San Juan 6
6
Jesús ja'ay yajkáy nimu̶gooxk mil
(Mt 14.13-21; Mc 6.30-44; Lc 9.10-17)
1Ko adaa du'un tyuunu̶ jyajtu̶, chi je̱'e̱ Jesús ñu̶kxy jim Galilea mejy ñi'ináxy, mu̶dyiibu̶ nandu'un xu̶u̶'ajtpu̶ñ Tiberias mejy. 2Janch mayjya'ay najty je̱'e̱ Jesús u̶x'aam panú̶kxu̶p, je̱' ko je̱'e̱ ijxpe̱jt mu̶jwinma'añbyu̶ najty tu̶ ijxku̶xy mu̶dyiibu̶ najty tyuumbyu̶ñ; yajtzo'ogy je̱'e̱ pa'amja'aydyu̶jk. 3Mu̶'it je̱'e̱ Jesús pya'ttu̶gu̶u̶y ma tu'ug kopt, y chi jim ñaxwech mu̶u̶d je̱'e̱ dyiscípulotu̶jk ajku̶xy. 4Timywyingoonu̶py najty je̱'e̱ Pascua xu̶u̶ mu̶dyiibu̶ je̱'e̱ judío ja'ay tyuungu̶xypyu̶ñ. 5Ko je̱'e̱ Jesús je̱'e̱ mayjya'ay ijxy je̱'e̱ mu̶dyiibu̶ najty pamiinu̶bu̶ñ, chi je̱'e̱ Felipe nu̶maay:
—¿Ma je̱'e̱ kaayu̶ñ uuku̶ñ n'okjuuyu̶mu̶ch mu̶dyiibu̶ adaa mayjya'ay nyajkaayu̶mu̶byu̶ñ?
6Paady je̱'e̱ Jesús du'un myu̶naañ ok'ixa'añ neby je̱'e̱ Felipe y'ok'adzoyu̶ñ, je̱' ko je̱' ñejwu̶u̶by najty je̱'e̱ ku̶'u̶m tii tyune̱e̱mbyu̶ñ. 7Chi je̱'e̱ Felipe adzooy je̱'e̱ Jesús:
—Ni me̱jtzmu̶go'px denario meeñ je̱'e̱ tzajkaagy kya'amu̶baad'ádu̶ch; oy u̶xyu̶py ku̶j tu'ktúky nja'amooyu̶mgu̶xpu̶ nidu'ugjáty nidu'ugjáty neby mu̶baad kyaaygyu̶xy y'uukku̶xyu̶ñ.
8Mu̶'it je̱'e̱ Andrés je̱'e̱ mu̶dyiibu̶ je̱'e̱ Jesús najty dyiscípulo'ajtypyu̶ñ, je̱'e̱ Simón Pedro pyuya'ay; nu̶maay je̱'e̱ Jesús:
9—Chaa je̱'e̱ pi'k'ana'k tu'ug mu̶dyiibu̶ je̱'e̱ cebada tzajkaagy mu̶gooxk mu̶u̶du̶ñ y me̱tzk je̱'e̱ akx, peru̶ yu̶'u̶ we̱e̱nu̶ yu̶'u̶ du'un mu̶u̶d je̱'e̱ mayjya'ay ajku̶xy.
10Chi je̱'e̱ Jesús y'adzooy:
—Nu̶maaygyu̶x yu̶'u̶ mayjya'ay nigu̶xyu̶ ko wan naxwe̱tztaaygyu̶xy.
Janch nekxyjyooty najty jim ma je̱'e̱ jimbu̶ it lugaaru̶ñ, y chi ñaxwe̱tztaaygyu̶xy. Jii najty je̱'e̱ ya'aydyu̶jktu̶jk da'a nigu̶xyu̶ ajku̶xy nimu̶gooxk miltu̶. 11Chi je̱'e̱ Jesús tzajkaagy konu̶'ky y yejky je̱'e̱ Dioskujuuyu̶p, chi je̱'e̱ dyiscípulotu̶jk tzajkaagy mooy ajku̶xy ko wan yajwa'kxku̶xy ma je̱'e̱ mayjya'ay najty y'u̶ñaaygyu̶xyu̶ñ. Nandu'un tuuñ mu̶u̶d je̱'e̱ akx, mooy je̱'e̱ ja'ay ajku̶xy du'uñdyu̶ najty tyimykyayaangu̶xyu̶ñ. 12Ko kyaaydyaaygyu̶xy janch ku'uxyu̶, chi je̱'e̱ Jesús dyiscípulotu̶jk nu̶maay:
—Yajpu̶du̶'kku̶x yu̶'u̶ tzajkaagy kaydyuk y yu̶'u̶ akx tzu'tztúk mu̶dyiibu̶ tu̶ ñadu̶gu̶'u̶yu̶ñ, ka'pu̶ ni tii y'ayówu̶ch.
