सॆःक्ढुङ्पा 8
8
1इस्टिफनस सेॽमॆ खानावाँबि सावाल स खासिमिम्पा लॆटा।
सावालऎ मान्डालि डुखा पिॽमिम्पा
आक्क डिनाबाङ् यारुसालम्बिऎ मान्डालिबि काइर लॆःॽमानुङ् डुखा पिप्पकुचि। हाङ् सॆःक्ढुङ्पाचिबाङ् होइढा चोब्न निवाँयुङ् लॆखुबाचि याहुडिया हाङ् सामारिया हाङ्टेम्पि फुबकामि। 2निवाँयुङ् लॆखुबा टुङ्घङ्पाचिऎ इस्टिफनस हुमुचिहाङ् खोम् लागि ढ्या डुखा मिनामि। 3टर सावालऎ सॆङ्सॆङॆ मान्डालि काइर लॆपकु। खो खिम्खिम्पि खॆॽयुङ्साहाङ् निवाँयुङ् लॆखुबा वाठाङ्पा हाङ् मेॽनुङ्माचि लाप्से सॆॽमानुङ् सॆक्चिम्पि सॆक्ढाङ्सुचि।
फिलिप सामरियाबि
4यारुसालेमबाङ् फुबक्से खॆक्खुबाचिऎ हाम्पि खॆःॽमि हाङ्स नुऎ खानावाँ फुबक्युङ्सुचि। 5फिलिप सामारिया हाटाबि खारा हाङ् आक्कुबिहा याॽमिचि येसुन खिरिस्ट यो कामानुङ् खेम्मिटुचिमि। 6याॽमिचिऎ फिलिपऎ लोमिम्पा खानावाँ खेमुचिहाङ् खोसॆ यिक्मिम्पा आक्खॆॽमाहा खानावाँ खाङ्मार खोचिऎ काम्नुःर उम् खानावाँबि निवाँ टिसुचि। 7आक्कुबि डिरिक् याॽमिचिबा खारिॽमाङ्चि याकामानुङ् खाइटामि हाङ् लाङ् हुक् फॆम्मिनिहा डिरिक् टुक्खाचि हाङ् ऎलाम्ढुहिखुबाचि स नुबकामि। 8गरहाङ् आक्क हाटाबि ढ्या हाङ्हाङ् टाआ।
9ह आक्क हाटाबि सिमोन लोमॆ याॽमि चुआ। आक्कसॆ याॽलऎ बाङ्न सामरियाबिहा याॽमिचि चाटाक् खाङ्मिसे फोफो आक्कॆमिॽमिम्पा लॆटुचि। खो “काङानोऎ” कायुङ्सा। 10हाङ् हाटाबि पेन्खुबा चोब्न याॽमिचिऎ “ग याॽमि नुङ् निवाँहाङ्मि ढ्या चॆक्मावा चु” कामानुङ् कायुक्सामि। 11हाङ् आक्खा याॽमिचिऎ खो ङॆप्युक्सुचि मान्ठाभनॆ खोसॆ डिरिक् याॽलऎ बाङ्न खोम् चाटाक्ऎ आक्खॆमिॽमिम्पा लॆटुचि। 12टर खोचिऎ फिलिपऎ इमिम्पा निवाँहाङ्मि हाङ्डाम् नुङ् येसु खिरिस्टमि नुऎ खानावाँ खेमुचिहाङ् निवाँयुङ् लॆटुचि हाङ् वाठाङ्पा नुङ् मेॽनुङ्माचि बाप्टिस्मा लासामि। 13सिमोनऎ सङ्क निवाँयुङ् लॆःॽमानुङ् बाप्टिस्मा लासा खोसॆ फिलिप टिङ्पकुहाङ् फिलिपऎ लॆःॽमिम्पा डिरिक् खालाह आक्खॆॽमाहा योम्पक् हाङ् आक्खॆॽमाहा खानावाँ खाङुहाङ् खो आक्खॆटु।
14हाङ् यारुसालेमबिहा सॆःक्ढुङ्पाचिऎ सामारियाबिहा याॽमिचिऎ निवाँहाङ्मि खानावाँबि निवाँयुङ् लॆटुचि कामानुङ् खेमुचिहाङ पाट्रुस नुङ् युहान्ना आक्कुबि पाङ्हाङ्सुचि। 15हाङ् आक्खाचि सामारियाबि टाआचिहाङ् निवाँयुङ् लॆखुबाचिऎ सॆङ्सॆङॆ लवा टक्चाउचिर कामानुङ् पारठाना लॆपिटुचिमि। 16मान्ठाभनॆ हढारि निवाँयुङ् लॆखुबाचिऎ सॆङ्सॆङॆ लवामि चॆक्मावा माटक्चामिम्पा लॆटुचि। टर पारभु येसुमि निङ्पि बास्टिस्मा टेःॽन लामिम्पा लॆटामि। 17हाङ् पाट्रुस नुङ् युहान्नाऎ खोचिम् हुक् सामरियाबिहा निवाँयुङ् लॆखुबा याॽमिचि सक्पि युङ्पिटुचिमिहाङ् आक्खाचिऎ सॆङ्सॆङॆ लावा टक्चाउचि।
