१ कोरिन्थी 9

निउतरह्यक अधिकार

1मै अपन रोजल कौनो फेन चिज खाइक लग स्वतन्त्र बतुँ। मै एकथो निउतरह्या हुइतुँ। मै हमार प्रभु येशूहे देखल बतुँ। तुहुरे प्रभुमे मोरिक कामके फल हुइतो। 2दोसुर मनै महिन्हे प्रभु येशूक एकथो निउतरह्यक रुपमे स्वीकार नै करे सेक्थाँ। पर तुहुरे मोरिक विश्वासी भैयन महिन्हे स्वीकार करो। काकरेकी मै एकथो वहे निउतरह्या हुइतुँ, जे तुहुरिन्के थेन खुशीक खबर लेके आइल। प्रभु येशूकमे तुहुरिन्के विश्वाससे यी फरछ्वार होजाइत कि मै हुँकार निउतरह्या हुइतुँ। 3जोन मनै मोरिक निउतरह्या हुइलक अधिकारमे प्रश्न करथाँ, ओइन्के लग मोरिक जवाफ यहे हुइत: 4बारनाबास और मोरिक लग निउतरह्या हुइलक कारण हम्रे अपन कर्लक कामके आर्थिक सहायता भेटाई सेक्ना हम्रिहिन्हे अधिकार बा। 5जब औरे निउतरह्यन और प्रभुक भैयन याकूब, यहूदा और पत्रुस (केफास) यात्रा करेबेर अपन विश्वासी जन्नीहे अपन संग लेके जैथाँ, और हमार ओस्तेहेँके करना अधिकार बा। 6महिन्हे और बारनाबासहे फेन सहयोग पैना अधिकार बा, जसिके प्रभु येशूक औरे चेलनके सहयोग भेटैथाँ, और जिअक लग दोसुर काम करे परना जरुरी नै परत। 7कौनो फेन सिपाही कबु फेन बिना तलबके काम नै करत। अंगुरके बारी लगाके ओकर कुछ फेन नै खउइया केऊ नै रहथुई। कौनो मनैया कुछ दूध बिना पिले भेँरीनके रेखदेख नै करत।

8यी बात मनैनके विचार किल नै हो कहिके मै कहतुँ। मोशक नियम कानुन फेन अस्तेहेँ बात कहत। 9काकरेकी मोशक नियम कानुनमे लिखल बा, “दाँइबेर गोरुनहे अनाज खाइक डरे ओइन्के मुहेँम मोख्री ना लगैहो।” का तुहुरिन्हे लागत कि परमेश्वर गोरुनके बारेमे किल चिन्ता करथाँ? नै हो। 10जात्तिकमे कना हो कलेसे परमेश्वर हमारे बारेमे बोलतिहिँत। हाँ, पवित्र शास्त्र हमारे लग लिखगिलस, काकरेकी असिक कहिगिल बा, “खेट्वा जोँतुइया मनैया कुछु पैना आशामे खेट्वा जोँतत। और अनाज दउँइयाँ मनैया कुछ अनाज पैना आशासे करत। 11हम्रे तुहुरिन्हे परमेश्वरके वचन प्रचार कर्ली। जसिके मनै अनाजके बिया लगैथाँ, ओस्तेहेँके हम्रे परमेश्वरके सन्देश लगाइल बती। तबेकमारे यी सही बा कि तुहुरे हमार रोट्दिनके जरुरी पूरा करक लग तुहुरे हम्रिहिन्हे हमार खर्च देऊ।

12काकरेकी तुहुरे दोसुर मनैनहे सहायता कर्लो, जेने तुहुरिन्हे प्रचार कर्ले रहिँत। पक्कै फेन बारनाबास और मै यम्ने धेउर हकदार बती। तभुन फेन हम्रे दुनु जाने असिक नै कली कि हम्रिहिन्हे चाहल चिज तुहुरे हम्रिहिन्हे देऊ। बेन हम्रे सक्कु चिज सहक लग तयार होगिली ताकि हम्रे किहुहे फेन ख्रीष्टके खुशीक खबरमे विश्वास करनासे रोके ना परे। 13तुहुरिन्हे पतै बा कि मन्दिरमे काम करुइया मनै मन्दिरेमेसे खैना चिज लेथाँ। हाँ, वेदीमे बलि चह्रुइयनहे फेन बलिदानके हिस्सा मिल्थिन। 14ओस्तेहेँके खुशीक खबर प्रचार करुइया मनैनके जीवनके गुजारा फेन खुशीक खबर सुनल मनैनसे चले परत कहिके प्रभु आज्ञा देलाँ।

