Mɛsa 7

Taŋal ɛ Etiɛn

1Boo ghaa-Zɛɛb eezɛdji nyɛ náá: «Etɛp ee bɛ di elii kɔ ɛsu ɛ lɔ'aak ɛ́ tsɛɛtsɛ?» 2Etiɛn eezɛbɔɔza náá: «Bɔn-nyɛɛg bam nɛ bɛsɛɛg bam, gwakeka mɛ! Zɛɛb duu naatel bhaab'enaka Abalaam nyel, é sok nyɛ nadi pɛ kyee dik Meezopotami ɛ, ɛsok nɛ nyɛ kɛdi pɛ dɛl ɛ Alan. 3É di'enek, nyɛ naake nɛ nɛ náá: “Dusa kyee dik'ɔ, beta bot ɛ mɛbyel mɔ, da wɔ ɛ́ tɔ́ pɛ kyee dik mɛ aalyaal wɔ ɛ.” 4Tin Abalaam ɛ́ boozɛdus kɔ kyee dik Salede, nyɛ eezɛtɔ́ kɛdi pɛ kyee dɛl ɛ Alan. Tinaak, bhis ɛsyee ɛ sɛɛg, Zɛɛb eezɛdis nyɛ kɔ kyee dɛl ɛ Alan, tɔ́ nɛ nɛ pɛ bi kadi mos'aak. 5Bela náá, Zɛɛb nabɛ ɛ́ ààdjɛ nyɛ pes bɔs, ààkobɛ mɔɔ pes bɛɛdok wat dáa ɛbɔ. Tin bela náá, Zɛɛb naazekɛk náá, nyɛ waadjɛ nyɛ tu dik, bɛdha bɛ ɛ́ waalik nɛ yɛ bhii koŋ'ɛ. Bela náá, é ghɛŋ tak nabɛ ɛ́, Abalaam di náá, ààkobɛ-bɛak nɛ mɔn. 6Beeka etɛp ee Zɛɛb nalɛɛ ɛ: “Bɛdha bɔ aadi ɛ́ kɔ mɛdhik mɛ mɛdjoŋ, é di bɛ aadi ekwom ɔ, é di bɛ aatiigaa membu bɛdhet-ɛná (400) ɔ. 7Tin, mɛ waapɛ́ɛ mɛdhik mɛ bɛ aadi e ekwom é tak ɛ. Bhii tak, bɛ waadus é di'enek, bɛ waakɛsɛɛga é mendjaala é di'ak#7.7 v. 2-3 Mɛk 12.1 v. 4 Mɛk 11.31; 12.4 v. 5 Mɛk 12.7; 13.15; 15.18; 17.8 v. 6-7 Mɛk 15.13-14 Ɛwy 3.12..” 8Deenek, Zɛɛb naagwakel nɛ Abalaam, étɛp ɛkwyal ɛbhɛŋ, ndem tak ɛ́ beka. Yɛ ɛ́ kɔ lo mɛsɔ mɛ tak ɛ Abalaam naniigal Izak mɔn'ɛ beka, é mɛlu mɛtɛn nɛ elɛl bhis ɛbyel ɛ lɛ, tyee wat nɛ dáa Izak naniigal Zakɔɔb mɔn'ɛ beka ɛ, Zakɔɔb zokaniigal bɔn bɛ, bot ɛ di bɛsɛɛg ɛ bɛbhaab ɛ membyak kam nɛ ebá e Yisalaɛl ɔ, beka.

