Romanos 8

Je̱'e̱ jugy'ajtu̶ñ neby je̱'e̱ Dios y'Espíritu tzokyu̶ñ njugy'ajtu̶mu̶ch

1Y du'unu̶tz, ka'p je̱'e̱ Dios yaj'o'ogu̶u̶ju̶ch yajtu̶goyu̶u̶ju̶ch ajku̶xy je̱'e̱ mu̶dyiibu̶ tu'ugyu̶ yajpaatku̶xpu̶ñ ma je̱'e̱ Cristo Jesúsu̶ñ,#8.1 Nije̱' wiingpu̶ versión myu̶náñ: je̱'e̱ mu̶dyiibu̶ du'un tzu̶naay jugy'ajtku̶xpu̶ñ neby je̱'e̱ Espíritu Santo tzokyu̶ñ chu̶naay jyugy'ajtku̶xu̶chu̶ñ y ka'p dyu'unu̶ch neby je̱'e̱ naaxwiiñjya'ay chu̶naay jyugy'ajtku̶xyu̶ñ. 2je̱' ko je̱'e̱ Espíritu Santo y'ane̱'e̱mu̶ñ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶ ye̱jkpu̶ñ ko tu'ugyu̶ nyajpaatu̶mu̶ch ajku̶xy ma je̱'e̱ Cristo Jesúsu̶ñ, je̱' xyaj'awa'adzpu̶dzu̶u̶mu̶mb ajku̶xy ma je̱'e̱ poky y'ane̱'e̱mu̶ñ y ma je̱'e̱ o'ku̶ñ tu̶gooyu̶ñ y'ane̱'e̱mu̶ñ. 3Je̱' ko tu̶ je̱'e̱ Dios tuñ mu̶dyiibu̶ je̱'e̱ Moisés y'ane̱'e̱mu̶ñ ka'p mu̶mu̶daakyu̶ñ, paady je̱'e̱ ka'p mu̶madaaky je̱' ko naaxwiiñjya'ayu̶ch ajtu̶m ajku̶xy y paady nbokyjya'ayu̶ch ajtu̶m ajku̶xy: chi je̱'e̱ Dios kyu̶'u̶m'úng kejxy ya naaxwiiñ du'un neby je̱'e̱ naaxwiiñjya'ay pokymyu̶u̶dpu̶ju̶ñ y neby windzu̶gu̶'u̶ñdyu̶ñ wan je̱'e̱ nboky ngu̶dyeey yajwinmé̱kxu̶mu̶ch ajku̶xy, y du'un je̱'e̱ poky tu̶ mu̶mada'agy ma u̶u̶ch ajtu̶m ajku̶xyu̶ñ naaxwiiñjya'ay pokymyu̶u̶dpu̶. 4Paady je̱'e̱ du'un tuuñ neby mu̶baad u̶u̶ch nguydyuunu̶mu̶ñ ajku̶xy neby je̱'e̱ ane̱'e̱mu̶ñ y'ane'emyu̶ñ, je̱' ko ka'p du'un ndzu̶naay njugy'ajtu̶mb ajku̶xy neby je̱'e̱ naaxwiiñjya'ay pokymyu̶u̶dpu̶ chu̶naay jyugy'ajtku̶xyu̶ñ, du'un ndzu̶naay njugy'ajtu̶mb ajku̶xy neby je̱'e̱ Espíritu Santo tzokyu̶ñ ndzu̶naay njugy'ajtu̶mu̶ch ajku̶xy.

