NGUG JI: 1
1
Yerusalem Nho: Kaug' Qhui: Ra" Khyo
1Ganhae" dalhang vobyu byang" ra" Yerusalem vogaung: yao: za: masho: majhin ngad: jo; ra" lhe".
Ganhae" dalhang mug: myid: yang nga: yhe' qhug' ru ana" yao: wa cug' mo" we' dau: jo; ava".
Vomo" jham mae" qi" qhang: thao" ra" lam: wa jeim doe; lo" va".
2Yao: wa damyi khyeim ngug: ra" yao" boqae mae ngug byid yug: gyo" ra".
Qhid' phyao: mae" yao" ba nam qe mae" yao: re nhag' tang" byid nae" ru dayaug re: mana: lo:-
yao" myid vang" ba nam qe wa yao: re ngag: phaug' pye' mung: alhab' mo, wa- ana" yao: re gye tug' kad' ako".
3Yuda nho: byu qe wa masho: majhin jeim boe" jo, ako". Yao: bam re yham mae" khe' tao" pye' ako".
Yao: bam wa- yao: bam: mug: myid ga: maqo" mhang" ra" gamug: mae ye: na: bam: ako".
Ai: mae gyevo qeyang lhang" kham" to: mung: phao: loe, nae" khyo majo, ngad: ra".
4Ai: gyang" lho" ba jham mae Caung:pa" Yham khyo khag' mali" caung:pa" ngad: ako".
Ai: jo, qo mae nghaui" caung: lhaung" nghaui" ra" myiqe: nau" qe dayin dayo: qhug' mung: khinjaung qe wa no: kyang: za: akyang" na: aloko".
Vomo" kham: jham akeim jo; ako". Aimung: Ziun wa dayin dayo: qhug' na: ra".
5Yao" nho: gyevo qe aung doe; ako". Yao: bam wa yao: re kheim: so' yang zaui" ci: ako".
Yao" nho: myo: sho' ra" qobo alhab' mathao mae yao: re Asang: yang qug: khai: qhug' nhao: va".
Yao: zo: qe re taung" yu mung: jhui" yu: pye' ako".
6Yerusalem nho: qi" qhang: gyag: ru wa lai: lo" va" ayo, mae angad lo"-
yao" au: jhaung qe wa vae: moe; mung: qam: nang" jo; ra"
shocid jham we' dau mung: sho: kung" byu qe: lo, mae" phao: lo" mung:- qam: alaug laug gan byaug: ru we' dau: ako".
7Ana" cae: jhug tag byo; qeim: jo; ra" Yerusalem wa- ganhae" mae" yao" qi" qhang: gyag: lo: rure myid: beim" ra".
Yao: gyevo: qe: lo, khyo gyo" vao lo" ra" au: yao: re bao" yu nae" khag' mana-
yao: re aung: pye' mo, wa yao: gyoe; gyo" lo" rure qi: ako".
8Yao" nho: nga: qo" ru baui" byaug va". Yao: wa gaung pyad' ngad: jo, mung: ceim" qu" cae" ako".
Yao: wa nokyang: kyang: mung: qho' ru we' yao" myo,khung: re nyham" ci: ra".
Yerusalem wa gyaug: din pho: yug: no qobo jham: yang yao: yao" gaung re maca' majhad' kad' pye' ra".
9Yao" nho: mayaung" masan: rure laui za: qo" myao: ra". Ngadqere: yao: wa yao" au: pa lo, kyo' re leim zo: nae" khyo re pe" shui manho ngad: ra".
Yao" gyang: gyo" lo" ru wa qu" gyaug qu" lhaung ngad: ra". Ngadqere: yao: re khag' yang nhag' maqo" tang" byid: ngad: ako".
Yao" nho: gyevo qe aung doe; avako". Aimung: yao: wa Asang jhao" nhag' khyag' yu nae" qhid' mae" mho' yao: ra".
10Yao" nho: gyevo qe wa yao: mae" zai kug jo,nho" alhab' lhad' yu: pye' byid' ako".
Tarha" taung bug qe magai: ye: ga: Asang kham" to" ra" Caung:pa" Yham khyo yao: bam vao ye" lo" ko" rure yao: myao co' ra".
11Yao" vobyu qe wa zo:ve qho: qin" au: re nokyang: kyang" ako"-
yao: bam wa yao: bam yao" kao so' qo" xo' daui: na nae" qhid' mae" yao: bam: zai kug jo,nho" we' zo:ve tha" zo" pye' ako".
