Levitika 2
2
Nā Tāulaga Haito.
1“ ‘Kāfai he tino e kaumai hana meālofa haito ki te Aliki, e tatau ko he meālofa falaoa mata e hili lelei. E liligi e ia ki ei te lolo ma lūlū ki luga ni meamanogi,#2.1 meamanogi Ko te pulu o he lākau e fakamamago ma e manogi gali kāfai e huhunu. E māhani foki oi fakaliu ki he pauta manogi gali 2oi kaumai ai ki nā ataliki o Alona, nā ohitāulaga. Oi kave ai e te ohitāulaga he lulukugā falaoa mata e hili te lelei, te lolo ma nā meamanogi uma ma huhunu i luga o te fata faitāulaga e vē ko hina vāega lava o te meālofa kātoa. Ko he meālofa meakai tēnā e ofo atu i te afi, ko tona manogi e fiafia ai te Aliki. 3Ko nā mea e totoe o te meālofa haito ka fōki mo Alona ma ona ataliki; ko he vāega e hili te paia, o nā meakai e ofo atu i te afi ki te Aliki.
4“ ‘Kāfai e kaumai e he tino he meālofa haito na tao i te ogāumu, e tatau ko he mea na fai i te falaoa mata e hili te lelei, ma e hēki palua ki ei he fefete. E mafai ke fai i ni pāpā falaoa e palu ki ei te lolo olive, pe ni mahi e valivali ki luga te lolo olive. 5Kāfai ko tana meālofa haito ko he pāpā falaoa e tunu i luga o he ukamea māfolafola, e tatau ke fai i te falaoa mata e hili te lelei, e palu i te lolo olive, kae e hē palua ki ei he fefete; 6tavaevae likiliki ma liligi ki luga ni lolo olive; ko he meālofa haito tēnā. 7Kāfai ko tana meālofa ko he falaoa e tunu i loto o he falai lahi, e tatau ke fai i te falaoa mata e hili te lelei, e palu ki ei he lolo olive. 8Pe ko heā lava te auala e tapena ai he meālofa haito mo te Aliki, e kaumai ki te ohitāulaga oi kave ai e ia ki te fata faitāulaga. 9E kave kehe e te ohitāulaga mai nā mea kua ofo atu mo te Aliki, hina vāega ke hui ai te meālofa haito kātoa, ma huhunu i luga o te fata faitāulaga. Ko he meālofa meakai tēnei e ofo atu i te afi, ko tona manogi e fiafia ai te Aliki. 10Ko nā mea e totoe o te meālofa haito ka fōki mo Alona ma ona ataliki. Ko te vāega tēnei e pito hili te paia e ofo atu i te afi ki te Aliki.
11“ ‘E hēai he meālofa haito e kaumai mo te Aliki e fai ki ei he fefete, auā e hēai he fefete pe he meli e tatau ke huhunu ma meālofa e ofo atu i te afi ki te Aliki. 12E mafai ke kaumai e koe nā mea iēnei ki te Aliki, e vē ko he meālofa o te fuata muamua o tō fātoaga, kae e hē mafai ke ofo atu i luga o te fata faitāulaga, mo he manogi e fiafia ai te Aliki. 13Tuku he māhima ki nā meālofa haito uma lele, auā ko te māhima e fakamanatu atu ai te feagaiga e pa ki te fakavavau, a koutou ma te Atua. Nahe puli lele oi tuku he māhima ki nā meālofa haito.
14“ ‘Kāfai e ofo atu e he tino ki te Aliki he meālofa haito o te fuata muamua o tona fātoaga, kaumai ni haito fōu kua tuki kae e hēki pala lelei, ma hunuhunu i te afi. 15Liligi ki ei he lolo olive ma lūlū ki luga nā meamanogi; ko he meālofa haito tēnā. 16Oi kave ai e te ohitāulaga he vāega ke hui ai te tāulaga kātoa ma huhunu i luga o te fata faitāulaga—ni haito, ni lolo olive ma nā meamanogi uma; ko he meālofa meakai tēnā e ofo atu i te afi ki te Aliki.
Currently Selected:
Levitika 2: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