5Je̱'e̱ mu̶dyiibu̶ du'un tzu̶naay jugy'ajtku̶xpu̶ñ neby je̱'e̱ naaxwiiñjya'ay pokymyu̶u̶dpu̶ju̶ñ, je̱' je̱'e̱ je'eyu̶ myu̶daj myu̶maaygyu̶xypy je̱'e̱ kyu̶'u̶mwinma'añ ajku̶xy; peru̶ je̱'e̱ mu̶dyiibu̶ du'un tzu̶naay jugy'ajtku̶xpu̶ñ neby je̱'e̱ Espíritu Santo tzokyu̶ñ, je̱' je̱'e̱ myu̶daj myu̶maaygyu̶xypy je̱'e̱ mu̶dyiibu̶ je̱'e̱ Espíritu Santo chojkypyu̶ñ tuungu̶xu̶chu̶ñ. 6Y ko je̱'e̱ ku̶'u̶mwinma'añbyu̶ nmu̶daj nmu̶maayu̶mu̶ch ajku̶xy, je̱' jiiby yajka'ab ma je̱'e̱ o'ku̶ñ tu̶gooyu̶ñ; peru̶ ko je̱'e̱ nmu̶daj nmu̶maayu̶mu̶ch ajku̶xy je̱'e̱ mu̶dyiibu̶ je̱'e̱ Espíritu Santo chojkypyu̶ñ nduunu̶mu̶ch ajku̶xy, mu̶'it je̱'e̱ jugy'ajtu̶ñ wiinu̶u̶xu̶u̶bu̶ nbaattu̶mu̶ch ajku̶xy, y je̱'e̱ jootkujk'ajtu̶ñ. 7Je̱'e̱ mu̶dyiibu̶ je̱'e̱ ku̶'u̶mwinma'añbyu̶ mu̶daj mu̶maaygyu̶xpu̶ñ, myu̶dzip'ajtku̶xypy Dios je̱', je̱' ko ka'p je̱'e̱ Dios tzojkku̶xy nan ka'p je̱'e̱ y'ane̱'e̱mu̶ñ kuydyunaanu̶ ajku̶xy. 8Paady je̱'e̱ mu̶dyiibu̶ du'un tzu̶naay jugy'ajtku̶xpu̶ñ kuydyuungu̶xy je̱'e̱ naaxwiiñjya'ay pokymyu̶u̶dpu̶ chojku̶ñ, ka'p je̱'e̱ Dios du'un kyu'umaayu̶gu̶xy neby du'un chu̶naay jyugy'ajtku̶xyu̶ñ.

9Peru̶ miich ajku̶xy ka'p miich du'un mdzu̶naay mjugy'ajtku̶xnu̶, mguydyuungu̶xy je̱'e̱ naaxwiiñjya'ay pokymyu̶u̶dpu̶ chojku̶ñ, du'un miich mdzu̶naay mjugy'ajtku̶xnu̶ neby je̱'e̱ Espíritu Santo tzokyu̶ñ, pu̶nu̶ jaanch je̱'e̱ Dios y'Espíritu jiiby yajpaady ma je̱'e̱ mjoot mwinma'añ ajku̶xyu̶ñ. Pu̶n je̱'e̱ Cristo y'Espíritu ka'p mu̶d'ajtu̶yu̶, ka'p je̱'e̱ yajpaady ma je̱'e̱ Crístoju̶ñ. 10Peru̶ pu̶nu̶ yajpaatp je̱'e̱ Cristo jiiby ma je̱'e̱ mjoot mwinma'añ ajku̶xyu̶ñ, je̱'e̱ aanu̶mu̶ jugy'ajtp je̱',#8.10 Nije̱' wiingpu̶ versión myu̶na'añ: je̱'e̱ Dios y'Espíritu je̱' je̱'e̱ jugy'ajtu̶ñ ye̱jkp ma miich ajku̶xyu̶ñ. je̱' ko je̱'e̱ Dios tu̶ xyaj'awa'adzpu̶dzu̶u̶mu̶m ajku̶xy ma je̱'e̱ poky ku̶dyeeyu̶ñ; peru̶ je̱'e̱ naaxni'kx o'ogy je̱'e̱ y'ity mu̶u̶d je̱'e̱ poky kyu̶xpu̶. 11Y pu̶nu̶ yajpaatp je̱' y'Espíritu jiiby ma je̱'e̱ mjoot mwinma'añ miich ajku̶xyu̶ñ je̱'e̱ mu̶dyiibu̶ je̱'e̱ Jesús yajjuugypyu̶jku̶ñ; je̱'e̱ mu̶dyiibu̶ je̱'e̱ Cristo yajjuugypyu̶jku̶ñ, je̱' je̱'e̱ mnaaxni'kx je̱'e̱ jembyu̶ jugy'ajtu̶ñ xymyooyu̶p ajku̶xy, je̱'e̱ naaxni'kx mu̶dyiibu̶ o'kp tu̶goobyu̶ñ mu̶u̶d je̱'e̱ Dios y'Espíritu je̱'e̱ mu̶dyiibu̶ jiiby yajpaatp ma je̱'e̱ mjoot mwinma'añ miich ajku̶xyu̶ñ.

