Santiago 1
1
Je̱'e̱ yajpókxu̶ñ
1U̶u̶ch, Santiago, je̱'e̱ Dios y je̱'e̱ Windzú̶n Jesucristo tyuumbu̶, cham u̶u̶ch nyajpókxy ku̶xyu̶ je̱'e̱ Israel ja'ay mu̶dyiibu̶ tu̶ yajke̱e̱ku̶gu̶xy y tu̶ ñú̶kxku̶xy tzu̶naaybyu̶ xii yaa wiing naaxjooty.
Je̱'e̱ wij'ajt ke̱j'ajt mu̶dyiibu̶ je̱'e̱ Dios yejkypyu̶ñ
2“Mu̶gu'uktu̶jk, mu̶baad jootkujk mnayjyu̶wu̶u̶yu̶gu̶xy ko je̱'e̱ ayo'on jootmáy naty mayñax mbaatku̶xy m'ijxku̶xy. 3Tu̶ mnejwu̶u̶ygyu̶xy ko je̱'e̱ mmu̶bu̶jku̶ñ naty yaj'ijxmajtzku̶xy ko je̱'e̱ ayo'on jootmáy naty mbaatku̶xy m'ijxku̶xy, mu̶'it du'un mjajtku̶xy neby je̱'e̱ tzaachpyu̶ ayo'on mmu̶madaakku̶xu̶chu̶ñ mu̶u̶d je̱'e̱ mu̶k'ajt. 4Peru̶ jatytimy yajkoptu̶gu̶u̶ygyu̶x je̱'e̱ mu̶k'ajt y wan je̱'e̱ mjoot mwinma'añ xyajwaatzu̶ch ajku̶xy. Mmu̶dajtku̶xnu̶ch ka'pxy je̱'e̱ mmu̶bu̶jku̶ñ y ka'p tii myajtu̶goy'ajtku̶xnu̶ch.
5Pu̶nu̶ jii miich je̱'e̱ wij'ajt ke̱j'ajt ka'p nije̱' mmu̶dajtku̶xy, amdoowu̶ je̱'e̱ Dios ajku̶xy, y xymyooygyu̶xu̶p je̱', Dios myooby je̱'e̱ ja'ay ku̶xyu̶ mu̶j may y ka'p amaay amaay yeky, y nan ka'p nej myu̶na'añ. 6Peru̶ tu'ug'aa tu'ugjoot yujkwa'anu̶ch mu̶u̶d je̱'e̱ mu̶bu̶jku̶ñ, ka'p nidu'uñdyu̶ y'ame̱tzk jyootme̱tzku̶'u̶wu̶ch, je̱' ko je̱'e̱ mu̶dyiibu̶ aamé̱tzk jootme̱tzku̶u̶by, du'un je̱' neby je̱'e̱ mejy jye̱'tzmíñ jye̱'tzxú̶pyu̶ñ ko pyojy. 7Pu̶n du'un ja'ay'ajtpu̶ñ, ka'p je̱'e̱ tii pada'añ ma je̱'e̱ Windzú̶n Diosu̶ñ, 8je̱' ko wiing je̱'e̱ cham wyinmay y nan wiing naty jaboom juxtu̶kp wyinmaayñu̶bu̶, y ka'p je̱'e̱ wyinma'añ tyu'ugyu̶ch ajku̶xy.
9Je̱'e̱ mu̶bu̶jkpu̶du̶jk mu̶dyiibu̶ ayoogu̶xpu̶ñ mu̶baad je̱'e̱ jootkujk ñayjyu̶wu̶u̶yu̶gu̶xy pu̶nu̶ pube̱jt pudu̶gu̶u̶yu̶gu̶xp je̱'e̱ Dios. 10Je̱'e̱ mu̶bu̶jkpu̶du̶jk mu̶dyiibu̶ kume̱e̱ñu̶ñ ajku̶xy mu̶baad je̱'e̱ jootkujk ñayjyu̶wu̶u̶yu̶gu̶xy pu̶nu̶ pu̶jku̶gu̶xp je̱'e̱ Dios wyit myeeñ ajku̶xy. Je̱' ko du'un je̱'e̱ kumeeñdyu̶jk ajku̶xy neby je̱'e̱ pu̶jy ujtz mu̶dyiibu̶ ka'p y'ijttú̶yu̶ñ. 11Ko je̱'e̱ xu̶u̶ pyu̶dzu̶my y y'anda'agy mu̶k, chi je̱'e̱ ujtz tyu̶'u̶ch, chi je̱'e̱ pyu̶jy kya'ay y ka'p oy y'okku̶xu̶'knu̶. Y du'un je̱'e̱ kumeeñdyu̶jk jyadaangu̶xy, u̶x'o'ogaangu̶xy je̱'e̱ wyit myeeñ ajku̶xy.
