1 કુરિંથીઓ પત્રો 8

મુર્તિ આગલા ચોળવુલી વસ્તુ વિશે

1આમી તીયુ ગોઠી વિશે લેખુહુ, જીયા વિશે તુમુહુ માને ફુચા માટે પત્ર લેખી મોક્લ્યોહો, કા મુર્તિ આગલા ચોળવુલો બલિદાન વસ્તુ આમનેહે ખાંઅ જોજે કા નાય? આમુહુ તીયા વિશે જાંતાહા, કા ખાવુલો કા નાય, એહડો જ્ઞાન પોતા મનુમે ઘમંડ કેરાવેહે, પેન પ્રેમ રાખુલોકી આપુહુ આગલા વાદી સેક્તાહા. 2કાદાચ એગો ઇ હોમજે કા આંય થોડો હોમજુહુ, તા તોઅ આમી લોગુ ઇ નાહ હોમજ્યો કા કેલ્લી રીતીકી હોમજા જોજે. 3પેન કાદાચ એગો પરમેહેરુ આરી પ્રેમ રાખેહે, તા પરમેહેર તીયા માંહાલે જાંહે.

4આમી આંય તુમા સવાલુ જવાબ આપા માગુહુ, આપુહુ બાદા જાંતાહા કા કેલ્લી બી મુર્તિ હાચો પરમેહેર નાહ. પેન ખાલી એકુજ હાચો પરમેહેર હાય. 5કાહાકા હોરગામે આને તોરતીપે ખુબુજ વસ્તુ હાય જીયાલે માંહુ પરમેહેર માનતેહે. હાચો આખુ તા તે પરમેહેર પ્રભુ નાહ.

6તેબી આપુ માટે એકુજ પરમેહેર હાય, એટલે બાહકો પરમેહેર જીયાહા બાદી વસ્તુ બોનાવીહી, આને એકુજ પ્રભુ હાય એટલે ઇસુ ખ્રિસ્ત તીયાહા જો કાય કેયોહો તીયા લીદે આપુ પરમેહેરુ માટે જીવતાહા.

7પેન થોડાક વિશ્વાસી લોક આમી લોગુ જાંતા કા મુર્તિમે કાય બી શક્તિ નાહ. કાહાકા તે પેલ્લા મુર્તિ પુજા કેતલે, ઇયાં ખાતુરે જાંહા તે મુર્તિ આગલા ચોળવુલી વસ્તુ બલિદાનુ પ્રસાદ હોમજીને ખાતલા, ઇ વિચારતલા કા મુર્તિ આગલા ચોળવુલી વસ્તુ ખાવુલોકી પાપ વેહે.

8ખાવુલો વસ્તુ આપનેહે પરમેહેરુ પાહી નાહ પોચવી સેકતી. તીયાલે ખાંવુલો સે આપનેહે નુકશાન નાહ વેતો કા ફાયદો બી નાહ વેતો. કાદાચ આપુહુ નાય ખાજી, તા આપનેહે કાયજ નુકશાન નાહ, આને કાદાચ ખાજી, તેબી કાયજ લાભ નાહ. 9પેન ધ્યાન રાખા, તુમા સ્વતંત્રતા કી જો વિશ્વાસ કમજોર હાય, તે પાપુમે નાય પોળી જાય. 10માના કા તુમામેને એગો બી કમજોર વિશ્વાસી માંહુ મંદિરમે પ્રસાદ ખાતા હેઅ, જો તુમુહુ જાંતાહા કા મુર્તિ પરમેહેર નાહ આને તીયામે કાય શક્તિ બી નાહ. પેન તોઅ કમજોર વિશ્વાસી બી તુમનેહે હીને બલિદાનુ પ્રસાદ ખાંઅ ઈચ્છા કેરી, જાંહા કા તીયા મનુમે શંકા હાય કા તોઅ ખાવુલો પાપ હાય. 11ઇયુજ રીતીકી તોઅ જ્ઞાનુ લીદે જો વિશ્વાસી પાવુહુ જો વિશ્વાસુમે કમજોર હાય, જીયા માટે ઇસુ ખ્રિસ્ત મોયોહો, વિશ્વાસ કેરા છોડી દી. 12ઇયુજ રીતી તુમુહુ વિશ્વાસી પાવુ-બોયુ નજરીમે પાપ કેતાહા, આને કમજોર વિશ્વાસીલે ઠોકર ખાવાવાકી તુમુહુ ખ્રિસ્તુ નજરીમે પાપ કેતાહા. 13ઈયા લીદે કાદાચ મુર્તિ આગલા ચોળવુલી વસ્તુ માઅ ખાવુલોકી, બીજો વિશ્વાસી માંહુ વિશ્વાસ કેરા છોડી દેહે, તા આંય એહેડી વસ્તુ નાય ખાંવ, જીયાકી માઅ આર્યો વિશ્વાસી માંહુ વિશ્વાસ કેરા છોડી દેઅ.

Currently Selected:

1 કુરિંથીઓ પત્રો 8: DUBNT

Highlight

Copy

Compare