12Y du'unu̶tz mu̶gu'uktu̶jk, mu̶dzibu̶'u̶ ndzu̶naay njugy'ajtu̶mu̶ch ajku̶xy neby je̱'e̱ Espíritu Santo tzokyu̶ñ ndzu̶naay njugy'ajtu̶mu̶ch ajku̶xy; y ka'p du'un ndzu̶naay njugy'ajtu̶mu̶ch ajku̶xy cham je̱'e̱ naaxwiiñjya'ay pokymyu̶u̶dpu̶ chojku̶ñ nguydyuunu̶ ajtu̶m ajku̶xy. 13Pu̶nu̶ mdzu̶naay mjugy'ajtku̶xp miich cham je̱'e̱ naaxwiiñjya'ay pokymyu̶u̶dpu̶ chojku̶ñ mguydyuunu̶ ajku̶xy, m'o'kku̶xu̶p y ka'p je̱'e̱ jugy'ajtu̶ñ wiinu̶u̶xu̶u̶bu̶ mbaadku̶xu̶ch; peru̶ pu̶nu̶ myajtu̶gooygyu̶xypy je̱'e̱ naaxwiiñjya'ay pokymyu̶u̶dpu̶ chojku̶ñ mu̶u̶d je̱'e̱ Espíritu myu̶k'ajtu̶ñ, mjugy'ajtku̶xu̶p y ka'p je̱'e̱ mjugy'ajtu̶ñ nimu̶naa kyú̶xu̶ch tyu̶góyu̶ch ajku̶xy.

14Ku̶xyu̶ pu̶njaty je̱'e̱ Dios y'Espíritu pube̱jt pudu̶gu̶u̶yu̶bu̶ñ ajku̶xy, Dios je̱'e̱ ung'ajtu̶p ajku̶xy. 15Miich ajku̶xy ka'p je̱'e̱ Espíritu tu̶ myajmooygyu̶xy, je̱'e̱ mu̶dyiibu̶ du'un yaj'ijtp neby je̱'e̱ tuumbu̶ ni'idoogypyu̶ju̶ñ je̱'e̱ mu̶dyiibu̶ ja'adu'ook xyajtzu̶gu̶u̶ybyu̶jkp xyajju̶wu̶u̶ybyu̶jkp ajku̶xyu̶ñ, je̱'e̱ Espíritu tu̶ myajmooygyu̶xy je̱'e̱ mu̶dyiibu̶ je̱'e̱ Dios xyaj'ung'ajtku̶xpu̶ñ. Mu̶u̶d adayaaba Espíritu je̱'e̱ Dios du'un nnu̶maayu̶m ajku̶xy: “¡Dios Teedy!” 16Adayaaba Espíritu tu'ugyu̶ ju̶u̶yñu̶py je̱'e̱ du'un, mu̶u̶d je̱'e̱ njoot nwinma'añ ajtu̶m ajku̶xy neby du'un nidu̶y'ajt'ádu̶chu̶ñ ko je̱'e̱ Dios xy'ung'ajtu̶nu̶ ajku̶xy. 17Y je̱' ko je̱'e̱ Dios xy'ung'ajtp ajtu̶m ajku̶xy, nan nbaattu̶mu̶py je̱'e̱ it lugaar jiiby tzajpjooty ajtu̶m ajku̶xy je̱'e̱ mu̶dyiibu̶ je̱'e̱ Dios tu̶ xyajwinwaanu̶u̶yu̶mu̶ñ ajku̶xy, je̱'e̱ mu̶dyiibu̶ nbaattu̶mu̶byu̶ñ ajku̶xy mu̶u̶d je̱'e̱ Cristo, pu̶nu̶ nmu̶najxypy ngu'ubu̶jkypy je̱'e̱ tzaachpyu̶ ajtu̶m ajku̶xy mu̶u̶d je̱' neby mu̶baad mu̶'it n'ijtu̶mu̶ñ ajku̶xy mu̶u̶d je̱' ma je̱'e̱ y'oy'ajtu̶ñ jiibyu̶ñ.

