2 SAMUEL 1
1
Daud megi kerna kematen Saul
1Kenca Saul mate mulih Daud i bas perang naluken Amalek nari. Kenca bage tading ia i Siklak dua wari dekahna. 2I bas wari si peteluken reh sekalak anak perana i bas perkemahen Saul nari ndahi Daud. Tandana ceda atena irigatkenna uisna dingen itamana abu i babo takalna, janah erjimpuh ia i lebe-lebe Daud. 3“I ja nari kam?” nina Daud nungkunsa.
“Aku enggo pulah i bas tentera Israel nari,” nina ngaloi.
4“Turiken man bangku kai si enggo jadi,” nina Daud.
“Tentera kami kiam nadingken peperangen,” nina anak perana ndai, “janah nterem kal i bas kami enggo ibunuh. Saul ras anakna Jonatan pe terbunuh.”
5“Uga pemetehndu maka Saul ras Jonatan enggo mate?” nina Daud nungkun anak perana e.
6Nina anak perana e, “Paksa si e rembang aku i datas Deleng Gilboa, jenari kuidah iciken-cikenken Saul lembingna. Gereta musuh ras kalak si ngersak kuda reh ndeheri ia. #1Sam 31:1-6; 1Kro 10:1-6 7Kenca bage itulihkenna ku pudi, idahna aku, e maka ilebuhna. Ningku njabapsa, ‘Kai Tuan!’ 8Isungkunna ise aku, e maka kukataken man bana maka aku sekalak bangsa Amalek. 9Kenca bage nina, ‘Mari ku jenda, bunuh aku! Enggo luka aku mekelek, e maka nandangi mate me aku.’ 10E maka kudeheri ia kenca bage kubunuh, erkiteken kueteh maka la banci la mate me ia kenca ia guling. E maka kubuat mahkota i bas takalna ras gelang i bas tanna nari janah enda kubaba man bandu, Tuan.”
11Megi si e irigatken Daud uisna janah kalak si ras ia pe ngikutken perbahanenna. 12Ceda ate kalak enda kerina, ngandung ia janah erpuasa ngayak ben, erkiteken Saul, Jonatan ras Israel, bangsa TUHAN e, sabap lanai tanggung teremna kalak si mate i bas peperangen.
13Isungkun Daud anak perana si maba berita e nina, “Ja nari kam?”
Nina anak perana ndai, “Aku kalak Amalek tapi ringan i negerindu.”
14Isungkun Daud ia nina, “Engkai maka pang kam munuh raja si ipilih TUHAN?” 15Jenari ilebuh Daud sekalak anak buahna, janah nina, “Bunuh anak enda!” Igudamna anak perana e, ibunuhna. 16Janah sanga e nina Daud man bangsa Amalek e, “Pengelegindu nge ukumen si reh man bandu e. Perbahan ngaku kam munuh raja pilihen TUHAN.”
Kata si ibelasken Daud tupung ia ngandung erkiteken kematen Saul ras Jonatan
17Itangisken Daud ende-enden ate ceda enda erkiteken kematen Saul ras anakna Jonatan, 18janah isuruhna maka iajarken ende-enden e man rayat Juda. (Ende-enden enda tersurat i bas Kitap Jasar.) #Jos 10:13
19“I uruk-uruk Israel
enggo mate peminpin-peminpinta!
Tenteranta si mbisana kal enggo ampar!
20Ola momoken e i Gat
ntah i pasar-pasar kuta Askelon.
Sabap adi bage meriah iakap
diberu-diberu bangsa Pilisti.
Ola erkiteken si e maka meriah ukur
singuda-nguda si la nandai Dibata.
21Ola lit udan ras embun ndabuh ku babo uruk-uruk Gilboa;
pelepas tetap jadi taneh tenggiring juma-jumana.
Sabap i jah me ampang-ampang si mbisa ampar keliamen,
ampang-ampang Saul si lanai iminaki salu minak.
22Panah Jonatan tuhu erbisa,
pedang Saul la meteh perkuah ate,
janah musuh si megegehna kal pe ibunuhna.
23Saul ras Jonatan e me si ikelengi ras mehuli,
mate ras mate, nggeluh ras nggeluh ia.
Pedasen ia asang rajawali kabang,
gegehen asangken singa.
24O kam diberu-diberu Israel ngandungilah Saul!
Iuisina kam salu uis gara si meherga,
janah ihiasina kam salu emas ras permata.
25Tentera si mbisa enggo guling,
mate terbunuh i bas perang.
Jonatan mate ampar
i das uruk-uruk.
26Ceda ateku erkiteken kam, o seninangku Jonatan;
seh kal kelengna ateku kam.
Lanai tanggung keleng atendu man bangku,
lebihen asang keleng ate sekalak diberu pe.
27Enggo amparen tentera si mbisa,
senjatana ampar lanai lit gunana.”
Currently Selected:
2 SAMUEL 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.