प्रेरित 27

पोलुसा रा रोमा व नहन्णा

1जेबा यह बिचार करू कि हामा जहाजा में इटली बे नांहणा तेबा त्याह पौलुस होर कुछ होरा कैदी भी युलियुस ना रअ औगुस्तुस रे सुबेदारा रे हाथ दीने। 2अद्र्मुतियुम रे एकी जहाजा पेन्दे जोह आसिया रै किनारे री जागह में नांहणे आले, चढी करे हामे सह खोलू, होर अरिस्तर्खुस ना थिस्सलुनीक रअ एक मकिदुनिया हमें संघे थी। 3दूजे धियाड़े हामे सैदा मे लंगर जहाजा रोकणे लाऊ होर युलियुस पौलुसा पेन्दे कृपा करी करे तेऊ तेऊरे दोस्ता सेटा मिलणे दीना कि तेऊरा सत्कार करे। 4तखाक जहाज खोली करे हबा उल्टी हूंणे री बजा हामे साईप्रसा बे नाठे। 5होर किलिकिया होर पंफुलिया सेटा समुद्रा मे होइकरे लुलिकिया रे मुरा मे उतरी। 6तखे सुबेदार सिकंदरिया रअ एक जहाज इटली बे नांहदअ भेटअ होर तेऊ हामे तेता मे चढाई। 7जेबा बहू धयाडी तणी सुले-सुले चली करे मुश्किलें संघे कनिदुसा सामने पूजे, तेबकी बागरी हामा आगे बढने नांई देई, हामे सलमोना रे सामने होइकरे क्रेती री आढा में चली। 8होर तेऊरे किनारे-किनारे चली करे शोभली बंदरगाह रे एकी जागहा पूजे, जखा का लसैया नगर नेड थी। 9बहू बक्त बीतू होर जलयात्रा संकटमय होई अखे तणी कि ब्रता रे धयाडे बीती छेकि। तेबा पौलुस त्याह बे बोली करे चेतनगी दींदअ लागअ, 10हे भाईओ माह एहडा लागदा कि ऐसा यात्रा में संकट होर हानि रे हुणे, हामा ना सिर्फ माला री होर जहाजा री पर हमारे प्राणा भी खतरा साहा। 11पर सुबेदारे पौलुसा री गला छाडी मालका होर कप्ताना गला बडी समझी। 12तेबा यह बंदरगाह ठांडे धयाडे बिताऊँणे बे ठीक नांई आंहदअ, तेबा बहू लोके न्याय करू कि तखा का जहाज खोली करे होई सके फिलिक्सा में ठांडे धयाडे काटणी। यह क्रेते रअ एक बंदरगाह सा दक्षिण-पश्चिम होर ऊतर पश्चिम फेरा बे खुल्दा।

समुन्दरा में तूफान

13जेबा कुछ-कुछ दक्षणी हाबा बंहंदी लागी, तेबा यह समझी करे कि माहरा आभिप्राय यह पूरा होऊ, लंगर चुआकू होर किनारे-किनारे क्रेता सेटा होइकरे नांहदे लागे। 14पर थोड़ी देरी बाद धरती कअ एक आंधी उठी, जोह यूरकुलिन कहलाऊँदा। 15जेबा आंधी जहाजा पैंदे लागी तेबा तेऊ सामने टिकी नांई सकू अतः हामे तेऊ बहणे दीना होर एह्डी तरह बह्न्दअ नाठअ। 16तेबा कौदा ना रे एकी होछ टापू रे सहारे बंहदे-बंहदे हामे किश्ती बड़ी मुश्किलें संघे लायक बशा में करी। 17तेबा मलाहे सह चुआकि करे कई तरकीब संघे जहाजा नेहटे का बान्हु होर सुरतिसा रे रेता पैंदे टिकणे रे डरे पाल होर समान बंहदा रहू। 18जेबा हामे आंधी संघे बहू हिचकोल होर धाके खाई, तेबा दूजे धयाडे त्याह माला फेंकदे लागे। 19होर चींहूंणे धयाडे आपणे हाथ त्याह जहाजा रा समान भी फेंकू। 20जेबा बहू धयाडे तणी नाह सूरज, नाह तारे हेरी होर बडी आंधी चलदी रही तेबा हामे बचणे री भी सारी आशा छाडी। 21जेबा त्याह बहू धयाडी तणी भोछे रही, तेबा पौलुस त्या बीचे खड़े होई करे बोलू, हे लोको, जेबा तमे मेरी गलआ मानी करे क्रेता बे जहाजा नांई नींदे होर ना बिपति इंहणी, होर नाह हूंणी। 22तेबा हांऊ तमाका बिनती करदा कि तसली डाहा किबेकी तमा मेंज़ा का कासी रे प्राणा री हानि नांई हूंणी, पर जहाजा री हूंणी। 23किबेकी परमेश्वर जासकअ हाऊं सा होर जासकी नमस्ते करदा, तेऊरे स्वर्गदूते आज इच्छी करे माह का बोलू, 24हे पौलुसा डरे नांई! ताह कैसरा सेटा खड़े हूंणा जरुरी साहा। होर परमेश्वर सभी बे जोह तांई संघे यात्रा करदा तेरे हाथे छाडी दे साहा। 25तेबा हे भाईओ, हिम्मत डाहा, किबेकी हाँऊ परमेश्वर रा बुशाह करदा जेहड़ा माहका बोलूदा तेहडा ही हूंणा। 26पर हामा कोही भी टापू पैंदे नांई नांहणा।

