MATHE 5
LHCL

MATHE 5

5
Bam Dao Mae" Tarha" Dao:
1Yesu wa byu phung: mo" re myao lao" bug gaung dalam: dao khyo do, ye" lo" ra". Yao: yezaung: jo, lao" Yao" mho"zo: qe wa yao: jhao" zang" lo: ako". 2Alao" yao: wa dao: phung" mung: yao: bam re mho" shid' ru wa-
Ngaui Lho" Tarha"
(Luka 6.20-23)
3Byo mae myaung sho: beim" ra" mo, wa- ngaui lho" ko" ra"-
Pe"mung:ga"re mug:gaung: mung"dan: wa yao: bam: mung"dan: ngad: ra".
4Kaug' qhui: ra" mo, wa ngaui lho" ko" ra"-
Pe"mung:ga"re Mao"So wa yao: bam re nhag' tang" byid' li" nae".
5Nhag' lam: nau" nhae" ra" mo, wa ngaui lho" ko" ra"-
Pe"mung:ga"re yao: bam wa Mao"So: dao:so: to" ra" shaman" jeju re yao: bam qo" khae: yu genae".
6Mao"So myid o: ra" khyo re phug' cao" nae" moe, shab' ra" mo, wa ngaui lho" ko" ra"-
Pe"mung:ga"re- Mao"So wa yao: bam re nhag' dag nhao: li" nae".
7Nhag' ba: khyag' ra" mo, wa- ngaui lho" ko" ra"-
Pe"mung:ga"re Mao"So wa yao: bam re nhag' khyag' yu: li" nae".
8Nhag' lam: san sin" mo, wa ngaui lho" ko" ra"-
Pe"mung:ga"re yao: bam wa- Mao"So re qhug' myao: li" genae".
9Mang: dae ba: tae" ra" mo, wa ngaui lho" ko" ra"-
Pe"mung:ga"re yao: bam re Mao"So: yao: zo: qe ga: mhang" li" genae".
10Mao"So myid o: ra" khyo re phug' cao" yang: yhin" ru qhug' ra" mo, wa ngaui lho" ko" ra"-
Pe"mung: ga: re Mug:gaung: mung"dan: wa yao: bam: mung"dan: ngad: ra".
11Nga" mathao: yang byu qe wa naonhaung" re maphug' makhyad' kad' ru we' yhin" mung: madang: ra" khyo" qobo vhin mung: ta" gelao"- naonhaung" wa ngaui lho" ko" ra"- 12Ngaui bau: ngaui lho" na ge,- pe"mung:ga"re mug:gaung: mung"dan: mae naonhaung" aphug' jhaung qhu" wa gyai qi" ra". Naonhaung" qhid' au: mae" lapa qere re: yao: bam airu: za: yhin" avako".
Xo: We' Bo" Bao Dao: Tau"
(Marku 9.50; Luka 14.34-35)
13Naonhaung" wa myid gaung: dao: xo: ngad: ako". Ngadqere: xo: wa ngae: ra" ru shao" byaug lao" ai: xo: re dam: ngae sho' magai: kad' yu lo:ngad: ra". Ai: xo: wa pe" akyu" mabo loyang: taung gaung khyo shapye' pye' mung: byu jham zab: nhae" pye' ko" ra".
14Naonhaung" wa mug: myid: bo" bao ngad: ako"- Bug gaung dao mae te" to" ra" vogaung: re maqo" go: to: ngad: ra". 15Myikaug' re te' mung: ban" yang mamaug: lhaung" to" qu"- Yham khug mae na: ra" mo, alhab' re bao byid: nae" qhid' mae myikaug' tao" dao mae lhaung" zhaung: to" ako". 16Ai we' dakhyo: byu jham wa naonhaung" kad' ra" gai: ra" mau" zo" jham re the' myao mung: mug:gaung dao mae na: ra" naonhaung" Pho" re caung:khin" byid: vageshao: naonhaung" bo" bao re byu jham: qhid' kheim: mae bao byid' to: ge,-
Tarha" Re Mho" Shid' Ru