13Chi je̱'e̱ discípulotu̶jk yajpu̶du̶'kku̶xy, y yaj'ujtzku̶xy je̱'e̱ kach majmé̱tzk mu̶u̶d je̱'e̱ mu̶gooxpu̶ cebada tzajkaagy kaaydyúk mu̶dyiibu̶ najty tu̶ ñadu̶gu̶'u̶yu̶ñ. 14Ko je̱'e̱ ja'ay je̱'e̱ ijxpe̱jt mu̶jwinma'añbyu̶ du'un ijxku̶xy, je̱'e̱ mu̶dyiibu̶ je̱'e̱ Jesús najty tu̶ tuñ, chi myu̶naañ ajku̶xy:
—Jaanchxyu̶m adaa jye̱'e̱ju̶ch je̱'e̱ Dios y'ayuuknajtzkapxu̶u̶ybyu̶ je̱'e̱ mu̶dyiibu̶ najty minaamb ya naaxwiiñ.
15Peru̶ ko je̱'e̱ Jesús nejwu̶u̶y ko je̱'e̱ ja'ay najty adzip yajnu̶kxaanu̶gu̶xy y pyu̶da'agaanu̶gu̶xy mu̶j'ane̱'e̱mbu̶, chi je̱'e̱ mayjya'ay ja'adu'ook winyo'oydyuuty y ñu̶kxy ma je̱'e̱ koptu̶ñ, neby jim mu̶baad naydyu'um y'ityu̶ñ.
Jesús yo'oy nu̶u̶wingú̶xy
(Mt 14.22-27; Mc 6.45-52)
16Ko chu'uju̶u̶yñu̶, chi je̱'e̱ Jesús dyiscípulotu̶jk mejypya'a kyu'unajxku̶xy, 17pye̱jtku̶xy ma tu'ug bárcu̶ju̶ñ, yaj'yo'oyñaxaangu̶xy je̱'e̱ mejy y jya'adaangu̶xy jim Capernaum mejy'awiimb. Tu̶ najty kyoodzu̶u̶yñu̶, y ka'anu̶ najty je̱'e̱ Jesús wyimbityñu̶ ma je̱'e̱ dyiscípulotu̶jk najty ajku̶xyu̶ñ. 18Ko je̱'e̱ mu̶kpoj tu'ug myiiñ, chi je̱'e̱ mejy tyu̶gu̶y je̱'tzmiin je̱'tzxu̶jpu̶. 19Ko najty tu̶ yo'oyquwe̱e̱kku̶xnu̶ mu̶gooxk o tudujk kilómetro, chi je̱'e̱ Jesús ijxku̶xy ñimiinu̶gu̶xyu̶ ma je̱'e̱ bárcu̶ju̶ñ yo'oyu̶p mejywingú̶xy, y chi mu̶k jyanchtzu̶gu̶u̶ygyu̶xy. 20Chi ñu̶maayu̶gu̶xy:
—¡U̶u̶ch je̱', ka'p mdzu̶gu̶u̶ygyu̶xy!
21Mu̶'it jyootkugu̶u̶ygyu̶xy y yajbarcu̶tu̶gu̶u̶ygyu̶xy je̱'e̱ Jesús, y chi jim mejy'awiimb mu̶k'eemby jya'tku̶xy ma najty ñú̶kxku̶xyu̶ñ.
