PILEMON 1
1
1Surat enda i bas aku nari, Paulus, si ipenjaraken erkiteken Kristus Jesus, bage pe i bas seninanta Timotius nari. Surat enda man bandu, Pilemon, si ikelengi kami, teman kami sada dahin 2ras man perpulungen si pulung i rumahndu, bage pe man turangta Apia ras temanta seperjuangen Arkipus. #Kol 4:17
3Dibata Bapanta ras Tuhan Jesus Kristus mereken lias ate ras kemalemen ate man bandu gelah.
Kekelengen dingen kiniteken Pilemon
4Rusur kukataken bujur man Dibatangku tep-tep kali kam kuinget i bas pertotonku. 5Sabap enggo kubegi kerna kekelengenndu man anak-anak Dibata ras kiniteken si lit i bas kam nandangi Tuhan Jesus. 6Ertoto aku gelah arah persadanta kalak si erkiniteken mabai kita ku pengertin si terbagesen kerna kerina pemere si ialoken kita i bas kegeluhenta erkiteken persadanta ras Kristus. 7O seninangku si kukelengi, kekelengenndu e erbahanca ateku malem dingen mpegegehi aku! Kerina anak-anak Dibata enggo ermeriah ukur ibahanndu.
Pemindon kerna Onesimus ntah pe si Erguna
8Erkiteken si e pang kal aku seninandu i bas Kristus merentahken kam erbahan kai si arus ilakokenndu. 9Tapi erkiteken keleng ateku kam, ulin kuakap aku mindo saja man bandu. Si enda kubahan aminna gia aku, Paulus, enggo metua, janah sangana ipenjaraken erkiteken Kristus Jesus. 10E maka mindo aku man bandu kerna si Erguna, si enggo jadi anakku erkiteken kiniteken tupung aku sangana i bas penjara. #Kol 4:9 11Nai la ia erguna man bandu, tapi genduari erguna ia labo saja man bandu tapi man bangku pe.
12Buah ateku si kukelengi enda, genduari kusuruh mulihken man bandu. 13Si tuhuna ateku min i jenda nge ia ras aku, kidekah aku i bas penjara erkiteken Berita Si Meriah, gelah banci ia jadi gancihndu nampati aku. 14Tapi la ateku kupaksaken kam nampati aku; ateku min si e ibahanndu alu ukur meriah. Alu bage la aku nggit erbahan kai pe adi la leben isetujuindu.
15Banci jadi si Erguna sirang ras kam kentisik gelah banci ia ras kam rasa lalap. 16Genduari lanai bo ia budak ngenca, tapi ndauh ganjangen asangken sekalak budak. Ia me seninandu si meherga i bas Kristus. Keleng ateku ia, tentu lebihen ka pe kekelengenndu man bana, subuk selaku manusia bage pe i bas Tuhan.
17E maka adi temanndu kin iakapndu aku, alokenlah ia mulihi bagi pengalokenndu aku. 18Adi lit nai salahna man bandu, ntah lit utangna, jadi utangku bahan. 19Aku jine nuratkenca bagin si enda, “Aku, Paulus, nggalarisa pagi kerina man bandu.” (Tentu labo perlu kupersingeti man bandu maka kam jine pe rutang man bangku, e me dirindu jine.) 20O seninangku, sampatindu min aku erkiteken Tuhan; pesenang min ukurku sabap kita ersenina i bas Kristus.
21Asum aku erbahan surat enda, tek aku maka ialokenndu pemindonku enda. Si tuhuna kueteh maka lebih asang si e pe nggit nge kam. 22Tambah si e sikapkenlah sada kamar man bangku, sabap ngarap aku maka pertotonndu kerina ibegiken Dibata, janah ibahanNa aku mulihken ndahi kam.
Salam pendungi
23Epapras si ipenjaraken ras aku erkiteken Kristus Jesus, ngataken mejuah-juah man bandu, #Kol 1:7; 4:12 24bage pe Markus, Aristarkus, Demas, ras Lukas temanku sada dahin. #Perb 12:12,25; 13:13; 15:37-39; 19:29; 27:2; Kol 4:10; 4:14; 2Tim 4:10,11
25Lias ate Tuhan Jesus Kristus ras kam kerina gelah.
Currently Selected:
PILEMON 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.