San Juan 13
13
Jesús je̱'e̱ dyiscípulotu̶jk tyeky puju̶ ajku̶xy
1Tyimypyaatnu̶py najty je̱'e̱ Pascua xu̶u̶. Jesús ñejwu̶u̶by najty je̱' ko najty je̱'e̱ tiempo tu̶ paatnu̶ mu̶naa ya naaxwiiñ chonaanu̶ju̶ñ; nu̶kxy je̱'e̱ Dios Teedy mu̶dnaybyadaanu̶nu̶. Jesús je'emy najty je̱'e̱ dyiscípulotu̶jk oy tzoky ju̶wu̶'u̶y je̱'e̱ mu̶dyiibu̶ najty ya naaxwiiñ yajpaatku̶xpu̶ñ, y oy je̱'e̱ tzojky ju̶wu̶u̶y ajku̶xy u̶xtu̶ koonu̶ yajku̶'u̶yejky ma je̱'e̱ myu̶dzipu̶ñ.
2Y ko najty chuugaaygyu̶xy, tu̶ najty je̱'e̱ mu̶jku'u tyu̶gu̶u̶yñu̶ ma je̱'e̱ Judas Iscariote jyoot wyinma'añdyu̶ñ, je̱'e̱ Simón y'ung, ko najty je̱'e̱ Jesús ku̶'u̶ye̱ga'añ ma je̱'e̱ myu̶dzip ajku̶xyu̶ñ. 3Jesús ñejwu̶u̶by najty je̱'e̱ du'un ko je̱'e̱ Dios Teedy je̱'e̱ ane̱'e̱mu̶ñ najty ku̶xyu̶ tu̶ myo'oyii, y nan ñejwu̶u̶by najty ko jiiby tu̶ chooñ ma je̱'e̱ Diosu̶ñ y wyimbidaanu̶ba jiiby ja'adu'ook ma je̱'e̱ Diosu̶ñ. 4Chi pyu̶du̶'ky ma najty jim y'adzuu'ajtku̶xyu̶ñ, y u̶xpu̶jky je̱'e̱ wyit y chi tuway #13.4 toalla tu'ug ñayyajmoxxodzu̶u̶yu̶. 5Mu̶'it je̱'e̱ nu̶u̶ palangaanu̶jooty pu̶daaky, y pujtu̶gu̶u̶yu̶ je̱'e̱ dyiscípulotu̶jk tyeky ajku̶xy y po'ttu̶u̶tzu̶ ajku̶xy mu̶u̶d je̱'e̱ tuway je̱'e̱ mu̶dyiibu̶ najty tu̶ ñayyajmoxxodzu̶'u̶yiiju̶ñ.
6Ko je̱'e̱ Jesús je̱'e̱ Simón Pedro tyeky najty pujaanu̶, chi je̱'e̱ Simón Pedro ñu̶maayu̶:
—Windzú̶n, ¿nej miich je̱'e̱ ndeky u̶u̶ch xypyujaanu̶byu̶?
7Chi je̱'e̱ Jesús y'adzoowu̶:
—Cham ka'p m'okwinju̶wu̶'u̶yñu̶ tii u̶u̶ch du'un nduumbyu̶ñ, peru̶ jiinu̶ je̱'e̱ mwinju̶wu̶'u̶wu̶chñu̶.
8Chi je̱'e̱ Pedro je̱'e̱ Jesús nu̶maay:
—¡Nimu̶naa u̶u̶ch du'un nga'aku'ubú̶gu̶ch ko u̶u̶ch je̱'e̱ ndeky miich xypyúju̶ch!
Mu̶'it je̱'e̱ Jesús y'adzooy:
—Pu̶nu̶ ka'p je̱'e̱ mdeky nbuju̶, ka'p mu̶baad n'okdiscípulo'ajtnu̶.
9Mu̶'it je̱'e̱ Simón Pedro je̱'e̱ Jesús nu̶maay:
—¡Peru̶ oy Windzú̶n, nan ka'p u̶u̶ch je̱'e̱ ndekytyu̶'ajty je'eyu̶ xypyúju̶ch, nan xypyúju̶byu̶ch je̱'e̱ ngu̶'u̶ y je̱'e̱ ngu'ubajku̶ch nandu'un!
