Romanos 9

Dios tu̶ je̱'e̱ Israel ja'ay win'ixy

1Neby je̱'e̱ mu̶bu̶jkpu̶du̶jk mu̶dyiibu̶ yajpaatp ma je̱'e̱ Crístoju̶ñ, tu̶y'ajt u̶u̶ch yam du'un nmu̶dya'agy, ka'p u̶u̶ch n'anu̶u̶'áty. Nan chi ja'adu'knáx, je̱'e̱ u̶u̶ch je̱'e̱ njoot nwinma'añ du'un tu̶ xyajnejwu̶u̶yu̶ je̱'e̱ Dios y'Espíritu Santo ko adaa du'un tyu̶y'ajtu̶ch: 2mu̶k u̶u̶ch ndajy nmaay y tzu̶chu̶u̶ybyu̶ch je̱'e̱ njoot y ka'p ñi'igu̶ moñ mu̶u̶d miich kyu̶xpu̶ ajku̶xy, 3u̶xtu̶ jiiby ju̶bu̶ktuum u̶u̶ch nja'ayajpaada'añ, najtz'ixu̶'u̶ ma je̱'e̱ Crístoju̶ñ, ko u̶xyu̶py naty je̱'e̱ nmu̶gu'ugtu̶jk du'un y'okni'i'awa'adzpu̶dzu̶u̶maangu̶xy ma je̱'e̱ ju̶bú̶kpu̶ju̶ñ, je̱'e̱ ngu̶'u̶mmu̶gunaax ngu̶'u̶mmu̶gugajptu̶ch ajku̶xy. 4Israel je̱'e̱ myu̶j'áp myu̶jteedy'ajtypy ajku̶xy y du'un je̱'e̱ Dios kyu'ubu̶jku̶ ajku̶xy neby je̱'e̱ kyu̶'u̶m'úngu̶ñ. Tu̶ je̱'e̱ Dios y'oy'ajtu̶ñ yajku̶xu̶'u̶gy ma je̱' ajku̶xyu̶ñ, y mooyu̶gu̶x je̱'e̱ waandaaku̶ñ, je̱'e̱ Moisés y'ane̱'e̱mu̶ñ, y neby je̱'e̱ Dios mu̶baad o'owu̶dajtku̶xyu̶ñ y nan yajwinwaanu̶u̶yu̶gu̶x je̱'e̱ Cristo. 5U̶u̶ch nmu̶j'áp nmu̶jteedy y'ok'ung y'ok'ana'k je̱'e̱ ajku̶xy; y je̱' myu̶gunaax myu̶gugajpt je̱'e̱ ajku̶xy, y ma je̱'e̱ myiñ ajku̶xyu̶ñ, jim je̱'e̱ Cristo myiñ, je̱'e̱ mu̶dyiibu̶ Dios'ajtpu̶ñ; ane̱'e̱mdaay ku̶xyu̶ mu̶dyiijáty jiiby tzajpjooty y ya naaxwiiñ yajpaatpu̶ñ, wan ku'umáy wiinu̶u̶xu̶u̶ ity.#9.5 Je̱'e̱ Cristo myiñ, je̱'e̱ mu̶dyiibu̶ wan ku'umaay wiinu̶u̶xu̶u̶ ity: nije̱' wiingpu̶ jaaybyu̶du̶jk myu̶naangu̶xy: je̱'e̱ Cristo myiñ. Je̱'e̱ Dios, je̱'e̱ mu̶dyiibu̶ ku̶xyu̶ ane̱'e̱mdaaybyu̶ñ mu̶dyiijáty jiiby tzajpjooty y ya naaxwiiñ yajpaatpu̶ñ, wan ku'umaay wiinu̶u̶xu̶u̶ ity. Jaanch adaa du'un.

