Romanos 2

Dios tu̶ydyuumb je̱' du'un neby tyu̶y'ajtu̶chu̶ñ

1Paady miich, ka'p miich mwinme̱kxu̶ñ, miich mu̶dyiibu̶ je̱'e̱ wiingpu̶ mmu̶gu'ug pyoky myaj'u̶x'ijxypy myajpa'ijxypyu̶ñ; oy miich naty mja'apú̶nu̶chpyu̶. Ko je̱'e̱ wiingpu̶ mmu̶gu'ug pyoky myaj'u̶x'íxy myajpa'íxy, ku̶'u̶m naty du'un mnaychaachpyu̶mo'oyii y nandu'un miich naty m'adu̶u̶tzpu̶ neby je̱' ajku̶xyu̶ñ. 2U̶u̶ch nnejwu̶u̶by ajtu̶m ajku̶xy ko je̱'e̱ Dios tu̶ydyuumb je̱' du'un neby tyu̶y'ajtu̶chu̶ñ ko tzaachtyúñ pu̶n naty du'un ja'ay'ajtku̶xpu̶ñ. 3Y miich mu̶dyiibu̶ je̱'e̱ wiingpu̶ mmu̶gu'ug pyoky myaj'u̶x'ijxypy myajpa'ijxypyu̶ñ y nandu'un naty m'adu̶u̶tzpu̶ neby je̱' ajku̶xyu̶ñ. Miich ka'p mni'idzo'ogu̶ch ko naty je̱'e̱ Dios xchaachtyuna'añ. 4Miich m'u̶xtijpy je̱'e̱ Dios y'oy'ajtu̶ñ je̱'e̱ mu̶dyiibu̶ ka'p nimu̶naaxu̶u̶ kyu̶xy tyu̶goyu̶ñ, je̱'e̱ mye̱kxtujku̶ñ y ko ka'p tii yujkpú̶ky yujk'íxy, ni mga'akweentu̶túñ ko je̱'e̱ y'oy'ajtu̶ñ du'un xyjya'ayajjootwimbijtp ma je̱'e̱ Diosu̶ñ. 5Peru̶ miich, je̱' ko janch xe̱x je̱'e̱ mjoot mgu'ubajk y ka'p mjootwimbida'añ ma je̱'e̱ Diosu̶ñ, ni'igyu̶ je̱'e̱ mdzaachpyu̶ miich ku̶'u̶m myajni'ibéty mu̶dyiibu̶ nu̶kxy mbaady m'ixy ko naty je̱'e̱ xu̶u̶ jumu̶jt tu̶ paatnu̶ mu̶naa je̱'e̱ Dios naaxwiiñjya'ay tzaachtyuna'añu̶ñ mu̶u̶d je̱'e̱ tyu̶y'ajtu̶ñ, 6y chi nidu'ug nidu'ug yajnibu̶dagu̶'u̶wa'añ neby naty tu̶ jya'ay'átyu̶ñ. 7Myo'owu̶py je̱'e̱ jugy'ajtu̶ñ wiinu̶u̶xu̶u̶bu̶ pu̶n je̱'e̱ oy'ajtu̶ñ, y je̱'e̱ ku'umaayu̶ñ y je̱'e̱ jugy'ajtu̶ñ ka'pu̶ nimu̶naaxu̶u̶ kyu̶xy tyu̶goy, y amuumdu'ugjoot tu̶ a'ijx ju̶jp'ijxku̶xyu̶ñ tuungu̶xy je̱'e̱ oybyu̶. 8Peru̶ chaachtyúnu̶py je̱'e̱ ja'ay mu̶u̶d je̱'e̱ jyootma'tu̶ñ je̱'e̱ mu̶dyiibu̶ ka'p kyapxymyu̶doogu̶xyu̶ñ, je̱'e̱ mu̶dyiibu̶ je̱'e̱ tu̶y'ajt mu̶dzip'ajtku̶xpu̶ñ, y tuungu̶xy je̱'e̱ ju̶bu̶kpu̶. 9Mínu̶p je̱'e̱ tzaachpyu̶ ayo'on y taju̶ñ maayu̶ñ ma je̱'e̱ ja'ay ku̶xyu̶ ajku̶xyu̶ñ mu̶dyiibu̶ je̱'e̱ ju̶bu̶kpu̶ tuungu̶xpu̶ñ, je̱'e̱ judío ja'ay jayu̶jp'ajtku̶xu̶p, peru̶ nandu'un je̱'e̱ ka'pu̶ jyudíoja'ayu̶ch ajku̶xy. 10Peru̶ pu̶n je̱'e̱ oybyu̶ tuungu̶xpu̶ñ, mooyu̶gu̶xu̶p je̱'e̱ Dios nigu̶xyu̶ je̱'e̱ oy'ajtu̶ñ, je̱'e̱ ku'umaayu̶ñ y je̱'e̱ jootkujk'ajtu̶ñ, je̱'e̱ judío ja'ay jayu̶jp'ajtku̶xu̶p, peru̶ nandu'un je̱'e̱ ka'pu̶ jyudíoja'ayu̶ch ajku̶xy.