10Chi je̱'e̱ Simón Pedro je̱'e̱ Jesús y'adzoowu̶:
—Pu̶n naamdzida'ayu̶ñ, wa'adzu̶ ñi'kx kyopt je̱'e̱ kú̶xyu̶ju̶ñ, je'eyu̶ je̱'e̱ tyeky jakpuju̶ch. Y miich ajku̶xy wa'adzu̶ miich ajku̶xy; oy kya'anigú̶xyu̶ju̶ch mwa'adzu̶ch ajku̶xy.
11Je̱' ko ñejwu̶u̶by najty je̱'e̱ Jesús pu̶n najty ku̶'u̶ye̱gaanu̶bu̶ñ ma je̱'e̱ myu̶dzipu̶ñ, y paady je̱'e̱ du'un myu̶naañ: “Ka'p miich nigu̶xyu̶ mwa'adzu̶ch ajku̶xy”.
12Ko je̱'e̱ Jesús je̱'e̱ dyiscípulotu̶jk tyeky pujtaayu̶ ajku̶xy, chi je̱'e̱ wyit ja'adu'ook yajtu̶gu̶u̶y, y ñaxwé̱tznu̶ba ja'adu'ook meesu̶ winduuy, y myu̶naañ:
—¿Nej mwinju̶wu̶u̶ygyu̶xypy adaa du'un miich ajku̶xy, je̱'e̱ mu̶dyiibu̶ u̶u̶ch tu̶ nduñu̶ñ mu̶u̶d miich ajku̶xy? 13Miich ajku̶xy, Yaj'u̶xpu̶jkpu̶ y Windzú̶n u̶u̶ch miich xytyijku̶xy, y tu̶y'ajtu̶ñ je̱'e̱ du'un nej mmu̶naangu̶xyu̶ñ, je̱' ko jaanch je̱'e̱ du'un. 14U̶u̶ch it je̱' je̱'e̱ Yaj'u̶xpu̶jkpu̶ y je̱'e̱ Windzú̶n, neby je̱'e̱ mdeky miich tu̶ n'okpúju̶byu̶ ajku̶xy, nandu'unu̶tz miich je̱'e̱ mdeky amíñ u̶xyu̶py mbujku̶xu̶ch. 15U̶u̶ch tu̶ miich je̱'e̱ ijxpe̱jtu̶ñ tu'ug nmooygyu̶xy, neby miich mu̶baad nandu'un mduungu̶xyu̶ñ je̱'e̱ mu̶dyiibu̶ u̶u̶ch tu̶ nduñu̶ñ mu̶u̶d miich ajku̶xy. 16Janch tu̶y'ajtu̶ñ du'un nnu̶maaygyu̶xy ko ka'p je̱'e̱ tuumbu̶ jii ni tu'ug mu̶dyiibu̶ ni'igyu̶ mu̶j ni'igu̶ ka'p je̱'e̱ wyindzú̶nu̶ñu̶ba, y nan ka'p je̱'e̱ kexyo'oybyu̶ jii ni tu'ug mu̶dyiibu̶ ni'igyu̶ mu̶j ni'igu̶ ka'p je̱'e̱ mu̶dyiibu̶ naty tu̶ kyexyii. 17Pu̶nu̶ mwinju̶wu̶u̶ygyu̶xypy je̱'e̱ n'ayuuk ndu̶y'ajtu̶ch, y pu̶nu̶ mguydyuungu̶xypy du'un, mu̶'it jootkujk m'ijtku̶xu̶ch.
18“Ka'p miich du'un nigu̶xyu̶ ndijku̶xy, u̶u̶ch nnejwu̶u̶ybyu̶ch pu̶n u̶u̶ch tu̶ nwin'ixyu̶ñ. Peru̶ kuaanu̶ je̱'e̱ du'un yajkuydyuna'añ neby je̱'e̱ Dios ñaky myu̶na'añu̶ñ: ‘Je̱'e̱ mu̶dyiibu̶ u̶u̶ch tu'ugmúky xymyu̶dkaaybyu̶ñ, je̱' u̶u̶ch nmu̶dzip tu̶ wyimbijtnu̶.’ 19Pa'tykyu̶ adaa du'un n'awaanu̶ ajku̶xy, y ko naty adaa du'un tyuñyii jyadyii, mu̶'it mnejwu̶u̶ygyu̶xu̶ch ko u̶u̶ch je̱' je̱'e̱ Cristo. 20Janch tu̶y'ajtu̶ñ du'un nnu̶maaygyu̶xy pu̶n ku'ubu̶jkpu̶ñ je̱'e̱ mu̶dyiibu̶ u̶u̶ch naty nguejxypyu̶ñ, u̶u̶ch naty je̱'e̱ du'un xykyu'ubu̶jkp; y pu̶n u̶u̶ch xykyu'ubu̶jkpu̶ñ, je̱' naty je̱'e̱ du'un kyu'ubu̶jkypy je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ.