Vomo" wa- Asang we" ngore qu" la, ngo nhag' kyo: nhag' gyae qhug' na: rure myao byid: la,- ga: gyi: ngug: yao: ra".
12Yao: wa anhae khyo" su" lai: lo" ra" yaug khao: ngo" re-
ngore qu" qu" la, nga" no dae ru" ru khonhae" khag' maqhug' qu"
Asang nhag' yo" ra" ba na mae Asang: yang nga" dao mae cilo byid' ra" no dae ngad:- ga: lham: gyi: ngug: ra".
13Yao: wa tho' mae" myi: re nhao: khyo" ke' ra"- ai: myi: wa nga" nho: aung khug mae nga" ra"-
yao: wa nga" qhid' mae" lha" thaung: to: mung: ngore myid gaung khyo she: khyo" pye' ra".
Ai: thao yao: wa ngore shapye' to: mung: abang mabyid dae no: na: jo, nhao: ra".
14Yao: wa nga" nho: qobo alhab' re xam" ci mung:- ai: qobo jham re sham" dang" to" ra".
Yao: wa aijham re nga" nho: lang zang: mae vhe' to: byid' ra".
Aimung: ngo wa airu la: yang: qam: nang" lo" byaug va". Asang wa ngore nga" nho: gyevo qenho: lo,khyo byid' pye' ra". Aimung: ngo wa yao: bam re khoru: maba: tug' phaug' lo:-
15 Asang wa nga" nho: qam: bo: thao" ra" gyezo: qere qi: jung" pye' ra".
Yao: wa nga" zolau: qere se' tam" pye' nae" qhid' mae" gyetab datab nhao: ke' ra".
Yao: wa sabyi khyae mae" sabyi shi: re we' dakhyo: nga" byu qere deim" khyoe' pye" pye' ra".
16Ai: mathao mae- nga" myo,jid' jham wa ngug byid byang" sheim: byaug va"
ngore khag' yang re: nhag' maqo" tang" ngore khag' yang re: qam: maqo" byid:-
gyevo wa ngore aung: pye' va"- nga" byu qe pe" maqo" lo:-
17Ngo wa nga" lo, re yheim" ke' ngadqere: ngore khag' yang bao" yu nae" mangad:-
Asang wa- ngore gye kad' nae" qhid' mae" shad' khao: ngo" mae" gyevo qere khai: ke' ava".
Yao: bam wa ngore maca' majhad' ja: we' dakhyo: zam" khug: ako".
18Ngadqere: Asang wa tarha" din:man" ra". Pe"mung:ga"re ngo wa- yao: re maphug' cao" ru kad' lai: lo va".
Khyi" khao: ngo" mae" mo, we"- ngore tae" gyo: byid: gela,- nga" no: dae re qu" byid: gela,.
Nga" zolau: qe we' zomyi: qere kyam: byu khyo" taung" jhui" lo" avako".
19Ngo wa nga" bo: de, ra" ba nam qere khai ngadqere: yao: bam ngore manug: bao" yu ngad: ako".
Khinjaung qe we' au: jhaung qe wa vomo" nho: hau" mo" khyo jham mae
yao: bam yao" gaung daui: na nae" qhid' mae" zo:ve qho zo: zo" re" shid: lo" ako".
20O" Asang we"- ngo dayin dayo: qhug' na: ru- nga" nhag' lam: masho: majhin phyag' na: ru- qu" byid: la,.
Nga" nho: qobo jham: mathao mae kaug' ruyang- nga" nhag' lam: byo; byaug va".
Hau" mo" khyo jham mae byu jho" se' ako". Yham khug mae lhao" re: shid: zug: na: ra".
21Nga" nokyang: thoe re tae" gyo: byid: la,- ngore nhag' tang" byid: nae" khag' mana-
nao: yang nga" dao mae qug: khai: kyi" khyag' leim zo: nhao: rure nga" gyevo qe qu" ngaui: ako".
Nao dao:so: byid' to" ra" ba na re joe" lo nhao wa,- ngo dayin dayo: qug: khai: qhug' ru we' dakhyo:- nga" gyevo qere leim zo: nhao wa,.
22Yao: bam: makhyang: mashab: mau" zo" qhid' mae" yao: bam re dao: phyid' byid: wa,.
Nga" nho: qobo jham: mathao mae ngore nao: yang qobo dae byid' ru we' dakhyo: yao: bam re qobo dae byid: wa,.
Ngo wa myid myo: mung: no: kyang: kyang" na:- aimung: ngo wa aung khug mae no: na:.
Currently Selected:
NGUG JI: 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009