Je̱'e̱ oy'ajtu̶ñ mu̶dyiibu̶ miimb ku̶daakpu̶ñ

18N'a'ixu̶u̶ybyu̶ch ko je̱'e̱ tzaachpyu̶ je̱'e̱ mu̶dyiibu̶ nmu̶najx ngu'ubu̶jku̶mbyu̶ñ ya naaxwiiñ ka'p je̱'e̱ ñi'igu̶'u̶mu̶ju̶ch ko je̱'e̱ oy'ajtu̶ñ n'okjayajmu̶badaanu̶mu̶ch je̱'e̱ mu̶dyiibu̶ jiinu̶ n'ixaanu̶mbyu̶ñ. 19Ku̶xyu̶ mu̶dyiibu̶ je̱'e̱ Dios tu̶ yajkojyu̶ñ jyanchja'ay'e̱jxku̶xypy je̱' nigu̶'u̶ nideky mu̶naa je̱'e̱ xu̶u̶ jumu̶jt okpaadyu̶ñ mu̶naa je̱'e̱ Dios yajni'igu̶xu̶'u̶gu̶chu̶ñ pu̶njaty y'ung'ajtypyu̶ñ. 20Ku̶xyu̶ mu̶dyiibu̶ je̱'e̱ Dios yajkoju̶ñ tu̶gooygyu̶x je̱'e̱ jékyu̶py, ka'p je̱'e̱ kyu̶'u̶mdzojku̶ñ tyu̶gooygyu̶xy, du'un najty je̱'e̱ Dios ku̶'u̶m jékyu̶p tu̶ niwinmayu̶'u̶y; peru̶ ka'p tyu'u'ook tu̶góyu̶ju̶ch nan y'a'ixu̶u̶y, 21neby mu̶baad y'awa'adzpu̶dzu̶u̶mgu̶xyu̶ñ ma ijty tyu̶goyaangu̶xyu̶ñ y ma je̱'e̱ windu̶gooydyaaktu̶ñ neby je̱'e̱ oybyu̶ awa'adzpu̶dzu̶u̶mdaakt mu̶baad paatku̶xyu̶ñ mu̶dyiibu̶ je̱'e̱ ja'ay yajmooygyu̶xpu̶ñ, pu̶njaty je̱'e̱ Dios ung'ajtu̶gu̶xpu̶ñ. 22Nejwu̶u̶yu̶mby ko u̶xtu̶ chambaad ko ku̶xyu̶ mu̶dyiibu̶ je̱'e̱ Dios yajkoju̶ñ yaaxku̶xp jojku̶xp je̱', y paatku̶xy ijxku̶xy je̱'e̱ tzaachpyu̶ du'un neby tu'ug je̱'e̱ to'oxyu̶jk tzaachpyu̶ ixy paadyu̶ñ ko naty y'ungpada'añ. 23Y ka'p je̱'e̱du̶'ajty ayoogu̶xp je̱'e̱ mu̶dyiibu̶ je̱'e̱ Dios ku̶xyu̶ tu̶ yajkojyu̶ñ, nandu'un u̶u̶ch ajtu̶m ajku̶xy je̱'e̱ mu̶dyiibu̶ je̱'e̱ Espíritu Santo nmu̶dajtu̶mbyu̶ñ ajku̶xy, du'un neby tii tu̶ njuuyu̶'ku̶mu̶ñ ajku̶xy je̱'e̱ mu̶dyiibu̶ n'ixe̱e̱mby nbade̱e̱mby ajtu̶m ajku̶xyu̶ñ. Ayoowu̶mb ajtu̶m ajku̶xy ndaj nmaayu̶m ajku̶xy; nja'ay'e̱jxu̶m je̱'e̱ tiempo ajku̶xy mu̶naa okpaadyu̶ñ mu̶naa je̱'e̱ Dios xywyindumbu̶gaanu̶mu̶ñ neby je̱'e̱ kyu̶'u̶m'úngu̶ñ, peru̶ mu̶'it je̱'e̱ nni'kx xyaj'awa'adzpu̶dzu̶maanu̶ ajtu̶m ajku̶xy; xyajtu̶gatzaanu̶ ajtu̶m ajku̶xy. 24Tu̶ je̱'e̱ aanu̶mu̶ ni'idzooku̶ñ nbaattu̶m ajku̶xy, peru̶ mu̶'it pu̶nu̶ nmu̶bu̶jku̶mby je̱'e̱ Dios ajku̶xy. Y pu̶nu̶ nmu̶bu̶jku̶mby je̱'e̱ Dios ajku̶xy du'un je̱'e̱ du'un wyimbu̶dzu̶my ko tii du'umbu̶ nja'ay'e̱jxu̶m ajku̶xy je̱'e̱ mu̶dyiibu̶ ka'anu̶ yajpaadyñu̶ju̶ñ. Y pu̶nu̶ tu̶ mbaattu̶m ajku̶xy, ka'p mu̶baad n'okja'ay'e̱jxu̶nu̶ ni nga'a'okmu̶bu̶jku̶nu̶ ajtu̶m ajku̶xy ko nbadaanu̶m ajku̶xy. 25Peru̶ pu̶nu̶ nju̶jp'ijxu̶mby je̱' je̱'e̱ mu̶dyiibu̶ ka'anu̶ n'ijxu̶mnu̶ ajku̶xy, tzu̶k ja'ay'e̱jxu̶m ajku̶xy mu̶u̶d je̱'e̱ me̱kxtujku̶ñ.