Jesús nigapxy ko je̱'e̱ Judas ku̶'u̶ye̱gaanu̶py ma je̱'e̱ myu̶dzipu̶ñ
(Mt 26.20-25; Mc 14.17-21; Lc 22.21-23)
21Ko je̱'e̱ Jesús du'un myu̶naandaay, chi mu̶k tyajy myaay, y chi oy wa'adz jaktimyñigapxy:
—Janch tu̶y'ajtu̶ñ du'un nnu̶maaygyu̶xy ko miich nidu'ugtu̶ xykyu̶'u̶ye̱gaamb ajku̶xy ma u̶u̶ch je̱'e̱ nmu̶dzipu̶ñ.
22Mu̶'it je̱'e̱ discípulotu̶jk ñaywyindu̶kxtu̶gu̶u̶yu̶gu̶xy amíñ u̶xyu̶py. Ka'p najty nejwu̶u̶ygyu̶xy pu̶n je̱'e̱ Jesús najty du'un tyijpyu̶ñ. 23Nidu'ugtu̶ ajku̶xy, je̱'e̱ mu̶dyiibu̶ je̱'e̱ Jesús najty oy chojkypy jyu̶wu̶u̶ybyu̶ñ, timyñamu̶jk najty je̱'e̱ Jesús mu̶d'u̶ña'ay cham y'adzuu'ajtku̶xy, 24y chi je̱'e̱ Simón Pedro kyu̶'u̶ yaj'ijxy je̱'e̱ discípulo mu̶dyiibu̶ oy yajtzojkp yajju̶wu̶u̶ybyu̶ñ ko je̱'e̱ Jesús wan yajtú̶y pu̶n du'un tyijpyu̶ñ. 25Chi je̱' je̱'e̱ Jesús ni'igyu̶ jaktaatzmu̶gowu̶u̶y, y yajtu̶u̶y:
—Windzú̶n, ¿pu̶n du'un mdijpy?
26Chi je̱'e̱ Jesús y'adzoowu̶:
—N'o'kku'umujyu̶ch je̱'e̱ tzajkaagy tu'ktúky, y je̱'e̱ mu̶dyiibu̶ u̶u̶ch je̱'e̱ tzajkaagykyu'umujy naty nmooybyu̶ñ, je̱' je̱'e̱ naty.
Mu̶'it je̱'e̱ tzajkaagy tu'ktúky ku'umujy y mooy je̱'e̱ Judas je̱'e̱ Simón Iscariote y'ung. 27Cham je̱'e̱ Judas je̱'e̱ tzajkaagy koondzóy, mu̶'ityu̶ je̱'e̱ mu̶jku'u mu̶k'eemby tyu̶gu̶u̶y ma je̱'e̱ jyoot wyinma'añdyu̶ñ. Chi je̱'e̱ Jesús ñu̶maayu̶:
—Je̱'e̱ mu̶dyiibu̶ mdune̱e̱mbyu̶ñ, tuungoj mu̶k'eemby.
28Peru̶ ni tu'ug je̱'e̱ mu̶dyiibu̶ najty jim adzuu'ajtku̶xpu̶ñ ma je̱'e̱ meesu̶ju̶ñ je̱'e̱ ayuuk ka'awinju̶wu̶u̶ygyu̶xy tii je̱'e̱ Jesús je̱'e̱ Judas ko du'un nu̶ma'ayu̶ñ. 29Je̱' ko je̱'e̱ Judas najty meeñgyonu̶'kp, paady du'un nije̱' winju̶wu̶u̶ygyu̶xy ko du'un je̱'e̱ Jesús najty du'un tijy ko je̱'e̱ Judas nu̶kxy tiga'atii juy mu̶dyiibu̶ xu̶u̶jooty yajtunaangu̶xypyu̶ñ, y nan nije̱' winju̶wu̶u̶ygyu̶xy ko je̱'e̱ Judas je̱'e̱ ayoobu̶du̶jk meeñ mo'owu̶ch ajku̶xy.
30Neby je̱'e̱ Judas je̱'e̱ tzajkaagy koondzooyu̶ñ, chi tu̶ba'ay pyu̶dzu̶u̶my. Tu̶ najty kyoodzu̶u̶yñu̶.
