रोमि 9

परमेश्वरोओ निवडिले मांहे

1आय ख्रिस्तमेहे खोरो कोहो, आय ठोगतु नाहा गोगोहो अने माआ विवेक बी पवित्र आत्मा मेहे गोवाय आपत्लू 2का माहु वोडू शोक होय, अने माआ मोन सदा दुखत रोनारे, 3काहाके का आय इही पर्यंत इच्छितो का आपाआ पायहोहो जे डीलोओ भाव सी माआ कुटुंब मेरयू होय खुद; ख्रिस्त त्यापोरोत शापित ओत जातु. 4ते इस्राएली होय, दंत्तक पणाचे अधिकार अने गौरव अने वाचा अने नियमशास्त्र अने उपासना अने प्रतिज्ञा तीयाज होय. 5पूर्वजही तियाज होय अने ख्रिस्तपण डीलोओ बोहे ज्याचमेहे होय आखाज परम परमेश्वर कायम धन्य ओवे, आमेन.

इस्राएलो नाकारलोओ अने परमेश्वरोओ उद्देश

6पोन ओ नाहा का परमेश्वरोओ वचन टाकीत जाइअलो, याकोअता काजे इस्राएल तियाआ वंश होय ते आखे इस्राएल वंश नाहा, 7अने नाहा अब्राहमो वंश उविलाआ कारनोवाही आखे तियाआ पोऱ्ये ठरव्येहे परंतु इसहाक यापोरोत ताआ वंश कोवाय. 8अर्थात डीलाआ पोऱ्ये परमेश्वरोओ मुलगा नाहा परंतु प्रतिज्ञेची पोऱ्ये आशामे मोजीलो जाहो. 9काहाके का प्रतिज्ञेचे वचन ओच होय का आय आव वेलाआ अनुसार आवे अने साराला पुत्र उवे. 10अने फक्त ओच नाहा ताहा रीबिका पण एकहो अर्थात आमाआ बाह्हू इसहाक यापोरोत गर्भवती ओती, 11अने ओमे पर्यंत नाहा पोऱ्यो जनम्यो ओते अने नाहा तियाआ हाजो वाईट कोल्यु ओते, याकोअता का परमेश्वरोओ योजना जो तियाहा निवडीत लेअला अनुसार होय कर्म कोनारू कारनोवाही नाहा परंतु हदणाराआ कारनोवाही होय, बोणीत रोही 12तिये कोयु, बाह्हा होस सेवा कोअही. 13जेहलो लेखिलो होय आय याकोबावर प्रेम कोल्यु परंतु एसावाला अप्रिय मान्ये.

इस्राएलो नाकारलोओ अने परमेश्वरोओ न्याय

14याकोअता आमाहा कि कोहू? कि परमेश्वराही अन्याय होय? कदापि नाहा. 15काहाके का तो मोशेला कोत्लू, आय ज्या कोडापो दया कोहू इच्छितो तियापो दया कोअत्लू अने ज्या कोडापो कृपा कोहू इच्छितो तियापो कृपा कोअही, 16आखरी ओ नाहा का इच्छा कोनारो का नाहा पलनारू का परंतु दया कोअनारे परमेश्वरोओ गोठी होय. 17काहाके का पवित्र शास्त्रामेहे फारोला कोयु गोये, आय ताहु याकोअता उभे कोल्यु होय का तुमामे आपाआ सामर्थ्य देखाडीत अने माआ नावाआ प्रचार आखा धोरतीपो ओवो. 18याकोअता ओ तियापो इच्छितो,, तियापो दया कोअत्लू अने ज्याहा इच्छितो तियाहा कडक कोईत आपोहो, 19आखरी तू माहु कोअही, तो फासी काहा दोष लागाडीत, कोडू तियाआ इच्छावाही सामना कोअही? 20हेमाहू, तू कोडू होय जो परमेश्वरोओ सामना कोअत्लू? नाहाकोत तीयार कोली वस्तू कोहू गोयो का घोड्विनारू, माहु एहलो काहा बोनाडहि होय? 21के कुमारोहो तुमामे काद्वोमेहे अधिकार नाहा का एकाच गोट्या एक बासणा आदराहाटी अने दिहराआ अनादरासाठी बोनाडहि? 22ताहा तीयाम कोडली आश्चर्याची गोठी होय का परमेश्वराने आपाआ राग देखाडीलाकोता अने आपाआ सामर्थ्य प्रगट कोइलाआ इच्छावाहि क्रोधावाही हानापऱ्याआ जे विनाशासाठी तीयार कोल्यु गोये ओते, वोडू धीरावाही खोरो; 23अने दया पाडापअ, जिये तियाआ गौरव कोअता पहिलुच तीयार कोल्यु, आपाआ गौरवाच्या हाजाकाजे इच्छा प्रगट कोअयी? 24अर्थात आमापो जिये तिये न फक्त यहुदीयांमे नहाते दिहरे जातीमेहे पण हादिलो गोये. 25जेहलो तियाअ होशे च्या पुस्तकाम पण कोत्लू, जी माआ प्रजा नाहाओती तियाहा आय. आपाआ प्रजा कोअलो ताआ जी प्रिय नाहाओती तीही प्रिय कोय. 26अने एहलो उवे का ज्या जगुमे तियाहा ओ कोयु ओते का तुमु माआ प्रजा नाहा होय, तियाआ जागापो ते जीवतु परमेश्वरोओ पोऱ्ये कोयु जाइअलो. 27अने यशायाह इस्राएल विषयी आयडीत कोत्लू, जर इस्राएल च्या संतानाची संख्याआ समुद्राआ वालू एती होय तेबी पोन तीयामरोत थोडोज वासिजाए. 28को का प्रभू आपाआ वचन धोरतीपो पुरो कोईत धोर्मी तेणे तियाहा तत्काळ सिद्ध कोअही. 29जेहलो यशायाह लेतजा पहीले पण कोयु ओते, किबी सेनाधीशाचा प्रभू आमा कोअता किबी. वंश नाहा सोडये ओते, ताहा सदोमाच्या सारखो ओत जाता अने गमोरा हारको बनलो रोतो.

इस्राएलो वर्तमानो परिस्थिति

30सासोल्यू आमाहा कि कोहू? ओच का अन्यजाति जे धार्मिकताआ होद कोईत निमिले, धार्मिकता जोडयो कोअयी अर्थात तियाअ धार्मिकतेला जो विश्वासामेहे होय, 31पोन इस्राएलो जे धर्माच्या नियमशास्त्राचा होद कोईत ओते ते नियम शास्त्रापर्यंत पुग्या नाहा. 32काहा? याकोअता का ते विश्वासा नाहा परंतु माहू ते कर्मवाही होद कोईत ओते, तिये तियाअ ठोकराचे दोणोपो ठोकर निसे, 33जसे लेखिलो होय, पाला आय सियोनामध्ये एक ठोकायू लागनार डोणो अने ठोकर खानारू चट्टान मेकोहो अने जो कोडु तियाआ उपो विश्वास कोअही, तो लाजआली उवे नाहा.

Currently Selected:

रोमि 9: NOINT

Highlight

Copy