Romanos 7

Ijxpe̱jt tu'ug mu̶dyiibu̶ yajkatz'ijxp ma je̱'e̱ pu̶kychu̶naayu̶ñ

1“Mu̶gu'uktu̶jk ajku̶xy, miich mnejwu̶u̶ygyu̶xypy je̱'e̱ Moisés y'ane̱'e̱mu̶ñ, y mnejwu̶u̶ygyu̶xypy ko je̱'e̱ Moisés y'ane̱'e̱mu̶ñ mu̶'it mu̶k'ajt je̱'e̱ je'eyu̶ mu̶u̶du̶ch ma je̱'e̱ ja'ayu̶ñ ko naty je̱'e̱ ja'ay jyugy'atyñu̶. 2Du'un, pu̶nu̶ civilpu̶ky je̱'e̱ to'oxyu̶jk tu'ug myu̶dtzu̶na'awu̶py je̱'e̱ ñiya'aydyu̶jk u̶xtu̶ mabaad je̱'e̱ ñiya'aydyu̶jk jyugy'atyu̶ñ, je̱' ko civilpú̶kyu̶ch. Peru̶ pu̶nu̶ o'kp je̱'e̱ ya'aydyu̶jk, je̱'e̱ to'oxyu̶jk awa'adzpu̶dzu̶u̶mb je̱'e̱ du'unu̶ñ ma najty civilpú̶kyu̶chu̶ñ mu̶u̶d je̱'e̱ ya'aydyu̶jk. 3Peru̶ pu̶nu̶ myu̶dtzu̶naaby je̱'e̱ wiingpu̶ ya'aydyu̶jk ko naty je̱'e̱ ñiya'aydyu̶jk jyugy'atyñu̶, tuundu̶gooby naty je̱'e̱ du'un, peru̶ pu̶nu̶ o'kp je̱'e̱ ñiya'aydyu̶jk, awa'adzpu̶dzu̶u̶mb je̱'e̱ to'oxyu̶jk du'unu̶ñ ma najty civilpú̶kyu̶chu̶ñ, y mu̶baad pyu̶jktu̶gajtznu̶ mu̶u̶d je̱'e̱ wiingpu̶ ya'aydyu̶jk, y ka'p naty du'un tyuundu̶gooyñu̶.

4Du'un miich nandu'un ajku̶xy u̶u̶ch nmu̶gu'ugtu̶jk, ko je̱'e̱ Cristo y'o'ky nan o'ok miich nandu'un ajku̶xy mu̶u̶d je̱' ma je̱'e̱ Moisés y'ane̱'e̱mu̶ñ je̱'e̱ mu̶dyiibu̶ ijty xy'ane̱'e̱mgu̶xpu̶ñ, wan myajpaatku̶xnu̶ch mu̶u̶d je̱'e̱ wiingpu̶ niya'aydyu̶jk. Jada'achám Cristo xyjya'ay'ajtku̶xnu̶py, je̱'e̱ mu̶dyiibu̶ juugypyu̶jku̶ñ. Y du'unu̶tz je̱'e̱ Dios mu̶baad oy yajxón mmu̶duungu̶xnu̶. 5Ko najty pokyjyooty ku̶dyeeyjyooty ndzu̶naay njugy'ajtu̶mb ajku̶xy, je̱'e̱ Moisés y'ane̱'e̱mu̶ñ je̱' je̱'e̱ nni'kx ngopt je̱'e̱ ju̶bu̶k adzojku̶ñ xyajnixondaak'ajtu̶m ajku̶xy; y je̱' xyajka'awu̶m ajku̶xy ju̶bu̶ktuum ma je̱'e̱ o'ku̶ñ tu̶gooyu̶ñ. 6Peru̶ jada'achám tu̶ n'o'ku̶m ajku̶xy ma je̱'e̱ Moisés y'ane̱'e̱mu̶ñ je̱'e̱ mu̶dyiibu̶ ijty xy'ane̱'e̱mu̶mbu̶ñ ajku̶xy. Tu̶ je̱'e̱ n'u̶xmajtzu̶nu̶ ajtu̶m ajku̶xy, y du'un du'un tu̶ yaj'awa'adzpu̶dzu̶u̶mnu̶ neby je̱'e̱ Dios mu̶baad nmu̶duunu̶nu̶ ajtu̶m ajku̶xy mu̶u̶d je̱'e̱ jembyu̶ jugy'ajtu̶ñ, je̱'e̱ mu̶dyiibu̶ je̱'e̱ Espíritu Santo yejkypyu̶ñ y ka'p je̱'e̱ jeky ane̱'e̱mu̶ñ kuja'aybyu̶ xy'ok'ane̱'e̱mu̶nu̶ ajtu̶m ajku̶xy.