Je̱'e̱ jembyu̶ ane̱'e̱mu̶ñ
31Ko najty je̱'e̱ Judas tu̶ba'ay tu̶ pyu̶dzu̶my, chi je̱'e̱ Jesús myu̶naañ:
—Jada'achám u̶u̶ch je̱' je̱'e̱ ja'ay mu̶dyiibu̶ tzon tzajpjooty je̱'e̱ n'oy'ajt nmu̶k'ajt nyajku̶xu̶'u̶ga'añu̶ch, y nan nyajku̶xu̶'u̶ga'añu̶ch je̱'e̱ Dios y'oy'ajt myu̶k'ajt. 32Y pu̶nu̶ nyajku̶xu̶'kypyu̶ch je̱'e̱ Dios y'oy'ajt myu̶k'ajt u̶u̶ch je̱' je̱'e̱ ja'ay mu̶dyiibu̶ tzon tzajpjooty, nan xyajku̶xu̶'u̶gaanu̶byu̶ch je̱'e̱ Dios n'oy'ajt nmu̶k'ajt nandu'un, y mu̶k'eemby je̱'e̱ yajku̶xu̶'u̶ga'añ. 33Mu̶gu'uktu̶jk ajku̶xy, ka'p u̶u̶ch miich jeky n'okmu̶d'idaangu̶xnu̶. Xjya'a'u̶xta'awu̶bu̶ch miich ajku̶xy, peru̶ du'un neby u̶u̶ch je̱'e̱ judío ja'ay tu̶ nnu̶maaygyu̶xyu̶ñ, nandu'un miich cham nnu̶maaygyu̶xy: Ka'p mu̶baad mnú̶kxku̶xy ma u̶u̶ch nnu̶kxyu̶ñ. 34Cham je̱'e̱ jembyu̶ ane̱'e̱mu̶ñ nmooygyu̶xy: Ko amíñ u̶xyu̶py mnaychojku̶gu̶xu̶ch. Du'un neby u̶u̶ch miich ndzojkku̶xyu̶ñ, nandu'un miich amíñ u̶xyu̶py naychojku̶gu̶x. 35Pu̶nu̶ mnaychojkku̶gu̶xp amíñ u̶xyu̶py, mu̶'it je̱'e̱ ja'ay du'un ku̶xyu̶ nejwu̶u̶ygyu̶xu̶ch ko miich ndiscípulos'ajtku̶xy.
Jesús nigapxy ko je̱'e̱ Pedro kyuyu'udza'añyii
(Mt 26.31-35; Mc 14.27-31; Lc 22.31-34)
36Mu̶'it je̱'e̱ Simón Pedro je̱'e̱ Jesús yajtu̶u̶y:
—Windzú̶n, ¿ma mnu̶kxa'añ?
—Chi je̱'e̱ Jesús y'adzoowu̶:
—Ma u̶u̶ch nnu̶kxyu̶ñ, ka'p u̶u̶ch miich cham mu̶baad xypyanu̶kxy, jak'u̶x'aam u̶u̶ch xypyanú̶kxu̶ch.
37Chi je̱'e̱ Pedro je̱'e̱ Jesús nu̶maay:
—Windzú̶n, ¿ti ko cham mu̶baad nga'apanú̶kxy? ¡U̶u̶ch ka'p u̶u̶ch tii ndzu̶gu̶'u̶y nju̶wu̶'u̶y u̶xtu̶ nyé̱gu̶byu̶ch je̱'e̱ njugy'ajtu̶ñ ma je̱'e̱ o'ku̶ñ mu̶u̶d miich kyu̶xpu̶!
38Chi je̱'e̱ Jesús y'adzoowu̶:
—¿Nej jaanch ka'p tii mdzu̶gu̶'u̶y mju̶wu̶'u̶y, myé̱gu̶py je̱'e̱ mjugy'ajtu̶ñ ma je̱'e̱ o'ku̶ñ mu̶u̶d u̶u̶ch kyu̶xpu̶? Janch tu̶y'ajtu̶ñ du'un nnu̶ma'ay, ko ka'anu̶ naty je̱'e̱ tzeyñu̶'u̶'aa yaxu̶'u̶gyñu̶, tu̶ u̶u̶ch miich naty tu̶gu̶u̶g'ook xyñi'ikuyu'tznu̶, ko u̶u̶ch miich ka'p xy'ixy'aty.
Currently Selected:
San Juan 13: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005