Romanos 3

1¿Ti oy'ajt myu̶dajtypy ko njudíoja'ay'ajtu̶mu̶ch o ko nyajtu̶y'ajtu̶u̶yu̶mu̶ch? 2May y mayñax oy'ajt je̱'e̱ ja'amu̶u̶du̶ch ajku̶xy. Timyjyayu̶jp, Dios myooy je̱'e̱ y'ayuuk tyu̶y'ajt je̱'e̱ judío ja'ay ajku̶xy. 3¿Y ti tunu̶u̶ jadu̶u̶ju̶p pu̶nu̶ ka'p je̱'e̱ Dios y'ayuuk tyu̶y'ajt nije̱' kuydyuunu̶ ajku̶xy? ¿Nej mu̶'it je̱'e̱ Dios je̱'e̱ y'ayuuk tyu̶y'ajt da'a ka'akuydyúnu̶cha? 4¡Ka'p, ka'p dyu'unu̶ch! Dios kyuydyuumby je̱'e̱ du'un je'emy neby tyu̶y'ajtu̶chu̶ñ, oy u̶xyu̶py je̱'e̱ ja'ay ku̶xyu̶ jya'a''anu̶u̶'ajtku̶xpu̶; je̱' ko du'un je̱'e̱ Dios ñaky myu̶na'añ:

“Ñejwu̶u̶by je̱'e̱ ja'ay du'un ko mguydyuumby je̱'e̱ m'ayuuk neby mmu̶na'añu̶ñ,

y ka'p je̱'e̱ myajmu̶ju̶da'agu̶ch ko naty pu̶n xyu̶'u̶y.”

5Peru̶ pu̶nu̶ nduunu̶mby je̱'e̱ axu̶u̶kpu̶ y nmu̶naanu̶mu̶ch ko je̱'e̱ Dios tyu'uda'agyu̶ch, ¿neby mu̶baad nmu̶naanu̶m? ¿Ko je̱'e̱ Dios ka'p tyu'uda'agyu̶ch je̱' ko je̱'e̱ nboky ngu̶dyeey xyajkumu̶doowu̶m ajku̶xy? (Du'un u̶u̶ch ngapxy nmu̶dya'agy neby je̱'e̱ ja'ay naagu̶ñ kyápxku̶xy myu̶dyaakku̶xyu̶ñ.) 6¡Ka'p, ka'p du'un mu̶baad nmu̶naanu̶m! Ko u̶xyu̶py je̱'e̱ Dios ka'p y'oktu'uda'agyu̶ch, ka'p u̶xyu̶py je̱'e̱ naaxwiiñjya'ay pyoky kyu̶ydyeedy mu̶baad ku̶'u̶yo'oy tekyyo'oyu̶.

7Peru̶ pu̶nu̶ tuumbu̶ch je̱'e̱ n'anu̶u̶'adyiibyu̶ neby je̱'e̱ Dios tyu̶y'ajt du'un ni'igyu̶ kyu'umaybyu̶dzú̶mu̶chu̶ñ, ¿ti u̶u̶ch ko nyajpoky'íxy neby je̱'e̱ pokyjya'ayu̶ñ? 8Ko u̶xyu̶py du'un y'okjaanchu̶ch, pues mu̶baad u̶xyu̶py je̱'e̱ ju̶bu̶kpu̶ nduun'adu̶u̶tzu̶m ajku̶xy wan je̱'e̱ oy'ajt du'un nbaattu̶mu̶ch ajku̶xy. Du'un je̱'e̱ ja'ay nije̱' myu̶naangu̶xy xyñi'iwaambétyu̶ch du'un ajku̶xy ko u̶u̶ch du'un nyaj'u̶xpú̶ky; peru̶ je̱'e̱ du'umbu̶ ja'ay paattu̶gu̶xp je̱' yajtzaachtyuungu̶xu̶ch.

Nigu̶xyu̶ nbokymyu̶u̶du̶ch ajtu̶m ajku̶xy

9¿Neby m'okmu̶naangu̶xpu̶? ¿Jak'oy da'a u̶u̶ch ni'igyu̶ ajtu̶m ajku̶xy judío ja'ay, ni'igu̶ ka'p je̱'e̱ ka'pu̶ jyudíoja'ayu̶ch ajku̶xy? ¡Ka'p, ka'p du'un tyu̶y'ajtu̶ch! Je̱' ko tu̶ du'un n'okyajni'ixu̶u̶ygyu̶xpu̶ ko nigu̶xyu̶ pokyjyooty nyajpaatu̶m ajku̶xy judío ja'ay y ka'pu̶ jyudíoja'ayu̶ch ajku̶xy, 10je̱' ko du'un je̱'e̱ Dios ñaky myu̶na'añ:

“¡Ka'p ni pu̶n, pu̶n tu'uda'agyu̶ñ!

¡Ni tu'ugtu̶'ajty kya'a'íty!

11Ka'p ni pu̶n, pu̶n je̱'e̱ Dios y'ayuuk tyu̶y'ajt winju̶wu̶u̶ybyu̶ñ.