Je̱'e̱ poky mu̶dyiibu̶ ijtp ma u̶u̶chu̶ñ

7¿Nej paady du'un mu̶baad nmu̶naanu̶m ko je̱'e̱ Moisés y'ane̱'e̱mu̶ñ pyókyu̶ch? ¡Ka'p, ka'p du'un paady mu̶baad nmu̶naanu̶m! Ko u̶xyu̶py najty je̱'e̱ Moisés y'ane̱'e̱mu̶ñ kya'a'íty, u̶u̶ch ka'p u̶u̶ch u̶xyu̶py nnejwu̶u̶y tii pokyu̶ñ. Ka'p u̶u̶ch u̶xyu̶py nimu̶naa nnejwu̶u̶y tii adzoky'ajtpu̶ñ, ko je̱'e̱ Moisés y'ane̱'e̱mu̶ñ u̶xyu̶py najty du'un kya'a'okmu̶na'añ: “Ka'p ni tii m'adzógu̶ch.” 8Peru̶ je̱'e̱ poky mu̶jtu̶gu̶u̶y je̱', oy najty je̱'e̱ ku'utujku̶ñ du'un kya'a'ane'emy, xyajnixondaaku̶ch je̱'e̱ ju̶bu̶k adzojku̶ñ ku̶xyu̶. Y ko u̶xyu̶py najty je̱'e̱ Moisés y'ane̱'e̱mu̶ñ kya'a'íty, u̶u̶ch ka'p u̶u̶ch u̶xyu̶py nnejwu̶u̶y tii pokyu̶ñ. 9Tu̶ u̶u̶ch du'un tu'ktiempo njaty ko u̶u̶ch najty je̱'e̱ Moisés y'ane̱'e̱mu̶ñ nga'anejwu̶'u̶yñu̶, ka'p u̶u̶ch najty nejwu̶'u̶y tii pokyu̶ñ; peru̶ ko u̶u̶ch je̱'e̱ ku'utujku̶ñ oy nejwu̶'u̶y, mu̶'it u̶u̶ch oy nejwu̶'u̶y tii pokyu̶ñ, 10y chi u̶u̶ch je̱'e̱ poky xyajtu̶gooy. Du'un u̶u̶ch njajty mu̶u̶d je̱'e̱ ku'utujku̶ñ neby u̶u̶ch je̱'e̱ jugy'ajtu̶ñ u̶xyu̶py nbaatyu̶ñ, ni'igyu̶ u̶u̶ch je̱'e̱ ju̶bu̶ktuum xyajka'ay ma je̱'e̱ o'ku̶ñ tu̶gooyu̶ñ, 11je̱' ko je̱'e̱ poky myu̶jtu̶gu̶u̶y oy najty je̱'e̱ ku'utujku̶ñ du'un kya'a'ane'emy y chi u̶u̶ch xywyin'u̶u̶ñ, y nan je̱' u̶u̶ch ku̶'u̶m ju̶bu̶ktuum xyajka'aw je̱'e̱ ku'utujku̶ñ ma je̱'e̱ o'ku̶ñ tu̶gooyu̶ñ.

12Je̱'e̱ Moisés y'ane̱'e̱mu̶ñ wa'adz je̱', y je̱'e̱ ku'utujku̶ñ nan wa'adz je̱', tu'uda'agy je̱' y oy je̱'. 13Pu̶nu̶ oy adayaaba ku'utujku̶ñ, ¿nej xyajka'awu̶bu̶ch adaa da'a ju̶bu̶ktuum ma je̱'e̱ o'ku̶ñ tu̶gooyu̶ñ? ¡Ka'p, ka'p u̶u̶ch yu̶'u̶ xyajka'awu̶ch! Je̱'e̱ poky neby ñayyajni'igu̶xu̶'u̶ga'añyii ko jaanch pyókyu̶ch, je̱' u̶u̶ch ju̶bu̶ktuum xyajka'aw ma je̱'e̱ o'ku̶ñ tu̶gooyu̶ñ, oy je̱'e̱ oybyu̶ ku'utujku̶ñ najty du'un kya'a'ane'emy. Y du'un je̱'e̱ poky oy ñi'igu̶xu̶'knu̶ ma je̱'e̱ ku'utujku̶ñ ko jaanch jyu̶bú̶ku̶ch.