6Ka'p u̶u̶ch yam du'un nmu̶na'añ ko je̱'e̱ Dios ka'p tu̶ kuydyúñ neby je̱'e̱ Israel yajwinwaanu̶u̶yu̶ñ, du'un u̶u̶ch ndu'un ndijy ko ka'p je̱'e̱ mu̶j'áp mu̶jteedy y'ok'ungtu̶jk y'ok'ana'ktu̶jk je̱'e̱ Dios jaanch nigu̶xyu̶ wyin'ijxu̶ ajku̶xy. 7Ka'p je̱'e̱ Abraham y'ok'ungtu̶jk y'ok'ana'ktu̶jk nigu̶xyu̶ jaanch yajwin'ijxy ajku̶xy, du'un je̱'e̱ Dios je̱'e̱ Abraham najty tu̶ nu̶ma'ay: “Je̱'e̱ m'ung Isaac u̶u̶ch y'ok'ungtu̶jk y'ok'ana'ktu̶jk tu̶ nwin'ijxu̶ je̱'e̱ mu̶dyiibu̶ miich mnigu'ubajk'ade̱e̱mbyu̶ñ.” 8Y adaa du'un xyajnejwu̶u̶yu̶mb ajku̶xy ko ka'p je̱'e̱ Dios y'ung'adyii oy du'un pu̶n jya'amu̶na'añ jim u̶u̶ch ngugajptu̶ch, je̱' je̱'e̱ Dios je'eyu̶ y'ung'ajtypy pu̶njaty mu̶bu̶jkku̶xpu̶ñ nebyjyaty je̱'e̱ Dios naty tu̶ yajwinwaanu̶u̶yu̶gu̶xyu̶ñ, y je̱'e̱ju̶tz je̱'e̱ Isaac jaanch y'ok'ung'ajtypy y'ok'ana'k'ajtypy. 9Je̱' ko adaa je̱'e̱ Dios je̱'e̱ Abraham yajwinwaanu̶u̶y: “Ko je̱'e̱ tiempo paadu̶ch, mu̶'it u̶u̶ch nwimbídu̶ch, y pyaadu̶py je̱'e̱ Sara y'ung.”

10Y ka'p y'adaadu̶'ajtyu̶ch adayaaba. Je̱'e̱ me̱tzkpu̶ Rebeca y'ung tu'ugteedy ijty je̱'e̱ du'un ajku̶xy, y je̱' je̱' je̱'e̱ nmu̶j'áp nmu̶jteedy Isaac ajtu̶m ajku̶xy, 11y ka'anu̶ najty mya'axung'ajtku̶xy, ka'anu̶ najty je̱'e̱ oybyu̶ ni je̱'e̱ ju̶bu̶kpu̶ tuungu̶xyñu̶, wan du'un tyu̶yjyádu̶ch ko je̱'e̱ Dios ane̱'e̱mu̶ñ mu̶u̶du̶ch neby je̱'e̱ ja'ay win'íxu̶chu̶ñ pu̶njaty naty y'a'ixu̶u̶ybyu̶ñ du'un neby niwinmayu̶u̶yu̶ñ, ka'p kweentu̶túñ tii naty tu̶ tuungu̶xy ijxku̶xyu̶ñ. 12Chi je̱'e̱ Dios je̱'e̱ Rebeca nu̶maay: “Je̱'e̱ mutzkpu̶ je̱'e̱ pyuya'ay ajch ane̱'e̱mu̶p.” 13Je̱'e̱ mu̶dyiibu̶ du'un nandu'un tu'ugyu̶ naybyaattu̶bu̶ñ ma je̱'e̱ Dios ñakyu̶ñ je̱'e̱ mu̶dyiibu̶ du'un mu̶naambu̶ñ: “Je̱'e̱ Jacob u̶u̶ch ni'igyu̶ tu̶ ndzoky, ni'igu̶ ka'p je̱'e̱ Esaú.”

14¿Nej paady da'a du'un mu̶baad nmu̶naanu̶m ajku̶xy ko je̱'e̱ Dios ka'p tu'uda'agy tyuñ? ¡Ka'p, ka'p du'un tyu̶y'ajtu̶ch! 15Je̱' ko du'un je̱'e̱ Dios je̱'e̱ Moisés nu̶maay: “Nba'a''ayówu̶byu̶ch pu̶n u̶u̶ch naty ndimychojkypyu̶ñ nba'a''ayowa'añu̶ch y nan nmu̶me̱kxtúku̶byu̶ch nandu'un pu̶n u̶u̶ch naty ndimychojkypyu̶ñ nmu̶me̱kxtuga'añu̶ch.” 16Y du'unu̶tz, ka'p ko je̱'e̱ ja'ay ku̶'u̶m tzoky o ko ku̶'u̶m ñay'amu̶jaduñyii, je̱'e̱ Dios naty du'un mu̶naamb ko mu̶me̱kxtuga'añ. 17Ma je̱'e̱ Dios ñakyu̶ñ du'un jiiby kuja'ay myiñ ko je̱'e̱ Dios je̱'e̱ Egipto mu̶j'ane̱'e̱mbu̶ du'un nu̶maay: “Paady miich mu̶j'ane̱'e̱mbu̶ tu̶ nbu̶da'agy neby u̶u̶ch je̱'e̱ nmu̶k'ajt nyajku̶xu̶'u̶gu̶chu̶ñ ma je̱'e̱ mnaax mgajptu̶ñ, y wan u̶u̶ch du'un nyajnigápx nyajnimu̶dya'agu̶ch ma je̱'e̱ naaxwiimbu̶ ku̶xyu̶ju̶ñ.” 18Dios je̱' je̱'e̱ pya'a''ayooby pu̶n naty je̱' xychojkypyu̶ñ pa'a''ayowa'añ, y nan je̱' je̱'e̱ y'aa jyoot yajjúnu̶py pu̶n naty je̱' xychojkypyu̶ñ yajjunaanu̶.