17Kham" to" ra" Tarha" we' Lapa qe: dao: jham re qab: pye' nae" qhid' mae" ngo joe" li" ru ngad: ein: naonhaung" dajho ge,- aijham re qab: pye' nae" ein: ngo joe" li" ru mangad:. Jab byang" li" nae" qhid' mae" ngo joe" li" ru ngad:. 18Naonhaung" re ngo dang dang ta" geli"- Mug:gaung we' myid gaung malai: lo" shire ta" to" ra" gu: alhab' majab byang" byang" wa kham" to" ra" Tarha" dao: mae" tung" ce' dace' we' myo, dace' lhao" malai: lo" nae". 19Airu: mung: khag' ngadqere: ai: ngai: thao" ra" amyin" dao: re yao: shad' lhoe" mung: su gaje qere airu: shad' lhoe" nae" mho" byid' ra" yaug wa- Mug:gaung: mung"dan: mae ngai thao" yaug ngad: li" nae". Ngadqere: ai: amyin" dao: jham re phug' cao" mung: su gaje qere airu: phug' cao" nae" mho" byid' ra" yaug wa mug:gaung: mung"dan: mae qi" thao" yaug boe" nae" ngad: ra". 20Amung: Ngo naonhaung" re ta" ru wa Mao"So myid o: ra" khyo" phug' cao" rumae Pharishe qe we' tung" pho" qe tho' naonhaung" maje qere wa mug:gaung: mung"dan: khyo maqo" vao ye: genae".
Nhag' Yo" Ra" Khyo Re Mho' Shid: Ru
21Byu dase'- Byu se' ra" yaug wa dao: kho' ru qhug' ca" nae" ga: daba: pyad mae" mo, ta" to" ra" dao: naonhaung" the' gyo" avako". 22Ngadqere: ngo naonhaung" re ta" ru wa yao: mao: yao: nhaung: re nhag' yo" ra" yaug khag' ngadqere: dao: kho' ru qhug' ca" nae". Yao: mao: yao: nhaung: re byugao: ga: ta" ra" yaug wa tarha" yung" mae dao: phyid' ru qhug' ca" nae"- amung: yao: mao: yao: nhaung: re ago ga: shad' ra" yaug khag' ngadqere: myiqid tham: khyo pye' zaui: ke' ru qhug' li" nae". 23Amung: nao wa phan dao mae Mao"So re xeim: ngaui" byid: nae" seim" na: au:- ni" mao:nhaung: dayaug yaug nao re nhag' mashid qobo vhin: to" ru daja: ja: re myid: beim" ke' lao"- 24Ai: xeim: re shi" to: co' mung: lo" yang: ni" mao:nhaung: pho" we' shi" mang: dae sho' lo" kad' wa,- Bin lao" dam: tug' lo mung: ni" xeim: Mao"So re lo: ngaui" byid: wa,.
25Nao re qobo zhaug' yaug we' daga" tarha" yung" khyo ye" lo" na: au:- tarha" yung" khyo majoe" shi: re yao: we' jho" vang" sho' phyad kad' yu wa,. Nao airu: makad' lao" yao: wa nao re tarha" zug: pho" lo, khug khyo ab byid' pye' li" nae". Alao" tarha" zug: pho" wa nao re gug: gam pho" lo, khyo ab byid' pye' mung: nao re thaung: khug mae lhaung" to" li" nae". 26Naonhaung" re ngo dang dang ta" geli"- nao khyug' ca" ra" ngaui alhab' mabin: khyug' khyug' wa thaung: mae" nao qo" thug' lo nae" mangad:.
Myi: Shad' Lao Shad' Khyo Mho" Shid' Ru
27Su: myi: su: lao dashad' wa,- ga: ta" to" ra" dao: re naonhaung" gyo" qu" vako" ra". 28Ngadqere:- ngo naonhaung" re ta" ru wa nhag' lam" yang qu" sang yu nug: ra" khyo" myiqe: re qu" ra" yaug khag' ngadqere: yao" nhag' lam: mae ai: myiqe: re shad' yaug ngad: ra". 29Amung: ni" lo, yo shad' myo,jid' yang nao re qobo kad' nhao: ngad: re wa ai: myo,jid' re thad' shalhaui" pye' wa,- pe"mung:ga"re ni" gaung geim" myiqid tham: khyo gyo" lo" nae" tho' ni" gaung mae" dadau qeim: byaug: ru wa je: gai shi" ra". 30Ni" lo, yo lo; yang nao re qobo kad' nhao: ngad: re wa ai: lo, re qam" phyid' pye' wa,- pe"mung:ga"re ni" gaung geim" myiqid tham: khyo gyo" lo" nae" tho' ni" gaung dadau qeim: byaug: ru wa ni" qhid' mae" je: gai shi" ra".
Myi: Lao Gao" Ra" Khyo Re Mho" Shid' Ru
(Mathe 19.19; Marku 10.11-12; Luka 16.18)
