Roma 7
7
Ka Nyɔngɔŋ a bə Mbvurɨ Ntsi ayi nɨ Mɨtən Atú Bɨgɨnə ghe
1Tsɛʼ a nkənu nə ɨbɔmbɨma ɨban, nɨ mɨ zuʼ kɨ zhi anu za ma lɔnɨ ɨ soŋə mbɨ́ʼ ngə́ bən bɨtsum nɨ zhi a nyɔngɔŋ Mǒse ghe. A nɨ tsɛʼ mbáʼ ɨbɛn tsinɨ atú ntən mbáʼ nyɔngɔŋ a tsinɨ nɨ mɨtən atú bo ghe. 2A bɨgɨnə lɔgɨ ngə́, nyɔngɔŋ a soŋ ngə́ mangye nɨzɔ́ʼ a tsi nɨ nghɔŋə a mu nɨzɔ́ʼ bo ndóm ɨyi ngɔŋ nkfu tsum za ndóm ɨyi a tsinɨ atú ntɨŋ ə; lá be ndóm ɨyi a kfo, ka nyɔngɔŋ nɨzɔ́ʼ a bvurɨ nchwa ayi a wɛrə a nye ndóm ɨyi wa. 3Ma lan, be mangye a nɔŋ bo mbáŋnɨ́ zə daŋ mbáʼ ndóm ɨyi a bvurɨnɨ atú ntən muŋ bɨ mɨ tɔŋ ayi nɨ mangye achwurɨ ə; lá be ndóm ɨyi a kfo, nyɔngɔŋ nɨzɔ́ʼ a keʼ mbɨ́ŋə́ nchwǎ a mangye məwa. A tiʼ ndiʼ ngə́ ka wɛrə a bən mbe ayi mangye achwurɨ mbáʼ be a zɔ́ʼ a ŋwɔn daŋ ə. 4Ɨbɔmbɨma, nə nɨ adzaŋ za nɨ tsinɨ nɨ nchyɛ ghe. Be bɨ ghángə́ bɨ ghamə mbɨ́ʼ a Nyɔngɔŋ, nɨ kɨnə nkɨ nkfo mbɨ́ʼ ngə́ nɨ nɨ bagɨ ɨnye Kristo ghe; tɨtsɔŋnɨ nɨ tiʼ ntsi lá a mbó zɨ wa bɨ zhwémnɨ́nɨ́ a mbó nɨvwo taŋ á bɨgɨnə chi tiʼ be ngaŋ afaʼ Ŋwi ə. 5Mbɨ́ʼ ngə́ a nkfu wa bɨgɨnə kɨ́nə́ ngɨ̌ ɨnu tsa ɨnyam ɨnye lɔnə lá, Nyɔngɔŋ a kə́ shwɛbtɨ ɨkwaʼtɨ ngɨ ɨbvu tsa tsɨ tsínɨ́ a mu ɨnye ɨtsɨgɨnə, ɨnu ɨtsum tsa bɨgɨnə ghɨ́nɨ́, tsɨ tságɨ́nɨ́ awɨgɨnə a mbó nɨvwo ə. 6Lá, tɨtsɔŋnɨ Ŋwi a kyɛtɨnə mɨnkɨ mɨ abuʼ ma Nyɔngɔŋ a kórɨ́nə́ awɨgɨnə ɨwu, mbɨ́ʼ ngə́ bɨgɨnə chigɨrɨ a mbó Nyɔngɔŋ məwen wa a láʼnɨ́ nkórɨ́ awɨgɨnə ndɛn tso ngaŋ atsáŋ lá. Ma lan, ka bɨgɨnə mbvúrə́ fáʼə awɨgɨnə a mbó Ŋwi lá a nye ndóm wu lvuŋ wu nyɔngɔŋ wa bɨ ŋwánɨ́nɨ́ lá, bɨgɨnə faʼə be a nye ndóm wu fi wa Azhwi zə Fɛmnɨ a fɨʼtɨnə ghe.
Nyɔngɔŋ a Ghɨə Bɨgɨnə zhi ngə́ Bɨgɨnə ghɨ Ɨbvu ə
7A nə́ bɨgɨnə mɨ tiʼ soŋ ngə́ Nyɔngɔŋ zɨmboŋ a nɨ ɨbvu le? Kə́ kə́! Lá, a nɨ Nyɔngɔŋ məwen wa a ghɨ́nɨ́ ma zhi anu za ɨbvu nɨ wɛrə ghe. Nyɔngɔŋ a bá tú sóŋ ngə́, “Koʼ tɛgɨ ntəm ɨgho a nye azúm za a nɨ zə ŋwɔn adaŋ ə”, muŋ ma sá zhi ngə́ ntɛgɨ ntəm a nye azúm a ŋwɔn daŋ a nɨ ɨbvu ə. 8Lá, ɨbvu ɨ tsá a ndzum ntɨgə ntsi nɨ abárɨ́ a ngɨə ngə́ á ma ndǒ nchyɛ nɨ ɨbə́ŋ ɨdzúm tsa ka ma tsi aghan nɨ nchyɛ nɨ tsɛrə ghe. Nyɔngɔŋ a bá tú bé muŋ ɨbvu kfónə́ ghe. 9A nye nkfu zɨ tsɛrə ma tsí atú ntən mbáʼ nyɔngɔŋ wu tsɛrə a sé chyɛ, lá ma ghɨnə nji ntɨgə, ɨbvu tiʼ ntsi atú ntən, ma tiʼ nkfoə. 10Ntɨgə za ɨ tsínɨ́ be nɨ ngɨə á ma tsi ntən, ɨ ghɨ́ ma baŋnɨ nkfo ɨ kfonə. 11Ɨbvu ɨ tsí nɨ abárɨ́, ntsa a ndzum ntɨgə ntamtɨ aghan nkɨ njwitɨ aghə.