19Mu̶'it u̶u̶ch miich xyñu̶maaygyu̶xu̶ch: “Pu̶nu̶ du'un, ¿neby je̱'e̱ Dios je̱'e̱ ja'ay da'a mu̶baad okpoky'ixy, nej ka'p naty je̱'e̱ y'aa jyoot je̱' tu̶ ok'yajjúnu̶byu̶?” 20Y miich ja'ay ajku̶xy, ¿pu̶n miich ajku̶xy ko je̱'e̱ Dios m'adzowaangu̶xy? ¿Nej mu̶baad je̱'e̱ naaxpochtyu'tz da'a nu̶ma'ay je̱'e̱ mu̶dyiibu̶ naty tu̶ y'oydyuñyii? “¿Ti u̶u̶ch ko du'un tu̶ xy'oydyúñ?” 21Je̱'e̱ naaxpochtyu'tz yajkojpu̶ je̱' je̱'e̱ ane̱'e̱mu̶ñ mu̶u̶d; yajkoju̶ch je̱'e̱ mo'ontz neby je̱'e̱ y'aa jyoot naty timychokyu̶ñ, y mu̶baad tu'ugyu̶ mo'ontz je̱'e̱ tzoowu̶ba tu'tz yajkojy y nan mu̶baad tu'ugyu̶ mo'ontz je̱'e̱ ku'umu̶nákypyu̶ tu'tz yajkojy.

22Dios, je̱'e̱ ijxpe̱jt je̱'e̱ du'un jya'aye̱jk ko je̱'e̱ mu̶k'ajt mu̶u̶du̶ch ko chaachtyúñ y ja'ayajni'igu̶xu̶'u̶ga'añ ko je̱'e̱ mu̶k'ajt mu̶u̶du̶ch. Myu̶me̱kxtujk je̱'e̱ ja'ay mu̶u̶d je̱'e̱ mye̱kxtujk ku̶xyu̶ je̱'e̱ mu̶dyiibu̶ je̱'e̱ tzaachpyu̶ najty ja'awinmajtzu̶bu̶ñ ajku̶xy y je̱'e̱ mu̶dyiibu̶ najty ju̶bu̶ktuum ja'awinmajtzu̶bu̶ñ ajku̶xy ñú̶kxku̶xu̶ch. 23Y nandu'un du'un ja'ayajni'igu̶xu̶'u̶ga'añ ma u̶u̶ch ajtu̶m ajku̶xyu̶ñ je̱'e̱ y'oy'ajtu̶ñ myu̶j'ajtu̶ñ, xypya'a''ayoow ajtu̶m ajku̶xy y xywyin'ijx jékyu̶p ajtu̶m ajku̶xy wan jiiby nyajpaatu̶mu̶ch ajku̶xy ma je̱'e̱ y'oy'ajtu̶ñ. 24Y du'unu̶tz je̱'e̱ Dios tu̶ xywyin'ijxu̶m ajku̶xy, nije̱' tu̶ win'ixy ma je̱'e̱ judío ja'ay ajku̶xyu̶ñ y nije̱' ma je̱'e̱ ka'pu̶ jyudíoja'ayu̶ch ajku̶xyu̶ñ. 25Du'un neby jiiby kuja'ay myiñu̶ñ ma je̱'e̱ Oseas ñakyu̶ñ:

“Je̱'e̱ ja'ay ajku̶xy je̱'e̱ mu̶dyiibu̶ u̶u̶ch najty ka'p nja'ay'átyu̶ñ ajku̶xy,

nja'ay'adaanu̶byu̶ch je̱'e̱ cham ajku̶xy.

Y je̱'e̱ mu̶dyiibu̶ u̶u̶ch najty ka'p ndzokyu̶ñ ajku̶xy,

ndzogaanu̶byu̶ch je̱'e̱ cham ajku̶xy.