11Je̱' ko ka'p je̱'e̱ Dios je̱'e̱ ja'ay win'ixy tzoky, y'agu̶tzojktaaby je̱'e̱ ku̶xyu̶ wanpú̶nu̶ch: 12Ku̶xyu̶ pu̶n pokytyuungu̶xpu̶ñ pu̶nu̶ ka'p je̱'e̱ Moisés y'ane̱'e̱mu̶ñ naty nejwu̶u̶yu̶ ajku̶xy, yajtu̶ydyuungu̶xu̶p je̱' ko je̱'e̱ Moisés y'ane̱'e̱mu̶ñ naty ka'anejwu̶u̶yu̶ ajku̶xy; peru̶ pu̶n pokytyuungu̶xpu̶ñ oy naty je̱'e̱ Moisés y'ane̱'e̱mu̶ñ ja'anejwu̶u̶yu̶ ajku̶xy, yajtu̶ydyuungu̶xu̶p je̱' du'un neby je̱'e̱ Moisés y'ane̱'e̱mu̶ñ y'ane'emyu̶ñ, je̱' ko je̱'e̱ Moisés y'ane̱'e̱mu̶ñ naty nejwu̶u̶yu̶ ajku̶xy. 13Je̱' ko ka'p je̱' awa'adzpu̶dzu̶u̶mgu̶xp je̱'e̱ mu̶dyiibu̶ je̱'e̱ Moisés y'ane̱'e̱mu̶ñ je'eyu̶ amdo'ijtku̶xpu̶ñ, je̱' awa'adzpu̶dzu̶u̶mgu̶xp je̱'e̱ mu̶dyiibu̶ je̱'e̱ Moisés y'ane̱'e̱mu̶ñ kuydyuungu̶xpu̶ñ. 14Peru̶ ko je̱'e̱ ja'ay je̱'e̱ ka'pu̶ jyudíoja'ayu̶ch je̱'e̱ oybyu̶ tuungu̶xy neby je̱'e̱ Moisés y'ane̱'e̱mu̶ñ y'ane'emyu̶ñ oy je̱'e̱ Moisés y'ane̱'e̱mu̶ñ naty ka'amu̶dajtu̶ ajku̶xy, je̱' ku̶'u̶m yajni'igu̶xu̶'kku̶xp ko je̱'e̱ oybyu̶ mu̶baad yajtúñ, 15y jii je̱'e̱ yajni'igu̶xu̶'kku̶xy neby jya'ay'ajtku̶xyu̶ñ ko je̱'e̱ Moisés y'ane̱'e̱mu̶ñ mu̶dajtu̶ ajku̶xy ma je̱'e̱ y'aa jyoot ajku̶xyu̶ñ. Je̱'e̱ kyu̶'u̶mjoot kyu̶'u̶mwinma'añ je̱'e̱ du'un yajni'igu̶xu̶'ku̶gu̶xp, y je̱'e̱ kyu̶'u̶mjoot kyu̶'u̶mwinma'añ yajpokykya'awu̶gu̶xu̶p o ka'ayajpokykya'awu̶gu̶xu̶p, 16je̱'e̱ mu̶'it xu̶u̶ ko naty je̱'e̱ Jesucristo mu̶u̶d je̱'e̱ Dios y'ane̱'e̱mu̶ñ je̱'e̱ naaxwiiñjya'ay ku̶xyu̶ tu̶ydyúñ tii naty ayu'uch amechu̶ tu̶ tuungu̶xy ijxku̶xyu̶ñ, du'un neby je̱'e̱ ayuuk tu̶y'ajt myu̶na'añu̶ñ je̱'e̱ mu̶dyiibu̶ aanu̶mu̶ ni'idzooku̶ñ ye̱jkpu̶ñ, je̱'e̱ mu̶dyiibu̶ u̶u̶ch ngapxwa'kxypyu̶ñ.