Je̱'e̱ ayo'on jootmáy y je̱'e̱ mu̶dyiibu̶ ju̶bu̶ktuum yajka'abu̶ñ
12Jootkujk je̱'e̱ ja'ay ajku̶xy mu̶dyiibu̶ je̱'e̱ ayo'on jootmáy mu̶madaakku̶xpu̶ñ mu̶u̶d je̱'e̱ mu̶k'ajt, y ko naty tu̶ mu̶madaakku̶xy mu̶'it je̱'e̱ oy'ajt paatku̶xu̶ch je̱'e̱ jugy'ajtu̶ñ wiinu̶u̶xu̶u̶bu̶, je̱'e̱ mu̶dyiibu̶ je̱'e̱ Dios tu̶ yajwinwaanu̶u̶yu̶gu̶xyu̶ñ je̱'e̱ mu̶dyiibu̶ je̱'e̱ Dios tzojkku̶xp ju̶wu̶u̶ygyu̶xpu̶ñ. 13Ko naty pu̶n ñayjyu̶wu̶'u̶yii tyuundu̶goya'añ, ka'p myu̶na'anu̶ch ko je̱'e̱ Dios du'un yajtuundu̶goyaanu̶p, je̱' ko ka'p je̱'e̱ Dios pu̶n yajtuundu̶góy, y nan ka'p mu̶baad pu̶n yajtuundu̶goyii. 14Je̱'e̱ kyu̶'u̶m ju̶bu̶k adzojku̶ñ naty je̱'e̱ du'un yajtuundu̶gooyu̶gu̶xp je̱'e̱ mu̶dyiibu̶ yajnixondaaku̶gu̶xpu̶ñ y yajku'ubu̶jku̶gu̶xyu̶ tyuundu̶gooygyu̶xu̶ch. 15Y ma adayaaba ju̶bu̶kwinma'añ, jii je̱'e̱ pokytyuunu̶u̶ chonda'agy, y ko je̱'e̱ poky naty tu̶ ñi'ibe̱jtnu̶, chi je̱'e̱ o'ku̶ñ myiinu̶.
16“Mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ, ka'p mnaywin'u̶nu̶gu̶xy. 17Ku̶xyu̶ je̱'e̱ oybyu̶ y ku̶xyu̶ mu̶dyiibu̶ je̱'e̱ Dios ñi'iyejkypyu̶ñ mu̶dyiibu̶ yajmooyu̶mbu̶ñ ajku̶xy, Dios je̱'e̱ ye̱jkp je̱'e̱ mu̶dyiibu̶ tzajpjootyu̶ñ, je̱'e̱ mu̶dyiibu̶ je̱'e̱ po'o mu̶dza'a yajkoju̶ñ. Dios je̱' je'emy Dios'ajtp y ka'p nimu̶naa tyu̶gach neby je̱'e̱ po'o mu̶dza'a tyu̶gachu̶ñ. 18Du'un je̱' tzojky, paady je̱'e̱ njoot nwinma'añ tu̶ xyajwinje̱e̱mu̶ ajtu̶m ajku̶xy mu̶u̶d je̱'e̱ jaanchpyu̶ ayuuk tu̶y'ajt, paady je̱'e̱ Dios du'un tuuñ wan du'un u̶u̶ch ni'igyu̶ xykyu'umaayu̶mu̶ch ajku̶xy ni'igu̶ ka'p du'un ni pú̶nu̶ñu̶ba.