Mayjya'ay u̶xta'ay je̱'e̱ Jesús
22Je̱'e̱ kujaboom, je̱'e̱ mayjya'ay mu̶dyiibu̶ najty mejy'awiimb tu̶ wyu̶'u̶mgu̶xy y'ijxku̶x ko agu̶ discípulotu̶jk tyu̶gu̶u̶ygyu̶xy ma je̱'e̱ barco, je̱'e̱ mu̶dyiibu̶ najty jiiby je'eyu̶ tu'ug, y ko ka'p najty je̱'e̱ Jesús jim chooñu̶ch mu̶u̶d je̱' ajku̶xy. 23Mu̶'it je̱'e̱ wiingpu̶ barco nije̱' jya'tku̶xy mu̶dyiibu̶ tzóngu̶xpu̶ñ ma je̱'e̱ kajpt mu̶dyiibu̶ xu̶u̶'ajtpu̶ñ Tiberias, mu̶wingón je̱'e̱ it lugaar ma je̱'e̱ Windzú̶n Jesús je̱'e̱ mayjya'ay najty tu̶ yajkáyu̶ñ mu̶naaba je̱'e̱ Dioskujuuyu̶p yekyu̶ñ. 24Ko je̱'e̱ mayjya'ay du'un ijxku̶xy ko ka'p najty je̱'e̱ Jesús jim y ni je̱'e̱ dyiscípulotu̶jk ajku̶xy, chi byarcu̶tu̶gu̶u̶ydyaaygyu̶xy y ñú̶kxku̶xy jim Capernaum, oy je̱'e̱ Jesús jim u̶xtaaygyu̶xy.
Jesús je̱' je̱'e̱ jugy'ajtu̶ñ wiinu̶u̶xu̶u̶bu̶ ye̱jkp
25Ko jim mejy'awiimb jya'tku̶xy, chi je̱'e̱ Jesús jim paatku̶xy y yajtu̶u̶gu̶xy:
—Windzú̶n, ¿mu̶naa ya tu̶ mmiñ?
26Chi je̱'e̱ Jesús ñu̶maayu̶ ajku̶xy:
—Janch tu̶y'ajtu̶ñ du'un nnu̶maaygyu̶xy ko miich ajku̶xy paady u̶u̶ch miich xy'u̶xtaaygyu̶xy, je̱' ko ku'uxyu̶ tu̶ nyajkaaygyu̶xy, y ka'p pyaadyu̶ch ko je̱'e̱ ijxpe̱jt mu̶jwinma'añbyu̶ tu̶ mwinju̶wu̶u̶ygyu̶xy. 27Ka'p mmu̶daj mmu̶maaygyu̶xy neby je̱'e̱ ju̶kxy pu̶ky mu̶baad mbaatku̶xyu̶ñ je̱'e̱ mu̶dyiibu̶ ku̶jxp najxpu̶ñ, je̱' mmu̶daj mmu̶maaygyu̶x je̱'e̱ ju̶kxy pu̶ky mu̶dyiibu̶ ijtu̶u̶b y je̱'e̱ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ. Adaaju̶tz je̱' je̱'e̱ ju̶kxy pu̶ky mu̶dyiibu̶ u̶u̶ch nyejkypyu̶ñ u̶u̶ch je̱' je̱'e̱ ja'ay mu̶dyiibu̶ tzon tzajpjooty, je̱' ko je̱'e̱ Dios Teedy u̶u̶ch je̱'e̱ ane̱'e̱mu̶ñ tu̶ xymyo'oy ko du'un miich nmooygyu̶xu̶ch.
28Chi je̱'e̱ Jesús yajtu̶u̶y ajku̶xy:
—¿Ti u̶u̶ch mu̶baad nduungu̶xy neby u̶u̶ch mu̶baad nguydyuungu̶xyu̶ñ je̱'e̱ mu̶dyiibu̶ je̱'e̱ Dios chojkypyu̶ñ ndúnu̶chu̶ch ajku̶xy?
29Mu̶'it je̱'e̱ Jesús y'adzoowu̶ ajku̶xy:
—Je̱'e̱ mu̶dyiibu̶ je̱'e̱ Dios chojkypyu̶ñ je̱' je̱' ko u̶u̶ch je̱'e̱ n'ayuuk ndu̶y'ajt xymyu̶bu̶jku̶ch ajku̶xy, je̱' ko je̱' u̶u̶ch ya naaxwiiñ tu̶ xykyexy.
