe ko heā lava te paki ki nā mea iēnei ka paia.’ ”
19Na vāgana foki te Aliki kia Mohe, 20“Ko tēnei te tāulaga e kaumai e Alona ma ona ataliki ki te Aliki, i te aho e fakauku ai: e fokotahi te kilokalama#6.20 Epelu tahi-vae-hefulu o te epaha o te falaoa mata e hili te lelei, ke fai ma tāulaga haito i nā aho takitahi, e āfa mo te tāeao, oi āfa mo te afiafi. 21E palu ki ei te lolo olive, ma tunu i luga o he ukamea māfolafola, oi nuti ai ma ofo atu ma tāulaga haito, ko tona manogi e fiafia ai te Aliki. 22I augā tupulaga takitahi uma, ko te Ulu Ohitāulaga e hui kia Alona, te ka tapena e ia te tāulaga. Ko he tāulaga tēnei e ofo atu ki te Aliki, ma e tatau ke mū kātoa. 23E hēai he vāega o te tāulaga haito tēia e ofo atu e he ohitāulaga e kaia; e tatau ke huhunu uma.”
Nā Tāulaga mo nā Agahala
24Na vāgana te Aliki kia Mohe, 25“Fōki kia Alona ma ona ataliki nā folahaga iēnei mo te faiga o te tāulaga mo nā agahala. Ko te manuvaefa mo he tāulaga mo nā agahala, e tatau ke tāmate i mua o te Aliki, i te itū ki mātū o te fata faitāulaga, te koga e tāmate ai nā manu mo nā tāulaga mū; ko te tāulaga tēnei e matuā paia lava. 26Ko te ohitāulaga e ohi e ia te tāulaga mo nā agahala, e tatau ke ia kaia tona vāega i he koga paia, te lotoā o te Falekie Tapu. 27Pe ko heā lava e paki atu ki te kanofi o te manu, ka kavea ma mea e paia. Kāfai he kie e pīhia i te toto o te tāulaga, e tatau ke ufi i he koga e paia. 28Ho he uloele e haka ai nā kanofi e tatau ke tatake, kae kāfai ko he ulo apamemea, e tatau ke olo mamā ia loto ma fufulu i ni vai. 29Ho he tama tāne i te kaukāiga o nā ohitāulaga e mafai ke kai ki te tāulaga tēnei; ko he tāulaga tēnei e matuā paia lava. 30Kae kāfai ho he vāega o te toto e kaumai ki loto o te Falekie Tapu ma fakaaogā i nā hāuniga mo te fakamāgaloga o nā agahala, e hē tatau la ke kai te manuvaefa tēnā; e tatau ke huhunu.
Currently Selected:
Levitika 6: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
