1 Juan 1
1
Je̱'e̱ tu̶y'ajt mu̶dyiibu̶ je̱'e̱ jugy'ajt ye̱jkpu̶ñ
1Cham miich adaa tu̶y'ajt nyajnijayu̶u̶ygyu̶xy je̱'e̱ mu̶dyiibu̶ najty jii je'emy ko je̱'e̱ naaxwiimbu̶ aga'an chonda'agy, je̱'e̱ mu̶dyiibu̶ u̶u̶ch tu̶ n'ijxku̶xy y tu̶ mu̶doogu̶xyu̶ñ mu̶u̶d u̶u̶ch je̱'e̱ ngu̶'u̶mwiin, y mu̶u̶d je̱'e̱ ngu̶'u̶mdadzák ajku̶xy. Je̱'e̱ tu̶ u̶u̶ch je̱'e̱ n'ijxku̶xy y tu̶ u̶u̶ch nni'idoongu̶xy mu̶u̶d u̶u̶ch je̱'e̱ ngu̶'u̶ ajku̶xy. Je̱' u̶u̶ch du'un ndijpy je̱'e̱ tu̶y'ajt mu̶dyiibu̶ je̱'e̱ jugy'ajt ye̱jkpu̶ñ. 2Adayaaba jugy'ajt wiinu̶u̶xu̶u̶bu̶ tu̶ je̱'e̱ ñayyajni'igu̶xu̶'u̶gyii, u̶u̶ch je̱'e̱ n'ijxku̶x y tu̶ u̶u̶ch je̱'e̱ tu̶y'ajt nye̱jkku̶xy neby u̶u̶ch n'ijxku̶xy nmu̶doogu̶xyu̶ñ. Y nyajmu̶dmu̶dyaakku̶xypy miich adayaaba jugy'ajt wiinu̶u̶xu̶u̶bu̶, je̱'e̱ mu̶dyiibu̶ najty jiiby ijtp ma je̱'e̱ Dios Teedy y chi tu̶ ñayyajni'igu̶xu̶'u̶gyii ma u̶u̶ch ajtu̶m ajku̶xyu̶ñ. 3Nyajmu̶dmu̶dyaakku̶xypy adaa mu̶dyiibu̶ u̶u̶ch tu̶ n'ijxku̶xy tu̶ nmu̶doogu̶xyu̶ñ, wan miich du'un tu'ugyu̶ m'ijtku̶xu̶ch mu̶u̶d u̶u̶ch ajku̶xy, du'un neby u̶u̶ch tu'ugyu̶ n'ijtku̶xyu̶ñ mu̶u̶d je̱'e̱ Dios Teedy y mu̶u̶d je̱'e̱ y'Ung Jesucristo. 4Nyajnijayu̶u̶ygyu̶xypy adaa wan du'un ni'igyu̶ anaxy njootkugu̶u̶yu̶mu̶ch ajku̶xy.
Dios je̱' tu̶kxu̶ñ jaju̶ñ
5Adaa je̱' je̱'e̱ ayuuk tu̶y'ajt mu̶dyiibu̶ u̶u̶ch je̱'e̱ Jesucristo xyaj'u̶xpu̶jkku̶xu̶ñ, y je̱'e̱ mu̶dyiibu̶ miich tu̶ nyajmu̶dmu̶dyaakku̶xyu̶ñ: ko je̱'e̱ Dios du'un je̱' neby je̱'e̱ tu̶kxu̶ñ jaju̶ñ, y ma je̱'e̱ju̶ñ ka'p je̱'e̱ koodzpu̶ nimaa. 6Pu̶nu̶ mu̶naanu̶mb ajku̶xy ko tu'ugyu̶ n'ijtu̶m ajku̶xy mu̶u̶d je̱'e̱ Dios, y ndzu̶naayu̶mu̶tz naty agootztuum ajku̶xy, anu̶u̶'ajtp naty du'un ajtu̶m ajku̶xy y ka'p je̱'e̱ tu̶y'ajt naty nguydyuunu̶m ajku̶xy. 7Peru̶ pu̶nu̶ tzu̶naayu̶mb ajku̶xy ma je̱'e̱ tu̶y'ajt yajpaadyu̶ñ du'un neby je̱'e̱ chu̶naay ma je̱'e̱ tu̶y'ajt yajpaadyu̶ñ, je̱'e̱ mu̶dyiibu̶ du'un neby du'umbu̶ ndzu̶naayu̶mu̶ñ ajku̶xy ma je̱'e̱ tu̶kxu̶ñ jaju̶ñ, mu̶'it tu'ugyu̶ oy yajxón n'ijtu̶mu̶ch ajku̶xy, y je̱'e̱ Dios ku̶xyu̶ xyajpokyñi'iwaatzu̶mu̶p ajku̶xy mu̶u̶d je̱'e̱ y'Ung Jesucristo ñe'pty mu̶dyiibu̶ te̱e̱m yojk mu̶u̶d u̶u̶ch kyu̶xpu̶ ajtu̶m ajku̶xy.
8Pu̶nu̶ mu̶naanu̶mb ajku̶xy ko ka'p nbokymyu̶u̶du̶ch ajtu̶m ajku̶xy, ku̶'u̶m naty du'un nnaywyin'u̶nu̶mu̶ ajku̶xy y ka'p je̱'e̱ tu̶y'ajt naty ni'imu̶dajtu̶mbu̶ ajku̶xy; 9peru̶ pu̶nu̶ nnigápxu̶mby je̱'e̱ nboky ngu̶dyeey ma je̱'e̱ Diosu̶ñ, mu̶baad je̱'e̱ tu̶y'ajt nmu̶dajtu̶m ajku̶xy ko tyúnu̶py je̱'e̱ Dios neby tyu'uda'agyu̶chu̶ñ. Xwyinmé̱kxu̶py je̱'e̱ nboky ngu̶dyeey ajtu̶m ajku̶xy y xyajwaatzu̶py je̱'e̱ njoot nwinma'añ ajtu̶m ajku̶xy ma je̱'e̱ ju̶bu̶kpu̶ kú̶xyu̶ju̶ñ. 10Pu̶nu̶ mu̶naanu̶mb ajku̶xy ko ka'p nduundu̶gooyu̶m ajku̶xy, anu̶u̶ je̱'e̱ Dios du'un nyajnajxu̶m ajku̶xy y ka'p naty je̱' y'ayuuk tyu̶y'ajt jaanch ngu'ubu̶jku̶m ajku̶xy.
Currently Selected:
1 Juan 1: MIXE
Highlight
Share
Copy
Want to have your highlights saved across all your devices? Sign up or sign in
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005