9Bɛbhaab ɛ tak nadi ɛ́ nɛ mɛbhuka nɛ Zozɛf. Tin, bɛ ɛ́ boozɛbɔmsa nyɛ, étɛp nyɛ needi kwom pɛ Eziptɛ. Tin, Zɛɛb nabɛ ɛ́ nɛ nɛ lɔɔg. 10Nyɛ nadi epɛk nyɛ tɔ mezuk mɛ djas, nyɛ naadjɛ Zozɛf etsoŋ, nyɛ naasa náá, nyɛ djɛ edjɔɔ é mis mɛ Falaɔŋ, mɛkoozi mɛ Eziptɛ. Nyɛ naazɛdjɛ Zozɛf bóó ekukuma kɔ kyee dik Eziptɛ, nɛ tɔ ndjaa mɛkoozi mɛ djas. 11Wɔ gwaa, pwom zɛni kɔ kyee dik Eziptɛ djas nɛ Kanan: ye nabɛ ɛ́ boo mezuk. Tin bɛbhaab binaka nabɛ ɛ́ ààbɛ nɛ edee e dek. 12Dáa Zakɔɔb nagwak náá, edee nabɛ ɛ́ pɛ Eziptɛ ɛ, nyɛ ɛ́ boolwom bɛbhaab bina lwoma mɛkɛn. 13Dáa bɛ nabaatɔ́-tɔ́ak tyee tɔ́ak esok ebá ɛ, Zozɛf ɛ́ bootel bɔn-nyɛɛg nyel. É di'enek ɛ mɛkoozi mɛ dik Eziptɛ nazɛgu bot ɛ mɛbyel ɛ Zozɛf. 14Tin, Zozɛf eezɛlwom bot bɛ kɛnɔɔ Zakɔɔb sɛɛg, zɛnɔɔ bot ɛ mɛbyel mɛ djas. Ye nabɛ ɛ́ bot mɛkam-mɛtɛn nɛ ebá nɛ ɛtɛn (75). 15Tin, Zakɔɔb ɛ́ boozɛtɔ́ pɛ Eziptɛ pɛ pak nyɛ nakɛgwyɛ ɛ, zɛnɔɔ bɛdhiiti bɛbhaab bena. 16Bɛ naanɔɔ myoŋ mɛ bot bɔɔ, tɔ́ nɛ yɛ pɛ dɛl ɛ Sisɛm. Bɛ ɛ́ bookɛdel bɛ tɔ ɛvit ɛ Abalaam nabɔm nɛ epata é mɛmbɔ mɛ bɔn Amɔɔd pɛ Sisɛm ɛ.

17Dáa ye nabɛ náá, ɛwala ɛ Zɛɛb nadi ekwyɛl ɛsa sa nyɛ nakɛk Abalaam ɛ, Zɛɛb nabɛ ɛ́, nyɛ eezebil mɛtaŋ mɛ bot, tin, bot bina moo ɛbuɛpe kɔ Eziptɛ. 18Tin, dhiiti mɛkoozi mɛ sis nadi ààgu Zozɛf ɔ, eezɛnɔɔ bóó mɛkoozi kɔ Eziptɛ. 19Mɛkoozi mɛ tak naakɔɔ bot ɛ mbyak yena. Nyɛ naazuk bɛbhaab bina é ɛlwom bɛ nɛ bhel náá, bɛ bet bɔn etɔlɔɔ bɔɔ étɛp bɛ neegwyɛ. 20É ghɛŋ tak ɛ́ Moiiz nabyel, nyɛ nadi ɛ́ nɛm mɔn motom Zɛɛb nakwyɛl ɔ. Nyɛ naabaalaa bɛngɔn ɛlɛl tɔ ndjaa sɛɛg. 21É sok nyɛ naanɛɛgaa pɛ kel ɛ, ye nabɛ ɛ́ ɛsyes ɛ mɛkoozi mɛ dik Eziptɛ ɛ naatek nyɛ, nyɛ ɛ́ boozɛwyel nyɛ dáa mɔn'ɛ met. 22Tin, Moiiz naadjek ɛgu nɛ etsoŋ e bɔs bot ɛ Eziptɛ, ye naasa náá, nyɛ di mot mbyok dum nɛ elii bɛ, nɛ esesɛɛ bɛ. 23Dáa nyɛ nadi nyɛ moo nɛ membu mɛkam-mɛná (40) ɛ, Moiiz ɛ́ boozɛke náá, ye goka ɛ́ náá, nyɛ pookotɔ́ kɛbee bɔn-nyɛɛg, bot ɛ mbyak Yisalaɛl. 24Tin, wɔ gwaa nyɛ zɛbee dhiiti mot kyee dik Eziptɛ ezuk ngɔt tɔ lɔɔ. Nyɛ ɛ́ zɛkɛm mot nadi ezukaa ɔ, é ghɛm tak, nyɛ naazɛgó mot dɛl ɛ Eziptɛ tak. 25Nyɛ nadi egek náá, bɔn-nyɛɛg bot ɛ Yisalaɛl nadi egu náá, ye nabɛ ɛ́ dum nɛ nɛ ɛ́, Zɛɛb naawaapɛk bɛ é ekwom. Tin, kabela ɛ́ náá, bɛ nabɛ ɛ́ ààgu. 26Yii myɛn tak, nyɛ eezɛbaatɔ́ pɛ daa lɔɔ, nyɛ kabela ɛ́ bot ɛ Yisalaɛl bɛbá eduu pak'ɔɔ, nyɛ ɛ́ boozɛsuu ɛbee ɛ́ bɛ, nyɛ neebulal ɛgwakel pak'ɔɔ. Nyɛy náá: “Bɛwɛn, bi ɛ́ bɔn-nyɛɛg, étɛp yé bi di egenel pak'en?” 27Tin, mot nadi ezuk mɔɔ sɔ ɔ, eezɛlóo Moiiz embee mɛkpa, nyɛy náá: “Ɛzɛ djɛ wɔ bóó ekukuma, wɔ needi tetɛp kɔ les? 28Wɔ kwyɛl ɛ́ wɔ neegó mɛ dáa wɔ nagó mot Eziptɛ koko ɛ?” 29Dáa Moiiz nagwak mɛkpa menek ɛ, nyɛ boozɛkaab, kɛdi pɛ kyee dik Madyan. Penek, nyɛ naabya bɔn botom ɛbá.