31Alao"- yao" yham sang myhi" re kao" pye' nug yaug wa yao" yham sang myhi" re kao: mugsug' tung" byid' ke' ca"- ga" ra" dao: jo, gau ngad: ra". 32Ngadqere: ngo naonhaung" re ta" ru wa yao" yham sang myhi" re yug: qho yang: mangad: lo: kao" pye' mung: ai: myiqe: wa gatau dayaug we' dam: lo, xo' yu: ngad: re wa yao: wa yao" yham sang myhi" re lao shad' nhao: ra" qobo qo" ra". Alao" ai: myiqe: re dam: lo, xo' yu: ra" yaug re: su: myi: lhad' yaug ngad: ra".
Jham Tang" Ra" Khyo We' Sin: Ra" Mho" Shid: Dao:
33Nao to" ra" dao:so: re daphyo' wa,- Mao"So re byid' to" ra" ni" dao:so: re zaui" pyang" wa,- ga: daba: mae" mo, re ta" to" ra" dao: re naonhaung" gyo" qu" vako" ra". 34Ngadqere: ngo naonhaung" re ta" ru wa- naonhaung" dao:so: dalam: lam: to" ra" au: mug:gaung re lao: yang: jham datang" ge,- pe"mung:ga"re mug:gaung wa Mao"So: zaung tao ngad: ra". 35Myid gaung re lao: yang: re: jham datang: ge,- Myid gaung wa Mao"So: khyid nao: jo, qo ngad: ra". Yerusalem re lao: yang: re: jham datang: ge,- Yerusalem wa kho:kham mo" na: ra" vogaung: ngad: ra". 36Alao" yao: yao" au: re lao: yang: re: jham datang: ge,- pe"mung:ga"re Naonhaung" wa xae dakhe' re za: lhao" phyu sho' no, sho' maqo" kad' gengad: ra". 37Airumung:- naonhaung" dao: wa- ngad lao" wa ngad va" ein: mangad: lao" wa mangad: ein: za: ta" ge,- aimae" je: ra" naonhaung" ta" ra" dao: wa makhyang" ra" yaug mae" lo: ra" dao: ngad: ra".
Lage, Phaug' Ra" Khyo We' Sin" Ra" Mho" Shid' Dao:
(Luka 6.29-30)
38myo,jid' qhid' mae" myo,jid'- zaui qhid' mae" zaui dam: tug' ca" ga" ra" dao: re naonhaung" gyo" qu" vako" ra". 39Ngadqere: ngo naonhaung" re ta" ru wa- Nao re magai kad' ra" yaug re lage, daphaug' wa- Ni" lo, yo shad' boqae pyo' yaug re lo, kaung: shad' rere: pyo' nhao shi: wa- 40Ni" akhug: bau: re yu nug yang: yung" zaung: ra" yaug re ni" bau: qhang rere: yu: lo" nhao shi: wa,- 41Nao re maqad maqui" deim" zag mung: khyo daman: qovin ye: nhao: yaug we' khyo shid' man: ye: shi: wa. 42Nao jhao" mho' yaug re byid: wa,- nao jhao" daja: ja: jhid' ngho: nug yaug re jhid' ngho: byid: wa,-
Gyevo Re Jhid'de, Ca" Ru
(Luka 6.27-28; 32-36)
43Ni" Ba nam sang: cao: qere jhid'de; wa,- ni" gye jham re nghang: wa, ga" ra" dao: re naonhaung" gyo" qu" avako". 44Ngadqere: ngo naonhaung" re ta" ru wa naonhaung" re yhin" ra" mo; qhid' mae" akyu" mho' byid: ge,. 45Airulao" naonhaung" wa mug:gaung dao mae na: ra" yao: Pho" zo: dau qe boe" genae". Pe"mung:ga"re magai: ra" mo, we' gai: ra" mo; dao mae dakhyo: za: Mao"So wa ba zho byid' ru we' din:man" ra" khyo kad' mo, we' madin: man" ra" khyo kad' ra" mo; dao mae mug: qu byid' ra". 46Naonhaung" re jhid'de; ra" mo, re za: naonhaung" jhid'de; ko" re wa- Mao"So mae" pe" jhaung qhu" qo" yu genae" i? Khang: khyui zo: mo, lhao" re: airu: kad' ko" ra". 47Amung: naonhaung" wa- mao:nhaung: qe we' za: jho" jhau zam" khug ko" ngad: re wa- gaje tho' nao kad' ru pe" je: i? Taung bug qere: ai we' dakhyo: kad' ako". 48Amung: mug:gaung dao mae" naonhaung" Pho" wa jab byang" ru we' dakhyo: naonhaung" re: jab byang" na ge,.

© Bible Society of Myanmar 2009


Learn More About Lhaovo Common Language Bible

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.