15तभुन फेन मोरिक प्रचार कर्लक मनैनसे यी बात पुँछ्ना सही हो, पर मै अपन काम कर्लक पारिश्रमिक नै माँगल हुइतुँ। तुहुरे मोरिक लग कुछु देहे परी कहिके यी चिट्ठी मै नै लिख्नु। तुहुरिन्से सहयोग भेटैनासे ते बेन मोरिक लग मुना ठिक बा। काकरेकी मै अपन ख्याल करथुँ कना घमण्ड करनासे महिन्हे केऊ फेन रोके नै सेकी। 16वहाँ गर्व करे परना कौनो कारण नै हो। काकरेकी खुशीक खबर प्रचार करक लग येशू ख्रीष्ट महिन्हे जिम्मा देले बताँ। यदि मै खुशीक खबर प्रचार नै कर्नु कलेसे मोरिक लग दुःखके बात हो। 17मै खुशीक खबर प्रचार करम कलेसे महिन्हे ईनाम मिली। काकरेकी यहे करक लग मै चुनगिल बतुँ। यी काम मै अप्निहीँ नै रोज्नु, पर परमेश्वर महिन्हे यी जिम्मा देले बताँ। महिन्हे ईनाम पैना कौनो आशा नै हो। 18यी मोरिक तलब हो, और मै सक्षम बतुँ। यदि मै मोरिक खर्चक लग माँग करना अधिकार भेटैले बतुँ कलेसे फेन बिना तलबके खुशीक खबर घोषणा करना फेन सम्भव बा।

19यकर मतलब यी हो कि मै मनैनके आज्ञा पालन करना मोरिक बाध्यता नै हो। काकरेकी ओइने महिन्हे पैँसा तीर्थाँ। तभुन फेन मै सक्कुहुनके नोकर बनगिल बतुँ, ताकि मै बहुत्ते मनैनहे येशू ख्रीष्टके विश्वासमे नाने सेकुँ।

20जब मै यहूदी कानुन मनुइया मनैनके संग रहुँ, तब मै फेन मोशक नियम कानुनके अधिनमे रहुँ। महिन्हे मोशक नियम कानुन पालन करे नै परत, तभुन फेन मै असिक कर्नु ताकि मै मोशक नियम कानुन पालन करुइयनहे ख्रीष्टमे नाने सेकुँ। 21अस्तेहेँके, जब मै गैर-यहूदिनके संग काम करथुँ, तब मै मोशक नियम कानुन पालन नै करुइया एकथो गैर-यहूदी हस रथुँ, ताकि ओइन्हे मै जिते सेकुँ। (यकर मतलब यी नै हो कि मै परमेश्वरके आज्ञा पालन नै करथुँ। काकरेकी मै सदादिन ख्रीष्टके आज्ञा पालन करथुँ।) 22जब मै विश्वासमे कमजोर रहल मनैनके संग रथुँ, तब मै ओइनेहेँन्के हस व्यवहार करथुँ। ताकि मै कौनो मनैनहे ख्रीष्टके अनुशरण करनामे सहयोग करे सेकुँ। मै सक्कु मेरिक मनैनके लग सक्कु चिज होगिल बतुँ ताकि मै कौनो फेन मनैनहे ख्रीष्टमे बँचैनामे सहयोग करे सेकुँ। 23खुशीक खबर प्रचार करक लग मै असिन सक्कु चिज करथुँ, ताकि मै खुशीक खबरके वाचक आशिषमे शामिल हुई सेकुँ।

24ओस्तेहेँके हम्रे सक्कु जाने परमेश्वरके सेवा करे परत, ताकि भविष्यमे परमेश्वर हम्रिहिन्हे सदाकालके मुक्तिक ईनाम देहे सेकिँत। 25जोन मनै दौड़मे भाग लेथाँ, ओइने सक्कुहुनसे आघे अभ्यास करथाँ, और अपन इच्छा अप्निहीँ नियन्त्रण करथाँ। ओइने असिके यहे कारणसे करथाँ, ताकि ओइने जिते सेकिँत। ओइन्हे सम्मानके लग फुलक माला घलाजाइत, और उ फुलक माला धेउर समयसम नै रहत। पर हम्रे, जे-जे येशू ख्रीष्टहे विश्वास कर्थी, हम्रे सम्मानित हुइबी, और हम्रिहिन्हे देगिलक आशिष सदामान पलिरही। तबेकमारे हम्रे अपने चाहनामे भुलाई नै परत। 26जसिके एकथो दौड़मे भाग लेहल खेलाड़ी या मुक्का मरना खेल खेलुइया खेलाड़ी अपन प्रहारहे नियन्त्रणमे धारत। ओस्तेहेँके मै मोरिक विश्वासी जीवनहे ख्रीष्टके नियन्त्रणमे धरथुँ। 27मै अपने इच्छाहे नियन्त्रण करथुँ, नै ते मै दोसुर मनैनहे खुशीक खबर प्रचार कर्लेसे फेन मै ईनाम नै भेटैम।”

Currently Selected:

१ कोरिन्थी 9: DVGNT

Highlight

Copy

Compare