जहाजा रा चूटणा

27जेबा चहूदी राच आऊई होर हाँमे आद्रिया समुद्रे भटकदे लागदे थी, तेबा आधा राची मलाहे अनुमाने संघे पता लाऊ कि हामे कासु देशा सेटा पूजदे लागे। 28हेरी करे त्याहे जांणू कि यह बीह फुट ढूघअ साहा होर थोड़ी देर बाद भी हेरू कि यह पन्द्रह फुट ढूघअ साहा। 29त्या डर थी की जेबा पाथरा आली जागह मेंज़ा का टकराऊणे बे त्याह जहाजा री पिछली जागहा त्याह चार लंगर लाई होर दोत हूणे री प्रार्थना करदे लागे। 30पर जेबा मल्लाह जहाजा का ठुरना चांहदा थी, तेवा त्याह किस्ती रे जेहुले हिसे का लंगरा रे बहाने किश्ती समुद्रा में काहडी। 31तेबा पौलुसे सुबेदारा होर सैनिका बे बोलू, ज़ेबा तमे एऊ जहाजा में नांई रहले तेबा तमे नांई बचणे। 32तेबा सिपाही राशी काटी किश्ती पाणी में फैंकी। 33जेबा दोत हूंणे आली थी, तेबा पौलुसे यह बोली करे, खांण बे सभी का बिनती करी आज चऊदा धयाडी होई कि तमे आशा लाई आज तणी भोछे रही। 34तेबा हाँउ तमा बिनती करा कि कुछ खा जासू संघे थारा उद्धार हो किबेकी तमामें कि कासी रा एक बाल भी बांका नांई हूंणअ। 35होर यह बोली तेऊ रोटी लई सभी रे सामने परमेश्वर रा धन्यबाद करू, होर चोडी करे खांदअ लागअ। 36तेबा त्याह सभे साहस डाही करे रोटी खांदे लागे। 37हामे सभी मिलिकरे जहाजा में दूई शअ छतर प्राणी थी। 38जेबा रोटी खाई त्याह रजी तेबा गिहू समुद्रा में फैंकी करे जहाजा हलके करदे लागे। 39जेबा दोत होई त्याहे सह देश नांई पछेणु, पर एक खाड़ी हेरी जासकअ कीनारअ चकोर, होर सोचू कि यह जहाज अखी टकाऊंणअ, ज़बा होई सके यह जहाज अखी टकाऊंणअ। 40तेबा त्याह लंगर खोली समुद्रा में छाडू होर तेऊ वक्त होरा पतवारों रे बंधना भी खोली, होर हबा रे सामने अगली त्रिपाल चढाई करे किनारे फेरा बे नाठे। 41पर दुई समुद्रा रा संगमा री डाही करे त्याहे जहाजा री पिछली जागहा टकाऊ होर किस्ती रे जेहुले हिसे री पिछली जागहा तक धक्का खाई करे तखी शाती पर लहरे संघे जहाज चूटदअ लागअ। 42तेबा सिपाही रा न्याय होऊ कि कैदी मारणे कंही एहडा ना हो की या तैरी करे निखले। 43पर सुबेदार पौलुसा बचाऊंणे री इच्छा संघे त्याह एऊ न्याया का रोकी होर यह बोलू, जोह तैरी सका पहिले किनारे पैंदे पूजले। 44होर बाकि कोई पटडे रे सहारे होर कोई जहाज रे होरी सामने संघे निखला होर एहडी तरह सभे धरती पेन्दे बची निकते।

Currently Selected:

प्रेरित 27: ISJNT

Highlight

Copy

Compare