Levitika 4
4
Nā Tāulaga mo nā Agahala
1Na vāgana te Aliki kia Mohe, 2“Tautala ki tagata o Ihalaelu, ma tuku atu ki ei nā fakatonuga iēnei: ‘Kāfai he tino e agahala ona kua holi e ia hētahi o nā fakatonuga a te Aliki kae e hēki fakamoemoe ke ia holia, e tatau ke mulimuli ki nā tūlāfono iēnei.#Nūm 15.27-29
3“ ‘Kāfai ko te Ulu Ohitāulaga#4.3 Epelu te ohitāulaga kua fakauku E vēnā foki i te 4:5, 16 te kua agahala, ma kua nofohala ai te nuku kātoa, e tatau ke kaumai e ia ki mua o te Aliki, he punuāpōvi poa e hēai ni māila i tona tino, ke fai ma tāulaga mo te agahala kua ia faia. 4E kaumai e ia te punuāpōvi poa ki te fāitotoka o te Falekie Tapu, ma fakauta tona lima ki te ulu o te manu, oi tāmate ai e ia i mua o te Aliki. 5Oi kave ai e te Ulu Ohitāulaga he vāega o te toto ki loto o te Falekie Tapu. 6Oi lolō ai tona muamuālima ki te toto ma hauhau fakafitu e ia ki mua o te kiepupuni o te nofoaga paia, i mua o te Aliki. 7E tuku e ia he vāega o te toto ki nā nifohua i nā tulimanu o te fata faitāulaga e fakamū ai nā meamanogi i mua o te Aliki; ma ko te vāega o te toto e totoe e liligi e ia ki te fakavae o te fata faitāulaga mo nā tāulaga mū, tēia e i te fāitotoka o te Falekie Tapu. 8E kave kehe e ia te gako o te pōvi poa; te gako kātoa e tatao ai nā tōtōga, 9nā fatugako ma te gako e pipiki ai vēnā ma te vāega e hili te lelei o te ate. 10E kave e te ohitāulaga nā gako iēnei oi huhunu i luga o te fata faitāulaga e fakaaogā mo nā tāulaga mū, e vē lava ko te mea e fai e ia ki te gako mai te manu e tāmate ma tāulaga mo te māfuta fakatahi. 11Kae ka kave e ia iētahi vāega o te pōvi poa e totoe—te paku, nā kanofi uma, te piho, nā vae, nā tōtōga, e aofia ai ma tona otaota, 12ki he koga i fafo o te api e mamā i nā tu tau tāpuakiga, te mea e fakaputu ki ei te lefulefu. I kinā, i luga o te fakaputugā lefulefu, ka huhunu ai e ia i he afi e puha i ni fafie.
13“ ‘Kāfai te fakapotopotoga kātoa o Ihalaelu e agahala, ona kua holi e kilātou hētahi o nā fakatonuga a te Aliki kae e hēki fakamoemoe ke kilātou holia,#Nūm 15.22-26 14ko te taimi lava e iloa ai e kilātou e uiga ki ta lātou agahala, oi kaumai ai e kilātou ki mua o te Falekie Tapu he punuāpōvi poa, ke fai ma tāulaga mo nā agahala; 15e fakauta nā lima o nā toeaina o te fakapotopotoga ki luga o te ulu o te punuāpōvi poa i mua o te Aliki, oi tāmate ai i kinā. 16Oi kave ai e te Ulu Ohitāulaga he vāega o te toto o te pōvi poa ki loto o te Falekie Tapu, 17ma lolō tona muamuālima ki te toto, ma hauhau fakafitu i mua o te Aliki, i mua o te kiepupuni. 18Ka tuku foki e ia he vāega o te toto ki luga o nā nifohua i nā tulimanu o te fata faitāulaga, mo nā tāulaga meamanogi i loto o te Falekie Tapu, ma liligi te toto e totoe, ki te tūlaga o te fata faitāulaga mo nā tāulaga mū, i te fāitotoka o te Falekie Tapu. 19Oi kave kehe ai e ia te gako kātoa o te manu, ma huhunu i luga o te fata faitāulaga. 20Ka ia faia ki te pōvi poa tēnei, e vē lava ko te mea na ia faia ki te pōvi poa mo te tāulaga mo nā agahala, ma i te faiga tēnei, ka fakatino ai e ia te tāulaga mo nā agahala a te nuku, oi ka fakamāgalo ai kilātou e te Atua. 21Oi kave ai e ia te pōvi poa ki fafo o te api ke huhunu ai, e vē lava ko te pōvi poa muamua. Ko te tāulaga tēnei, e mo nā agahala a te fakapotopotoga kātoa o Ihalaelu.