30Mu̶'it je̱'e̱ Jesús yajtu̶u̶gu̶xy:
—¿Ti ijxpe̱jt u̶u̶ch mu̶baad xy'ok'yaj'ijxku̶xy, y ko u̶u̶ch naty tu̶ n'ok'ijxku̶xy mu̶'íttu̶tz it nmu̶bu̶jkku̶xu̶ch ko miich je̱'e̱ Dios ya naaxwiiñ tu̶ xykyexy? ¿Tijaty du'un mduumby? 31U̶u̶ch je̱'e̱ nmu̶j'áp nmu̶jteedy ajku̶xy kyaaygyu̶x je̱'e̱ maná jékyu̶p jim adu'ugtuum, du'un neby je̱'e̱ Dios ñaky myu̶na'añu̶ñ: ‘Dios yajkaay je̱'e̱ ja'ay tzajkaagy mu̶dyiibu̶ tzajpjooty tzombu̶ñ.’
32Chi je̱'e̱ Jesús y'adzoowu̶ ajku̶xy:
—Janch tu̶y'ajtu̶ñ du'un nnu̶maaygyu̶xy ko ka'p je̱'e̱ Moisés miich xymyooygyu̶x je̱'e̱ tzajkaagy mu̶dyiibu̶ tzajpjooty tzombu̶ñ, je̱'e̱ nDeedyu̶ch je̱' je̱'e̱ mu̶dyiibu̶ je̱'e̱ jaanchpyu̶ tzajkaagy ye̱jkpu̶ñ mu̶dyiibu̶ tzajpjooty tzombu̶ñ. 33Je̱' ko je̱'e̱ tzajkaagy mu̶dyiibu̶ je̱'e̱ Dios yejkypyu̶ñ, je̱' je̱' je̱'e̱ mu̶dyiibu̶ jiiby tzajpjooty tu̶ chooñu̶ñ y mo'oy je̱'e̱ naaxwiiñjya'ay je̱'e̱ jugy'ajtu̶ñ wiinu̶u̶xu̶u̶bu̶.
34Mu̶'it je̱'e̱ Jesús nu̶maaygyu̶xy:
—Windzú̶n, u̶u̶ch yu̶'u̶ jiibu̶ tzajkaagy wiinu̶u̶xu̶u̶ mooygyu̶xk.
35Y chi je̱'e̱ Jesús ñu̶maayu̶ ajku̶xy:
—U̶u̶ch du'un u̶u̶ch neby je̱'e̱ tzajkaagyu̶ñ, je̱'e̱ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ. Y pu̶n u̶u̶ch xyñimiimb xykyu'ubu̶jkpu̶ñ, ka'p yuu xu̶u̶ je̱'e̱ nimu̶naaxu̶u̶ ju̶wu̶u̶ygyu̶xu̶ch; y pu̶n u̶u̶ch je̱'e̱ n'ayuuk ndu̶y'ajt xymyu̶bu̶jku̶byu̶ñ, ka'p tu̶dzu̶'u̶wu̶u̶ je̱'e̱ nimu̶naaxu̶u̶ ju̶wu̶u̶ygyu̶xu̶ch. 36Peru̶ u̶u̶ch tu̶ u̶u̶ch miich du'un nnu̶maaygyu̶xy; oy u̶u̶ch miich tu̶ xyjya'a'ijxku̶xy, peru̶ ka'p mmu̶bu̶jkku̶xy. 37Ku̶xyu̶ pu̶njaty u̶u̶ch je̱'e̱ Dios Teedy xyajnigue̱jxpu̶ñ, xyñimiimb xykyu'ubu̶jkku̶xpu̶ch je̱'; y je̱'e̱ mu̶dyiibu̶ u̶u̶ch xyñimiimb xykyu'ubu̶jkku̶xpu̶ñ, ka'p u̶u̶ch je̱'e̱ n'u̶xtijku̶xu̶ch. 38Ka'p u̶u̶ch jiiby tzajpjooty paady tu̶ ndzooñ tu̶ ngu̶da'agyu̶ch ya naaxwiiñ ko u̶u̶ch je̱'e̱ ngu̶'u̶mdzojku̶ñ nguydyúnu̶ch, tu̶ nmíñu̶ch ya naaxwiiñ ko u̶u̶ch je̱'e̱ nDeedy chojku̶ñ nguydyuunu̶ch, je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ. 