Roma 5

Adzaŋ za Bɨgɨnə Tsinɨ nɨ Ntɛmnə a Ɨshi Ɨmɨgɨ Ŋwi ə

1Tɨtsɔŋnɨ wa Ŋwi a bemnɨ awɨgɨnə tso ɨbɛn ba bɨ chinɨnɨ a ɨshi ɨmɨgɨ zɨ ntsa a ndzum abeməntəm lá, mbɔnɨ tiʼ ntsi a tɨtərɨ Ŋwi abɔʼnɨ bɨgɨnə ntsa a ndzum Maʼmbyí ɨwɨgɨnə Yeso Kristo ghe. 2A ndzum Yeso Kristo bɨgɨnə zɛnə abɔʼ ɨ tsa ɨwu ɨ tsi nɨ abɔŋəntəm məzen za bɨgɨnə tíʼnə́ nchyɛ̌ wə mu lá. Ma lan, bɨgɨnə tɛrə mbɨ́ʼ ntsiŋə nɨ mɨntəm ɨmɨgɨnə mɨtsum ngə́ bɨgɨnə ghɨ kɨ tsi nɨ nɨfáŋ nɨ Ŋwi ə. 3Bɨgɨnə kə́ ntɛ́rə́ mbɨ́ʼ ngɨ́ʼ ɨzɨgɨnə, mbɨ́ʼ ngə́ bɨgɨnə zhi ngə́ ngɨ́ʼ ghɨə bɨgɨnə tsinə nɨ achigəntəm 4achigəntəm a ghɨə Ŋwi a bemtɨnə awɨgɨnə, mbemtə ɨzhi məzen ɨ ghɨə bɨgɨnə tsinə nɨ ntsiŋə nɨ ntəm tsum ə. 5Ntsiŋə məzen nɨ ntəm ɨtsum se awɨgɨnə a ntámtə́ mbɨ́ʼ ngə́ Ŋwi a nɨŋnə akɔŋnɨ azhi a mu mɨntəm ɨmɨgɨnə ntsa a ndzum Azhwi zə Fɛmnɨ, wa a benɨ azúm zə ghanɨ zə Ŋwi a mbó bɨgɨnə lá.

6A nkfu za bɨgɨnə chínɨ́ keʼ kwatɨ ɨtumbəm ɨtsɨgɨnə, Kristo a kfó mbɨ́ʼ atú a bə abɨgəntəm a nkfu za ɨ kúʼnɨ́nə́. 7A təntɨ a mbó ŋwɔn a nkfó atú ŋwɔn wa a chinɨnə. A chi be ngə́ ŋwɔn tsɛrə a chi zhwəŋtɨ a nkfó atú ŋwɔn wu shiʼnɨ ə. 8Lá Ŋwi a diʼnə ngə́ zɨə kɔŋ awɨgɨnə be tɨ́sə́n a nye ndómnji wɛnə ngə́ mbáʼ bɨgɨnə bvúrɨ́ mbé ngaŋ ngɨ mɨbvu, Kristo a kfó atú bɨgɨnə ghe! 9Ntsa a ndzum alɛm azhi, bɨ ghɨ Ŋwi a bem ngə́ bɨgɨnə chinɨ a ɨshi ɨmɨgɨ zɨə; Kristo a mɨ loŋ awɨgɨnə a mbó alwɛntɔ́ŋ a Ŋwi ɨ ghɛn nɨ mbyi ɛ. 10Bɨgɨnə bé ngaŋ kɨban Ŋwi ə; lá bɨ ghɨ́ awɨgɨnə a nye bɨson ɨbyi ntsa a ndzum nɨvwo nɨ Mɔn ɨyi ɛ. Tɨtsɔŋnɨ wa bɨ ghɨnə awɨgɨnə a nye bɨson ɨbyi lá, bɨ mɨ loŋ awɨgɨnə ɨ ghɛn nɨ mbyi ɨ tsa a ndzum ntsi ntən Kristo ghe. 11A se tsɛʼ mə lá be; bɨgɨnə dórə́ mbɨ́ʼ anu za Ŋwi a ghɨnə ntsa a ndzum Maʼmbyí Yeso Kristo ɨwɨgɨnə, zɨ wa a ghɨnə awɨgɨnə a nye bɨson bɨ Ŋwi tɨtsɔŋnɨ lá.

