Levitika 5
5
Nā Mea e Tatau ke Ofo ai he Tāulaga mo nā Agahala
1“ ‘Kāfai he tino e fakatonu e te fakamahinoga ke tūlaki mo hana fakamatalaga ki he mea na ia kitea pe na ia iloa kae muhu, ka pakū lava ki ona luga te fakahalaga.
2“ ‘Kāfai he tino e paki tona lima ki he mea e hē mamā i nā tu tau tāpuakiga—e vē ko he manuvaefa kua mate, pe he manu tāvao pe he manu tauhi, pe he meaola hē mamā foki e totolo i luga o te kelekele—e ui lava e hēki faia ma tona iloa, kae kua hē mamā lava ia ma kua nofohala ai.
3“ ‘Kāfai he tino e paki tona lima ki he mea e hē mamā ona ko faiga a te tagata—pe ko heā lava—e ui lava e hēki ia faia ma tona iloa, kae e ia hāfia loa lava tana mea kua fai, oi ka nofohala ai loa ia.
4“ ‘Kāfai he tino e fai hana tautōga fāvalevalea o ho he itūkāiga—pe mo he lelei pe mo he kino—e nofohala ia i te taimi lava e ia hāfia ai tana mea kua fai.
5“ ‘Kāfai he tino e nofohala i hō he mea o nā mea iēnei, e tatau ke fakailoa e ia i mua o tagata ko ia kua agahala. 6Ma e tatau ai ke kaumai e ia ki te Aliki he māmoe fafine, pe he oti fafine, ke totogi ai tana agahala. Oi ka ofo ai e te ohitāulaga te tāulaga mo nā agahala a te tino tēnā.
7“ ‘Kāfai he tino e hē ia nafatia he māmoe pe he oti, e tatau ke kaumai e ia ki te Aliki he luagamata lupe vao, pe o te itūkāiga taigogole; ko tētahi ke fai ma tāulaga mo nā agahala, ma tētahi ke fai ma tāulaga mū. 8E kaumai e ia ki te ohitāulaga, oi ofo ai muamua e te ohitāulaga te tāulaga mo nā agahala. E gagau e ia te ua kae e hē momotu kehea te piho, 9oi hauhau ai he vāega o te toto ki te itū o te fata faitāulaga, ma fakagogolo te toto e totoe ki te tūlaga o te fata faitāulaga. Ko he tāulaga mo nā agahala tēnei. 10Oi ofo atu ai e te ohitāulaga tētahi lupe ma tāulaga mū, e tuha ai ma nā tūlāfono. I te faiga tēnei, ka ofo atu ai e te ohitāulaga te tāulaga mo agahala a te tino tēnei, ma ka fakamāgalo ai ia.
11“ ‘Kae kāfai e hē ia nafatia ni lupe vao e lua, pe ni lupe e lua o te itūkāiga taigogole, e tatau la ke kaumai e ia he kilokalama o te falaoa mata e hili te lelei, ke fai ma tāulaga mo nā agahala; e hē ia tukua ki ei he lolo pe he meamanogi. 12E kaumai e ia tana tāulaga ki te ohitāulaga, oi kave ai e te ohitāulaga he lulukugā falaoa mata ke fai ma fakailoga, ko he tāulaga kua ofo kātoa atu ki te Aliki. Oi ka huhunu ai e ia i luga o te fata faitāulaga, e fakaopōpo ki nā meālofa meakai na ofo atu i te afi ki te Aliki. Ko he tāulaga tēnei mo nā agahala. 13I te faiga tēnei, ka ofo atu ai e te ohitāulaga te tāulaga mo nā agahala a te tino, ma ka fakamāgalo ai ia. Ko nā falaoa mata e totoe, e a te ohitāulaga, e vē foki lava ko te meālofa haito.’ ”
Nā Tāulaga mo te Nofohala
14Na vāgana te Aliki kia Mohe, 15“Kāfai he tino e hē fakamāoni ki te Aliki ona kua fai e ia te agahala ma tona hē iloa, e tuha ai ma nā mea kua fakatō mo te Aliki, e kaumai e ia ki te Aliki he tāulaga mo te nofohala. Ko te tāulaga tēnei e tatau ko he māmoe poa pe he oti poa mai tana lafu e hēai he māila i te tino, pe fakatau mai e ia he manu vēnā, e tutuha te tau kāfai e fakaliu tupe hiliva, i te fua māhani o te nofoaga paia. 16E tatau ke toe totogi e ia te tau o nā mea kua uma te fakapaia, e hēki ia totogia i te kāmataga, ma fakaopōpo ai ki ei te lua hefulu pahene, oi tuku uma atu ai ki te ohitāulaga. Oi ka ofo atu ai te māmoe poa e te ohitāulaga ke fai ma tāulaga mo te nofohala, ma ka fakamāgalo ai te tino tēnā.
17“Kāfai he tino e agahala ma tona hē iloa, ona kua holi e ia hō he fakatonuga a te Aliki, e ui lava e hē ia iloa, e nofohala lava ia, ma e pakū lava ki ona luga te fakahalaga. 18E tatau ke kaumai e ia ki te ohitāulaga, he māmoe poa e hēai ni māila mai tana lafu, pe totogi he manu e tutuha tona tau, ke fai ma tāulaga mo te nofohala. I te faiga tēnei, ka ofo atu ai e te ohitāulaga he tāulaga mo te agahala na fai e te tino tēnei ma tona hē iloa, ma ka fakamāgalo ai ia. 19Ko he tāulaga mo te nofohala tēnei, auā kua hala ia i mua o te Aliki.”
Currently Selected:
Levitika 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