39Y du'un u̶u̶ch je̱'e̱ nDeedy tzoky je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ, ko u̶u̶ch je̱'e̱ naaxwiiñjya'ay ka'p ni tu'ug nyajtu̶góyu̶ch je̱'e̱ mu̶dyiibu̶ u̶u̶ch tu̶ xymyo'oyu̶ñ, nyajjuugypyú̶gu̶byu̶ch je̱'e̱ ni'igyu̶ ko naty tu̶ myu̶baad'ajtnu̶ mu̶naa je̱'e̱ naaxwiimbu̶ kyu̶xaan tyu̶goyaanu̶ju̶ñ. 40Du'un u̶u̶ch je̱'e̱ nDeedy tzoky ko ku̶xyu̶ pu̶njaty nimiin ku'ubu̶jkku̶xpu̶ñ je̱'e̱ Dios y'Ung y mu̶bu̶jku̶ je̱'e̱ y'ayuuk tyu̶y'ajt ajku̶xy, pyaatku̶xu̶py je̱'e̱ jugy'ajtu̶ñ wiinu̶u̶xu̶u̶bu̶; y nyajjuugypyu̶jkku̶xu̶byu̶ch je̱' ko naty tu̶ myu̶baad'ajtnu̶ mu̶naa je̱'e̱ naaxwiimbu̶ kyu̶xaan tyu̶goyaanu̶ju̶ñ.
41Paady je̱'e̱ judío ja'ay ni'oj niyaaxu̶ydyu̶gu̶u̶ygyu̶xy je̱'e̱ Jesús ko najty du'un tu̶ myu̶na'añ: “U̶u̶ch je̱'e̱ tzajkaagy je̱'e̱ mu̶dyiibu̶ tzajpjooty tu̶ chooñu̶ñ.” 42Y chi myu̶naangu̶xy:
—¿Nej ka'p ada Jesús jye̱'e̱ju̶ch, je̱'e̱ José y'ung? Y u̶u̶ch n'ixy'ajtu̶py je̱'e̱ tyaj tyeedy ajtu̶m ajku̶xy. ¿Y ti ko du'un cham myu̶na'añ ko tzajpjooty tu̶ chooñ?
43Mu̶'it je̱'e̱ Jesús ñu̶maayu̶ ajku̶xy:
—Amoongu̶xnu̶ ka'p nigoo mni'oj mniyaaxu̶y'adu̶u̶tzku̶xy. 44Ni pu̶n u̶u̶ch mu̶baad xykya'animíñ xykya'aku'ubú̶ky, pu̶nu̶ ka'p je̱'e̱ Dios Teedy naty du'un myu̶na'añ, je̱'e̱ mu̶dyiibu̶ u̶u̶ch ya naaxwiiñ tu̶ xykyexyu̶ñ; y je̱'e̱ mu̶dyiibu̶ u̶u̶ch xyñimiimb xykyu'ubu̶jkpu̶ñ nyajjuugypyú̶gu̶byu̶ch ko naty tu̶ myu̶baad'ajtnu̶ mu̶naa je̱'e̱ naaxwiimbu̶ kyu̶xaan tyu̶goyaanu̶ju̶ñ. 45Du'un jiiby myu̶na'añ ma je̱'e̱ Dios y'ayuuknajtzkapxu̶u̶ybyu̶du̶jk kujaaygyu̶xyu̶ñ: ‘Yaj'u̶xpu̶ge̱e̱mby je̱'e̱ Dios je̱'e̱ ja'ay nigu̶xyu̶ ajku̶xy.’ Y du'unu̶tz ku̶xyu̶ pu̶njaty je̱'e̱ Dios y'ayuuk tyu̶y'ajt amdo'ijtku̶xpu̶ñ y jajt abu̶jku̶ je̱'e̱ y'ayuuk tyu̶y'ajt ajku̶xy, je̱'e̱ du'umbu̶ u̶u̶ch xyñimiimb xykyu'ubu̶jkp ajku̶xy.
