सॆःक्ढुङ्पा 9
9
सावालऎ येसु निवाँयुङ् लॆकु
1सावालऎ आक्रल पारभुमि टिङ्खुबाचि चोब्न सेॽमा लॆःॽमि कामानुङ् किसिमा खाङ्मिटुचि। खो चोब्बाङ् ढ्या याटाङ्पाबि खारा। 2हाङ् दमस्कसबि चुखुबा चोब्न पारभुमि लाम्फु टिङ्खुबा मेॽनुङ्मा हाङ् वाठाङ्पाचि लाॽमाचिहाङ् यारुसालेम्पि लाटॆॽमाहाङ् डान्डा पिट्टॽङार कामानुङ् दमास्कस्मि याहुडिचिम् खोम्ठाम् खिम्पिहा टुङ्घङ्पाचिबि ढुप्पाट्टमि लागि साब्मारा ङागा। 3हाङ् खो दमास्कस कॆक्पि टामार मरक्लन नाम्फलिॽवाबिऎ नाम्टुरुङ्मार हामिम्पा एक्क ओप्लिङ् खोम् गॆअङमॆअङ् ओप्टाआ। 4सावाल बाखाबि टॆक्बिखारा हाङ् खो गर लोमिम्पा एक्क साम्ला खेमु, “सावाल, ए सावाल काङा मान्ठा डुखा पिःॽङानॆ?”
5हाङ् सावालऎ सिमु, “ओ पारभु, आना आसारो?” पारभुऎ गरहाङ् खानावाँ एम्पिटु, “का आनॆ डुखा पिॽमॆ पाइमिम्पा येसुङा। 6ह पगॆहाङ् हाटाबि खारॆ हाङ् आक्कुबि आनॆ माङ् योम्पक् यिक्मा लॆ लोमॆ खानावाँ इऎछ।”
7सावालनुङ् लाम्ढुखुबा याॽमिचि माङ्स मायामुरे येबमि मान्ठाभनॆ खोचिऎ साम्ला ग खेमुचि टर आसास माखाङ्टकुचि। 8सावाल बाखाबाङ् पक्लिन्टा, टर खोसॆ उम् मिक् ओबक्मार माङ्स मॆखाङ्टकु। मसॆ खोनुङ् लाम्ढुखुबाचिऎ उम् हुक्पि लाॽसे डमास्कसबि लाखॆटुचि। 9हाङ् खो सुम्चि डिनाढारि मिक्सुरुम्पा लिसा हाङ् माङ्स माचाउ, माडुङु।
10डमास्कसबि हनानिया लोमॆ एक्क टिङ्खुबा चुआ। पारभुऎ सेन्चिबि खो गर कामनुङ् सेःरु, “ओ हनानिया!” हननियाऎ खानावाँ ऎम्पिटु, “माल, पारभु।”
11पारभुऎ खो लोसु, “सिढा लोमॆ लाम्फुबिऎ याहुडामि खिम्पि खारॆहाङ् टारससबिऎ सावाल लोमॆ याॽमि चुऎ? कामानुङ् सिमॆ। खो पारठाना लॆःॽमॆपाइ। 12खोसॆ सेन्चिबि हनानिया लोमॆ याॽमि खिम् हङ्सिॽयु भॆनुॽहाङ् होइखेपा सङ्क मिक् खाङ्हिङार कामानुङ् उम् हुक् खो सक्पि युङ्पिॽमिम्पा खाङु।”
13टर हननियाऎ खानावाँ ऎम्पिसे लोसु, “पारभु, आक्कसॆ ग यारुसालेम्पि आनाम् ऎॽवा निवाँनेन् याॽमिचि ऎॽवा डुखा पिडुचि कामानुङ् कॆ डिरिक् याॽमिचिबाङ् खेम्डुङ। 14हाङ् गुबि सङ्क आनाम् निङ् लाखुबाचि चोब्न लाप्मा कामानुङ् ढ्या याटाङ्पाचिबाङ् ढुप्पाट्ट लाटॆडाहाङ् टाडा।”
15टर पारभुऎ हनानिया लोसु, “आना खोबि खारॆ, मान्ठाभनॆ आक्क याॽमि कॆ काम् योम्पक् मुसुर कामानुङ् सॆःक्डुङ। आक्कसॆ होइढा याॽमिचि नुङ् आक्खाचिम् हाङ्चि, नुङ् इस्राएलिचिम् लुम्पि काम् निङ् खेम्मिकुचिमि। 16काम् लागि आक्कसॆ ऎॽवा डुखा आङ्मा लॆ कामानुङ् कॆ आक्क खाङ्मिकुङ।”