Je̱'e̱ judío ja'ay ajku̶xy y je̱'e̱ Moisés y'ane̱'e̱mu̶ñ

17Miich du'un miich mmu̶na'añ ko miich mjudioja'ayu̶ch, y mguydyuunu̶py je̱'e̱ Moisés y'ane̱'e̱mu̶ñ, y mnaygyu'umaayu̶p ko je̱'e̱ mDios mmu̶dúñ. 18Wa'adzu̶ miich mnejwu̶'u̶y neby je̱'e̱ Dios tzoky mja'ay'ádu̶chu̶ñ, y je̱'e̱ Moisés y'ane̱'e̱mu̶ñ xy'awaanu̶py neby je̱'e̱ oybyu̶ mwin'íxu̶chu̶ñ. 19Miich mnay'aju̶wu̶u̶yu̶p neby je̱'e̱ wiindzja'ay mu̶baad mwijtzyo'oyu̶ñ y neby mu̶baad mgudu̶kxy mgujajyu̶ñ je̱'e̱ mu̶dyiibu̶ agootztuumb yajpaatku̶xpu̶ñ, 20neby je̱'e̱ ja'ay mu̶baad myaj'u̶xpú̶ky je̱'e̱ mu̶dyiibu̶ ka'p tii jajtku̶xyu̶ñ y neby je̱'e̱ ja'ay mu̶baad mjootmo'oy mwinma'añ myo'oy je̱'e̱ mu̶dyiibu̶ ka'p tii winju̶wu̶u̶ygyu̶xyu̶ñ, je̱' ko jim je̱'e̱ Moisés y'ane̱'e̱mu̶ñ mmu̶dajtu̶ ma je̱'e̱ wij'ajt ke̱j'ajt y je̱'e̱ tu̶y'ajt mgatz'ixyu̶ñ. 21Bueno, pu̶nu̶ myaj'u̶xpu̶jkypy je̱'e̱ wiingpu̶ ja'ay, ¿ti ko ku̶'u̶m mga'akuydyuumbu̶ je̱'e̱ mu̶dyiibu̶ je̱'e̱ wiingpu̶ ja'ay myaj'u̶xpu̶jkypyu̶ñ? Pu̶nu̶ mgapxwa'kxypy je̱'e̱ Dios y'ayuuk tyu̶y'ajt ko je̱'e̱ ja'ay ka'p mu̶baad mye̱e̱tzku̶xy, ¿y miich ti ko mmeech? 22Pu̶nu̶ mmu̶naamb ko ka'p je̱'e̱ ja'ay je̱'e̱ wiingpu̶ to'oxyu̶jk mu̶baad mu̶dtuundu̶góy, ¿y miich ti je̱'e̱ wiingpu̶ to'oxyu̶jk ko mu̶dtuundu̶góy? Pu̶nu̶ ka'p je̱'e̱ kepychech tzaabóch mwindzu̶gu̶'u̶y, ¿y ti je̱'e̱ wyit myeeñ ko me̱e̱tzu̶ mu̶dyiibu̶ jiiby chajptu̶gootyu̶ñ? 23Mnayyajku'umaayu̶p je̱'e̱ Moisés y'ane̱'e̱mu̶ñ, peru̶ ka'p je̱'e̱ Dios mwindzu̶gu̶'u̶y je̱' ko ka'p je̱'e̱ y'ayuuk tyu̶y'ajt mguydyuunu̶. 24Paady je̱'e̱ Dios ñaky du'un myu̶na'añ: “Je̱'e̱ ka'pu̶ jyudíoja'ayu̶ch ajku̶xy ñi'oj ñiyaxu̶u̶ygyu̶xypy je̱'e̱ Dios mu̶u̶d miich kyu̶xpu̶ mboky ajku̶xy, judío ja'ay.”