26Y nan je̱'e̱ Espíritu Santo xypyube̱jtp xypyudu̶gu̶u̶yu̶mb ajku̶xy ko naty n'ame̱tzk njootme̱tzku̶u̶yu̶m ajku̶xy, je̱' ko ka'p njajtu̶m ajku̶xy neby je̱'e̱ Dios nmu̶bu̶jktzoowu̶mu̶ch ajku̶xy neby jya'apadyiiju̶ñ, peru̶ je̱'e̱ Espíritu Santo je̱'e̱ Dios ku̶'u̶m mu̶nukxtaakp mu̶u̶d u̶u̶ch kyu̶xpu̶ ajtu̶m ajku̶xy mu̶u̶d je̱'e̱ ju̶u̶yu̶ñ yaaxu̶ñ mu̶dyiibu̶ ka'p mu̶baad yajkapxpu̶dzú̶myu̶ñ mu̶u̶d je̱'e̱ ayuuk. 27Y je̱'e̱ Dios, je̱'e̱ mu̶dyiibu̶ je̱'e̱ joot winma'añ ku̶xyu̶ nejwu̶u̶ybyu̶ñ, wyinju̶wu̶u̶by je̱' je̱'e̱ mu̶dyiibu̶ je̱'e̱ Espíritu Santo du'un tyijpyu̶ñ, je̱' ko je̱'e̱ Espíritu Santo je̱'e̱ Dios mu̶nukxtaakp mu̶u̶d je̱'e̱ mu̶bu̶jkpu̶du̶jk kyu̶xpu̶ nigu̶xyu̶ ajku̶xy du'un neby je̱'e̱ Dios tzokyu̶ñ.

