JOEL 1
1
1Enda me kata TUHAN man Joel anak si Petuel.
Ceda ate bangsa e perban labang encedai negeri
2O Pertua-pertua, megermetlah,
kerina kalak si i Juda dengkehkenlah.
Lit kin pernah jadi bagenda i bas jamanndu ntah
i bas jaman nini-ninindu nai?
3Turiken man anak-anakndu kerina si jadi enda,
maka iturikenna ka kempak anak-anakna,
anak-anakna nurikenca ka kempak kesusuren si arah pudi.
4Pegancih-gancih reh labang erdemuyung
ipanganina sinuan-sinuanndu.
Kenca lawes si pemena, reh ka labang si deban erdemuyung.
Keri ipanganina sinuan-sinuan si lit denga tading.
5O kalak pemabuk, kekeken jenari ngandungken,
o kam peminem-minem anggur, tangislah;
buah anggur enggo kernep, lau anggur si mbaru lanai banci ibahan.
6Sada bala labang enggo reh nerang negerinta;
gegehna lanai teralang, buena lanai terkira.
Ipenna bali telapna ras ipen singa. #Ket 9:8
7Enggo ikernepkenna buah anggurta,
enggo ingatngatina batang aranta.
Kulit batang kayu e pe keri ipanganina,
seh maka enggo mbentar dahan-dahanna.
8Tangiskenlah bali ras pertangis singuda-nguda
erkiteken kepaten anak perana
si nandangi ngempoi ia.
9Lanai lit persembahen pangan ras inemen
guna Rumah Pertoton,
ceda ate imam-imam lanai lit
man persembahenken man TUHAN.
10Juma-juma enggo terulang;
taneh tangis ngandung
sabap gandum enggo radas,
buah anggur enggo kerah,
minak saitun enggo kelayap.
11Ndeleken, o perjuma,
tangisken, o kam si perkebun anggur,
erkiteken gandum ras jaba ras kerina ulih juma
enggo radas kal.
12Batang anggur ras ara enggo kerah
kerina batang kayu si erbuah; kerah jenari mate.
Keriahen bangsa e enggo bene.
13O imam-imam si ngelai batar-batar,
pakekenlah uis guni tanda rate ceda, jenari tangisken.
To bengket ku bas Rumah Pertoton
jenari ngandungken gedang-gedang berngi!
Lanai lit persembahen pangan ras inemen
si man persembahenken man TUHAN.
14Suruh kerina erpuasa,
lebuh perpulungen!
Pepulung peminpin-peminpin
ras kerina kalak Juda,
gelah bengket ia kerina
ku Rumah Pertoton TUHAN Dibatandu
maka alu serko, ertoto ia man baNa.
15Wari TUHAN enggo ndeher,
e me wari cilaka, si rehna i bas si Mada Kuasa nari.
Andiko mejinna cilaka si ibahanNa i bas wari e! #Jes 13:6
16Teridah kita enggo kote kerina,
erkiteken kerina pangan enggo lesap.
Lanai lit keriahen, i bas Rumah Pertoton TUHAN Dibatanta.
17Benih maten i bas taneh si kerah.
Lanai lit gandum si man lumbungenken
e maka enggo runtuh lumbung-lumbung si lume.
18Lembu erboh perban serana,
perbahan lanai lit mbalmbal inganna nggagat;
rarasen biri-biri pe seh kal iakapna serana.
19Erlebuh aku man baNdu, o TUHAN,
sabap mbalmbal ras batang kayu enggo kerah
tempa-tempa api enciluksa.
20Rubia-rubia si meliar pe serko man baNdu
sabap ulu lau pe enggo jadi kerah.
Currently Selected:
JOEL 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.