18सिमोनऎ स सॆःक्ढुङ्पाचिऎ उम्चि हुक् युङ्मार याॽमिचिऎ सॆङ्सॆङॆ लावा टक्चामिम्पा खाङुहाङ् खोसॆ याङ् लाटॆटुहाङ् पिस्से 19गर लोसुचि, “कॆस याॽमिचि सक्पि हुक् युङ्मार खोचिऎ सॆङ्सॆङॆ लावा टक्चाउचिर कामानुङ् आन्नॆ कास चॆक्मावा पिॽङानॆ।”
20टर पाट्रुसऎ खानावाँ एम्पिसे लोसु, “निवाँहाङ्ऎ आनाम् याङ् माइपिॽर हाङ् आना काइर लॆःॽर मान्ठाभनॆ आनॆ ग निवाँहाङ्मि बारडाना स याङ्ऎ इन्मा मिनुना। 21आनॆ ग योम्पक् मुटकुनानि। गुबि आनाम् भाग नुङ् ढुप्पाट्ट माङ्स माआ। मान्ठाभनॆ निवाँहाङ्मि ङारिङ्पि आनाम् निवाँ काम्नुऎ लॆःॽनि। 22मसॆ आम् काइसॆ निवाँबाङ् ऎम्पकॆहाङ् पारभु नुङ् पारठाना लॆटॆ। हाङ् आनाम् काइसॆ निवाँमि लागि यङ्निमा टक्चाकुना। 23मान्ठाभनॆ कॆ खाङ्टकुङ् आना ग काइसॆ निवाँऎ चेप्खॆडाना हाङ् हिङ्वा निवाँऎ हिःक्भुङ्डा।”
24हाङ् सिमोनऎ खानावाँ ऎम्पिटु, “आनॆ लोमिम्पा माङ्स खानावाँ का सक्पि ऎलिर कामानुङ् पारभु नुङ् काम् लागि पारठाना लॆपिॽङानॆ।”
25हाङ् पटुरुस नुङ् युहान्नाऎ पारभु नुङ् खोम् बारेबि खेम्मिॽमाह खानावाँ लुक्पिटाचुहाङ् सामारिचिम् डिरिक् गाँवाँबि नुऎ खानावाँ खेम्मिसे खोचि यारुसालेम ऎम्पकाचि।
फिलिप हाङ् इठिइयोपियाबिऎ याॽमि
26इॽया पारभुऎ पाङ्हाङ्पा निवाँखाटॆखुबाऎ फिलिप गर लोसु, “यारुसालेमबाङ् गाजा लोमॆ ठालबि खॆऎ लाम्फुबिऎ युलाम् पोट्टि खारॆ। आक्कुबि आसासु पेम्मिनिहा ठालबिऎ लाम् चु।” 27हाङ् फिलिप सङ्क आक्कुबि लङ्पका। हाङ् खोसॆ इठोपियाबिऎ एक्क नापुङ्साक् चुबु। आक्क इठोपियाबिऎ हाङ्टाङ्मा कन्दाकिरिमि चासुम् खाङ्खुबा टुङ्घङ्पा लॆटा। खो यारुसालेम्पि निवाँहाङ् चुङ्सि खॆॽमिम्पा लॆटा। 28हाङ् खो राठबि पेम्मानुङ् यासाइया लोमॆ याॽमिऎ साॽमिम्पा साब्चिरा पाढालिसॆ उम् खिम्पि ऎम्पक्मॆ पाइटा। 29सॆङ्सॆङॆ लावाऎ फिलिप लोसु, “बग्मि कॆक्पि खारॆ।”
30हाङ् फिलिप स पिन्से बग्मि कॆक्पि खाराहाङ् म याॽमिऎ यासाइया लोमॆ निवाँहाङ्मि खानावाँ लोखुबामि साब्चिरा पाढालॆःॽमिम्पा खेमु। हाङ् फिलिपऎ सिमु, “ग आनॆ पाढालॆःॽमिम्पा खानावाँ वाबुकुनॆ?”