17हाङ् हनानिया आक्क खिम्पि खाराहाङ् हङ्सिॽयु भॆना हाङ् सावाल सक्पि उम् हुक् युङुहाङ् गर लोसु, “नुसा सावाल, आना लाम्फुबि टामॆ पाइमार आनानुङ् खाङ्मुडॆ पारभु येसुऎ, आनॆ होइखेपा सङ्क मिक् खाङ्हिसॆ हाङ् सॆङ्सॆङॆ लावामि चॆक्मावाऎ चॆप्खॆॽनार कामानुङ् काङा पाङ्हाङ्डिङ।” 18मरक्लॽन सावालमि मिक्बाङ् सिपरॆॽवा रक्मा माङ्माङ् हेरा हाङ् खो फेरि खाङ्हिखुबा लिसा हाङ् खो पगाहाङ् बाप्टिस्मा लासा। 19हाङ् खोसॆ चामा चाउ हाङ् उम् सक्मा टाबिटु।
सावाल डमास्कस हाङ् यारुसालेम्बि
सावाल रिचि ङाचि डिनाढारि डमास्कसबि टिङ्खुबाचि नुङ् पेना। 20मरक्लॽन सावाल याहुडिचि खोम्ठाम् खिम्पि येसु निवाँहाङ्मि पासा कामानुङ् इबकु। 21हाङ् खोम् खानावाँ खेम्खुबा चोब्न याॽमिचि फोफो आक्खॆटुचि हाङ् खोचि खोचिबि गर कासामि, “यारुसालेम्पि येसुमि निङ्पि यामुखुबा याॽमिचि काइर लॆखुबा याॽमि गन हॆॽनॆ? गुबि सङ्क म निङ् लाखुबाचि लाप्से ढ्या याटाङ्पाचिबि लाखॆसि टामिम्पा याॽमि गन हॆॽनॆ?” 22टर सावाल झाना चॆक्मावा नुङ्मा लिसे खारा हाङ् येसुन खिरिस्ट लोमॆ खानावाँमि चुमॆक्सङ् पिस्से डमास्कसबिहा याहुडिचि आक्खॆॽमिट्टुचि।
23हाङ् डिरिक् लः डॆङ्पि याहुडिचिऎ सावाल सेॽमे निवाँ मुसुचि। 24टर ग खानावाँ सावालऎ वाप्टकु। हाङ् आक्खा याॽमिचिऎ लेल्लेन् सेन्सेन् खो सेॽमाम् लागि हाटामि टागारबि हुङ्युक्सुचि। 25टर युटान सावालमि टिङ्खुबाचिऎ खो बचॽवाबि युङुचिहाङ् ठेट्ढाङ्सुचि हाङ् लुङ्ठग् बाहिर खुराङ्सुचि।
26सावाल यारुसालेम टाआहाङ् आक्कुबिहा टिङ्खुबाचि नुङ् चुॽमा मिना टर आक्खाचिऎ खो स टिङ्खुबान कामनुङ् निवाँयुङ् मालॆहिसुचि हाङ् खोनुङ् चोब्न किसिआमि। 27टर बारनाबास टाआहाङ् सावाल सॆःक्ढुङ्पाचिबि लाटॆटु। हाङ् खोसॆ सावाल लाम्ढुढाङ्मार मान्टहाङ् पारभु खोनुङ् खाङ्मुसॆ हाङ् यामुसॆ, हाङ् खोसॆ डमास्कसबि मॆङ्किसिरे येसुमि निङ्पि खानावाँ खेम्मिटुचॆ म चोब्न खानावाँ सॆःक्ढुङ्पचि खेम्मिटुचिमि। 28हाङ् सावाल खोचिनुङ्न यारुसालेम्पि पेम्पका हाङ् पारभुमि निङ्पि मॆङ्किसिरे यामुबक्का। 29खोम् गिरिक् याहुडिचि नुङ् याटक्माटक् सिॽयुङ्सा टर आक्खाचिऎ खो सेॽमा कामानुङ् लाम् खाङ्युक्सुचि। 30टर ग खानावाँ निवाँयुङ् लॆखुबाचिऎ वाप्टकुचि हाङ् खोचिऎ सावाल मिम्मु सिजरियाबि लाखॆटुचि हाङ् आक्कुबाङ् खो टारसस पाङ्हाङ्सुचि।
