NEHEMIA 6
6
Pertakin guna munuh Nehemia
1Sanballat, Tobia, Gesem ras kerina musuh-musuh kami si debanna megi maka enggo dung ipajekken kami tembok e janah bagin-bagin si runtuh pe enggo ipekena mulihi, aminna gia pintu-pintu gerbangna langa ipasang kami. 2E maka Sanballat ras Gesem, nengesken sada berita man bangku, mindo gelah kujumpai ia i bas sada kuta i Kendit Ono. Enda pertakin kalak e guna erbahan ateku mesui. 3Erkiteken si e kusuruh piga-piga kalak pertenahen ndahi kalak e lako ngataken, “Aku sangana ndahiken dahin si mbelin, e maka aku la banci ngincuah ku kuta e. Tentu la banci kupengadi dahin e erkiteken njumpai kam saja.”
4Lit empat kali isehkenna berita si bage man bangku, janah empat kalina ka kubalas alu jabapen si seri.
5Kenca bage isuruh Sanballat sekalak suruh-suruhenna ndahi aku lako nehken berita si pelimaken. Sekali enda ibahanna surat terbuka. 6Bagenda me kata surat e,
“Gesem ngataken man bangku maka lit berita-berita tersiar i tengah-tengah bangsa sekelewet enda maka kam ras kalak Jahudi ngelawan atendu, janah e nge sabapna maka ipekenandu mulihken tembok kuta e. Tole pe ikatakenna maka irencanakenndu ngerajaken dirindu 7janah enggo pe iaturkenndu piga-piga kalak nabi gelah imomokenna i Jerusalem maka kam me raja Juda. Si enda ugapa pe ibegi raja nge. E maka reh lah kam njumpai aku gelah arih-arih kita.”
8E maka kubahan balasna man bana,
“Labo lit sada pe tuhu si ikatakendu e. Ibahan-bahannindu saja nge kerina.”
9Ipebiar-biar kalak ndai kami gelah ngadi kami erdahin. E maka pertotonku, “Tapi genduari, o Dibata, pegegehilah min aku.”
10Sanga si e lawes aku njumpai Semaya, anak Delaya, kempu Mehetabel, si la banci nadingken rumahna. Nina man bangku, “Kam ras aku la banci la cebuni i bas Ingan si Badia i bas Rumah Pertoton janah sieruk pintunna, sabap reh me kalak e munuh kam. Ugapa pe reh nge ia berngi-berngi munuh kam.”
11Ngaloi aku, “Akapndu kin tempasku kalak si kiam dingen cebuni? Akapndu kin nggit aku cebuni i bas Rumah Pertoton e guna nelamatken diringku? La aku nggit!”
12Enggo kuangka maka Dibata langa bo ngerana man Semaya, tapi Tobia ras Sanballat enggo nogok ia lako pebiar-biar aku. 13Iupahi kalak enda Semaya pebiar-biar aku gelah aku ndabuh ku bas dosa, maka banci icedakenna gelarku janah megombang man bangku.
14Pertotonku e me, “O Dibatangku, ingetlah kai si enggo ibahan Tobia ras Sanballat, janah ukumlah ia. Ingetlah Noaja, nabi diberu e, ras kerina nabi-nabi si deban si enggo icubakenna pebiar-biar aku.”
Pembangunen tembok Jerusalem enggo dung
15Kenca enggo erdahin lima puluh dua wari dekahna, kerina tembok e enggo dung, i bas wari dua puluh lima bulan Elul. 16Asum musuh-musuh kami si lit i bas negeri-negeri sekelewet Juda megi si enda, mela kal akapna, sabap kerina kalak metehsa maka dahin enggo dung bekas penampat Dibata.
17I bas paksa si e peminpin-peminpin kalak Jahudi rusur sikirem-kiremen surat ras Tobia. 18Nterem kalak i Juda mihak ia erkiteken mamana kalak Jahudi, e me Sekanya anak Ara. Tambah si e anakna Johanan ngempoi anak Mesullam anak Bekia. 19Ituriken kalak e i lebe-lebengku kerina perbahanen Tobia simehuli, jenari ituriken kalak e ka man bana kasa kai si kubelasken. Janah lalap ikiremina man bangku surat lako pebiar-biar aku.
Currently Selected:
NEHEMIA 6: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