22“ ‘Kāfai he takitaki o Ihalaelu e ia holia hētahi o nā fakatonuga a te Aliki tona Atua ma te hē ia iloa, kua nofohala lava ia. 23Kāfai kua fakailoa kia te ia tana agahala, e tatau ke kaumai e ia he oti poa e hēai he māila i te tino ke fai ma tāulaga. 24E tatau ke fakauta tona lima ki luga o te ulu o te oti poa ma tāmate i te itū ki mātū o te fata faitāulaga, i te mea e tāmate ai nā manuvaefa mo nā tāulaga mū. Ko he tāulaga tēnei mo ana agahala. 25Oi lolō ai te muamuālima o te ohitāulaga ki te toto o te manu ma tuku ki nā nifohua o te fata faitāulaga e ohi ai nā tāulaga mū, kae liligi te toto e totoe ki te tūlaga o te fata faitāulaga. 26E tatau ke huhunu e ia te gako kātoa i luga o te fata faitāulaga, e vē ko te gako o te tāulaga mo te māfuta fakatahi. I te faiga tēnei, ka ofo atu ai e te ohitāulaga te tāulaga mo ana agahala, ma ka fakamāgalo ai ia.
27“ ‘Kāfai he tino o te nuku e agahala ona kua ia holia hētahi o nā fakatonuga a te Aliki, ma tona hē iloa, kua nofohala lava ia.#Nūm 15.27, 28 28Kāfai kua fakailoa kia te ia tana agahala, e tatau ke kaumai e ia he oti fafine, e hēai he māila i tona tino kātoa, ke fai ma ana tāulaga. 29E tatau ke fakauta tona lima ki luga o te ulu o te manu, oi tāmate ai i te itū ki mātū o te fata faitāulaga, i te mea e tāmate ai nā manu mo nā tāulaga mū. 30Oi lolō ai te muamuālima o te ohitāulaga ki te toto, ma tuku ki nā nifohua i nā tulimanu o te fata faitāulaga mo nā tāulaga mū, ma liligi te toto e totoe ki te tūlaga o te fata faitāulaga. 31Oi kaumai ai e ia ki fafo te gako kātoa o te manu, e vē foki lava ko tana mea e fai ki te tāulaga mo te māfuta fakatahi, ma huhunu ai e te ohitāulaga i te fata faitāulaga, mo he manogi e fiafia ai te Aliki. I te faiga tēnei, ka ofo atu ai e te ohitāulaga he tāulaga mo nā agahala a te tino tēnei, ma ka fakamāgalo ai ia.
32“ ‘Kāfai e kaumai e he tino he punuāmāmoe ke fai ma tāulaga mo ana agahala, e tatau ko he punuāmāmoe fafine, e hēai he māila i tona tino kātoa. 33E tatau ke fakauta tona lima ki te ulu o te manu, oi tāmate ai i te itū ki mātū o te fata faitāulaga, i te mea e tāmate ai nā manu mo nā tāulaga mū. 34Oi lolō ai te muamuālima o te ohitāulaga ki te toto o te manu, ma tuku ki nā nifohua i nā tulimanu o te fata faitāulaga e ohi ai nā tāulaga mū, ma liligi te toto e totoe ki te tūlaga o te fata faitāulaga. 35Oi kave kehe ai e ia te gako kātoa o te manu, e vē lava ko te faiga e fai ki te gako o te māmoe o te tāulaga mo te māfuta fakatahi, ma huhunu ai e te ohitāulaga i luga o te fata faitāulaga, fakatahi ma nā meālofa meakai e ofo atu ki te Aliki i te afi. I te faiga tēnei, ka ofo atu ai e te ohitāulaga te tāulaga mo nā agahala a te tino tēnei, ma ka fakamāgalo ai ia.
Currently Selected:
Levitika 4: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