30Membu mɛkam-mɛná (40) bhii tak, pɛ tɔ kyee bɔs bɛsyɛ di ààbɛ nɛ mɛdii ɛ, é ngwoob ɛtsok ɛ Sinayi, fofop ngɔt zokazɛtuula Moiiz pɛ tɔ ngel du tɔ ɛkpak. 31Nyɛ naadjoka é ɛbee mbi yenek mɛvyɛkɛlɛ mɛ nyɛ natelaa ɛ. Tin, esok nyɛ nadi esaa étɛp nyɛ neebee ɛnyɔɛpe é ngwoob ɛ, wɔ gwaa, nyɛ zokazɛgwak gwood ɛ Ghɛŋ eke náá: 32“Yɛ ɛ́ mam Zɛɛb bɛbhaab bɔ, Zɛɛb ɛ Abalaam, Zɛɛb ɛ Izak, nɛ Zɛɛb ɛ Zakɔɔb”. Gbegbaagba nɛ bwoo, nyɛ nabɛ ɛ́ ààkadjheebal ɛgwyák pɛ yiizaag. 33Tin, Ghɛŋ eezɛke nɛ nɛ náá: “Disa mɛpapa mɔ, etɛɛ náá, di wɔ di wak'aak, yɛ ɛ́ bɔs na Dɛɛ. 34Mɛ eebee dáa bɛ di ezuk bot ɛ mbyak'am pɛ kyee dik Eziptɛ ɛ. Mɛ eegwak etsim bɔɔ, é di'enek ɛ, mɛ zyɛ zɛpɛk bɛ. Deenek, tɔ́a, mɛ kwyɛl ɛ́ mɛ lwom wɔ pɛ dik Eziptɛ#7.34 Ɛwy 3.1-10.”