31गरहाङ् याहुडिया, गालिलि, हाङ् सामरियाबिहा मान्डालि सान्टिबि चेन्चाआमि हाङ् चॆकुवॆ लिसामि। आक्कुबि पारभुमि किसिमाबि पेनामि हाङ् सॆङ्सॆङॆ लावाऎ पाङ्नुमा पिट्टुचि हाङ् याॽमिचि मान्डालिबि येट्टिसे खारामि।
एनियास नुबका
32पाट्रुस आक्क ठालबि वाइसे वाइसे लिड्डा लोमॆ ठालबिहा निवाँयुङ् लॆखुबा याॽमिचि स चुब्सि टाआ। 33आक्कुबि खोसॆ एनियास लोमॆ एक्क याॽमि चुबु। आक्क बाङ्चि निङ् याॽलबाङ् लाङ् हुक् टानिऎसॆ हानाम्स इम्ढाङ्युङ्सा। 34पाट्रुसऎ आक्क लोसु, “एनियास, आना येसु खिरिस्टऎ नुबक्मि। पगॆहाङ् आनाम् लिःॽमारा इगॆ।” मरक्लॽन आक्क पगा। 35लुड्डा नुङ् सारोन लोमॆ ठालबि पेन्खुबा चोब्न याॽमिचिऎ म खाङुचिहाङ् पारभुबि टाआमि।
36जोप्पा हाटाबि टाबिटा (आक्कमि निङ् गिरिक्बि डोरकास लॆटा, म लोमिम्पा चाइ किसामा रेम)। निङ् लॆखुबा एक्क टिङ्खुबा मेॽनुङ्मा चुआ। खो हानाम्स होइढाचि काम्नुःर लॆःॽमा हाङ् माङ्स ऎचुखुबाचि खाङमॆ योम्पक्पि लागालिढाङ्युक्सा। 37खो आक्रल टुक्टिखारा हाङ् सिखारा हाङ् याॽमिचिऎ खोम् सिच्चि सगुचिहाङ् सङ्पिटुऎ टालाबि युङुचि। 38लुड्डा लोमॆ ठाल जोप्पा कॆक्पिॽन चुऎसॆ टिङ्खुबाचिऎ पाट्रुस आक्कुबि चु कामानुङ् खेमुचिहाङ् “काङ्काबि सॆॽलॽन टाबिॽमा” कामानुङ् हिप्पा याॽमिचि पाट्रुस चिःक्सि पाङ्हाङ्सुचि।
39पाट्रुस आक्खाचिनुङ् खारा हाङ् आक्कुबि याॽमिचिऎ खो सङ्पिटुऎ टालाबि लाखॆटुचि। आक्कुबि लाङ्मिॽमाचि पाट्रुसमि गॆअङमॆअङ् येॽमानुङ् डोरकासऎ खोचिनुङ् चुआर ठिःमिम्पा चेः खाङ्मिसे हाबामि।
40पाट्रुसऎ आक्खाचि चोब्न कोठाबाङ् लाबहाक्सुचि हाङ् खो पुम्रुॽवा ठक्मानुङ् पेना हाङ् पारठाना लॆटा। हाङ् आक्क सिखॆम्पा मेॽनुङ्मा पोट्टा हिङ्पकाहाङ् लोसु, “ओ टाबिटा, पगॆ।” आक्कसॆ उम् मिक् ओबकु हाङ् पाट्रुस खाङ्टकु हाङ् पगाहाङ् पेना। 41पाट्रुसऎ उम् हुक्पि लाॽमानुङ् येप्पक्मिट्टु हाङ् निवाँयुङ् लॆखुबाचि हाङ् लाङ्मिॽमाचि सेःरुचिहाङ् आक्क हिङ्चाऎन पिट्टुचि। 42ग खानावाँ जोप्पाबि फुबका हाङ् डिरिक् याॽमिचिऎ पारभुबि निवाँयुङ् लॆटुचि। 43पाट्रुस डिरिक् डिना जोप्पाबि साखक्मि योम्पक् मुखुबा सिमोन निङ् लॆखुबा याॽमि नुङ् पेना।
Currently Selected:
सॆःक्ढुङ्पा 9: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