31आक्क नापुङ्साक्ऎ खानावाँ ऎम्पिसे लोसु, “इबिखुबा याॽमि मॆड्डिङ् कॆ मान्टक्ल वाप्मॆ?” मसॆ आक्कसॆ फिलिप सेःरुहाङ् खोनुङ् सोरि पेनॆ लोसु।
32म नापुङ्साक्ऎ पाढालॆःॽमिम्पा निवाँनेन् साब्चिराबि ग साॽमिम्पा लॆटा,
“खो ग सेॽमा ठाबाक्मिम्पा सामुङ् रक्मान लॆटा हाङ् खो टाङाक् हॆक्मा ठाबाक्मिक्पाचिम् लुम्पि सङ्क माङ्स माकारे येप्ढाङ्खुबा सामुङ्ऎ रक्न खोम् या माहेनु।
33हाङ् खो याॽमिचिऎ काइर लॆःॽमार खोसॆ माङ्स न्याये माभॆट्टकु। आसॆ खोम् पिसानासाचिम् बारेबि खानावाँ इमा हेकुयॆ? मान्ठाभनॆ खोम् हिङ्खामा बाखाटेम्बाङ् लाफॆडा।”#यासाइया ५३:७,८
34काङा लोङॆ, आक्क नापुङ्साक्ऎ फिलिप सिमु, “ग निवाँहाङ्मि खानावाँ लोखुबाऎ आसाम् बारेबि लोमिम्पा? उम् बारेब्न लोमिम्पा रु होइकन याॽमिमि बारेबि लोमिम्पा? काङा इबिक्ङॆ।” 35मसॆ फिलिपऎ निवाँनेन् साब्चिरामि इग भागबाङ् येसुमि बारेबि नुऎ खानावाँ इपकु।
36-37हाङ् आक्खा हिप्पा लाम्फुबि लाम्ढुसे खॆॽमार योवा चुऎ ठालबि टाआचि हाङ् म नापुङ्साक्ऎ सिमु, “खाङॆ, गुबि योवा चु। काङा बाप्टिस्मा लाहिॽङॆ?”#८:३६-३७ ग खानावाँ याॽल याॽलहा साब्चिराबि येप्टिडा। फिलिपऎ लोसु, “आनाम् चोब्न निवाँऎ निवाँयुङ् लॆःकुना हाङ्ग लाहिक्ना।” आक्क नापुङ्साक्ऎ खानावाँ एम्पिसे लोसु, “येसु खिरिस्ट निवाँहाङ्मि पासा ह कामानुङ् कॆ निवाँयुङ् लॆकुङ।” 38हाङ् आक्क बग् येॽमिटॆ लोसु हाङ् युङाचुहाङ् खोचि मिम्मु योवाबि खाराचिहाङ् फिलिपऎ आक्क बाप्टिस्मा पिट्टु। 39-40खोचि मिम्मु योवाबाङ् आम्पक्से लॆःॽमार पारभुमि सॆङ्सॆङॆ लावाऎ मरक्लॽन फिलिप लाफॆटु हाङ् आजोटोस लोमॆ ठालबि टॆटु। आक्कुबि खोसॆ सिजरिया माटारढारि लाम्फुबि चुहा हाटाबि नुऎ खानावाँ खेम्मिटुचिमि। नापुङ्साक्ऎ खो फेरि माखाङ्टकु, टर आक्क चेन्चामानुङ् उम् लाम्फु लागालिसा।
Currently Selected:
सॆःक्ढुङ्पा 8: LBR
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
