DAO: ZHAM" 1
1
Dao: Zham" Nho: Aphug' Gau Jho
1Davi yao: zo: Israel Kho:kham Sholamon: nho: dao: zham" jham- 2Cejham wa no; ra" lajheim: khyo" ta" to" ra" pha,jhi" dao: we' aung khug: laba lajhao khyo re ba: gyo: nae" qhid' mae" tung" to" ra" dao: zham" jham ngad:. 3Ce: dao: zham" jham wa nao re din: din: man: man: nhag' bo taung" ba: na: ye: nae" qhid' mae" qo" mho" shid' byid: nae" ru ngad:. 4Byuna myao" va" mo, we' qao" va" nhag' bo qere je: nhag' gyang" sho'- apyad ngai shi" mo, re ja: nam jab ba: ci sho' mho" byid: nae" ngad: ra". 5Pha,jhi" bo mo, re lhao" re: je: ba sho' qo" mho" shid' li" nae". Pha,jhi" ba mo, rere: khyo qo" shid' li" nae". 6Ailao" yao: bam wa pha,jhi" bo mo, tung" to" ra" dao: zham" khug mae" nyham" to" ra" khyo jham re qo" ba: gyo" yu: li" genae".
Zolau: Qere Pha,jhi" Byid' Ra" Khyo
7Pha,jhi" laba lajhao bo nae" qhid' mae" Mao"So re shi" gyaug phug' ca" ra". Nhag' magyang: mo, wa pha,jhi" dao: re pe" shui manho mung: manug: mho" zhao: yu ngad: ako".
8Nga" zo: we"- ni" myhi" we' ni" pho" ta" ra" dao: re gyo: wa,- 9Ni" myhi" pho" dao: wa yaung" ra" au: thab' re" ru: ni" byuna ave, re azhao" myhao nhao: li" nae"- ni" gaung dau: re ngadqere: qui: we' dakhyo: gyang" yaung" nhao: li" nae".
10Nga" zo: we"- qobo jab qeyang ju" phyo' re dabo: cao: ye:- 11byu dayaug re yese' gelang:- qobo maqo" lo: ana mo, re mageim: se' keim" gelang:- 12Yao: bam re ngonhaung" yeqhug' ra" au: daui: na geyang: re: ngonhaung" lo, mae joe" lao" shid: li" genae". 13Ngonhaung" yham khug mae lhad' phyo' yu: ra" zai kug byang" sho' xao" to: gelang:- 14Ngonhaung" we' cao" li" wa,- qo" lhad' phyo' yu: ra" zai mae" myho" byid: nae" ga: lhaung ko" ein gelang:-
15Nga" zo: we"- aibam jhao" dacao. Aibam mae" va: va: khyo na wa, 16Yao: bam wa mashab makhyang" ru maqo" kad' re mathan" na ngad: ako". Yao: bam wa se' nae" khonhae" re: jin" jin" ngad: ako". 17Nao taung" yu nug: ra" ngho' lha" na: au:- geim khae: to" re pe" akyu" mabo- 18ngadqere: airu" byu qe wa yao: yao" qhid' mae" lha" re thaung: to" ako". Yao: bam yao: myi" shid nae" lha" re thaung: ra" mo, we' dau: ako". 19Lhad' zo: lhad' shaug' mo; nho: kao so' re khonhae" re: jeim: nhao: ra"- aqan alan daui: na: ra" yaug khag' ngadqere: airu: mung: li" nae".
Pha,jhi" Yao: Na: Ra"
20Tae" gyo: ge, Pha,jhi" wa hau" mo" mae we' gai mae yao: hug' na: ra". 21Vomo" kham: mae we' byu zang" phaung: ra" jo, qo mae hug' na: ra".
22Nhag' magyang: mo, we"- khomyhao" joe" sho' nhag' cad' na genae" i? Laba lajhao re khonhae" joe" sho' jung" na genae" i? Naonhaung" khonhae" re: mazhao: yu lo: genae" i? 23Ngo mho" shid' au: re gyo" yu ge,. Ngo naonhaung" re pha,jhi" byid: mung: nga" laba lajhao gae byid: geli". 24Ngo naonhaung" re khai: na: lhaung: na:- ngadqere: naonhaung" mali" gengad: ako". Ngo ta" ru pe" magyo: ko" ngad: ra". 25Nga" pha,jhi" byid: dao: re gyo" lhaui" pye' gemung: ngo mho" shid' rure manug: khae: yu ngad: ako". 26Aimung: naonhaung" nyhan thaung: qhug' ra" au:- ngo qi: pye' li" nae". Qug: khai: phau: ko" re Ngo: yang jung" pye" ru qhug' li" genae". 27Qug: khai: wa la qam" re" ru: joe" li" mung:- nyhan thaung: qug: khai: cili" re- 28naonhaung" khyo" pha,jhi" re khai: li" genae". Ngadqere: ngo matau: nae". Khyi" khao: ngo" ngore qho: li" genae"- ngadqere: ngore maqhug' genae". 29Naonhaung" wa khonhae" re: pha,jhi" laba lajhao re mayhung:- Mao"So: mho dao: manug: gyo: ko" ngad: ra". 30Nga" pha,jhi" byid: dao: re naonhaung" khonhae" re: ma o. Ngo mho" shid' khyo rere: magyo: ngad: ako". 31Aimung: naonhaung" we' man: qi" rure the' yu: li" genae". Naonhaung" yao" ave, lo, mau" re naonhaung" yao: qu" nghang" li" genae". 32Aja: ja: maqhug' qu" mo, wa pha,jhi" re to" pye' gemung: shid qhug' li" genae". Nhag' magyang: mo, wa yao: bam yao" myo, jao mabo: ra" nhag' lam" yang byo; qeim: lo" li" genae". 33Ngadqere: nga" mho dao: gyo: yaug wa gug: gam qhug' li" nae"- yao: wa gyaug ci" maqo lo:- gug: gam za: qo" na: li" nae".
Currently Selected:
DAO: ZHAM" 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009