Ka'p ni pu̶n, pu̶n je̱'e̱ Dios u̶xtaaybyu̶ñ.

12Nigu̶xyu̶ je̱'e̱ ju̶bu̶kpu̶ nu̶u̶ tu'u tu̶ padu'ubu̶jkku̶xnu̶;

nigu̶xyu̶ anaxy tu̶ tyu̶gooygyu̶xnu̶.

¡Ka'p ni pu̶n, pu̶n tu'uda'agyu̶ñ!

¡Ni tu'ugtu̶'ajty kya'a'íty!

13Janch ju̶bu̶kjaty axu̶u̶gjáty je̱'e̱ kyápxku̶xy myu̶dyaakku̶xy.

Du'un je̱'e̱ yo'kpajk ajku̶xy neby je̱'e̱ o'kpu̶ jut mu̶dyiibu̶ awa'adz ijtpu̶ñ,

agu̶ anu̶u̶ je̱'e̱ kyápxku̶xypy myu̶dyaakku̶xypy,

ma je̱'e̱ y'awaku̶ñ jiiby je̱'e̱ ju̶bu̶kpu̶ yu'uch mu̶dajtku̶xy, du'un neby je̱'e̱ awa'andza'añdy je̱'e̱ ju̶bu̶kpu̶ jiiby yu'uch mu̶datyu̶ñ ma je̱'e̱ y'awaku̶ñ,

14y janch kapxtu̶gooygyu̶xp, y ku̶xy kubety myu̶naangu̶xy.

15Janch ja'ani'ijootma'tku̶xp, y chi jya'ayyaj'o'kku̶xy;

16majaty ñajxku̶xy tyu̶gu̶u̶ygyu̶xyu̶ñ je'eyu̶ je̱'e̱ tzip ma'ad nigoo yajpu̶du̶'kku̶xy y je̱'e̱ ayowu̶u̶,

17y ka'p nejwu̶u̶ygyu̶xy neby mu̶baad chu̶naaygyu̶xy jyugy'ajtku̶xyu̶ñ jootkujk.

18Nimu̶naa kya'ataj kya'amaaygyu̶xy ko je̱'e̱ Dios mu̶baad windzu̶gu̶u̶ygyu̶xy.”

19U̶u̶ch nejwu̶u̶by ajtu̶m ko du'un neby je̱'e̱ Moisés ñaky ku̶xyu̶ myu̶na'añu̶ñ, je̱' je̱'e̱ du'un tyijpy je̱'e̱ judío ja'ay ajku̶xy pu̶njaty je̱'e̱ Moisés y'ane̱'e̱mu̶ñ ane̱'e̱mu̶gu̶xpu̶ñ, paady wan amoñu̶ timy'ijtku̶xnu̶ y du'un je̱'e̱ naaxwiiñjya'ay je̱'e̱ Dios ku̶xyu̶ tyu̶ydyuunu̶gu̶xu̶ch; 20je̱' ko ka'p je̱'e̱ Dios ni pu̶n pokytyuk yajnaxa'añ oy naty je̱'e̱ Moisés y'ane̱'e̱mu̶ñ tu̶ ja'akuydyuumbu̶, je̱' ko je̱' je̱'e̱ Moisés y'ane̱'e̱mu̶ñ je'eyu̶ xyajnejwu̶u̶yu̶mb ko nbokyjya'ayu̶ch ajtu̶m ajku̶xy.