Ni'igyu̶ mu̶daaku̶ñ

28Nejwu̶u̶yu̶mb ajku̶xy ko je̱'e̱ Dios ku̶xyu̶ tijaty ye̱jkp mu̶u̶d je̱'e̱ ja'ay y'oy'ajtu̶ñ gyu̶xpu̶ ajku̶xy je̱'e̱ mu̶dyiibu̶ tzojku̶ñ ju̶wu̶u̶yu̶bu̶ñ ajku̶xy, je̱'e̱ mu̶dyiibu̶ je̱' tu̶ win'ixyu̶ñ du'un neby niwinmayu̶u̶yu̶ñ. 29Je̱'e̱ mu̶dyiibu̶ je̱'e̱ Dios jékyu̶p wyin'ijxu̶ñ, chi du'un timytyu̶u̶yu̶p nibu̶daagu̶u̶y ko du'un y'ídu̶ch neby je̱'e̱ y'ungu̶ñ, wan je̱'e̱ y'ung nigu'ubajk'ádu̶ch je̱'e̱ mu̶dyiibu̶ je̱'e̱ Dios mu̶bu̶jkku̶xpu̶ñ ma je̱'e̱ maybyu̶ mu̶bu̶jkpu̶du̶jk ajku̶xyu̶ñ je̱'e̱ mu̶dyiibu̶ du'un neby je̱'e̱ myu̶gue̱'e̱xk ajku̶xyu̶ñ. 30Y je̱'e̱ mu̶dyiibu̶ je̱'e̱ Dios timytyu̶u̶yu̶p'ajt ñibu̶daagu̶u̶y, nan wyin'ijxku̶x je̱'e̱ nandu'un; y je̱'e̱ mu̶dyiibu̶ wyin'ijxku̶xu̶ñ, chi yaj'awa'adzpu̶dzu̶u̶mgu̶xy ma je̱'e̱ poky kyu̶dyeeyu̶ñ; y je̱'e̱ mu̶dyiibu̶ yaj'awa'adzpu̶dzu̶u̶mgu̶xu̶ñ ma je̱'e̱ poky ku̶dyeeyu̶ñ, nan myooygyu̶x je̱'e̱ y'oy'ajtu̶ñ myu̶j'ajtu̶ñ.

31¿Neby da'a n'okjakmu̶naanu̶mu̶ch ajku̶xy? ¡Pu̶nu̶ je̱'e̱ Dios xypyube̱jtp xypyudu̶gu̶u̶by ajtu̶m ajku̶xy, ni pu̶n xykya'amu̶madaaku̶mu̶ch ajku̶xy! 32Y ka'p je̱'e̱ Dios kyu̶'u̶m'úng kuyu'uch kyu̶'u̶ye̱jk, je̱' ko yaj'o'ogu̶u̶ju̶ch mu̶u̶d u̶u̶ch kyu̶xpu̶ nboky nigu̶xyu̶ ajtu̶m ajku̶xy, ¿ti mdijy da'a ko nandu'un xykya'a'okmooyu̶mu̶ch ajku̶xy ku̶xyu̶ tijaty myu̶u̶du̶ñ, kipxy mu̶u̶d je̱'e̱ y'ung? 33¿Pu̶n da'a mu̶baad okxu̶'u̶y mu̶dyiijáty je̱'e̱ Dios tu̶ win'ixyu̶ñ? Je̱' ko Dios je̱'e̱ tu̶ yaj'awa'adzpu̶dzú̶my ma je̱'e̱ poky ku̶dyeeyu̶ñ. 34¿Pu̶n da'a mu̶baad y'ok'yajpokykya'awu̶gu̶xy? Je̱' ko je̱'e̱ Cristo Jesús o'k mu̶u̶d u̶u̶ch kyu̶xpu̶ nboky ngu̶dyeey ajtu̶m ajku̶xy, y jyuugypyu̶jky y jada'achám yajpaady ma je̱'e̱ Dios y'a'oy'eembyu̶ñ mu̶u̶d je̱'e̱ ane̱'e̱mu̶ñ ku̶xyu̶; mu̶nukxta'agy je̱'e̱ Dios mu̶u̶d u̶u̶ch kyu̶xpu̶ ajtu̶m ajku̶xy. 35¿Pu̶n je̱'e̱ Cristo da'a mu̶baad xy'ok'yaj'u̶xmajtzu̶m ajku̶xy neby xychojku̶m xyjyu̶wu̶u̶yu̶mu̶ñ ajku̶xy? ¿Je̱'e̱ tzaachpyu̶ ayo'on, o je̱'e̱ ayo'on jootmáy, o je̱'e̱ u̶xwu̶dit pawu̶dittu̶, o je̱'e̱ yuu xu̶u̶, o ko je̱'e̱ wit tukxy naty kya'a'íty, o je̱'e̱ tzu̶gu̶'u̶ñ ju̶wu̶'u̶ñ, o je̱'e̱ o'ku̶ñ tu̶gooyu̶ñ?