35Yɛ ɛ́ Moiiz tak ɛ bot ɛ Yisalaɛl nabyen, é ɛlóo mɛkpa náá: “Ɛzɛ djɛ wɔ bóó ekukuma, wɔ needi tetɛp kɔ les?” Zɛɛb eedhis nyɛ tyee kukuma, pɛkel-bot, é ze ɛ fofop nalyaal nyɛ nyel tɔ ngel ɛkpak ɔ. 36Yɛ ɛ́ Moiiz ɛ nawyisal bɔn ɛ Yisalaɛl kɔ dik Eziptɛ, nɛ endem e mɛbwala mɛ nyɛ nadi esa kɔ dik tak ɛ, pɛ boo dii mɛsɔn na tɔɔbelaa, nɛ tɔ kyee bɔs bɛsyɛ di ààbɛ nɛ mɛdii ɛ é membu mɛkam-mɛná (40). 37Yɛ ɛ́ Moiiz tak ɛ nabaake nɛ bɔn ɛ Yisalaɛl náá, “Zɛɛb ɛ́ waadhis bin ngoolel-mɛkpa mɛ dáa mam, nyɛ aadi ɛ́ mot mbyak'en.#7.37 Mɛd 18.15-18” 38Baabela náá, é sok bɔn ɛ Yisalaɛl nadi esɛɛga tɔ kyee bɔs bɛsyɛ di ààbɛ nɛ mɛdii ɛ, yɛ ɛ́ nyɛy ɛ nadi etyaa pak bɛbhaab binaka nɛ fofop nadi elii nɛ nɛ pɛ kɔ ɛtsok ɛ Sinayi ɛ. Nyɛ naabela mɛkpa mɛ tsik yii Zɛɛb, étɛp nyɛ neezɛgoola mena yɛ ɛ. 39Tin, ye kabela náá, bɛbhaab bina nabɛ ɛ́ ààgwak nyɛ. Bɛ naabyen nyɛ, bɛ kakwyɛl ɛ́ ɛsik pɛ Eziptɛ. 40Bɛ naalɛɛ nɛ Aalɔn náá: “Sa bis bɛzɛɛb ɛ di ekɛ sok bhwoob'es ɛ, etɛɛ náá, bis ààgu sa sael nɛ Moiiz, mot wyisal bis tɔ kyee dik Eziptɛ ɔ.” 41Wɔ gwaa, bɛ zɛlul naghisɛ, mɔɔ ngom ngɔmbɛ é di Zɛɛb, bhii tak, bɛ eezɛka naghisɛ tak buwa. Bɛ eezɛbɔl ɛbyoŋ nɛ mɛmyaala ɛbuɛpe dum nɛ sa bɛ nalul bɔɔ bɛmet ɛ. 42É di'enek, Zɛɛb eezɛliig bɛ koŋ, nyɛ eezɛbet bɛ, bɛ duwal ekwyikwyen tɔ gwoo. Etɛp e tak sael ɛ́, dáa ye di kwyala tɔ mɛkana mɛ bɛngoolel ɛ Mɛkpa ɛ Zɛɛb náá:

“Bot ɛ mbyak eYuda,

yɛ ɛ́ mam ɛ bi nadjɛ ebuwa e bɛtit nɛ edhiiti embi ebuwa,

é membu mɛkam-mɛná (40) mena nadika

tɔ kyee bɔs bɛsyɛ di ààbɛ nɛ mɛdii ɛ.

43Ààbɛ! Ghuna, bi naabɛp pɛt ɛ zɛɛb Molok,

nɛ ekpaka-ekpaka kwyikwyen zɛɛb'en Lefan!

Bɛzɛɛb ɛ bɛnaghisɛ binɔk, bi nakpak bɛ ɛ́,

étɛp bi needuwal bɛ.

Étɛp tak ɛ di náá, mɛ waakyeed bin,

kɛdhaa ghaada Bhabhilɔn#7.43 Amɔ 5.25-27.”

44Kɔ kyee bɔs bɛsyɛ di ààbɛ nɛ mɛdii ɛ, bɛbhaab binaka nadi ɛ́ nɛ pɛt ɛbhɛŋ ɛ Zɛɛb, bɛ nawa ɛbup ɛ mɛkana di elii etɛp ɛbhɛŋ ɛ. Ye nasael ɛ́ dáa Zɛɛb nalɛɛ Moiiz ɛ, etɛɛ náá, nyɛ naake nɛ Moiiz náá, nyɛ zosum ɛ́ ɛzel wat nɛ yii nyɛ nabee ɛ. 45Yɛ ɛ́ deenek ɛ́ Pɛt na Dɛɛ ɛ Zɛɛb tak nalik nɛ bɛbhaab bina, nɛ bot ɛ nakadu yɔbɔ bhis ɔ. Bɛ naazɛnɔɔ Pɛt tak, tɔ́ nɛ yɛ, é ghɛŋ Zozue nadi ndulel lɔɔg'ɔɔ ɛ. Bɛ naadɛk mɛdhik mɛ membyak mɛ Zɛɛb nadi esɔ bɛkum ɛ tak sok bhwoob'ɔɔ ɛ. Pɛt na Dɛɛ ɛ Zɛɛb tak naadi tin, kɛkum é sok Dhavid nadi mɛkoozi ɛ. 46Tin, Dhavid naabela mbɛɛ bhwoob é mis ɛ Zɛɛb. Nyɛ ɛ́ boozɛwaab náá, Zɛɛb gek nyɛ goŋ, étɛp nyɛ neesum ndjaa-Zɛɛb bɛdha ɛ Zakɔɔb. 47Tin, Salomɔŋ ɛ nakasum nyɛ ndjaa. 48Bela náá, Zɛɛb Mɛkaake ààdi tɔ mendjaa mɛ zumal bot. Dáa ngoolel-Mɛkpa ɛ Zɛɛb nalɛɛ náá:

49“Ghɛŋ lɛɛ ɛ́ deenek náá,

gwoo ɛ́ bóó mɛkoozi mam,

bɔs ɛ́ di di mɛbɔ mam di enyal ɔ.

Yɛ ɛ́ yaa kwaambi ndjaa biyɔ aakosum mɛ yɛ ɛ?

É yaa di mɛ aakwak ɛdi?

50Ye tok mam nasa yɛ nɛ mɛmbɔ mam ɛmet é#7.50 Eza 66.1-2?”

51Biyɔ bot ɛ maa-ɛlɔ, bot ɛ di náá, elyem nɛ mɛlɔ men eezɛdiyalel dum nɛ ndjóoel ɛ Zɛɛb di edjóo bin ɔ. Bi ɛ́ nɛ maa-ɛlɔ dum nɛ Sisim na Dɛɛ! Bi ɛ́ dáa bɛbhaab bin! 52Baa bɛngoolel ɛ Mɛkpa ɛ Zɛɛb, bɛbhaab bin nadi ààtiigaa? Bɛ naagó bot ɛ nagoola bhaadal náá, Mot Epiki ngɔt ɛpezyɛ ɔ. Yɛ ɛ́ nyɛy ɛ bi naka nyɛ, nɛ ɛgó ɛ́ nyɛ. 53Biyɔ bot ɛ efofop nadjɛ etsi e Zɛɛb ɔ, bi nabɛ ɛ́ ààduwal yɛ!»

Ɛsyee ɛ Etiɛn

54Dáa bot ɛ boo kwan eYuda nagwak deenek ɛ́, bɛ naazɛkpaa elyem, nɛ ɛkwaal ɛ mɛtsok kɔ ɛsu ɛ Etiɛn. 55Tin, nyɛy tɔɔɔ nɛ Sisim na Dɛɛ tɔ lɛ, nyɛ eezɛben mis pɛ ɛko, gwyák tɔ gwoo. É di'enek nyɛ eezɛbee mɛkas ɛ Zɛɛb, zɛnɔɔ Yezu Klisto tetel pɛ mbɔ eghɛŋ ɛ Zɛɛb. 56Tin, Etiɛn eezɛke náá: «Mɛ ɛpebee gwoo mbek, Sɛɛŋɛlɛ Mɔn Mot tetel pɛ mbɔ eghɛŋ ɛ Zɛɛb.» 57Bɛ eezɛtsim ɛlyelɛpe, bhii tak, bɛ eezɛdiyal mɛlɔ, bɔɔ djas eewyis kaab, zɛduma nyɛ é nyel. 58Bɛ eezɛtɔ́ nɛ nɛ pɛ bhii dɛl, tin, bɛ moo zɛbyaal nyɛ nɛ mɛkok, étɛp bɛ neegó nyɛ. Wɔ gwaa, bɛtyaasɛs zokadjɛ ekaad bɔɔ nɛ dhiiti mɔɔ ngbaaz din ɛ lɛ nabɛ ɛ́ Sɔl, nyɛ baal bɛ yɛ ɛ. 59É sok bɛ nadi ewus nyɛ nɛ mɛkok ɛ, Etiɛn nadi ɛ́ edjaala náá: «Ghɛŋ Yezu, nɔŋa sisim yam!» 60Bhii tak, nyɛ eezɛkwyɛ mɛboŋ si, nyɛ eezɛtsim ɛlyelɛpe náá: «Ghɛŋ, nàkɛl syem'ak kɔ lɔɔ!» Bhii nyɛ nake deenek ɛ́, nyɛ eezɛsil eswos.

Currently Selected:

Mɛsa 7: bkwNT

Highlight

Copy