Adam bo Kristo ghe

12Ɨbvu kón atuəshe ntsa lá a ndzum táʼ ŋwɔn, ɨbvu ɨyi məwen ɨ tíʼ ngyen nɨ nɨvwo ə. Adzaŋ məwen, nɨvwo tíʼ ndamnɨ a tɨtərɨ ngwəgɨ ŋwɔn mɨsɔŋ a ntsu tsum mbɨ́ʼ ngə́ ŋwɔn tsum a ghɨnɨ ɨbvu ə. 13Mbɔŋə a bɨ ngǎ a Nyɔngɔŋ wa lá, ɨbvu ɨ tsí a mu mbyi ɛ. Lá adiʼ wa Nyɔngɔŋ a se ɨwu be, bɨ se ɨbvu a nkwaʼə ghe. 14Lá, ɨ lɔgɨnɨ a nkfu Adam ɨ kɔʼ kuʼ a nkfu Mǒse, nɨvwo tsí nɨ adaʼ atú ngwəgɨ ŋwɔn mɨsɔŋ a ntsu tsum, nchintɨ a ŋwɔn tsum wa a sé ndəŋndəŋ ɨbvu ghɨ tso Adam wa a sé zúʼnɨ́ ntɨgə Ŋwi lá.

Adam a kə́ ndiʼə abə́ŋ a zɨ wa a tsínɨ́ ɨ ghɨ yen lá. 15Lá bo wa bɨbá se ndəŋndəŋ be, mbɨ́ʼ ngə́ azúm zə ghanɨ za Ŋwi a ghánə́ adaŋədaŋə a se tso ɨbvu Adam be. A nɨ nkənu ngə́ ɨbɛn bə ghaʼnɨ kfókɨ́ mbɨ́ʼ ɨbvu táʼ ŋwɔn məwiŋ ə. Lá abɔŋəntəm a Ŋwi a ghaʼ ngɛn nɨ mbyi ɛ, ma lan, nə nɨ adzaŋ za azúm zə ghanɨ azhi za wɛrə a ghánə́ a mbó ɨbɛn bə ghaʼnɨ adaŋədaŋə a benɨ, ntsa a ndzum abɔŋəntəm a táʼ ŋwɔn məwen, mbe Yeso Kristo ghe. 16Líʼ a kɨ ntsi a tɨtərɨ azúm za Ŋwi a ghánə́ adaŋədaŋə abɔʼnɨ anu za ɨbvu táʼ ŋwɔn yenə nɨ zɛrə ghe. Mbáʼ táʼ ɨbvu wa a fúnɨ́ lá, a zɔ́ŋ nchwɛrɨ ɨsáʼ zen ngə́, “O vwo ɨsáʼ ə”; lá mɨbvu mə ghaʼnɨ baŋnɨ fu lá, a yiŋ azúm zə ghanɨ za bɨ ghánə́ adaŋədaŋə ngə́, “O so ɨsáʼ vwo!” 17A nɨ nkənu ngə́ a ndzum ɨbvu táʼ ŋwɔn nɨvwo tsí atú ɨnu ɨtsum mbɨ́ʼ a táʼ ŋwɔn məwa. Lá bɨ chi keʼ fɨʼnɨ a məzen nɨ anu za Yeso Kristo a ghɨnə ghe. Ŋwi a diʼnə abɔŋəntəm azhi za a chwinɨnə adaŋədaŋə mbɨ́ʼ a Yeso Kristo, ma lan, bɨgɨnə tiʼ ntsi nɨ adaʼ atú nɨvwo ə.

18Ma lan, mbáʼ táʼ ɨbvu wa táʼ ŋwɔn a ghɨ́nɨ́ a ghɨnɨ ŋwɔn tsum a vwo ɨsáʼ lá, ndəŋndəŋ, táʼ anu wa a chinɨnɨ wa táʼ ŋwɔn a ghɨ́nɨ́ a ghɨ Ŋwi a bem ngə́ ŋwɔn tsum a chinɨ a ɨshi ɨmɨgɨ zɨ, nkɨ nga awa nɨ ntsi ntɨŋ ə. 19Ɨ kwiʼtɨ, tso mbáʼ bɨ ghɨ́nɨ́ ɨnɔ ɨbɛn a nye ngaŋ ngɨ mɨbvu ntsa a ndzum atɨŋətú a táʼ ŋwɔn lá, ndəŋndəŋ, bɨ ghɨ ghɨ á ɨnɔ ɨbɛn chinɨ a ɨshi ɨmɨgɨ Ŋwi ɨ tsa a ndzum azuʼnɨ a táʼ ŋwɔn ə.

20Bɨ yén nɨ Nyɔngɔŋ lá taŋ ɨ kwiʼtɨ ɨfənu ə; lá mbáʼ ɨbvu gháʼnɨ́ ngɛn be nɨ mbyi lá, abɔŋəntəm a Ŋwi a kɨ ngáʼ ngɛn nɨ mbyi ntsa adzaŋ məwa. 21Ma lan, tso mbáʼ ɨbvu kɨ́nə́ sáʼ mbyi ntsa a ndzum nɨvwo lá, ndəŋndəŋ, abɔŋəntəm a Ŋwi a sáʼ mbyi ntsa a ndzum nchinə, ntságɨ́nə́ awɨgɨnə a mu ntsi ntən nɨnkoŋ ntsa a ndzum Yeso Kristo Maʼmbyí ɨwɨgɨnə ghe.

Currently Selected:

Roma 5: MNT

Highlight

Copy

Compare