Malakiasï 2
2
1Ka iásï cháia tátecha, ari urhetamakua enka juramunhaka chári eratakatesti. 2Enkats'ïni cha no kurhach'aska ka níts'ï mintsita jinkuni jánkuarhent'ani jucheti jakankurhikuani k'érikuarhu pérani, chári sési jásï kóntperatani ikimperata únt'aaka. Joo, ji ikimperata únt'aaka jimpokats'ï cha nósani jánkuarhent'aska jínteni mintsitani jinkuni k'éri ampe arhini. Jísïni ísï uantani jaka enkani ACHA uinhapitika.
3Ji nósesi ampe úkuauaka chári sïrukuechani ka chánksïni kuatsita k'uaninharhitaaka, imani manakuarhiricheri kuatsitani enkats'ïni cha uántikucheak'a kéts'ïtacheani, ka chát'utsï manakuarhiricheri kuatsita jinkuni k'uanikunhaaka. 4Ísïts'ï úaka sési míteni eskaksïni jísï axacheka urhetamakua juramukuani, ka ísï no kéntitaaka imani pakatperakuani enkani Lebi jinkuni úka. Jísïni ísï uantani jaka enkani ACHA uinhapitika.
5Imani pakatperakua enkani Lebi jinkuni úka, ima tsípekueri pakatperakuesti ka sési jakueri, ka ji ísï úska uékani eskarini ima k'éri ampe arhipirinka ka imarini k'éri ampe arhisti ka méntkisï kétsekua uérasti jínteni japarini. 6Ka imeri uantakua méntkisï juramukueri ampe uantasïrempti eska na k'uanimpka, ka méntku nómeni uantaspti nósesi ampe ka jínteni jinkuni jámasti sési irekuarheparini ka jurhimpekua jinkuni, ka uánekua kéntitaasti nósesi jáxekuarhu. 7Jimpoka táteri uantakua ma mímixekua ampe jarhaska ka ireta erokuarheni jarhasïnti juramukuani táteri uantakuani jimpo míteni, jimpoka ima ACHA uinhapitiri uantakua páriska. 8Ka cháts'ï imani xanhari jimpo kéntikuska, uánekuechanits'ï juramukuarhu tsîp'ataraaska, ka nósesits'ï ják'uska imani pakatperakuani enkani Lebi jinkuni úka. Jísïni ísï uantani jaka enkani ACHA uinhapitika. 9Jít'uni inteni jimposïni ísï úka, eskaksïni ireta nóteru sáni janhanharhiaka ka eskaksïni ísterku exeaka, jimpokats'ï cha no jucheti xanharirhu pakaraska ka jimpokats'ï k'uiripuni eraerapkusïnka inteni juramukuani marhuatani jámani.
IV. K'AMANHARHINTPERAKUA JURAKPERAKUERI AMPE KA UÉRAKUA ANAPUECHANI JINKUNI TEMPUCHAKUA
10¿Anti nóchi iámentuecha ma táatenku kánkuarhesïnki? ¿Anti nóts'ïni mák'usï Diósïsï kuera? Enka i ampe ísïka, ¿Cha antisï k'arhap'erak'i ka ikichakuenits'ï ják'uni chári tátecheri pakatperakuani? 11Juda k'amanharhint'asti enka ísï máteru diósï uáp'a ma jinkuni tempuchaka ka enka no mítenhaka, ka inteni jimpo Diósïri pímpinhantu irerakuarhu ikichakueni ják'usti, imani enka ACHA xáni uék'a, ka Israeli ka Jerusaleni kánekua nósesi ampe únhasti. 12¡Eska ACHA Jakobueri k'umanchekuarhu méntku k'amantskant'aue imechani enkaksï ísï ampe niátaka ka náuek'i kuárini o imani enka ACHA uinhapitini kéts'ïtakuni jámka!
13Mémechantsï uént'ani cháts'ï óch'akurasïnka ACHAeri kéts'ïtakuarhu chári uekuani jimpo. Jimats'ï uerasïnka ka uinhachani ka ACHA nóteru erauatia chári kéts'ïtakuechani exeani ka nóteru tsípekua jinkuni jiókuarheauati. 14Ka cháts'ï kurhankuarhesïnka, ¿Anti ísï? Jimpoka ACHA exeska eskari chéti uarhitini no janhanharhiska enkats'ï jinkuni márku jámaka tumpiparini, chéti uarhitini jinkuni enkari pakatperakua ma úka. 15¿Anti Diósïksïni no ma ampek'u kueraaski enka xáni kánekua uinhapekua kámka? ¿Ampe jimposï mák'ue? Jimpoka uékasïrempka Diósïni sïrukua ma jirinhakuni. Inteni jimpo jinkuntku je chári espirituni jinkuni, ka ásï tantoch'a je chári uarhitini enkats'ï tumpiparini mítperaka. 16Jimpoka ACHA ka Diósï Israeli anapu, ACHA uinhapiti sésimentu uantarixaka eska ikimchasïnka enkaksï temunkurhiri ma jurak'peraaka ka enkaksï imani ísku jánkuani óch'akurakorhek'a. Jinkuntku je chári espirituni jinkuni ka ásï ámeratpera je.
V. IRETERI PÍMPINHAXENTSKUA
17Cháts'ï chári úkuechani jimpo ACHAni kuatak'uskia. Ka útasïts'ï tekaasïnka ísï uantani: ¿Jucha ampe jimpo kuatak'uski? Enkats'ï xáni ísï uantak'a: Ima enka nósesi ampe úk'a ACHA jaiapanhetant'asïnti. Ka útasïts'ï uantasïnka: Joo, ACHA imechani jaiapanheant'aasïnti. Ka méntkuts'ï ísï uantani jarhasïnka: ¿Ka anti nani pakarasïnkia Diósïri juramukua?
Currently Selected:
Malakiasï 2: BI-PURHE
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.