25Jaanch je̱'e̱ du'un ko pu̶n je̱'e̱ Moisés y'ane̱'e̱mu̶ñ kuydyuunu̶byu̶ñ, je̱'e̱ tu̶y'ajtu̶'u̶yiibyu̶ tzobaadp je̱'e̱ du'un; peru̶ pu̶nu̶ ka'p je̱'e̱ Moisés y'ane̱'e̱mu̶ñ kuydyuunu̶, du'un je̱' neby ka'pu̶ tyu̶y'ajtu̶'u̶yu̶chu̶ñ oy naty jya'atu̶y'ajtu̶'u̶yu̶chpyu̶. 26Y pu̶n ka'p tyu̶y'ajtu̶'u̶yu̶chu̶ñ y kuydyúñ neby je̱'e̱ Moisés y'ane̱'e̱mu̶ñ y'ane'emyu̶ñ, du'un je̱'e̱ Dios yajnaxyii neby tu̶y'ajtu̶'u̶ybyu̶ju̶ñ oy naty kya'atu̶y'ajtu̶'u̶yu̶ch. 27Pu̶n je̱'e̱ Moisés y'ane̱'e̱mu̶ñ kuydyuunu̶byu̶ñ, oy naty je̱'e̱ kya'atu̶y'ajtu̶'u̶yu̶chpyu̶ ma je̱'e̱ ñi'kx kyoptu̶ñ, je̱' je̱'e̱ ja'ay yajpokykya'awu̶p je̱'e̱ mu̶dyiibu̶ je̱'e̱ Moisés y'ane̱'e̱mu̶ñ naty ja'amu̶dajtpu̶ñ y je̱'e̱ mu̶dyiibu̶ naty ja'atu̶y'ajtu̶'u̶yu̶ñ, y ka'p kuydyúñ je̱'e̱ Moisés y'ane̱'e̱mu̶ñ. 28Je̱' ko je̱'e̱ judio'adyiibyu̶ ka'p je̱'e̱ je'eyu̶ ni'igú̶xp ku'uduumb kyu̶xu̶'u̶ga'añ, y je̱'e̱ tu̶y'ajtu̶'u̶yiibyu̶ ka'p je̱'e̱ je'eyu̶ ni'igú̶xp ku'uduumb kyu̶'u̶xu̶'u̶ga'añ ma je̱'e̱ ni'kx koptu̶ñ. 29Je̱'e̱ jaanchpyu̶ judio'adyiibyu̶ jiiby aajooty jootjooty je̱'e̱ mu̶baad nmu̶dajtu̶m, y je̱'e̱ tu̶y'ajtu̶'u̶yiibyu̶ jiiby jootjooty winma'añjyooty je̱'e̱ mu̶baad nmu̶dajtu̶m: ka'p ko je̱'e̱ ane̱'e̱mu̶ñ njatytimypyaduunu̶mu̶ch je̱'e̱ mu̶dyiibu̶ kuja'ayu̶ñ je̱'e̱ mu̶dyiibu̶ ni'igú̶xp ku'uduumb ku̶xu̶'kpu̶ñ, je̱'e̱ju̶tz je̱' je̱'e̱ mu̶dyiibu̶ ka'p ni'igú̶xp ku'uduumb kyu̶xu̶'u̶gyu̶ñ. Pu̶n je̱'e̱ du'un paduumbu̶ñ je̱' ku'umaybyu̶dzu̶u̶mb, peru̶ ka'p je̱'e̱ ja'ay ku'umaayu̶p, je̱'e̱ Dios je̱'e̱ ku'umaayu̶p.

Currently Selected:

Romanos 2: MIXE

Highlight

Copy

Compare