२ कोरिन्थी 12

पावलको दर्सन रे तिनरो काँडो

1मइले घमण्ड अद्दुइ पणन्छ। तर यइ बठेइ फाइदा केइ नभया लगइ प्रभु बठेइ पाया दर्सन रे प्रकाशका कुरणी म अद्दाछु। 2ख्रीष्टमी म एक जना मान्सलाइ#12:2 एक जना मान्सलाइ यो मान्स पावल आफइ हो, क्याकि उनले आफ्ना बारेमि घमण्ड अद्द चाहानइनथ्या। चिन्नउ, जो चौद बर्ष अगाडी स्वर्ग सम्म उचाइ लइया। यो घटना हुनज्या उ आजी लगइ सरीरमि थ्यो कि थेइन त्यो म जाण्नइन तर परमेश्वर पक्‍का जाण्नाहान। 3म दोहर्याउनउ, म जाण्नउ कि यो मान्स स्वर्गमि लइयाथ्यो। आजी, मलाइ था आथिन कि यो साच्ची भया हो कि अथवा यो दर्सन हो, यो कुरणी परमेश्वर मान्तर जाण्नाहान। 4रे ताँ भण्नु नहुन्या कुरणी उइले सुण्यो, जइका बारेमि और मान्सलाइ भण्नु अनुमति आथिन। 5यइ मान्सका पक्षमि म गर्व अद्द्या हुँ, तर आफनाइ पक्षमि भण्या मेरा कमजोरि बाहेक और कुरणीमि म घमण्ड अद्द्या आथिन।

6यदि मइले गर्वइ अद्द्या इच्छा अर्या भण्या लगइ म मुर्ख बन्न्या होइन, क्याकि म सत्य बोल्लारया हुन्या हु। तर मान्सले ममि धेक्या रे म बठेइ सुण्याको भण्ना बरता कसइले मलाइ जन ठानउ भणबर म घमण्ड अद्द बठेइ थामिनउ।

7तर परमेश्वरले धेकाया आश्चर्यजनक कुरणिका बारेमि घमण्डले म बरता नफुलु भणबर मलाइ सताउन रे घमण्ड बठेइ रोक्दाइलाइ सैतानका दुतले भौत असजि समस्या अथवा एक काँडो मेरा सरीरमि दियो। 8यो म बठेइ हटोस भणबर मइले तीन बेर प्रभुसित बिन्ति अर्या। 9तर मलाइ उनले भण्यो “मेरो अनुग्रह तेरा निउति कतिब छ, क्याकि मेरो सक्ति कमजोरीमी सिद्द हुन्छ।” तबइकिलाइ ख्रीष्टको सक्ति ममि बास अरउ भणबर म बरु मेरा कमजोरीमी बढी खुसिसाथ गर्व अद्द्या हु। 10तबइकिलाइ ख्रीष्टका खातिर कमजोरीमी, बदनाममि, कठीनाइमी, सतावोटमि, आपतमी, म सन्तुष्ट रनउ। क्याकि जब म कमजोर छु तब म ख्रीष्टको सक्ति बठेइ बलियो हुनउ।

कोरिन्थका मान्सनकि निउति पावलको चिन्ता

11म मुर्ख भया छु। तर तमनले मलाइ इसो अद्द कर लाया, क्याकि तमन बठेइ त मेरो प्रसंसा हुनु पड्डयाथ्यो। क्याकि म केइ नभया लगइ छान्या शिष्या भण्ना म तुच्छ आथिन। 12साँचो छान्या शिष्याका लक्षण पुरा धैर्यसित, चिन्ह, चमत्कार, रे सक्तिका काम बठेइ तमरा बिचमि प्रकट अरिएका थ्या। 13एक कुरणी मइले तमरा मण्डलिमि अरेइन जो और मण्डलिमि अर्या, त्यो यो हो कि म कभइ तमरि निउति आर्थिक रुपमि भार बनेइन। इसो गलत अर्या हुनाले मलाइ क्षमा अर!

14आब तेसर्या तमरा वाँ आउनाइ म तयार छु। रे आजी म तमनसित आर्थिक सहयोग ग्रहण अद्दइन, क्याकि म तमरो सम्पत्ति होइन तर तमनइ लाइ चाहानउ। क्याकि इजा बा कि निउति चेला चेलिले होइन तर चेला चेलीका निउति इजा बाले जम्मा अद्दु पणन्छ। 15म आफइलाइ रे मसित भया सबै कुरणी लगइ दिनाइ म खुशी हुन्या हु, ताकि म तमनलाइ परमेश्वरको अनुकरण अददाइलाइ सहयोग अद्द सकु। म तमनलाइ भौत प्रेम अद्दउ, तर इसो लाग्नछ तमन मलाइ थोकाइ प्रेम अरन्छौ!

16तमनलाइ था छ कि मइले तमनसित आर्थिक सहयोग मागेइन, यो ठिकइ हो, तर औरले सोच्चाहान मइले चलाकि अरिबर तमनलाइ धोका दिया, यो झुटि हो। 17मइले तितस अथवा और कसइलाइ तमन बठेइ आफ्नो निउति पैसा पाउनाइ प्रयोग अरेइन। 18मइले तितसलाइ जा भणबर आग्रह अर्या रे तइ भाइलाइ उइका साथमि पठाया। कि तीतसले तमन बठेइ केइ आर्थिक सहयोग पायो? होइन, तमनलाइ था छ कि तितस रे मेरो एकइ मनसाय थ्यो रे एकइ तरिकाले काम अर्या हु।

19कि तमन यो सोच्चा छौ, कि अइल सम्म तमरा सामने हाम आफ्नो सफाइ दिन्नाछु? प्यारा भाइन हो, हाम परमेश्वरको उपस्थितिमि सदाइ ख्रीष्टमी भया मान्स जसेरि बोल्लाइ आया छु, रे यिन सब तमनलाइ बिश्वासमि बलिया बनाउनाइ निउति हो। 20क्याकि म आउन्ज्या मइले इच्छा अरे अनसार तमनलाइ नभेटलो, रे तमनले लगइ मलाइ आफले इच्छा अर्या अनसार भेट्टउनानु कि भण्न्या मलाइ डर लाग्या छ। सायद ताँ झगडा, डाहा, क्रोध, स्वार्थ, बदख्याइ, निन्दा, चर्चा, अभिमान रे गोलमाल हुन्छ होलो। 21मलाइ डर लाग्या छ, कि म आजी आउन्ज्या मेरा परमेश्वरले मलाइ तमरा सामने होच्याइ दिन्या हुन रे भौत जनाका निउति मइले सोक अद्दु पड्डया छ, जइले अगाडी पाप अर्याथ्या। रे आफले अरेका असुद्दता व्यभिचार रे छाडापन बठेइ पाप अद्द छाडिबर परमेश्वरतिर फर्क्या आथिन हुन्ना।

Currently Selected:

२ कोरिन्थी 12: DTYNT

Highlight

Copy

Compare