46“Ka'p je̱'e̱ Dios Teedy ni pu̶n ixyñu̶, je̱' je̱'e̱ je'eyu̶ tu'kpajk tu̶ ixy je̱'e̱ mu̶dyiibu̶ jiiby tu̶ chooñ ma je̱'e̱ Diosu̶ñ. 47Janch tu̶y'ajtu̶ñ du'un nnu̶maaygyu̶xy ko pu̶njaty u̶u̶ch je̱'e̱ n'ayuuk ndu̶y'ajt xymyu̶bu̶jku̶byu̶ñ, pyaatku̶xu̶py je̱'e̱ jugy'ajtu̶ñ wiinu̶u̶xu̶u̶bu̶. 48U̶u̶ch du'un u̶u̶ch neby je̱'e̱ tzajkaagyu̶ñ, je̱'e̱ mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ. 49Miich je̱'e̱ mmu̶j'áp mmu̶jteedy ajku̶xy kyaaygyu̶x je̱'e̱ maná jékyu̶p jim adu'ugtuum, peru̶ oy je̱'e̱ ja'akaaygyu̶xy o'kku̶x je̱' y ka'p je̱'e̱ jugy'ajtu̶ñ wiinu̶u̶xu̶u̶bu̶ paatku̶xy. 50Peru̶ u̶u̶ch, je̱' u̶u̶ch du'un ndijpy je̱'e̱ tzajkaagy mu̶dyiibu̶ tzajpjooty tu̶ choonu̶ñ, pu̶n je̱'e̱ du'umbu̶ tzajkaagy kaaybyu̶ñ, ka'p je̱'e̱ jyugy'ajtu̶ñ kyú̶xu̶ch tyu̶góyu̶ch. 51U̶u̶ch je̱' je̱'e̱ du'umbu̶ juugypyu̶ tzajkaagy mu̶dyiibu̶ tzajpjooty tu̶ chooñu̶ñ; pu̶n adaa du'umbu̶ tzajkaagy kaaybyu̶ñ, pyaadu̶py je̱'e̱ jugy'ajtu̶ñ wiinu̶u̶xu̶u̶bu̶. Je̱'e̱ tzajkaagy mu̶dyiibu̶ u̶u̶ch nye̱ge̱e̱mbyu̶ñ u̶u̶ch ngu̶'u̶mni'kx je̱', y nyé̱gu̶byu̶ch je̱' mu̶u̶d je̱'e̱ naaxwiiñjya'ay gyu̶xpu̶ ajku̶xy, neby je̱'e̱ aanu̶mu̶ ni'idzooku̶ñ mu̶baad paatku̶xyu̶ñ.
52Mu̶'it je̱'e̱ judío ja'ay ñay'amayu̶ydyu̶gu̶u̶yu̶gu̶xy amíñ u̶xyu̶py:
—¿Neby mdijy adayaaba ja'ay kyu̶'u̶mni'kx da'a mu̶baad xy'okmooyu̶m ajku̶xy y nnu̶kxy ndzu'tz njú̶kxu̶m ajku̶xy?
