Kolose 4
4
1Komi tomoyamoya, mami takínona mooitamoina be kivaavasaina imi pakonayao komatakaavatēdi Yaubada matana goi. Konuwāisi bego komi nakae mami Tomoya yábana goi.#Epeso 6:9.
Paulo ina liwola vaamliyaidi
(Kolose 4:2-6)
2Kokaasalēmi awanoi goi go, imi kawanoiyana goi mami kauyagu nukotomi goi koyauyāusa.#Epeso 6:18. 3Kai nakae manuma kokaawanōi bego Yaubada ina livala ana kenao tayamo ikatupáeve manuma, e bei itoboinema Guyau valena boi vamoounina katalavaite tomota yaidi. Guyau ana talavaitayana pasina yau deri goi akaaiyaka. 4Nakae kokaawanōi manugu bego itoboinegu valayana alumavivisidoko guna kawoi ana toboine nakae.
5Mami nanamsa koketooiya dōkana tomota geya sinumiseta yaidi goi. Taabu imi tuta kokavaavalūge, go sem imi tuta tamo tamo adi toboine guinuwa dedevidi koguuinuwēdi.#Epeso 5:16. 6Imi livala tuta liliuna madi kaanuwōiya, awoinu mana soroti nakae, e bei koyagoi nakonakae itoboinemi tomota tamo tamo idi livala kokatumapudi.
Paulo ina yabobona be ina nuwonúwana vaamliyaina
(Kolose 4:7-18)
Paulo valena manuna
7Tukiko#Guinuwa 20:4; Epeso 6:21-22; 2 Timoti 4:12; Taito 3:12. bei aetune iwo bei yau valegu madabokina ilatuwokoimi. Tauyana konōve unana tauyana siyada nakae ida kalo, tayamo tovaita aba numisa nakae ida tosavaiyuwo Tomoyayana umana.#Epeso 6:21-22. 8Tauyana aetune iwo ame manuna: Bego kaga kaga siisowóduwo yaima koyagoidi be nakae itoboine atemi ikipaiwoledi. 9Onesimo#Pilemoni 1:10-12. taiyao siwowoiwo unana tauyana siyada, nakae ida kalo aba numisa be nakae komi imi boda tayamo. Kaga liliuna siisowóduwo ameko goi adi taiyuwokova bei silatuwokoimi.
Paulo kidi idi vaduduwo
10Aristako,#Guinuwa 19:29, 27:2; Pilemoni 1:24. tauyana deri ana tokaiyako yau taiyao, ina yabobona yaimi. Banabasi nubaina Maki#Guinuwa 12:12,25, 13:13, 15:37-39. nakae ina yabobona yaimi. Makiyana manuna ami lovina bogina avinimi. Neta iwo, kouyaōne. 11Yeisu, tauyana youyuwoina Yusto, nakae ina yabobona yaimi. Kidi sakavaidi kuuponidi yaidi goi ame adi taito aditava guna tosavaiyuwoyao Yaubada ina kalibúbuna manuna sivaitegu. 12Epapira,#Kolose 1:7; Pilemoni 1:23. tauyana imi boda tayamo, ina yabobona yaimi. Tauyana Guyau Yeisu ina pákwana tayamo. Tuta liliuna ina kawanoi goi iikokóila manumi bego koovadókana, imi numisa goi komatuwo be nakae Yaubada ina nuwonúwana koyagoidoko. 13Moe moitamo. Tauyana akamoitamoe yaimi bego iikokóila gagaina manumi be nakae tonumisa Laodiseya be Iyerapoli goi manudi. 14Ida kalo doketa Luke#2 Timoti 4:11; Pilemoni 1:24. be Demasi#2 Timoti 4:10; Pilemoni 1:24. idi yabobona yaimi.
15Kai ima yabobona sedao Laodiseya goi yaidi, niuda Nimpa yaina be nakae Yeisu ana totugugunayao tauyana ina vada goi siitugúguna yaidi. 16Tutayana leta ame bogina sikatuyaivi konove, namliyeta koetūne ina Yeisu ana totugugunayao Laodiseya goi nakae kidi sikatuyaivi sinove. Ago kidi adi leta nakae sietune iwo bei komi kokabi kokatuyaivi. 17Ago Arikipo#Pilemoni 1:2. kolatuwōko kami,
‘Paisewa Tomoya bogina iivinim kunuwāisi kulukavave.’
18Guna yabobona ame toinigu nimagu goi agini.
Guna kaiyaka deri goi konuwokavāte.
Ida Tomoya Yeisu Guyau bei ikanuwoiyemi!
Yau Paulo be Timoti
Currently Selected:
Kolose 4: GVS
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
