रोमियों 6

पापा में मौत मसीहा में जिन्दगी

1तेबा हामें कैह करे? कैह हामें पाप करदे रहे कि अनुग्रह बहू हो? 2कधी नांई! हामें जेवा पापा री तणी मुये तेबा जेहूली जिंदगी तेता में कैहडे साबे जिउणी? 3कैह तमे नांई जाणदे कि हामें सभी जोह यीशु मसीह का बपतिस्मा लऊ, तेऊरी मृत्यु रा बपतिस्मा लऊ। 4पर तेसा मृत्यु रा बपतिस्मा पाऊणे का हामे तेऊ संघा गाडीदे साहा जेहडा मसीह पिता री महिमा काम री करे जिऊंदअ होऊ, तेहडी हामा भी नई जिंदगी रे साबे जिये।

5किबेकि अगर हामे तेऊरे मरने री समानता में जुडी दे साहा तेबा जरूरत तेऊरे पुनरुत्थाना री समानता में भी जुड़णा। 6हामे जान्दा कि हमारे पुराणे मनुष्यतत्त्ब तेऊ सघे क्रुसा पेन्‍दे चडाउदअ साहा, पर पापा रा शरीर नाश होये होर हामा जेहा का पापा रअ सेबक बणी करे नांई रहू। 7किबेकि जोह मुअ, सह पाप का मुक्त होऊ। 8तेबा अगर हामें मसीहा में मुये तेबा हमारा बुशाह यह साहा कि तेऊ संघे जिउणे भी, 9किबेकि यह जांणदा कि मसीह मुयदे मे का जिऊंदअ होई करे भी नांई मरण; तेऊवै भी मऊती रा राज नांई हुणा।

10किबेकि सह जोह मुअ साहा पापा वै एक बारी मुय; पर जोह जिऊंदअ साहा सह परमेश्वरा वै जिऊंदअ साहा। 11एडा ही तमे भी आपणे आपा वै पापा री तणी मुए, पर परमेश्वरा वै मसीहा यीशु में जिऊंदअ समझे। 12तेबा पाप थारे शरीरा में राज नांई करना, की तमे तेत्‍की इछा रे अधीन रहे। 13होर ना आपणे शरीरा रे कासी भी अंगा जो अधर्मी रे हथियार हुणे री तणी पापा बै देआ, पर आपणे आपू वै मरी करे जिऊंदअ होऊ होर आपणे अंगा वै धर्मा रअ हथियार हुणे वै परमेश्वरा वै देआ। 14तेबा तमा पेन्‍दे पापा रा राज नांई हुणा किबेकि तमे व्यवस्था रे अधीन नांई पर अनुग्रह रे अधीन साहा।

धार्मिकता रे नोकर

15तेबा कैह होऊ? कैह हामे तेबा पाप करी की हामे व्यवस्था रे अधीन नांई, पर अनुग्रहा रे अधीन साहा? कधी नांई! 16कैह तमे नांई जाणदे जासकी आज्ञा मनने वै तमे आपणे आपा वै नोकरा जेह छाडी दिंदा तेऊरे नोकर साहा, चाहे पाप रे, जासका अंत मऊत साहा, चाहे आज्ञा मनण आले, जासका अंत धार्मिकता साहा। 17पर परमेश्वरा रा धन्यवाद हो कि तमे जोह पापा रे नोकर थी एवा मना का तेऊरे उपदेशा मनण आले, जासू तमे बणाई दे साहा, 18होर पापा का छुड़ाई करे धर्मा रे नोकर होई। 19हाऊं थारे शरीरा री कमजोरी री बजा का मणशा री रीति रे सावे बोला, जेहडा तमे आपणे अंग अशुद्ध कुकर्मा रे नोकर बणाई थी तेहडे ही तमे आपणे शरीरा रे अंगा पवित्र धार्मिकता कामा वै देया।

20जेवा तमे पापा रे नोकर थी तेबरे तमे धर्मा री तरफा का आजाद थी। 21पर एवा तमे जासू गल्ला का तमे लज्जित हुंदा, तेता में तेऊ वक्ते कैह फ़ल भेटा थी? किबेकि तेत्का अंत मृत्यु साहा। 22पर एवा पापा का आजाद होई करे होर परमेश्वरा रे नोकर बणी करे तमा वै फ़ल भेटा जासू का पवित्रता भेटा थी होर तेत्का अंत अनन्त जीबन साहा। 23किबेकि पाप री मजदूरी मृत्यु साहा, पर परमेश्वर रा वरदान हमारे यीशु मसीहा में अनन्त जीबन साहा।

Currently Selected:

रोमियों 6: ISJNT

Highlight

Copy

Compare