53Chi je̱'e̱ Jesús ñu̶maayu̶ ajku̶xy:
—Janch tu̶y'ajtu̶ñ du'un nnu̶maaygyu̶xy pu̶nu̶ ka'p u̶u̶ch je̱'e̱ nni'kx miich xychu'tzu̶ ajku̶xy y pu̶nu̶ ka'p u̶u̶ch je̱'e̱ nne'pty xy'uuku̶ ajku̶xy, u̶u̶ch je̱' je̱'e̱ ja'ay mu̶dyiibu̶ tzon tzajpjooty, ka'p je̱'e̱ mjugy'ajtu̶ñ wiinu̶u̶xu̶u̶bu̶ mbaatku̶xu̶ch. 54Pu̶n u̶u̶ch je̱'e̱ nni'kx xychu'tzu̶py y pu̶n u̶u̶ch je̱'e̱ nne'pty xy'uuku̶byu̶ñ, pyaadu̶py je̱'e̱ jugy'ajtu̶ñ wiinu̶u̶xu̶u̶bu̶; y nyajjuugypyú̶gu̶byu̶ch je̱' ko naty tu̶ myu̶baad'ajtnu̶ mu̶naa je̱'e̱ naaxwiimbu̶ kyu̶xaan tyu̶goyaanu̶ju̶ñ. 55Je̱' ko je̱'e̱ nni'kxu̶ch je̱'e̱ jaanchpyu̶ tzu'uch je̱', y je̱'e̱ nne'ptyu̶ch je̱'e̱ jaanchpyu̶ u'ugy je̱'. 56Pu̶n u̶u̶ch je̱'e̱ nni'kx xychu'tzu̶py y pu̶n u̶u̶ch je̱'e̱ nne'pty xy'uuku̶byu̶ñ, tu'ugyu̶ je̱'e̱ wiinu̶u̶xu̶u̶ y'ídu̶ch mu̶u̶d u̶u̶ch, y u̶u̶ch wiinu̶u̶xu̶u̶ ídu̶p mu̶u̶d je̱'. 57Je̱'e̱ Dios Teedy mu̶dyiibu̶ u̶u̶ch ya naaxwiiñ tu̶ xykyexyu̶ñ, myu̶u̶d jugy'ajtu̶ñ wiinu̶u̶xu̶u̶bu̶ je̱', y u̶u̶ch je̱' gyu̶xpu̶ u̶u̶ch njugy'aty; y timydyu'unu̶tz je̱' pu̶n je̱'e̱ jyu̶kxy pyu̶ky paatp ma u̶u̶chu̶ñ, u̶u̶ch kyu̶xpu̶ jyugy'ajtu̶ñ wiinu̶u̶xu̶u̶bu̶ je̱'e̱ paadu̶ch. 58U̶u̶ch je̱'e̱ u̶u̶ch du'un ndijpy je̱'e̱ tzajkaagy mu̶dyiibu̶ tzajpjooty tu̶ chooñu̶ñ. Adayaaba tzajkaagy ka'p adaa dyu'unu̶ch neby je̱'e̱ maná mu̶dyiibu̶ je̱'e̱ mmu̶j'áp mmu̶jteedy miich jékyu̶p kyaaygyu̶xu̶ñ; oy je̱'e̱ ja'akaaygyu̶xy peru̶ o'kku̶x je̱', ka'p je̱'e̱ jugy'ajtu̶ñ wiinu̶u̶xu̶u̶bu̶ paatku̶xy, peru̶ pu̶n adayaaba tzajkaagy kaaygyu̶xpu̶ñ, pyaatku̶xu̶py je̱'e̱ jugy'ajtu̶ñ wiinu̶u̶xu̶u̶bu̶.
59Jim je̱'e̱ Jesús adayaaba u̶xpu̶jku̶ñ du'un yejky ma je̱'e̱ judío ja'ay ñaymyujktaakt ajku̶xyu̶ñ jim Capernaum.
Je̱'e̱ ayuuk mu̶dyiibu̶ je̱'e̱ jugy'ajtu̶ñ wiinu̶u̶xu̶u̶bu̶ ye̱jkpu̶ñ
60Ko adayaaba ayuuk du'un mu̶doogu̶xy, chi je̱'e̱ Jesús y'u̶xpu̶jkpu̶du̶jk nimay myu̶naangu̶xy:
—Adayaaba ayuuk mu̶dyiibu̶ je̱'e̱ Jesús du'un tyijpyu̶ñ, janch tzip yu̶'u̶ du'un nu̶kxy ngu'ubu̶jku̶m ajku̶xy, ¿pu̶n je̱'e̱ da'a du'un mu̶baad okwinju̶wu̶'u̶y?
