EZRA 1
1
Israel Qe Dam: Tug' Lo" nae" Kuru Amyin" Byid' Ru
1Persia mung" mae Kuru khosin" boe" qhid: ra" sao qhid' zin mae Asang wa yao" yang lapa Yeremia nhad' khyo" ta" to" ra" dao: re jab byang" li" nhao: ra". Yao: wa Kuru re o mae bo: ra" amyin" re tung" nhao mung: yao" nho: mung"dan: khyi" khao:ngo" mae thoe qi: khyo" nghe' nhao nae" qhid' mae" jhan" ke' ra". 2Ce wa Persia khosin" Kuru nho: amyin" ngad: ra". Mug: khaung mae" Mao"So Asang wa ngore mug: myid geim" mae eib: ra" yaug boe" nhao mung:- Yuda mung" mae" Yerusalem mae yao" qhid' mae" Caung:pa" Yham zhaug' nae" qo byid' ru qhug' ava". 3Mao"So wa yao" nho: byumyu" naonhaung" alhab' we' daga" ngad vashao:- Naonhaung" wa Yerusalem khyo lo" mung: Yerusalem mae caung:pa" byid' ra" Mao"So- Israel byumyu" nho: Mao"So Asang: Caung:pa" Yham re dam: zhaug' ca" ra". 4Taung bug: mang: mae yephao: na: bam: ra" yao" nho: byumyu" mae" dayaug yaug qe tug' phao nae" qhid' mae" bao" yu ca" ngad: re- yao: bam: yham kyo: cao: qe wa yao: bam re ceru: bao" byid: ca" ra". Yao: bam wa yao: bam: qhid' mae" ngaui we' qhang- ci ca" ra" zo:ve we' qovin gug'nyhug' jham we' Yerusalem mae" Mao"So: Caung:pa" Yham mae qhaug' byid: nae" ngaui" xeim: ngaui she byid: ca" ako"- ga" ru ngad: ra".
5Ailao"- Yuda we' Benyamin kaung mae" au: jhaung ade, qe- khinjaung qe we' Levi byu qe- aimae" gatau Mao"So: yang nhag' lam: jhan: byid: qhug' ra" mo, wa Yerusalem mae" Asang: Caung:pa" Yham re dam: lo" zhaug' nae" byin seim" ako". 6Yao: bam: yham kyo: cao: qe alhab' wa yao: bam re ngaui zai jham- qhang- zao: kho jham- zai tho gug'nyhug' jham- phug' de; ra" zai gatau jham- Caung:pa" Yham qhid' mae" ngaui" xeim: jham re byid: ko" ra" khyo" bao" thaug' byid' ako".
7Kuru khosin" wa yao: bam re Nebugkhaneza kho:kham: yang Yerusalem mae" caung:pa" yham mae" tai: cilo mung: yao" so jham: nho: jhaung: yham mae ke' to" ra" khug' jham we' keim jham re dam: byid' ra". 8Yao: wa aijham re kho:kham ngaui zam: au: jhaung Mithredad nho: lo, khyo kai" byid: mung:- ai: yaug wa Yuda mae" mung" eib zug: Shebaza qhid' mae" mang tung" lhai: ke' ra". 9-10
| Zai ai: gu: wa- xeim: ngaui" qhid' mae" qhang khug'- | 30 |
| Xeim: ngaui" qhid' mae" ngaui khug'- | 1,000 |
| gatau: khug' jham- | 29 |
| qhang khug' angai- | 30 |
| ngaui khug' angai- | 410 |
| gatau keim kang: khug'- | 1,000 |
11Shebaza we' pyaung" nha: to: mo, we' gaje Babelon mae" Yerusalem khyo lo" ra" au: yao: we' daga" tai: lo" ra" qhang khug'- ngaui khug' we' gatau: zai jham alhab' wa 5,400 ngad: ra".
Currently Selected:
EZRA 1: LHCL
Highlight
Share
Copy
Want to have your highlights saved across all your devices? Sign up or sign in
© Bible Society of Myanmar 2009