Je̱'e̱ jaanchpyu̶ tu̶y'ajt
19Ja'aymye̱jtzku̶x adaa, mu̶gu'uktu̶jk mu̶dyiibu̶ u̶u̶ch oy ndzojkypy nju̶wu̶u̶ybyu̶ñ: ko nigu̶xyu̶ miich ni'ixu̶'u̶ ijtku̶x ko naty je̱'e̱ Dios y'ayuuk tyu̶y'ajt m'amdo'idaanu̶ ajku̶xy; peru̶ ka'p je̱'e̱ mgapxy m'ayuuk nigoo myaj'anajxku̶xy, y ka'p mja'ani'ijootma'tku̶xu̶ch. 20Je̱' ko je̱'e̱ mu̶dyiibu̶ ja'ay jootma'tpu̶ñ ka'p je̱'e̱ tuñ neby je̱'e̱ Dios ku'umáyu̶ñ. 21Y du'unu̶tz u̶xmajtzku̶xnu̶ miich ku̶xyu̶ je̱'e̱ ka'pu̶ y'óyu̶ch y je̱'e̱ ju̶bu̶kja'ay'ajtu̶ñ mu̶dyiibu̶ ni'igyu̶ mayu̶u̶ybyu̶ñ, y ku'ubu̶jkku̶x je̱'e̱ Dios y'ayuuk tyu̶y'ajt, je̱'e̱ mu̶dyiibu̶ tu̶ myajmooygyu̶xyu̶ñ ma je̱'e̱ mjoot mwinma'añdyu̶ñ, je̱' ko mu̶k'ajt mu̶u̶d je̱'e̱ ayuuk tu̶y'ajt, je̱'e̱ mu̶dyiibu̶ tu̶ myajmooygyu̶xyu̶ñ neby je̱'e̱ m'aanu̶mu̶ xyajni'idzooku̶chu̶ñ ajku̶xy.
22Kuydyuungu̶x je̱'e̱ Dios y'ayuuk tyu̶y'ajt, y ka'p nigoo m'amdo'ijtku̶xy, pu̶nu̶ ka'p mguydyuungu̶xy nigoo naty du'un ku̶'u̶m mnaywin'u̶nu̶gu̶xy. 23Je̱'e̱ mu̶dyiibu̶ je̱'e̱ Dios y'ayuuk tyu̶y'ajt je'eyu̶ amdo'ijtpu̶ñ, y ka'p kuydyúñ, du'un je̱' neby je̱'e̱ ja'ay tu'ug wyiiñjyu̶jp ixyu̶ñ ma je̱'e̱ ijxku̶ñ: 24ku̶'u̶m ñay'ixyii, peru̶ ko wya'agwimbíty, chi ja'aydyu̶góy neby je̱'e̱ wyiiñjyu̶jp natyu̶ñ. 25Peru̶ pu̶n je̱'e̱ Dios y'ayuuk tyu̶y'ajty ka'p ja'aydyu̶góy je̱'e̱ mu̶dyiibu̶ myu̶dooybyu̶ñ, yajkoptu̶gu̶u̶by je̱'e̱ oy yajxón je̱'e̱ ka'pxypyu̶ ane̱'e̱mu̶ñ, je̱'e̱ ane̱'e̱mu̶ñ mu̶dyiibu̶ xyaj'awa'atzpu̶dzu̶u̶mu̶mbu̶ñ ajku̶xy y nan mu̶bu̶ky tu'ug'aa tu'ugjoot, y ka'p y'u̶xtu̶gu̶'u̶wa'agy, cham kuydyúñ neby y'ane'emyu̶ñ, jootkujk je̱'e̱ du'umbu̶ ja'ay y'ídu̶ch y kunukxu̶u̶wu̶p je̱'e̱ Dios mu̶u̶d kú̶xyu̶ mu̶dyiibu̶ tyuumbyu̶ñ.
26Pu̶nu̶ jii pu̶n myu̶na'añ ko je̱'e̱ tu̶y'ajt kuydyúñ, peru̶ ka'p je̱'e̱ tyootz awijtzu̶'u̶gy, ku̶'u̶m je̱'e̱ ñaywyin'u̶u̶ñyii y ka'p je̱'e̱ tu̶y'ajt jaanch kuydyúñ. 27Je̱'e̱ wa'atzpu̶ tu̶y'ajt y ka'p je̱'e̱ ju̶bu̶kpu̶ maa, je̱'e̱ mu̶dyiibu̶ najxp Diosteedy winduuy adaa je̱': nbube̱jt nbudu̶gu̶u̶yu̶mu̶ch je̱'e̱ ko'ogy'ungtu̶jk y ku'o'ogytyo'oxyu̶jktu̶jk ajku̶xy, je̱'e̱ mu̶dyiibu̶ je̱'e̱ ayo'on jootmáy paatku̶xpu̶ñ y nnaygyweentu̶'ajtu̶mu̶ch ma je̱'e̱ ju̶bu̶kpu̶ mu̶dyiibu̶ yaa naaxwiiñ yajpaatpu̶ñ.
Currently Selected:
Santiago 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005