61Jesús ñejwu̶u̶y je̱'e̱ du'un neby najty je̱'e̱ ja'ay ñi'oj ñiyaaxu̶u̶yu̶gu̶xy, chi yajtu̶u̶wu̶gu̶xy:
—¿Adayaaba ayuuk du'un miich mdzaachpyu̶daakku̶xypyu̶? 62¿Neby it da'a m'okmu̶naangu̶xu̶ch ko u̶u̶ch xy'ijxku̶xu̶ch, u̶u̶ch je̱' je̱'e̱ ja'ay mu̶dyiibu̶ tzon tzajpjooty nba'ttu̶gu̶'u̶yu̶ch naty tzajpjooty ma u̶u̶ch najty jékyu̶p n'ityu̶ñ? 63Je̱'e̱ ja'ay y'aanu̶mu̶, je̱' je̱'e̱ ni'kx kopt yajjugy'ajtp, y je̱'e̱ ni'kx kopt ka'p je̱'e̱ maa chobaady pu̶nu̶ ka'p naty je̱'e̱ y'aanu̶mu̶ mu̶u̶du̶ch. Y je̱'e̱ ayuuk je̱'e̱ tu̶u̶bu̶ nyajmu̶dmu̶dyaakku̶xy je̱' je̱'e̱ Dios tyu̶y'ajtu̶ñ y je̱' je̱'e̱ jugy'ajtu̶ñ wiinu̶u̶xu̶u̶bu̶. 64Peru̶ chiinu̶ miich nije̱' ajku̶xy mu̶dyiibu̶ ka'p mmu̶bu̶jkku̶xyñu̶ u̶u̶ch je̱'e̱ n'ayuuk ndu̶y'ajt.
Je̱' ko ñejwu̶ydyaaby najty je̱'e̱ Jesús ku̶xyu̶ pu̶n najty je̱'e̱ y'ayuuk mu̶bu̶jkku̶xu̶bu̶ñ, y pu̶n najty ku̶'u̶ye̱gaanu̶bu̶ñ ma je̱'e̱ myu̶dzipu̶ñ. 65Chi je̱'e̱ Jesús jyakmu̶naañ:
—Paady du'un tu̶ nnu̶maaygyu̶xy ko ni pu̶n u̶u̶ch mu̶baad xykya'animíñ xykya'aku'ubú̶ky, pu̶nu̶ ka'p je̱'e̱ Dios Teedy naty du'un myu̶na'añ.
66Mu̶'it je̱'e̱ mayjya'ay ajku̶xy, je̱'e̱ mu̶dyiibu̶ je̱'e̱ Jesús najty pawu̶dijtku̶xpu̶ñ oy timypyuyo'oydyuutku̶xnu̶ je̱'e̱ Jesús y ka'p najty okmu̶dwu̶dijtku̶xnu̶. 67Chi je̱'e̱ Jesús je̱'e̱ nimajmé̱tzkpu̶ dyiscípulotu̶jk yajtu̶u̶y:
—¿Nej xy'u̶xmadzaambu̶ch miich nandu'un ajku̶xyu̶?
68Chi je̱'e̱ Simón Pedro y'adzooy:
—Windzú̶n, ¿pu̶n u̶u̶ch je̱'e̱ y'ayuuk tyu̶y'ajt da'a mu̶baad n'okmu̶bu̶jku̶ ajku̶xy? Miich je̱'e̱ m'ayuuk mdu̶y'ajt je̱'e̱ jugy'ajtu̶ñ wiinu̶u̶xu̶u̶bu̶ ye̱jkp. 69U̶u̶ch ajku̶xy tu̶ u̶u̶ch je̱'e̱ m'ayuuk mdu̶y'ajt nmu̶bu̶jkku̶xy, y nnejwu̶u̶ygyu̶xypyu̶ch ko miich je̱' je̱'e̱ Kunukxypyu̶ ja'ay, mu̶dyiibu̶ je̱'e̱ Dios tu̶ kexyu̶ñ.
70Chi je̱'e̱ Jesús y'adzoowu̶ ajku̶xy:
—Miich ajku̶xy nimajmé̱tzk tu̶ nwin'ijxku̶xy, peru̶ nidu'ugtu̶ miich mu̶jku'uju̶ch ajku̶xy.
71Ko je̱'e̱ Jesús du'un myu̶naañ, je̱'e̱ Judas je̱'e̱ najty du'un tyijpy, je̱'e̱ Simón Iscariote y'ung, je̱' ko je̱'e̱ Judas je̱'e̱ najty ku̶'u̶ye̱gaanu̶p ma je̱'e̱ myu̶dziptu̶jku̶ñ. Oy najty je̱'e̱ jya'anidu'ugtu̶ju̶ch je̱'e̱ nimajmé̱tzkpu̶ discípulotu̶jk ajku̶xy.
Currently Selected:
San Juan 6: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005