26Nan jiibyu̶ du'un myu̶naanu̶ba ma je̱'e̱ Oseas ñakyu̶ñ:

‘Miich ajku̶xy ka'p miich nja'ay'ajtku̶xy,

peru̶ Dios'ung miich myajtijku̶xu̶ch, je̱'e̱ Dios mu̶dyiibu̶ wiinu̶u̶xu̶u̶ jugy'ajtpu̶ñ.’ ”

27Ñigapx je̱'e̱ Isaías je̱'e̱ Israel ja'ay ajku̶xy, myu̶naañ: “Oy u̶xyu̶py je̱'e̱ Israel y'ok'ung y'ok'ana'k du'un tu̶ jya'amayu̶u̶ygyu̶xpu̶ neby je̱'e̱ mejy tzaybyu'u myáyyu̶chu̶ñ, niwe̱e̱nu̶ je̱'e̱ aanu̶mu̶ ni'idzooku̶ñ je'eyu̶ paatku̶xu̶ch, 28je̱' ko tzojku̶ je̱'e̱ Dios y'ayuuk du'un ku̶xyu̶ kuydyunaanu̶ ma du'un myu̶na'añu̶ñ ko je̱'e̱ ja'ay je̱'e̱ pyoky ku̶xyu̶ yajkumu̶dowa'añ ma je̱'e̱ naaxwiimbu̶ kú̶xyu̶ju̶ñ.” 29Du'un neby je̱'e̱ Isaías ku̶'u̶m jékyu̶p myu̶naañu̶ñ:

“Ko u̶xyu̶py je̱'e̱ Windzú̶n Dios mu̶jmu̶k'ajtmu̶u̶dpu̶ je̱'e̱ mu̶j'áp mu̶jteedy y'ok'ung y'ok'ana'k we̱e̱nu̶ ka'ayajwu̶'u̶mu̶,

tu̶ u̶xyu̶py nigu̶xyu̶ ngu'udu̶gooydyaayu̶m ajku̶xy neby je̱'e̱ Sodoma kajpt y je̱'e̱ Gomorra kajpt jyajtyu̶ñ.”

Je̱'e̱ judío ja'ay ajku̶xy y je̱'e̱ Jesucristo y'ayuuk tyu̶y'ajt

30¿Neby mu̶baad nmu̶naanu̶m ajku̶xy mu̶u̶d adayaaba? Je̱' ko je̱'e̱ Jesús tu̶ mu̶bu̶jkku̶xy y paady je̱'e̱ Dios tu̶ yajpokyñi'iwaatzu̶gu̶xyu̶ je̱'e̱ mu̶dyiibu̶ ka'p jyudíoja'ayu̶ch ajku̶xyu̶ñ, oy najty ka'a'u̶xtaaygyu̶xy neby je̱'e̱ Dios yaj'awa'adzpu̶dzu̶u̶mu̶gu̶xu̶chu̶ñ. 31Peru̶ je̱'e̱ judío ja'ay ajku̶xy, je̱'e̱ mu̶dyiibu̶ je̱'e̱ Moisés kyu'utujku̶ñ najty ka'pxy ja'akuydyuungu̶xpu̶ñ neby je̱'e̱ Dios du'un yajpokyñi'iwaatzu̶gu̶xu̶chu̶ñ, ka'p je̱'e̱ Dios yajpokyñi'iwaatzu̶ ajku̶xy. 32¿Ti ko? Je̱' ko ka'p je̱'e̱ mu̶joottu̶gooy ajku̶xy neby je̱'e̱ Dios yajpokyñi'iwaatzu̶gu̶xu̶ch ko naty je̱'e̱ Jesús tu̶ mu̶bu̶jkku̶xy, du'un je̱'e̱ myu̶naangu̶xpu̶ ko mu̶'it ndijy je̱'e̱ Dios yajpokyñi'iwaatzu̶gu̶xu̶ch ko naty je̱'e̱ Moisés kyu'utujku̶ñ ka'pxy kuydyuunu̶ ajku̶xy y mu̶u̶d je̱'e̱ mu̶dyiibu̶ tyuungu̶xypyu̶ñ. Paady je̱'e̱ kyu'unejpy kyu'ugojxy ajku̶xy “ma je̱'e̱ ja'ay je̱'e̱ mu̶dyiibu̶ du'un neby je̱'e̱ tzaaju̶ñ, je̱'e̱ mu̶dyiibu̶ yajku'une̱jp yajku'ugojxpu̶ñ.” 33Je̱'e̱ mu̶dyiibu̶ jiiby yajnigápxp ma je̱'e̱ Dios ñakyu̶ñ ma du'un myu̶na'añu̶ñ:

“Nbu̶daakypyu̶ch je̱'e̱ tzaa jim tu'ug jim Sión kajpt,

tu'ug je̱'e̱ tzaa ma kyu'une̱jp kyu'ugojxku̶xu̶chu̶ñ;

pu̶n je̱'e̱ mu̶bu̶jkku̶xpu̶ñ, ka'p je̱'e̱ nimu̶naa yajwin'u̶u̶ngu̶xu̶ch.”

Currently Selected:

Romanos 9: MIXE

Highlight

Copy

Compare