Je̱'e̱ aanu̶mu̶ ni'idzooku̶ñ je̱'e̱ mu̶bu̶jku̶ñ je̱'e̱ mu̶u̶d yajpaady

21Peru̶ jada'achám, tzu̶k je̱'e̱ Moisés y'ane̱'e̱mu̶ñ awiing okpu̶daaku̶mbu̶. Dios tu̶ je̱'e̱ xyajnejwu̶u̶yu̶m neby mu̶baad xyajpokyñi'iwaatzu̶mu̶ñ ajku̶xy, y jiiby je̱'e̱ du'un yajpaady ma je̱'e̱ Moisés ñakyu̶ñ y ma je̱'e̱ Dios y'ayuuknajtzkapxu̶u̶ybyu̶du̶jk ñaky ajku̶xyu̶ñ. 22Dios xyajpokyñi'iwaatzp je̱'e̱ ajtu̶m ajku̶xy ko je̱'e̱ Jesucristo nmu̶bu̶jku̶m ajku̶xy; yajpokyñi'iwaachpy wanpú̶nu̶ch pu̶n mu̶bu̶jku̶bu̶ñ, 23je̱' ko nigu̶xyu̶ je̱'e̱ naaxwiiñjya'ay tu̶ pyokytyuungu̶xy y ju̶gue̱m je̱'e̱ yajpaatku̶xy ma je̱'e̱ Dios wyinduuyu̶ñ; je̱'e̱ mu̶dyiibu̶ je̱'e̱ aanu̶mu̶ ni'idzooku̶ñ ye̱jkpu̶ñ. 24Peru̶ je̱'e̱ Dios tu̶ xyajpokyñi'iwaatzu̶m ajku̶xy mu̶u̶d je̱'e̱ myay'ajtu̶ñ; y nan timyñi'inigoobu̶ tu̶ xyaj'awa'adzpu̶dzu̶u̶mu̶m ajku̶xy mu̶u̶d je̱'e̱ Cristo Jesús kyu̶xpu̶. 25Je̱'e̱ Dios je̱'e̱ Cristo yaa naaxwiiñ ke̱jx oy je̱'e̱ ñe'pty temy yoky ni'i'o'ktuuty je̱'e̱ naaxwiiñjya'ay du'un, wan je̱'e̱ pyoky kyu̶dyeey du'un winmekxy wyu̶'u̶mgu̶xu̶ch. Adaa pokywyinme̱kxu̶ñ mu̶'it je̱'e̱ yajpaady ko je̱'e̱ Cristo yajmu̶bú̶ky, y ni'igu̶xu̶'kp je̱'e̱ du'un ko je̱'e̱ Dios tyu'uda'agyu̶ch y ko je̱'e̱ naaxwiiñjya'ay pyoky kyu̶dyeey ka'p jékyu̶p yujpu̶jk yujk'ijxu̶ ma je̱'e̱ Jesucristo najty ka'p kéxyñu̶ju̶ñ ya naaxwiiñ, 26je̱' gyu̶xpu̶ ko je̱'e̱ me̱kxtujk mu̶j mu̶u̶du̶ch. Nan ni'igu̶xu̶'kp je̱'e̱ du'un ko je̱'e̱ Dios jada'achám tyu'uda'agyu̶ch y ko tu'uda'agy'ajtp'adu̶u̶tzpu̶ch ko tu̶ yajpokyñi'iwa'ach pu̶njaty je̱'e̱ Jesús mu̶bu̶jkku̶xpu̶ñ.

27¿Ma je̱'e̱ ja'ay y'amu̶j jyootmu̶j'adyiibyu̶ tyuñ ko ñaygyu'umayii ma je̱'e̱ Diosu̶ñ? ¡Ka'p je̱'e̱ nimaa tyuñ! ¿Ti gyu̶xpu̶ ko? Je̱' gyu̶xpu̶ ko je̱'e̱ Jesús tu̶ mu̶bu̶ky y ka'p pyaadyu̶ch ko je̱'e̱ Moisés y'ane̱'e̱mu̶ñ tu̶ kuydyuunu̶. 28Y du'un je̱'e̱ mu̶dya'agy yam kyu̶xy myay: ko je̱'e̱ Dios je̱'e̱ ja'ay yajpokyñi'iwaachpyu̶ch ko je̱'e̱ Jesús naty mu̶bu̶ky y ka'p ko je̱'e̱ Moisés y'ane̱'e̱mu̶ñ mu̶dzibu̶'u̶ jatytimypyadúnu̶ch.

29¿Nej Dios'ajtp je̱'e̱ Dios da'a je'eyu̶ ma je̱'e̱ judío ja'ay ajku̶xyu̶ñ? ¿Nej ka'p je̱'e̱ da'a Dyios'aty ma je̱'e̱ naax kajpt kú̶xyu̶ju̶ñ ma je̱'e̱ ka'pu̶ jyudíoja'ayu̶ch ajku̶xyu̶ñ? ¡Tu̶y'ajt je̱'e̱ du'un ko nandu'un Dyios'aty ma je̱'e̱ naax kajpt kú̶xyu̶ju̶ñ ma je̱'e̱ ka'pu̶ jyudíoja'ayu̶ch ajku̶xyu̶ñ, 30je̱' ko tu'ug je̱'e̱ Dios je'eyu̶ y ka'p kya'anaagu̶ch: je̱'e̱ Dios mu̶dyiibu̶ je̱'e̱ ja'ay yajpokyñi'iwaatzpu̶ñ je̱'e̱ mu̶dyiibu̶ je̱'e̱ Jesús naty tu̶ mu̶bu̶jkku̶xyu̶ñ, ka'p kweentu̶túñ pu̶nu̶ tu̶y'ajtu̶'u̶y o pu̶nu̶ ka'p tyu̶y'ajtu̶'u̶yu̶ch; pu̶nu̶ judío ja'ay o pu̶nu̶ ka'p jyudío ja'ayu̶ch! 31Y nej ¿ko je̱'e̱ Jesús nmu̶bu̶jku̶m ajku̶xy mu̶'it je̱'e̱ Moisés y'ane̱'e̱mu̶ñ je̱'e̱ myu̶k'ajt da'a nyajtu̶gooyu̶ ajtu̶m ajku̶xy? ¡Ka'p, ka'p du'un tyu̶y'ajtu̶ch! Ni'igyu̶ je̱'e̱ Moisés y'ane̱'e̱mu̶ñ du'un nmu̶k'ajtmooyu̶ ajtu̶m ajku̶xy ko je̱'e̱ Jesús nmu̶bu̶jku̶m ajku̶xy.

Currently Selected:

Romanos 3: MIXE

Highlight

Copy

Compare