12Ma lan, Nyɔngɔŋ zɨmboŋ a fɛm, ntɨgə kɨ fɛm, nkuʼnɨ nkɨ mbɔŋə. 13Lá məzen a diʼ ngə́ anu zə shiʼnɨ a báŋnɨ́ ngɨ ma kfo le? Kə́ kə́! A nɨ ɨbvu mbáʼ ɨ ghɨ́nɨ́ ma kfo; ɨbvu ɨ tsá a ndzum anu zə shiʼnɨ ngyen nɨ nɨvwo a ɨnye me, taŋ á ngótɨ́ mbě ɨzhi tso ɨbvu tiʼ ntsi asaŋəsaŋ ə. Ma lan, a ntsǎ a ndzum ntɨgə, ɨbvu diʼ ngə́ zɨə bɨ́gɨ́ ntsa mbó ə.
Adzaŋ za Ɨbvu bo Ɨbɔŋ Shwuŋnɨnə a mu Ntəm Ŋwɔn Mɨsɔŋ a Ntsu ə
14Bɨgɨnə zhi ngə́ Nyɔngɔŋ a nɨ azúm azhwi a Ŋwi; lá ma baŋnɨ mbe ŋwɔn mɨsɔŋ a ntsu wa a kfónə́, wa bɨ fenɨ tso abuʼ a mbó ɨbvu ə. 15Ka ma ndzúʼə nkə́ njíɛ aghə anu za ma ghɨnə ghe; mbɨ́ʼ ngə́ ka ma ngɨə aghə anu za ma kɔŋnɨ ngɨə, lá ma ghɨə be anu za ma banə. 16Tɨtsɔŋnɨ, be ma ngɨ̌ ɨnu tsa ma sa kɔŋ, a be ngə́ ma bem ngə́ nyɔngɔŋ a kuʼnə. 17Ma lan, ka a lanɨ mbe ayi me wa a ghɨnɨ anu məziŋ ə; a baŋnɨ mbe be ɨbvu wa ɨ tsinɨ a mu ntəm ɨghə. 18Ma zhi ngə́ ka ɨbɔŋ wu tse ɨ tsi ayi a mu ɨnye me ghe — ma sóŋə́ lá mbě ɨzan tso ŋwɔn mɨsɔŋ a ntsu ə. Mbɨ́ʼ ngə́, ma baʼtə ndǒ ngɨ anu zə kuʼnɨnɨ ɨ ghɨnɨ lá, ma chi kaʼ a zɛrə ghɨə. 19Ka ma ngɨə aghə anu zə kuʼnɨnɨ za ma lɔnɨ ngɨə ghe; ma baŋnə ngɨə be ɨnu tsɨ tɔmnɨnɨ tsa ka ma ndǒ aghə ngɨə ghe. 20Be ma ngɨə anu za ma sa kɔŋ ngɨə, lá be ngə́ ka ma bvurɨ mbe aghan ŋwɔn wa a ghɨnə a zɛrə; a baŋnɨ mbe be ɨbvu wa ɨ tsinɨ a mu ntəm ɨghə.
21Ma lan, ma zɛn ngə́ nyɔngɔŋ məwen a faʼə ghe: be ma ndǒ ngɨ anu za a bɔŋnɨ, ma kaʼ nɨ zə daŋ tsi ntsa ngɨ ɨnu tsɨ tɔmnɨnɨ ə. 22A mu ɨsɔŋ me, ma tsi nɨ nɨdorɨ mbɨ́ʼ a nyɔngɔŋ Ŋwi ə. 23Lá nyɔngɔŋ wə daŋ a faʼnə a mu ɨnye me — nyɔngɔŋ wa a tǒkɨ́nə́ bo nyɔngɔŋ wa akwaʼtɨ azə a bémtɨ́nə́ ghe. A ghɨə ma be ngaŋ atsáŋ a mbó nyɔngɔŋ ɨbvu wa mbáʼ a tsinɨ afaʼ a mu ɨnye me ghe. 24Adzə́ŋnɨ a lanɨ ntsi a mu ntəm me be tɨsɨŋə! Ɨwa mɨ kwarɨ aghan a mbó ɨnyam ɨnye zen za ɨ shwuŋnə aghan ntsagə a mbó nɨvwo lá le? 25Mɨya a mbó Ŋwi, zɨ wa a faʼnə a məzen ntsǎ a ndzum Maʼmbyí Yeso Kristo ɨwɨgɨnə ghe!
Lə nɨ mbe ɨzan tɨtsɔŋnɨ ngə́: nɨ me nɨ me ma chi len a nyɔngɔŋ Ŋwi tsɛʼ nɨ akwaʼtɨ azan, mbəmnye zə baŋnə ndzúʼnə́ be a nyɔngɔŋ ɨbvu ə.
Currently Selected:
Roma 7: MNT
Highlight
Copy
Compare
Share
Want to have your highlights saved across all your devices? Sign up or sign in
© 2023, CABTAL