14U̶u̶ch nejwu̶u̶yu̶mby ko je̱'e̱ Moisés y'ane̱'e̱mu̶ñ Dios je̱'e̱ ye̱jk, peru̶ u̶u̶ch pokymyu̶u̶du̶ch je̱' ko u̶u̶ch naaxwiiñjya'ayu̶ch, y ni'idoogyu̶ch ma je̱'e̱ pokyu̶ñ neby je̱'e̱ tuumbu̶ ni'idoogypyu̶ju̶ñ. 15Ka'p u̶u̶ch nejwu̶'u̶y tii u̶u̶ch xyjyajtpu̶ñ, ko u̶u̶ch je̱'e̱ oybyu̶ nja'atuna'añ je̱'e̱ mu̶dyiibu̶ u̶u̶ch nja'anijoot'ajtypyu̶ñ, je̱'e̱ ju̶bu̶kpu̶ u̶u̶ch nu̶kxy nduñ, y je̱'e̱ ju̶bu̶kpu̶ mu̶dyiibu̶ u̶u̶ch njanchmu̶dzip'ajtypyu̶ñ ni'igu̶ je̱'e̱ u̶u̶ch nduumby. 16Peru̶ je̱'e̱ mu̶dyiibu̶ u̶u̶ch nduumybyu̶ñ je̱' je̱' je̱'e̱ mu̶dyiibu̶ u̶u̶ch ka'p nja'atzókyu̶ñ ndúnu̶chu̶ch, y je̱' u̶u̶ch je̱'e̱ du'un xyajnejwu̶u̶by ko je̱'e̱ Moisés y'ane̱'e̱mu̶ñ y'óyu̶ch. 17Y du'unu̶tz ka'p je̱'e̱ y'u̶u̶chu̶ch je̱'e̱ mu̶dyiibu̶ du'un adu̶u̶tzpu̶ñ, je̱'e̱ poky je̱' je̱'e̱ mu̶dyiibu̶ du'un adu̶u̶tzp je̱'e̱ mu̶dyiibu̶ yajpaatp ma u̶u̶chu̶ñ. 18Je̱' ko u̶u̶ch nejwu̶u̶ybyu̶ch ko ka'p je̱'e̱ oybyu̶ yajpaady ma u̶u̶chu̶ñ, je̱' ko naaxwiiñjya'ayu̶ch paady u̶u̶ch nbokyjya'ayu̶ch; oy u̶u̶ch du'un nja'amu̶na'añ ko u̶u̶ch je̱'e̱ oybyu̶ nduna'añ; peru̶ ka'p u̶u̶ch nay'aju̶wu̶'u̶yii ndúnu̶chu̶ch. 19Ka'p u̶u̶ch je̱'e̱ oybyu̶ nduñ je̱'e̱ mu̶dyiibu̶ u̶u̶ch nja'atzojkypyu̶ñ ndúnu̶chu̶ch, je̱'e̱ ju̶bu̶kpu̶ u̶u̶ch ni'igyu̶ nduumby je̱'e̱ mu̶dyiibu̶ u̶u̶ch ka'p nja'atzókyu̶ñ ndúnu̶chu̶ch. 20Y pu̶nu̶ nduumbyu̶ch je̱' je̱'e̱ mu̶dyiibu̶ u̶u̶ch ka'p nja'atzókyu̶ñ ndúnu̶chu̶ch, ka'p je̱'e̱ y'u̶u̶chu̶ch je̱'e̱ mu̶dyiibu̶ du'un adu̶u̶tzpu̶ñ, je̱'e̱ poky je̱' je̱'e̱ mu̶dyiibu̶ du'un adu̶u̶tzp je̱'e̱ mu̶dyiibu̶ yajpaatp ma u̶u̶chu̶ñ.

21Du'un u̶u̶ch njaty n'abety ko u̶u̶ch je̱'e̱ oybyu̶ nja'atuna'añ, je̱'e̱ ju̶bu̶kpu̶ u̶u̶ch nu̶kxy nduñ. 22Ma u̶u̶ch je̱'e̱ n'aa njoottu̶ñ nixondaakypyu̶ch je̱'e̱ Dios y'ane̱'e̱mu̶ñ, 23peru̶ nayjyu̶wu̶u̶yu̶bu̶ch ku̶'u̶m ko jii tii mu̶dyiibu̶ u̶u̶ch xy'agugu̶u̶ybyu̶ñ ko u̶u̶ch je̱'e̱ oybyu̶ nja'atuna'añ: y je̱' je̱' je̱'e̱ poky y'ane̱'e̱mu̶ñ je̱'e̱ mu̶dyiibu̶ yajpaatp ma u̶u̶chu̶ñ, y je̱'e̱ mu̶dyiibu̶ u̶u̶ch tzumy mach xymyu̶dajtpu̶ñ.

24¡U̶u̶ch y'yoobu̶! ¿Pu̶n u̶u̶ch je̱'e̱ nni'kx xy'ok'yaj'awa'adzpu̶dzu̶u̶mu̶p ju̶bu̶ktuum ma je̱'e̱ o'ku̶ñ tu̶gooyu̶ñ? 25Je̱'e̱ Dios je'eyu̶ tu'kpajk je̱'e̱ mu̶dyiibu̶ u̶u̶ch je̱'e̱ nni'kx xyaj'awa'adzpu̶dzu̶u̶mu̶bu̶ñ, nyejkypyu̶ch je̱'e̱ Dioskujuuyu̶p ma je̱'e̱ Diosu̶ñ mu̶u̶d je̱'e̱ nWindzú̶n Jesucristo kyu̶xpu̶ ajtu̶m ajku̶xy. Ma je̱'e̱ mu̶dya'agy yam kyu̶xy myayu̶ñ: U̶u̶ch mu̶naamb ko ngapxymyu̶dówu̶byu̶ch je̱'e̱ Dios y'ane̱'e̱mu̶ñ, peru̶ je̱' ko naaxwiiñjya'ayu̶ch nan nguydyúnu̶byu̶ch je̱'e̱ poky y'ane̱'e̱mu̶ñ.

Currently Selected:

Romanos 7: MIXE

Highlight

Copy

Compare