36Je̱' ko du'un jiiby kuja'ay myiñ ma je̱'e̱ Dios ñakyu̶ñ:

“Mu̶u̶d miich kyu̶xpu̶ o'ogy'aam u̶u̶ch ni'igu̶ n'ijtku̶xy;

oy nejpyu̶ch je̱'e̱ ja'ay xytyuungu̶xy

du'un neby je̱'e̱ borreegu̶ yajnú̶kxku̶xyu̶ñ ma je̱'e̱ y'o'ktaaktu̶ñ.”

37Peru̶ oy adaa du'un ku̶xyu̶ nja'apaat nja'a'ijxu̶mu̶ch ajku̶xy, ni'igu̶ nmu̶bu̶dzu̶u̶mu̶mu̶py je̱'e̱ ni'igyu̶ madaaku̶ñ ajtu̶m ajku̶xy mu̶u̶d je̱'e̱ Jesucristo kyu̶xpu̶ je̱'e̱ mu̶dyiibu̶ tu̶ xychojku̶m xyjyu̶wu̶u̶yu̶m ajku̶xy. 38Mu̶naambu̶ch du'un tu'ug'aa tu'ugjoot ko du'un tyu̶y'ajtu̶ch ko ka'p je̱'e̱ Dios mu̶baad ni pu̶n xyaj'u̶xmajtzu̶m ajku̶xy neby xychojku̶m xyjyu̶wu̶u̶yu̶mu̶ñ ajku̶xy: ni je̱'e̱ o'k tu̶gooyu̶ñ, ni je̱'e̱ juugy'ajtu̶ñ, ni je̱'e̱ ángelestu̶jk ajku̶xy, ni je̱'e̱ mu̶dyiibu̶ je̱'e̱ mu̶k'ajt mu̶dajtku̶xpu̶ñ ma je̱'e̱ mu̶dyiibu̶ je̱'e̱ naaxwiiñjya'ay ane̱'e̱mgu̶xpu̶ñ y ni je̱'e̱ mu̶dyiibu̶ je̱'e̱ mu̶k'ajt jiiby tzajpjooty mu̶dajtku̶xpu̶ñ, ni je̱'e̱ xu̶u̶ tiempo mu̶dyiibu̶ cham tu'uyo'oybyu̶ñ, ni je̱'e̱ xu̶u̶ tiempo mu̶dyiibu̶ miimb ku̶daakpu̶ñ, 39ni je̱'e̱ mu̶dyiibu̶ ku̶xtu̶goy yajpaatpu̶ñ, ni je̱'e̱ mu̶dyiibu̶ ku̶u̶ktu̶góy yajpaatpu̶ñ, ni mu̶dyiibu̶ ni tu'ug mu̶dyiibu̶ je̱'e̱ Dios tu̶ yajkojyu̶ñ. ¡Ni pu̶n je̱'e̱ Dios mu̶baad xykya'ayaj'u̶majtzu̶m ajku̶xy neby xychojku̶m xyjyu̶wu̶u̶yu̶mu̶ñ ajku̶xy ko tu̶ xyaj'ijxu̶m ajku̶xy ma je̱'e̱ Cristo Jesúsu̶ñ, je̱'e̱ nWindzú̶n ajtu̶m ajku̶xy!

Currently Selected:

Romanos 8: MIXE

Highlight

Copy

Compare