२ कोरिन्थी 10

पावलको सेवा

1म पावल तमरा अगाडी नम्र हुनउ, तर दुर हुन्तक तमन प्रति साहसि हुनउ! ख्रीष्टको नम्रता रे कोमलता बठेइ म तमलाइ बिन्ति अद्दउ। 2केइ मान्सनले भण्या छन कि हाम यइ संसारका मान्सन जसाइ ब्यबहार अददाउ। तबइकिलाइ जब म आउनउ तब म तिननसित कठोर हुनु पड्डया छ। म जोरसित बिन्ति अद्दउ कि जब म आउन्या हु तब मइले तमनसित कठोर ब्यबहार अददु पड्डया आथिन। 3क्याकि हाम संसारमी बस्साउ पइलगइ यइ संसारका मान्सन जसा हाम आफ्ना सत्तुर सित लड्डाइन। 4क्याकि हामरा युद्दका हातहतियार संसारका होइन, तर किल्ला नास अद्द्या परमेश्वरको सामर्थी हातहतियार हुन। 5परमेश्वरका ज्ञानका बिरोधमी आउन्या बहस रे हरेक अहंकार बठेइ आउन्या हरेक बाधालाइ हाम नास अद्दाउ, रे हरेक बिचारलाइ ख्रीष्टको आज्ञापालन अद्दाइलाइ बसमि पाड्डाउ।

6जब तमन ख्रीष्टमी पुरा आज्ञाकारी हुन्छौ। हरेक जो अनाज्ञाकारी छ उइलाइ दण्ड दिनाइ हाम तयार बस्या हौ।

7तमन बाइर धेकिन्या कुरणीलाइ हेरन्छौ। यदि कसइ मान्सलाइ यो भरोसा छ कि उ ख्रीष्टको हो भण्या, उइले आजी आफइलाइ याद अराओस कि जसो उ ख्रीष्टको हो, हाम लगइ ख्रीष्टइका हौ। 8क्याकि हामरा अधिकारका बारेमि मइले केइ बरताइ घमण्ड अर्या भण्या लगइ म लाजमि पड्ड्या होइन, क्याकि यो अधिकार तमरा बिश्वासलाइ नास अददाइ होइन, तर प्रभुले तमरो बिश्वास बढाउनाइ सहयोग अददाइ हामलाइ दिया हो। 9मइले तमलाइ लेख्या चिठ्ठी तमनलाइ डराउनाइलाइ हो भणि जन सम्ज्या। 10क्याकि केइ मान्सन भण्नाहान, तइले लेखेइ चिठ्ठी गहकिलि रे प्रभाबशाली हुन्छे, तर त्यो आफइ हाजिर हुन्तक भण्या त्यो कमजोर हुन्छ रे तइको बचनको केइ महत्त्व हुनइन।

11तसा मान्सनले याद राखुन कि हाम आफ्ना अनुपस्थितिमि चिठ्ठी बठेइ जी भण्नाउ, उपस्थिति भया बेला लगइ तसइ काम अद्दाउ।

12आफनी बडुवाँइ आफइले अद्द्या कसइ कसइ मान्ससित हाम आफइलाइ एकै दर्जामि राख्द चाहानाइन, अथवा आफइलाइ तिननसित दाँज्ज हाम साहस अद्दाइन। तर तिनन आफले-आफइलाइ एक अर्खासित तुलना अरिबर तिनन समज नभया हुनाहान। 13हामसित नभया अधिकारको हाम घमण्ड अद्द्या आथिन। हामरि निउति परमेश्वरको योजनामि हाम सिमित हुन्या हु, रे तमनसित ताँ हामले काम अददु इसइ योजना भितर पणन्छ। 14तमरा वाँ आउनाइ नआया जसो हाम बडाइ चड़ाइ घमण्ड अद्दाइन, क्याकि भण्या ख्रीष्टको सुसमाचार लेइबर दुरका यात्रा बठेइ तमरा वाँ पइल्ली कोरिन्थ सहरमि पुग्द्या हामइ थ्या। 15हाम सिमा निङालिबर औरका परिश्रममि घमण्ड अद्दाइन, तर हामरो आसा यो छ, कि तमरो बिश्वास बड्डारया बेला तमरा बिचमि हामरो काम झिक बड्डोइ जान्या हो, 16ताकि हाम टाडा-दुरका क्षेत्रमी अगाडी और बठेइ भइ सक्या काममी घमण्ड नअरिबर तमन बठेइ बाइरका ठाउँमि सुसमाचार प्रचार अद्द सकौ। 17जसेरि पबित्र सास्त्रले भणन्छ, “घमण्ड अद्द्याले प्रभुमि घमण्ड अरउ।” 18क्याकि आफ्नो बडुवाँइ आफइ अद्द्या मान्स स्वीकार अरिनइन, तर जइको तारिफ प्रभुले अददाहान, उ निको तरिकाले स्वीकार अरिन्छ।

Currently Selected:

२ कोरिन्थी 10: DTYNT

Highlight

Copy

Compare